Ọgụngụn 13 - Ika

Isi Nke Mmẹtọ E Zi Wẹ Wẹ D'e Lele Kẹ Alị Kenaanị Nọ

¹ Osolobuẹ nọ sị Mozizi,

² “Họrị ikẹnnyẹ zijẹn d'e lele kẹ alị Kenaanị m rị e ye ndị Izrẹlụ nọ. Gha ebọn-ebọn họrị onyẹ-ndu ohu-ohu zijẹn.”

³ Ya Mozizi nọ nọ ọfịa alị ọkpọ-nkụn Paranị zipụ wẹ makẹni ịya kẹ Osolobuẹ gwa a mẹ. Wẹ ile o zijẹn wụsọnmẹ ndị-ndu imẹ ndị Izrẹlụ.

⁴ Lee ẹfan wẹ lẹ ebọn wẹ: imẹ ebọn Rubẹni, Shamụa nwa Zakọ k'ọ họrị;

⁵ imẹ ebọn Simiọnụ, Shafatị nwa Hori k'ọ họrị;

⁶ imẹ ebọn Juda, Kalẹbụ nwa Jefunẹ k'ọ họrị;

⁷ imẹ ebọn Isaka, Igalụ nwa Josẹfụ k'ọ họrị;

⁸ imẹ ebọn Ifrem, Hoshia nwa Nọnụ k'ọ họrị;

⁹ imẹ ebọn Bẹnjamini, Pal'ti nwa Rafu k'ọ họrị;

¹⁰ imẹ ebọn Zẹbulọnụ, Gadiẹlụ nwa Sodi k'ọ họrị;

¹¹ imẹ ebọn Manasẹ (ebọn ohu imẹ ẹbụọ rị ebozo Josẹfụ), Gadị nwa Susi k'ọ họrị.

¹² Imẹ ebọn Danị, Amiẹlụ nwa Gẹmalị k'ọ họrị;

¹³ imẹ ebọn Asha, Sẹtọ nwa Maịkẹlụ k'ọ họrị;

¹⁴ imẹ ebọn Naf'tali, Nah'bi nwa Vofisi k'ọ họrị;

¹⁵ imẹ ebọn Gadị, Gẹwuẹlụ nwa Makị k'ọ họrị.

¹⁶ Ọhụn wụsọnmẹ ẹfan ikẹnnyẹ ndị hụn Mozizi zijẹn d'e lele alị ahụn. (Mozizi ịya gụn Hoshia nwa Nọnụ “Joshụa”.)

¹⁷ Ogẹn Mozizi gi zi wẹ d'e lele alị Kenaanị, ọ sị, “Ghashi ni atụ Nẹgẹvụ, ụnụ e dọn ihun ẹbamịn-ugu, gha ebẹhụ shi ẹgbẹrẹ oke —

¹⁸ e lele kẹ alị hụ nọ, kẹ ndị rị n'a ze eze ra ezeni wẹ; kẹ wẹ bu ọda ra ebuni wẹ ọda;

¹⁹ kẹ alị wẹ bi hụ mma ra ọ jọ njọ; kẹ wẹ bisọnmẹ obodo ndị wẹ tụnhunmẹ mgbọn ra ndị wẹ tụnhunmẹlẹni mgbọn;

²⁰ Nanị kẹ alị ahụn nọ? O mẹ ihiẹn ugbo ra ara mẹ? Osisi hụ a ra ọ rịa? Lịlịma nị welụa mkpụrụ alị ahụn mị.” (Ogẹn wẹ gi a ghọ vaịnị ibuzọ k'o gi zipụ wẹ.)

²¹ Ya wẹ nọ shi alị ugu hụ, lelesọnmẹ kẹ ọ nọ, gha alị ọkpọ-nkụn Zini d'e rukwọrị Rehobu hụn rị ibẹka Lebo-Hamatị.

²² Nẹgẹvụ rị ẹbamịn ndịdan-mirin kẹ wẹ gha, a pụha wẹ Hibrọnụ — ebe Ahimanị, Shẹshaị lẹ Tal'maị ndị ebọn adụn-aran wụ Anakị bi. (Ọ rị ahụa ẹsa wẹ pumẹ Hibrọnụ nị wẹ d'e pumẹ obodo Zụanị rị alị Ijiptu.)

