Ọgụngụn 14 - Ika

Isi Nke Mmẹnọ Ekwerini Wẹ, E Sị Wẹ Ọ Nịkọ Mẹ

¹ Imẹ abalị ahụn, igunrun ahụn ile nọ weshi olu elu kwanma ụya.

² Ndị Izrẹlụ nọ kọrịamanị Mozizi lẹ Ẹrọnụ, igunrun ahụn ile hụ a sị wẹ, “O te ka mma nị ẹnyi nwụntọ imẹ alị Ijiptu mọbụ imẹ alị ọkpọ-nkụnnị!

³ Kị Osolobuẹ wẹhẹdẹni ẹnyi nwan alịnị nị wẹ gi agha gbupụ ẹnyi — kịrị inyẹnmẹ ẹnyi lẹ ụmụ ẹnyi. Ọ kanị mma nị ẹnyi lakin alị Ijiptu?”

⁴ Wẹ nọ sị ibe wẹ, “Nị ẹnyi họrị nị onyẹ sikọ d'e du ẹnyi, nị ẹnyi lakin alị Ijiptu.”

⁵ Ya Mozizi lẹ Ẹrọnụ nọ dan alị bu ihun kpumẹ alị idẹnya igunrun ndị Izrẹlụ ile zu ebahụn.

⁶ Joshụa nwa Nọnụ lẹ Kalẹbụ nwa Jefunẹ, ndị rị imẹ ndị ahụn jẹn d'e lele alị ahụn, nọ dọka ẹkwa ye enwẹn wẹ olu gi ghọsị nị ihiẹn rị e mẹni a jọka,

⁷ sị igunrun ndị Izrẹlụ ahụn ile, “Alị hụn ẹnyi ghagbarị imẹ ẹ, lele, a rịkakwọ mma!

⁸ Omẹni ihiẹn ẹnyi a sụọghọ Osolobuẹ, o jẹnkọ d'e duban ẹnyi imẹ alị ahụn, alị anụ lẹ ihiẹn-akụnkụn n'e mẹ ọhụnma — alị mirin-ẹran lẹ mirin-ẹnwụn rị e hu, o sikọ d'e we ẹ ye ẹnyi.

⁹ Ka agbalẹni ni nwan Osolobuẹ isi-akwanran; atụlẹ ni egun ndị alị ahụn, makẹni ẹnyi k'e luepụ wẹ kẹ nni. Ihiẹn wẹ gi che ẹhụ arịzị a kanị Osolobuẹ nọyeni ẹnyi anọyeni. Atụlẹ ni egun wẹ.”

¹⁰ Kanị igunrun ahụn ile nọ kumẹ oku i gi ọmụma magbu wẹ. Ya kẹ Osolobuẹ nọ gi orukpu-ọghọ a bịa Ọdụ-nsọ; ndị Izrẹlụ ile hụ e legha a.

¹¹ Osolobuẹ nọ sị Mozizi, “Elee mgbe kẹ ndịnị e legberibehi m? Elee mgbe kẹ wẹ k'e gimẹ oku m dọn — onwọnni ihiẹn wẹ kpọ ọrụn atụmẹnya ile m rụnghọsị wẹ imẹ igunrun wẹ?

¹² M sikọ d'a tụ wẹ eje-emu, jụ wẹ tọ — e gi m'i họnrin okẹn alị hụn ka wẹ ọda, ka wẹ ikẹn.”

Mozizi A Rịọdọnni Wẹ

¹³ Mozizi nọ sị Osolobuẹ, “O ru ẹ ndị Ijiptu a nụ a — kanị ikẹn i kẹ i gi gha imẹ igunrun wẹ wepụha ndịnị.

¹⁴ O ru ẹ a gwa wẹ ndị bi alịnị — bụ a nụgụọ w'a nị ị nọyeni ndịnị anọyeni lẹni a hụngụọ wẹ ịyụ wụ Osolobuẹ elee-m elee-i, nị orukpu i a rị wẹ isi lẹni y'a nọ orukpu mawuruni e buruni wẹ ụzọ ebe eki rị elu, a nọ ọkụn mawuruni e buruni wẹ ụzọ imẹ uhinhin.

