Ọgụngụn 11 - Ika

Isi Nke Mmanaị E Dẹnnwịnwịn Wẹ, Osolobuẹ E Gi Ọkụn Sọn Wẹ

¹ Ogẹn ndị Izrẹlụ gi kpemẹ nị wẹ rị a ta afụnfụn, ku ẹ hụn Osolobuẹ nụ, Osolobuẹ a nụ a, ezigbo olulu nọ bu ẹ. Ya ọkụn gha ẹka Osolobuẹ bịa nọ nwunrun imẹ igunrun wẹ, dụnpụ ihiẹn ndị rị mkpẹnrẹn ebahụn wẹ ziẹntọ.

² Mgbe wẹ gi kwanburu Mozizi, ọ nọ rịọ Osolobuẹ; ọkụn ahụn nọ tinyụn.

³ Ya wẹ nọ kpọma ebẹhụ Tabera, makẹni ọkụn hụn gha ẹka Osolobuẹ bịa a dụnọlẹ imẹ igunrun wẹ.

Osolobuẹ E Zihẹni Wẹ Nnụnụ Ri

⁴ O mẹgụ, ẹgụn ihiẹn-oriri ọzọ nọ gụnma igunrun ahụn ile wụlẹni ndị alị ohu hụn wẹ lẹ wẹ wị, ya ndị Izrẹlụ nkẹ nọzị yimẹ, “K'ọ rị ẹnyi, ẹnyi a hụndẹ nwan anụ rị!

⁵ Ẹnyi a nyanhan azụn ẹnyi e ri imẹ alị Ijiptu, ya lẹ kukumba lẹ iroro, arabasị-liki lẹ arabasị mmaka lẹ arabasị-galiki.

⁶ Ndụn a gụgụọ ẹnyi! Onwọnzini nwan ihiẹn ẹnyi a hụn e ri karị mananị sụọ!”

⁷ (Mana ahụn nọ kẹ ụkwan; o nwunzi kẹ ya, nọkẹ bẹdẹlium.

Mana

⁸ W'a ghahunmẹ a tụtụ a; e gwe w'ẹ mọbụ a sụ w'a odo, gi ugbẹgbẹ shi ẹ mọbụ gi ẹ mẹmẹ akara. Ọ sụọ kẹ ihiẹn wẹ gi ofugbọn-olivu mẹmẹ.

⁹ Igirigi ziẹnmẹ ebe wẹ ziẹntọ, mana ahụn nkẹ ẹ a danma.)

Ihiẹn Ikpe Wẹ Kpe Mẹ Mozizi

¹⁰ Mozizi hụ a nụ kẹ ikp'ụlọ-ikp'ụlọ nọdịsọnmẹ ọnụmụzọ ọdụ wẹ rị a kwan ụya; iwe hụ e we Osolobuẹ ọda-ọda; ihiẹn rị e mẹni hụ a fụ Mozizi.

¹¹ Ọ nọ jụma Osolobuẹ, “K'i buni nsọngbuni ile kwasị odibo i? Kịnị kẹ m gi kpasu i iwe i gi bu igunrunni ile che m olu?

¹² Mmẹ ye imẹ wẹ ile? Mmẹ mụ wẹ? Kị sịnị m parị wẹ kẹ wẹ a pa nwa-ndu — pajẹn alị ahụn i kun enwẹn i kwe nkwa n'i k'e ye ndị nẹdi wẹ kanị?

¹³ Elebe m'a nọ hụn anụ ye ndịnị ile ri? A tọ wẹ a kwannị m ụya, a sị m, ‘Ye ẹnyi anụ ri!’

¹⁴ Mmẹ sụọ asakọkwọ ẹka bu igunrunni ile; ibuni karịkwọ m ẹka!

¹⁵ Omẹni ẹnịna k'i k'e mẹ m, gbupụkwọ m nwan ozigbo. Omẹni ihiẹn m a sụọghọ ị, dodo anịlẹ m gi ẹnya m legha ụya sikọ d'e kunrunni m.”

¹⁶ Ya Osolobuẹ nọ sị Mozizi, “Wẹhẹni m madụ iri kwasị ọgụn-ẹtọ imẹ ndị-isi ndị Izrẹlụ, ndị ị marịn nị wẹ wụ ndị-ndu lẹ ndị gi ọkwa imẹ wẹ. Wẹhẹ wẹ Ọdụ-nsọ, wẹ bịa d'e wuzoyeni i ebahụn.

¹⁷ M k'e hidan d'a gwa ụnụ oku ebẹhụ. M k'e weribelụa mmọn hụn nọkwasịn'ị, bu ẹ kwasị wẹ kẹni wẹ sọn i bu ibu igunrunni, makẹ ịyụ sụọ a ghazị e bu ẹ.

¹⁸ “Sị igunrun ahụn: Dọn ni enwẹn ụnụ nsọ, gi kwademẹni eki, hụn ụnụ e gi ri anụ. Osolobuẹ a nụgụọ kẹ ụnụ rị a kwan ụya, a sị, ‘K'ọ rị ẹnyi ẹnyi a hụndẹ nwan anụ rị! Kẹ ẹnyi rị Ijiptu k'ọ ka ẹnyi mma!’ Osolobuẹ sikọ nwan d'e ye ụnụ anụ; ụnụ k'e rirịrị a.