²³ E ru wẹ Ọdanmgbugbu Ẹsh'kọlụ, wẹ nọ beri agalaba grepu-vaịnị mị ọhịọ vaịnị ohu; ọ dọ isi nke wụnị mmadụ ẹbụọ kọn ẹ ye ẹgbe buru ẹ isi-uvun — ya lẹ mkpụrụ osisi pomegraneti lẹ ogbe figi ndị wẹ ghọrị chen'ẹ — nị wẹ gi wẹ ile ghọsị kẹ alị hụ nọ.

²⁴ Ya kẹ ebẹhụ gi zama “Ọdanmgbugbu Ọhịọ” makẹ ọhịọ grepu-vaịnị ahụn ndị Izrẹlụ beri ebahụn: “Ọhịọ” wụ “Ẹsh'kọlụ” ọnụ ndị Izrẹlụ.

Ozi Ndị Jẹn D'e Lele Alị Gi Lụaha

²⁵ Ogẹn wẹ gi lelechanrịngụ alị ahụn ọrọgbọ akp'ọhịn ọgụnnaị, wẹ nọ lụakinhẹn

²⁶ d'e kunrun Mozizi, Ẹrọnụ lẹ igunrun Izrẹlụ ile imẹ alị Kadẹshi hụn rị alị ọkpọ-nkụn Paranị. Wẹ nọ gwa Mozizi lẹ Ẹrọnụ lẹ igunrun ahụn ile ihiẹn wẹ hụn, ghọsịzị wẹ mkpụrụ alị ahụn mị.

²⁷ Ihiẹn wẹ gwa Mozizi wụ: “Ẹnyi e jẹngụọ alị hụ i zi ẹnyi d'e lele. Ezigbo alị rọ nke-esi — alị anụ lẹ ihiẹn-akụnkụn n'e mẹ ọhụnma — alị mirin-ẹran lẹ mirin-ẹnwụn n'e hu. Lee mkpụrụ-osisi alị ahụn.

²⁸ K'osilẹrị, ndị bi ebahụn e nwọnkẹ ndụn; wẹ tụnhunmẹ obodo ndị rị n'a mgbọn; obodo ndị rịn'a a shịakẹnmẹkẹ. Ẹnyi a hụnzịghọ ndị ebọn adụn-aran, ụmụ Anakị, bi ebahụn.

²⁹ Ndị Amalẹki bi alị ọkpọ-nkụn Nẹgẹvụ hụn rị nkọ ndịdan-mirin; ndị Hẹti lẹ ndị Jebusu lẹ ndị Amọ bisọnmẹ alị ndị rị òke; ndị Kenaanị bi ẹhụ Ohimin Mẹditerenia lẹ mkpẹnrẹn Iyi Jọdanị.”

³⁰ Ya kẹ Kalẹbụ nọ buche ọnụ mẹ ịhịan ile gba nkịtịn ihun Mozizi, sị, “Nị ẹnyi jẹnmẹ ni d'e weri alị ahụn, makẹni ẹnyi k'a s'ẹka weri ẹ.”

³¹ Kanị ndị wẹ lẹ ịya wị jẹn nọ sị, “Ẹnyi asakọkwọ ẹka maye ndị ahụn ọgụn — uwẹ kakwọ ẹnyi ndụn e nwọn!”

³² Wẹ nọ ku egun ijẹn d'e weri alị ahụn wẹ lele ye igunrun ndị Izrẹlụ ẹnya, a sị, “Alị ahụn ẹnyi jẹn d'e lele wụ alị hụn e ripụ ndị bin'ẹ. Ndị ile ẹnyi hụn ebahụn wụ adụn-aran adụn-aran.

³³ Ẹnyi a hụnghọ ndị adụn-aran ebahụn (ụmụ Anakị wụ ebọn ndị adụn-aran). Kẹ ẹnyi hụn wẹ, ẹnyi nọhụ kẹ kpamkpam ẹnya wẹ, ẹnya hụ kẹ wẹ nwẹn gizi e lee ẹnyi.”