Ọgụngụn 12 - Ika

Isi Nke Mmẹbụọ Miriam Lẹ Ẹrọnụ E Lelịa Mozizi

¹ Ebẹhụ kẹ Miriam lẹ Ẹrọnụ nọ kujama oku Mozizi makẹ nwunyẹ ẹ onyẹ alị Ẹtiopịa. Makẹni Mozizi lụrụ onyẹ Ẹtiopịa.

² Wẹ hụ a sị, “Mozizi sụọ kẹ Osolobuẹ gi ku oku? O gizini ẹnyi nwẹn ku?” Osolobuẹ nọ nụ ihiẹnni.

³ (Okẹnnyẹ hụ wụ Mozizi e welụakẹnmẹkẹ enwẹn ẹ alị; ịya kachanrịn ịhịan ile rị elu ụwa enwẹn ẹ alị e welụa.)

⁴ Osolobuẹ nọ hị Mozizi lẹ Ẹrọnụ lẹ Miriam idẹnmizi, sị, “Ụnụ ẹtọ, pụha nị, bịa nị imẹ Ọdụ-nsọ”. Ya wẹ ẹtọ nọ pụha.

⁵ Osolobuẹ nọ nọ imẹ orukpu mawuruni hidan. Ọ nọ turu Ọnụ-mgbọn Ọdụ-nsọ, kpọ Ẹrọnụ lẹ Miriam. Ogẹn wẹ ẹbụọ gi pụha,

⁶ ọ nọ sị wẹ, “Gọn ni nwan ntịn ihiẹn m jẹnkọ d'e ku: Omẹni onyẹ-amụma m rị igunrun ụnụ, imẹ ọhụn kẹ m'a nọ e we enwẹn a ghọsị a; imẹ nrọ kẹ m nọ a gwa a oku.

⁷ Kanị nke odibo m wụ Mozizi anọnị ẹrịra: ọ wụ onyẹ m gi e dọn ẹnya ebe ụlọ m ile rị.

⁸ M'e du ẹ e ku elee-m elee-i, a kpọpụ ihiẹn ẹfan, m'a ra gi ilu gwa a oku; Ọ hụndẹ kẹ Osolobuẹ nọ. Ya kẹ egun nọ nwan a nị ụnụ e kuja oku odibo m wụ Mozizi?”

⁹ Ihiẹnni wẹ mẹ nọ bu Osolobuẹ olulu ọda-ọda, ọ nọ la wẹ tọ pụ.

¹⁰ Ogẹn orukpu ahụn gi gha elu Ọdụ ahụn pụ, e lee Miriam lẹ oti ebahụn o wuzo — ẹhụ a hụ e nwun kẹ ẹkwa ọchan! Ẹrọnụ e lee Miriam, hụn a nị oti a fụkpogụọ a;

¹¹ ọ nọ sị Mozizi, “Diọkpa, dodo egilẹ njọnị ẹnyi zuzu mẹ sọn ẹnyi;

¹² anịl'a nọ kẹ nwa nwụntọ ẹfọ hụn gha ẹfọ nnẹ ẹ pụla ẹhụ a rị a gbụpụ.”

¹³ Ya Mozizi nọ kpọku Osolobuẹ, sị, “Osolobuẹ, dodo zụọ a!”

¹⁴ Osolobuẹ nọ sị Mozizi, “Omẹni nẹdi ẹ te jụ a hụ ẹsọn ihun, o bukọ ihiẹn-ifẹnrẹn hụ akp'ọhịn ẹsa? Gha nị ebe ịhịan ile bi wepụ a ọrọgbọ akp'ọhịn ẹsa; ọ gharịgụ, ụnụ e webanhan a.”

¹⁵ Ya wẹ nọ gha ebahụn wẹ ziẹntọ wepụ Miriam ọrọgbọ akp'ọhịn ẹsa; ndị Izrẹlụ nkẹ ebulini d'e runi e webanhangụ w'a.

¹⁶ Ọhụn e mẹgụ, wẹ nọ gha Hazẹrọtụ bulizi, ya wẹ nọ ziẹntọzị atụ Paranị.