Ọgụngụn 10 - Ika

Isi Nke Iri Opi (Ọdụ) Wẹ Gi Siliva Mẹmẹ

¹ Osolobuẹ nọ sị Mozizi,

² “Gi siliva wẹ tipịa mẹmẹ opi (ọdụ) ẹbụọ, nị ụnụ e gi wẹ a kpọkikomẹ ndị Izrẹlụ, e gizi wẹ a gwa wẹ gha ebe wẹ ziẹntọ buli.

³ Wẹ gbu wẹ ẹbụbụọ, ndị Izrẹlụ ile e zu ebe ị rị ọnụmụzọ Ọdụ-ozuzu.

⁴ Omẹni ohu sụọ kẹ wẹ gbu, ndị-ndu, ndị-isi ebọn rịsọnmẹ Izrẹlụ, e zu ebe ị rị.

⁵ Wẹ gbu ohu imẹ wẹ ube ohu sụọ, ndị ebọn hụn ziẹntọ azụụn shikọ ọwụwa ẹnyanwụn e buli.

⁶ Wẹ gbu ẹ nke mgbe ẹbụọ, ndị ebọn nọdị ẹbamịn ndịdan-mirin e buli. Wẹ gbu ẹ ẹrịra ya wụ wẹ sị wẹ buli.

⁷ Ụnụ jẹnkọnị d'a kpọzu wẹ, gbu ni opi ndị hụ — kanị ẹlẹ olu ohu ahụn.

⁸ “Ụmụ Ẹrọnụ onyẹ nchụn-ẹjan nwọn e gbu opi hụ. Ẹrịra k'o k'a rịsọnmẹ ebe ụnụ lẹ agbọ ndị lala ihun rị.

⁹ “Ụnụ ru alị hụ ụnụ jẹnkọ d'e nwọnrin, ụnụ jẹnkọnị agha d'a lụsọn ndị-iṅẹnrẹn rị a bịangbuni ụnụ, gbu ni opi ndị hụ mgbe ohu. Osolobuẹ wụ Chuku ụnụ k'a nyanhan ụnụ, gbapụha ụnụ ẹka ndị-iṅẹnrẹn ụnụ.

¹⁰ E gbuzikwọ nị opi ndị ahụn ogẹn ụnụ gi a ghọghọ — ogẹn mmẹmmẹ ndị ahụn wẹ kayesọnmẹ ni ụnụ lẹ mmẹmmẹ Ifọn Ọhụn; e gbu ni opi ndị ahụn ụnụ gha a chụn ẹjan ụnụ w'a dụn ọkụn lẹ ẹjan-ekele ụnụ, a wụrụ wẹ ihiẹn Chuku ụnụ e gi nyanhan ụnụ. Mmẹ wụ Osolobuẹ, Chuku ụnụ.”

Ndị Izrẹlụ A Gha Ẹgbẹrẹ Ugu Saịnaị Pụ

¹¹ Nke akp'ọhịn ọgụn imẹ ifọn nke ẹbụọ imẹ ahụa nke ẹbụọ, orukpu ahụn nọ gha elu Ọdụ Ashịa-ẹri ahụn heli.

¹² Ya ndị Izrẹlụ nọ gha atụ Saịnaị buli, jẹnsọnmẹ, a gha ebeni e shi ebeni d'e ru ni orukpu ahụn e wuzo imẹ atụ Paranị.

¹³ Ọnwan wụ nke ibuzọ wẹ gi bulimẹ ụdị hụn Osolobuẹ gwa Mozizi nị wẹ k'a rị e buli.

¹⁴ Itu ebọn Juda lẹ ebọn ndị wẹ lẹ wẹ ziẹntọ nkọ ohu bu ụzọ buli, bukọ ahịma wẹ — Nashọnụ nwa Aminadabụ kị ebọn Juda.

¹⁵ Natanẹlụ nwa Zụa kị itu ebọn Isaka,

¹⁶ Ẹliabụ nwa Hẹlọnụ kị itu ebọn Zẹbulọnụ.

¹⁷ Wẹ nọ nwan tọtu Ọdụ-nsọ, ndị Gẹshọnụ lẹ ndị Mẹrari hụn e bun'ẹ nọ buru ẹ, buli.

