Ọgụngụn 1 - Ika

Isi Nke Ibuzọ Ọgụngụn-ịhịan

¹ Osolobuẹ gwa Mozizi oku imẹ Ọdụ-ozuzu imẹ atụ Saịnaị, ụhụọhịn ibuzọ imẹ ifọn mẹ ẹ ẹbụọ ndị Izrẹlụ gha alị Ijiptu pụha, ọ sị a:

² “Gụn ndị Izrẹlụ ile ọnụ. Gụn wẹ ebọn-ebọn lẹ ikp'ụlọ-ikp'ụlọ; detusọnmẹ ẹfan ikẹnnyẹ ile ohu-ohu,

³ ikẹnnyẹ ile rị nwa ahụa ọgụn shi elu, ndị k'a s'ẹka jẹn agha, dọnmẹsọnmẹ ni wẹ itu-itu gụn wẹ, ịyụ lẹ Ẹrọnụ.

⁴ Weri ni onyẹ ohu-ohu imẹ ebọn-ebọn nị wẹ yeni ụnụ ẹka gụn wẹ; o k'a wụrịrị onyẹchẹn ikpụnọ nẹdi ẹ.

⁵ “Ọnwan wụ ẹfan ndị k'e yeni ụnụ ẹka: imẹ ebọn Rubẹni, Ẹlizuru nwa Shẹdiọ;

⁶ ebọn Simiọnụ, Shẹlumiẹlụ nwa Zurishadaị;

⁷ ebọn Juda, Nashọnụ nwa Aminadabụ;

⁸ ebọn Isaka, Natanẹlụ nwa Zụa;

⁹ ebọn Zẹbulọnụ, Ẹliabụ nwa Hẹlọnụ.

¹⁰ Imẹ ebọn ụmụ Josẹfụ, nke ebọn Ifrem wụ Ẹlishama nwa Amihudu, nke ebọn Manasẹ wụ Gamaliẹlụ nwa Pẹdazọ.

¹¹ Imẹ ebọn Bẹnjamini, Abidanị nwa Gidiọni k'e yeni ụnụ ẹka;

¹² imẹ ebọn Danị, Ahiẹza nwa Amishadaị;

¹³ ebọn Asha, Pagiẹlụ nwa Ọkranị;

¹⁴ ebọn Gadị, Ẹliasafụ nwa Dewuẹlụ;

¹⁵ ebọn Naf'tali, Ahira nwa Ẹnanị.”

¹⁶ Uwẹ wụ ndị wẹ họrị imẹ ndị nke wẹ, tumẹ, ndị-ichẹn ebọn kẹ wẹ ile wụ, ndị-isi ebozo rịsọnmẹ Izrẹlụ.

¹⁷ Ya Mozizi lẹ Ẹrọnụ nọ weri ndịnị wẹ kpọnị wẹ ẹfan wẹ,

¹⁸ wẹ nọ kpọgbama ndị Izrẹlụ ile ụhụọhịn ibuzọ hụ imẹ ifọn nke ẹbụọ; wẹ ile nọ kusọnmẹ ikpụnọ wẹ lẹ ebọn wẹ, wẹ nọ detuchanrịn ẹfan ndị rị nwa ahụa ọgụn shi elu,

¹⁹ nọkẹ kẹ Osolobuẹ dọn gwa Mozizi imẹ atụ Saịnaị.

²⁰ Imẹ ebọn Rubẹni nwa ibuzọ Izrẹlụ, wẹ nọ detu ẹfan ikẹnnyẹ ile rị nwa ahụa ọgụn shi elu, ndị ile ru hụn e jẹn agha, onyẹ-onyẹ lẹ ebozo ẹ lẹ ezi-lẹ-ụlọ a:

²¹ Ndị ebọn Rubẹni nọ gba madụ nnụ-uku isin-kwasị-ọgụnnaị lẹ mkpikpi (46,500).

²² Ebọn Simiọnụ: Ikẹnnyẹ ile hụn rị nwa ahụa ọgụn shi elu, ndị k'a s'ẹka jẹn agha, kẹ wẹ gụn, detusọnmẹ ẹfan wẹ ohu-ohu ye ebe ndị ebọn wẹ lẹ ikpụlọ wẹ rị.