¹⁹ Ẹlẹ hụn ụnụ k'e rihụ akp'ọhịn ohu mọbụ ẹbụọ mọbụ isẹn mọbụ iri mọbụ ọgụn sụọ —

²⁰ kaka — ụnụ k'e ri ẹ ọrọgbọ ifọn, ri ẹ d'e runi ọ ghama ụnụ imi pụha, d'e ru ni ọ gbụ ụnụ — ebe o mẹ ni ụnụ e lelịagụọ Osolobuẹ hụn rị imẹ igunrun ụnụ, a kwann'a ụya, a sị, ‘Kị ẹnyi ghanị nwan Ijiptu pụha?’ ”

²¹ Kanị Mozizi nọ sị Osolobuẹ, “Madụ nnụ-uku ọgụn-iri-kwasị-nnụ (600,000) fihunmẹ m ebeni, bụ ị sị, ‘M k'e ye wẹ anụ ri ọrọgbọ ifọn ohu gbegbegbe!’

²² Ọsụọn'a nị wẹ gbuchanrịn nị wẹ igunrun atụnrụn lẹ igunrun efin ole-lẹ-ole, n'o zu wẹ ri? Wẹ gbuchanrịn nị wẹ azụn ile rị imẹ ohimin, n'o zu wẹ ri?”

²³ Osolobuẹ nọ sị Mozizi, “Ẹka Osolobuẹ e mẹkẹ mkpụrụ? Ị jẹnkọ nwan d'a hụn kẹ ihiẹn m ku sikọ d'e mẹ ra o mẹkọ.”

²⁴ Ya Mozizi nọ jẹn d'a gwa wẹ ihiẹn Osolobuẹ ku; ọ kpọkwama ndị-isi iri kwasị ọgụn-ẹtọ ahụn, mẹ wẹ fihunmẹ Ọdụ-nsọ.

²⁵ Ya kẹ Osolobuẹ nọ nọ imẹ orukpu ahụn hidan, sọn Mozizi ku oku, gha imẹ Mmọn a rị imẹ Mozizi weri, buche imẹ ndị-isi iri kwasị ọgụn-ẹtọ ahụn. Ogẹn Mmọn a gi ban imẹ wẹ, wẹ nọ bu amụma; kanị, mgbe ohu ahụn sụọ kẹ wẹ bu ẹ.

²⁶ Kanị o nwọn ikẹnnyẹ ẹbụọ ẹfan wẹ wụ Ẹdadị lẹ Mẹdadị hụn ghalẹni ebe wẹ ziẹntọ pụha d'e kunrun Mozizi. Wẹ rị ndị wẹ gụnye ndị-isi, kanị ejẹnni wẹ Ọdụ-nsọ ahụn. Kanị Mmọn hụ nọ banyezi wẹ nwẹn, wẹ nọ nọ ebe wẹ rị bumẹ amụma ozigbo-ozigbo.

²⁷ Ya okorọbịa ohu nọ gbajẹn d'a sị Mozizi, “Ẹdadị lẹ Mẹdadị rị ebe wẹ bi e bu amụma!”

²⁸ Joshụa nwa Nọnụ, hụn gha ebe ọ rị okoro sọnmẹ Mozizi nọ sị, “Diọkpa Mozizi, kụsị wẹ!”

²⁹ Kanị Mozizi nọ sị a, “Ọ rị a fụ ị nị eyeni wẹ m ọghọ runi m? K'ọ rịdẹ m ndị nke Osolobuẹ ile wụ ndị-amụma ndị-amụma, Osolobuẹ e bu Mmọn a che imẹ wẹ!”

³⁰ Omẹgụ, Mozizi lẹ ndị-isi ahụn nọ lakin ebe wẹ ziẹntọ.

³¹ O mẹgụ, ufere nọ gha ebe Osolobuẹ rị bịa, gha ibẹka Ohimin bupụha nnụnụ, kwẹlụ — butu wẹ fihunmẹ ebahụn ndị Izrẹlụ ziẹntọ, elumelu ẹ ru ịhịan ukun; ebe wẹ dantọsọnmẹ e rugụọ ijẹn akp'ọhịn ohu azụụn ile.

³² Ụhụọhịn ahụn ile — kẹ efinnaị kẹ uhinhin — lẹ ụhụọhịn sọnn'ẹ, ịhịan ile hụ e jẹn d'a nwụn nnụnụ ahụn. Onwọnni onyẹ nwụnrulẹni hụn k'e jun adana ọgụnnaị. Wẹ nọ tanma wẹ ghahunmẹ ebẹhụ wẹ ziẹntọ.

³³ Kanị ebe anụ ahụn rịkwọ wẹ ọnụ, ebe wẹ kelẹni tama a, ọnụma Osolobuẹ nọ dankwasị wẹ, Osolobuẹ nọ tụ wẹ eje emu.

³⁴ Ya haịn wẹ gi kpọma ebahụn “Kibrọtụ-Hatava”, makẹni ebahụn kẹ wẹ litọ ndị hụn ẹgụn ihiẹn-oriri ọzọ gụn.

³⁵ Omẹgụ, ndị Izrẹlụ nọ gha Kibrọtụ-Hatava shi Hazẹrọtụ, wẹ nọ nọdịzị ebahụn.