¹⁸ Itu ebọn Rubẹni lẹ ebọn ndị wẹ lẹ wẹ ziẹntọ nkọ ohu nọ sọn wẹ, sọnkọ ahịma nke wẹ. Ẹlizuru nwa Shẹdiọ kị ebọn Rubẹni.

¹⁹ Shẹlumiẹlụ nwa Zurishadaị kị itu ebọn Simiọnụ,

²⁰ Ẹliasafụ nwa Dewuẹlụ kị itu ebọn Gadị.

²¹ Ya ndị Kohatị nọ buli, buru ihiẹn ndị rị Ọdụ-nsọ. Wẹ ru ebe wẹ k'e ziẹntọ, ndị hụn buni wẹ ụzọ sikọ d'e zumẹgụ Ọdụ-nsọ, ndịnị kebe pụha.

²² Itu ebọn Ifrem lẹ ebọn ndị wẹ lẹ wẹ ziẹntọ nkọ ohu nọ sọn wẹ, bukọ ahịma nke wẹ; Ẹlishama nwa Amihudu kị ndị Ifrem.

²³ Gamaliẹlụ nwa Pẹdazọ kị itu ebọn Manasẹ,

²⁴ Abidanị nwa Gidiọni kị itu ebọn Bẹnjamini.

²⁵ O mẹgụ, ndị hụn e che nche azụụn hụn wụ Itu ebọn Danị lẹ ebọn ndị wẹ lẹ wẹ ziẹntọ nkọ ohu nọ buli, bukọ ahịma wẹ. Ahiẹza nwa Amishadaị kị ebọn Danị,

²⁶ Pagiẹlụ nwa Ọkranị kị itu ebọn Asha,

²⁷ Ahira nwa Ẹnanị kị itu ebọn Naf'tali.

²⁸ Ẹrịra kẹ itu-ebọn ichẹn-ichẹn rị Izrẹlụ gi bulisọnmẹ.

Ihiẹn Mozizi Rịọ Hobabụ Nwẹnẹ-nwunyẹ Ẹ

²⁹ Mozizi sị Hobabụ nwa Rẹwuẹlụ onyẹ Midianị, nẹdi nwunyẹ Mozizi, “Ẹnyi e jẹnmẹ ebẹhụ Osolobuẹ gwa ẹnyi oku ẹ, sị, ‘M k'e ye ụnụ ya’. Sọnmẹ ẹnyi, nị ẹnyi k'e lepụ ị ẹnya ọhụnma, makẹni Osolobuẹ e kwegụọ ndị Izrẹlụ nkwa ihiẹn rị mma.”

³⁰ Hobabụ nọ sị Mozizi, “Mba; ejẹnkọ m. M lakinkọ alị m; m burukọ ndị nke m.”

³¹ Kanị Mozizi nọ sị a, “Dodo, alalẹ ẹnyi tọ. Y'a marịnghọ ebe ẹnyi k'e ziẹntọ imẹ ọfịa alị ọkpọ-nkụnnị, n'ị saghọ ẹka wụrụ ẹnya ẹnyi.

³² I sọnmẹ ẹnyi, ẹnyi sikọ d'e keye i ihiẹn ile rị mma Osolobuẹ jẹnkọ d'e ye ẹnyi.”

A Gha Wẹ Ugu Saịnaị Pụ

³³ A ghagụ wẹ Ugu Osolobuẹ buli, ya wẹ nọ jẹn ijẹn akp'ọhịn ẹtọ. Ẹkpẹti Nkwerigbama buruni wẹ ụzọ akp'ọhịn ẹtọ ahụn d'a chọnị wẹ ebe w'a nọ ziẹn zu ikẹn.

³⁴ Wẹ gha ebe wẹ ziẹntọ bulikọ — ọsụọn'a ebe eki rị elu, orukpu Osolobuẹ sikọ d'a rịrịrị wẹ isi.

³⁵ Ogẹn ọwụlẹ Ẹkpẹti hụ gi buli, Mozizi sị, “Euu Osolobuẹ, lihi ọtọ! Ndị iṅẹnrẹn i wẹ gbayịya! Ndị iwe i wẹ gbamanị ị ọsọ.”

³⁶ Ọ kụsị, Mozizi sị, “Euu Osolobuẹ, kinhẹn d'e kunrun ndị Izrẹlụ madụ nnụ ole-lẹ-ole.”