²³ Ndị ebọn Simiọnụ rị madụ nnụ-uku-mmitenẹi lẹ ọgụn-mmisẹn kwasị nnụ-uku-ọgụnnaị (59,300).

²⁴ Ebọn Gadị: Ikẹnnyẹ ile hụn rị nwa ahụa ọgụn shi elu kẹ wẹ gụn, ikẹnnyẹ k'a s'ẹka jẹn agha, e detusọnmẹ wẹ ẹfan wẹ ohu-ohu ye ebe ndị ebọn wẹ lẹ ikpụlọ wẹ rị.

²⁵ Ndị ebọn Gadị rị madụ iri kwasị ọgụn-ẹsa kwasị nnụ-uku isẹn-kwasị-ọgụnnaị-lẹ-mkpikpi (45,600).

²⁶ Ebọn Juda: Ikẹnnyẹ ile hụn rị nwa ahụa ọgụn shi elu — ya wụ ndị k'a s'ẹka jẹn agha, kẹ wẹ gụn, detusọnmẹ ẹfan wẹ ohu-ohu ye ebe ndị ebọn wẹ lẹ ikpụlọ wẹ rị.

²⁷ Ndị ebọn Juda rị madụ nnụ mmanaị-lẹ-mkpikpi kwasị nnụ-uku mmẹnọ-kwasị-ọgụn-ẹtọ (74,600).

²⁸ Ebọn Isaka: Ikẹnnyẹ ile hụn rị nwa ahụa ọgụn shi elu — ya wụ ndị k'a s'ẹka jẹn agha, kẹ wẹ gụn, detusọnmẹ ẹfan wẹ ohu-ohu ye ebe ndị ebọn wẹ lẹ ikpụlọ wẹ rị.

²⁹ Ndị ebọn Isaka rị madụ nnụ kwasị nnụ-uku mmẹnọ-kwasị-ọgụnnaị (54,400).

³⁰ Ebọn Zẹbulọnụ: Ikẹnnyẹ ile hụn rị nwa ahụa ọgụn shi elu — ya wụ ndị k'a s'ẹka jẹn agha, kẹ wẹ gụn, detusọnmẹ ẹfan wẹ ohu-ohu ye ebe ndị ebọn wẹ lẹ ikpụlọ wẹ rị.

³¹ Ndị ebọn Zẹbulọnụ rị madụ nnụ kwasị nnụ-uku mmẹsa-kwasị-ọgụnnaị (57,400).

³² Ebọn ụmụ Josẹfụ: Imẹ ebọn Ifrem: Ikẹnnyẹ ile hụn rị nwa ahụa ọgụn shi elu — ya wụ ndị k'a s'ẹka jẹn agha, kẹ wẹ gụn, detusọnmẹ ẹfan wẹ ohu-ohu ye ebe ndị ebọn wẹ lẹ ikpụlọ wẹ rị.

³³ Ndị ebọn Ifrem rị madụ nnụ-uku ọgụnnaị-lẹ-mkpikpi (40,500).

³⁴ Ebọn Manasẹ: Ikẹnnyẹ ile hụn rị nwa ahụa ọgụn shi elu — ya wụ ndị k'a s'ẹka jẹn agha, kẹ wẹ gụn, detusọnmẹ ẹfan wẹ ohu-ohu ye ebe ndị ebọn wẹ lẹ ikpụlọ wẹ rị.

³⁵ Ndị ebọn Manasẹ rị madụ ọgụn-iri kwasị nnụ-uku mmẹbụọ-kwasị-ọgụn (32,200).

³⁶ Ebọn Bẹnjamini: Ikẹnnyẹ ile hụn rị nwa ahụa ọgụn shi elu — ya wụ ndị k'a s'ẹka jẹn agha, kẹ wẹ gụn, detusọnmẹ ẹfan wẹ ohu-ohu ye ebe ndị ebọn wẹ lẹ ikpụlọ wẹ rị.

³⁷ Ndị ebọn Bẹnjamini rị madụ nnụ kwasị nnụ-uku mmisẹn-kwasị-ọgụn (35,400).

