Obadaya 1 - Ika

Isi Nke Ohu Osolobuẹ sikọ D'e Wetu Ẹdọm Alị

¹ Ọnwan wụ ihiẹn Osolobuẹ ghọsị Obadaya. Lee ihiẹn Osolobuẹ ku banyeni alị Ẹdọm: Ẹnyi a nụọlẹ ozi Osolobuẹ zi; Osolobuẹ e zijẹngụọ onyẹ-ozi d'a sị alị ichẹn-ichẹn, “Kọnrin ni, ni ẹnyi d'a lụsọn alị Ẹdọm agha!”

² Osolobuẹ sị, “M k'e mẹ i kachanrịn alị ndị ọzọ ntịn; wẹ k'e legberi i ru alị.

³ Ọghọ ụnụ ye enwẹn ụnụ e dufieọlẹ ụnụ — ụnụ gi ugu-ọmụma fihunmẹ alị ụnụ e dọn ẹnya; ụnụ gi ugu jẹngbu enwẹn ẹ elu ụnụ bi e dọn ẹnya; Ụnụ hụ a sị enwẹn ụnụ, ‘Onyẹ k'a sa ẹka mẹri ẹnyi?!’

⁴ Ọ sụọn'a nị ụnụ rị imẹ elu nọkẹ ugọn rị e feni; ọsụọn'a nị ẹkụ ụnụ bi rịchanrịn ebe kokisẹ rị, m jẹnkọ d'a gha ebẹhụ wetu ụnụ alị. Mmẹ, Osolobuẹ, e kugụọ a.

Osolobuẹ K'e Mẹgwarị Ndị Ẹdọm

⁵ “Omẹni ndị ohin bịa iwe i, omẹni ndị ohin bịa imẹ abalị d'e zun, ẹlẹ wẹ zunrun hụn wẹ chọ e zunhọdụ wẹ? Ndị ọrụn ugbo ghọman'ị ihiẹn ugbo, ẹlẹ wẹ ghọ a ghọhọdụ wẹ? Kanị, nke ụnụ, ndị-iṅẹnrẹn k'e tikpọ ụnụ ru alị!

⁶ Euu, e gi wẹ ẹka-ikẹn gwalọ alị Ẹdọm ile, bunarịn a akụ-lẹ-ụba ile o zuemẹ!

⁷ Alị ile ụnụ lẹ wẹ e mẹgbama sikọ d'e dufie ụnụ, chụrụdẹ ụnụ ru ebe alị ụnụ ru; wẹ k'a karị ụnụ ẹka, mẹri ụnụ; ndị ịyụ lẹ wẹ gba e ri k'e shin'i ọnyan, y'a marịnkọ!!

⁸ Osolobuẹ sị: O ru ogẹn hụ, m k'a zapụchanrịn ndị Ẹdọm ile marịn ihiẹn, wepụchanrịn ndị ile nwọn nghọta elu ugu ndị ahụn ụmụ Isọ bi.

⁹ Euu obodo Tẹmanị alị Ẹdọm, eje-egun jẹnkọ d'a tụ ndị odogun-agha ị ile; ndị-iṅẹnrẹn k'e gbuchanrịndẹ ndị ile rị alị-ugu Isọ hụ.

Ihiẹn Ndị Ẹdọm Mẹ Ndị Izrẹlụ, Umunẹ Wẹ

¹⁰ “Makẹ eje-ihiẹn ụnụ mẹ umunẹ ụnụ ndị Izrẹlụ, ebọn Jekọpụ, ụya k'e ri ụnụ ndị Ẹdọm; m k'e bepụ ụnụ, bepụchanrịn —

¹¹ ụnụ gi nọye ụsụọ ogẹn hụ, ogẹn hụ ndị alị ọzọ gi buru ihiẹn Jerusalẹm, ogẹn hụ wẹ gi gha ọnụ-mgbọn ẹ, ogẹn hụ wẹ gi keri Jerusalẹm; ụnụ nwẹn mẹchanrịn kẹ ndị-iṅẹnrẹn hụ ụhụọhịn ahụn.