¹⁵ I gbupụ ndịnị ile mgbe ohu, ndị alị ichẹn-ichẹn sikọ d'a nụn'a jẹnkọ d'a sị,

¹⁶ ‘Osolobuẹ asanị ẹka webanhan ndịnị alị hụ o kwe nkwa, kun enwẹn ẹ n'o k'e ye wẹ; ya ọ nọ gbupụ wẹ imẹ atụ.’

¹⁷ Dodo nwan Osolobuẹ, ghọsị ikẹn i kẹ i dọn ku ebe ị nọ sị,

¹⁸ ‘Osolobuẹ ara bukẹnrin olulu; o nwọnkẹnmẹkẹ ihiẹn-ọsụsụọ; ọ gbagharị njọ lẹ nnupụ-isi. Kanị ara hatu onyẹ ikpe ma — o gidẹ ufiri njọ nẹdi e ye ụmụ afụnfụn d'e ru agbọ nke ẹtọ lẹ nke ẹnọ.’

¹⁹ Gi nwan okẹn ihiẹn-ọsụsụọ ị gbagharị ndịnị njọ — k'i dọn rị a gbagharị wẹ ghakwọrị ogẹn wẹ gi gha alị Ijiptu pụha d'e ru ogẹnni.”

²⁰ Osolobuẹ nọ sị, “A gbagharịgụọ m wẹ k'i dọn rịọ.

²¹ Kanị, mmanị m nwụnhụn anwụnhụn, mmanị m wụbehi Osolobuẹ ọghọ a jun ụwa ile —

²² ya wụ nị onyẹ ọwụlẹ imẹ ndịnị a banye alị ahụn m kwe nkwa a: ndịnị hụn ọghọ m lẹ ọrụn atụmẹnya ndị m rụnghọsị wẹ imẹ Ijiptu lẹ imẹ alị ọkpọ-nkụnnị pazị oku m, chọsọnmẹ ihiẹn rị m ọnụ mgbe iri;

²³ o nwọnni kaka onyẹ ohu imẹ wẹ sikọ d'e legha alị ahụn m kwe nkwa, kun enwẹn m, nị m k'e ye ndị nẹdi wẹ kanị. Onwọnni onyẹ legberini m k'a hụnn'a.

²⁴ “Kanị, makẹni odibo m wụ Kalẹbụ nwọn agụngụn ichẹn, e gi obi ẹ ile e sọn m, m sikọ d'e weban a imẹ alị ahụn o jẹn, ebozo a k'e nwọnrin ẹ.

²⁵ “Ebe o mẹ ni ndị Amalẹki lẹ ndị Kenaanị bi imẹ ọdanmgbugbu ndịnị, eki fọn, ụnụ e kin nwan azụụn, dọn ihun ibẹka alị ọkpọ-nkụn; ghashi ni ụzọ ahụn wẹ gha e jẹn Ohimin Ufie.”

²⁶ Osolobuẹ nọ sị Mozizi lẹ Ẹrọnụ:

²⁷ “Elee mgbe kẹ eje-alịnị a kọrịabehini m? A nụgụọ m ndẹnwịnwịn ndị Izrẹlụ rị e ndẹnwịnnwịnnị m.

²⁸ Sị nị wẹ nwan nị Osolobuẹ sị ‘Ma isi m, m sikọ d'e mẹrịrị ụnụ ihiẹn ndị m nụ ọnụ ụnụ ku:

²⁹ imẹ alị ọkpọ-nkụnnị kẹ ụnụ jẹnkọ d'a nwụntọsọnmẹ — onyẹ ọwụlẹ imẹ ụnụ hụn dẹnnwịnwịnnị nị m, hụn rị nwa ahụa ọgụn shi elu — hụn wẹ gụn ogẹn wẹ gi gụn ụnụ.

³⁰ Onwọnni akpụ onyẹ ohu imẹ ụnụ sikọ d'a hụn alị ahụn m kịshi ẹka elu kun enwẹn m n'o k'a wụ iwe ụnụ — wezụka Kalẹbụ nwa Jefunẹ lẹ Joshụa nwa Nọnụ.