³⁸ Ebọn Danị: Ikẹnnyẹ ile hụn rị nwa ahụa ọgụn shi elu — ya wụ ndị k'a s'ẹka jẹn agha, kẹ wẹ gụn, detusọnmẹ ẹfan wẹ ohu-ohu ye ebe ndị ebọn wẹ lẹ ikpụlọ wẹ rị.

³⁹ Ndị ebọn Danị rị madụ ọgụn-iri kwasị nnụ-uku ẹbụọ-kwasị-ọgụn-ẹtọ-lẹ mkpikpi (62,700).

⁴⁰ Ebọn Asha: Ikẹnnyẹ ile hụn rị nwa ahụa ọgụn shi elu — ya wụ ndị k'a s'ẹka jẹn agha, kẹ wẹ gụn, detusọnmẹ ẹfan wẹ ohu-ohu ye ebe ndị ebọn wẹ lẹ ikpụlọ wẹ rị.

⁴¹ Ndị ebọn Asha rị madụ nnụ-uku ohu-kwasị-ọgụnnaị lẹ mkpikpi (41,500).

⁴² Ebọn Naf'tali: Ikẹnnyẹ ile hụn rị nwa ahụa ọgụn shi elu — ya wụ ndị k'a s'ẹka jẹn agha, kẹ wẹ gụn, detusọnmẹ ẹfan wẹ ohu-ohu ye ebe ndị ebọn wẹ lẹ ikpụlọ wẹ rị.

⁴³ Ndị ebọn Naf'tali rị madụ nnụ kwasị nnụ-uku mmẹtọ-kwasị-ọgụnnaị (53,400).

⁴⁴ Ndịnị ile kẹ Mozizi lẹ Ẹrọnụ lẹ ndị-isi Izrẹlụ mmẹbụọ gụn. Onyẹ-isi ohu-ohu nọkinsọnmẹ ẹnya ebọn wẹ.

⁴⁵ Ikorọbịa Izrẹlụ ile hụn rị nwa ahụa ọgụn shi elu kẹ wẹ gụn, ẹbozo-ẹbozo, ikorọbịa ile ru ogo e jẹn agha:

⁴⁶ wẹ ile gba madụ iri-kwasị-ọgụnnaị lẹ nnụ-uku ẹtọ-lẹ-mkpikpi kwasị nnụ-uku ọgụn-iri-kwasị-nnụ (603,550).

⁴⁷ Ebọn Livaị arị ndị wẹ gụn —

⁴⁸ Osolobuẹ sị Mozizi,

⁴⁹ “Agụnkwọlẹ ebọn Livaị ọnụ mọbụ gụn wẹ ebe i rị a gụn ndị Izrẹlụ ibe wẹ.

⁵⁰ Ka tumẹ ndị Livaị nị w'e lepụ Ọdụ Ashịa-ẹri ẹnya — ya lẹ ihiẹn ẹ ile lẹ ihiẹn ọwụlẹ ya lẹ ịya wị. Uwẹ nwọn e bu Ọdụ hụ lẹ ihiẹn ẹ ile; wẹ sikọ d'e lepụ a ẹnya, bihunmẹ ẹ.

⁵¹ O ru obubu, ndị Livaị nwọn tọtu ẹ buru; o ru izumẹn'ẹ, ndị Livaị nwọn mẹ ẹ. Onyẹ ọwụlẹ wụlẹni onyẹ Livaị nọkunmẹ ẹ, wẹ gbu ẹ.

⁵² “Ndị Izrẹlụ họdụnị wẹ e zumẹsọnmẹ ọdụ wẹ e bi ebọn-ebọn, onyẹ lẹ ikpụlọ a lẹ ahịma wẹ gi marịn wẹ.

⁵³ Kanị ndị Livaị k'e zumẹsọnmẹ ọdụ nke wẹ ghahunmẹ Ọdụ Ashịa-ẹri amamgbe ọnụma Osolobuẹ e kunrun ndị Izrẹlụ. Ndị Livaị nwọn e lepụ Ọdụ Ashịa-ẹri ẹnya.”

⁵⁴ Ndị Izrẹlụ nọ mẹchanrịn ihiẹnni ile kẹ Osolobuẹ dọn gwa Mozizi.