¹² Ụnụ eke mụ umunẹ ụnụ ẹmụ ogẹn hụ eje-ihiẹn gi kunrun wẹ; ụnụ eke gi ihiẹn mẹ ndị Juda ghọghọ ogẹn wẹ gi tikpọ wẹ; ụnụ eke nyannị wẹ isi ogẹn ahụn wẹ gi rị eje-ọnọdị.

¹³ Ụnụ eke banye ọnụ-mgbọn ndị nke m ụhụọhịn eje-ihiẹn kunrun wẹ; ụnụ eke gi ihiẹn mẹn'ẹ mụ ẹmụ ogẹn ahụn eje-ihiẹn gi kunrun wẹ; ụnụ eke kwarị ihiẹn ndị Juda ogẹn hụ eje-ihiẹn gi kunrun ẹ.

¹⁴ Ụnụ eke chekin wẹ ẹbụ, e gbu ndị gbapụkọnị; ụnụ eke we ndị Juda wanahịnnị chezi ẹka ndị-iṅẹnrẹn ụhụọhịn ahụn nsọngbu gi kunrun wẹ.

Osolobuẹ K'e Mẹ Ndị Alị Ile Ihiẹn W'e Mẹ

¹⁵ “Ogẹn Osolobuẹ k'e gi mẹshi alị ile ikẹn a rịgụọ nsue. Ihiẹn onyẹ mẹ kẹ Osolobuẹ k'e mẹ ẹ; onyẹ-onyẹ k'e gi isi ẹ buru ihiẹn o mẹ.

¹⁶ Kẹ ụnụ ndị alị m dọn ra afụnfụn kẹ manya elu Ugu-nsọ m, ẹrịra kẹ alị ndị ọzọ k'a dọnzi ra a, rasọnmẹ: wẹ k'a ra a, ọ tụgbu wẹ, nke wẹ a gụ — lekẹ sị arịtuni wẹ.

¹⁷ Kanị, elu Ugu Zayọnụ wụ Izrẹlụ, o k'e nwọn ndị k'a wanahịnnị; wẹ k'a rịzịkwọ nsọ; uwẹ ndị ikpụlọ Jekọpụ k'e weri alị wẹ.

¹⁸ Ikpụlọ Jekọpụ jẹnkọ wụ ọkụn; ẹghẹẹ, Ikpụlọ Josẹfụ k'a wụ ọkụn rị enwunni, ikpụlọ Isọ wụ Ẹdọm a wụrụ ẹfịfịa ọkpọ-nkụn; wẹ k'a dụnpụ ụmụ Isọ, onwọnni onyẹ k'a họdụ ikpụlọ Isọ.” Osolobuẹ e kuọl'a.

Ihiẹn Ile K'e Mẹ Nke Osolobuẹ Lẹ Ndị Nke Ẹ

¹⁹ Ndị Izrẹlụ bi ẹbamịn-ndịdan wụ Nẹgẹvụ k'e weri ugu ahụn ụmụ Isọ bi; ndị bi Shẹfẹla — ẹbamịn ọdịdan-ẹnyanwụn k'e weri alị ndị Filistia; werizidẹ alị Ifrem lẹ Sameria; ebọn Bẹnjamini jẹnkọ d'e weri ẹgbẹrẹ Gilẹdị.

²⁰ Ndị Izrẹlụ wẹ kpụnshi alị ọzọ k'a lụaha, weri Kenaanị wụ Finishịa d'e rudẹ Zarẹfatị; ndị wẹ gha Jerusalẹm kpụnshi Sẹfaradị k'a lụaha, werizi obodo ndị rịsọnmẹ Nẹgẹvụ.

²¹ Ndị mgbapụha jẹnkọ e shi Ugu Zayọnụ d'a nọ a kị Ugu-Ịsọ wụ alị Ẹdọm. Ogẹn ahụn, Osolobuẹ lẹ enwẹn ẹ k'a wụ eze.