³¹ O mẹ nke ụmụ ụnụ, hụn ụnụ sị wẹ k'e mẹri ụnụ agha narịn ụnụ wẹ, m k'e webanhan wẹ d'e ri erere alị ahụn ụnụ jụ.

³² Kanị nke ụnụ, alị ọkpọ-nkụnnị kẹ ụnụ k'a nwụntọsọnmẹ.

³³ Ụmụ ụnụ jẹnkọ d'a tọ ebeni ọrọgbọ ahụa ọgụnnaị, e duhunmẹ anụ — a ta afụnfụn makẹni ụnụ edọnmẹni enwẹn ụnụ kẹ mmẹ lẹ ụnụ dọn kwerigbama.

³⁴ Ẹghẹẹ, ọrọgbọ ahụa ọgụnnaị hụ m k'e gi nọkin ẹnya akp'ọhịn ọgụnnaị ndị hụ ụnụ gi lele kẹ alị ahụn nọ kẹ ụnụ k'a rị a ta afụnfụn njọ ụnụ — ụnụ a hụn k'ọ nọ ebe mmẹ lẹ ịhịan nọ mẹ eṅẹnrẹn’.

³⁵ Mmẹ wụ Osolobuẹ e kugụọ; m k'e mẹrịrị eje-igunrunni zuni ni m eje-umẹ ihiẹn ndịnị m ku. Isi wẹ k'a tọ imẹ alị ọkpọ-nkụnnị; ebeni kẹ wẹ k'a nwụntọ.”

³⁶ Ya ndị ahụn Mozizi zi d'e lele alị ahụn, ndị ahụn lụahanị kujama oku alị ahụn, gi ẹ mẹ wẹ ile kọrịamanị Mozizi,

³⁷ ndị ahụn ku eje-oku banyeni alị hụ ye imẹ igunrun ndị Izrẹlụ, nọ nwụnhụn ebẹhụ yeni eje-emu Osolobuẹ tụ wẹ.

³⁸ Imẹ wẹ ile hụn jẹn d'e lele alị hụ, Joshụa nwa Nọnụ lẹ Kalẹbụ nwa Jefunẹ sụọ kẹ Osolobuẹ gbulẹni.

³⁹ Ogẹn Mozizi gi gwa ndị Izrẹlụ ihiẹnni, wẹ nọ kwan ẹkwan ọda-ọda.

⁴⁰ Eki e fọn ụzọ-ọtụntụn, wẹ nọ buli, dọn ihun alị ndị ahụn rị ẹgbẹrẹ mkpọnụnụ òke, wẹ hụ a sị, “Ẹnyi e mẹọlẹ njọ! Nị ẹnyi jẹnmẹ ni nwan ebẹhụ Osolobuẹ kwe nkwa a.”

⁴¹ Kanị Mozizi nọ sị wẹ, “Kị ụnụ n'a panị nwan ihiẹn Osolobuẹ ku? Ọ ghakọkwọ!

⁴² Ejẹnkwọlẹ ni alị òke ndị hụ — nị ẹlẹkwọ ụnụ lẹ Osolobuẹ wị. Ndị-iṅẹnrẹn ụnụ k'e mẹrikwọ ụnụ;

⁴³ ndị Amalẹki lẹ ndị Kenaanị k'a lụsọn ụnụ ọgụn ebahụn. Hụnnị ụnụ gbakịtọgụ Osolobuẹ azụụn, ọ nọyekọnị ụnụ, wẹ k'e gi ọpịa-agha gbu ụnụ.”

⁴⁴ Kanị wẹ nọkwọ mẹ ihiẹn ahụn rị wẹ obi, jẹnmẹ ẹgbẹrẹ mkpọnụnụ oke — ọsụọn'a nị kẹ Mozizi kẹ Ẹkpẹti-Osolobuẹ aghanị ebahụn wẹ ziẹntọ heli.

⁴⁵ Ya ndị Amalẹki lẹ ndị Kenaanị hụn bisọnmẹ ẹgbẹrẹ òke hụ nọ gbadan d'a maye wẹ ọgụn, mẹshi wẹ ikẹn, gbukọ wẹ, chụkọ wẹ d'e rukwọrị Homa.