Nehemiah 9 - Ika

Isi Nke Itenẹi Ndị Izrẹlụ E Kupụha Njọ Wẹ

¹ Nke akpọhịn ẹnọ kwasị ọgụn imẹ ifọn hụ, ndị Izrẹlụ nọ zu. Wẹ rị e bu ọnụ, wẹ yisọnmẹ ẹkwa ahịọ ndị eje-ihiẹn mẹ, kpọn uzunzun yesọnmẹ isi.

² Ndị wụ ndị Izrẹlụ kẹti-kẹti e wepụgụọlẹ enwẹn wẹ ebe ndị alị ọzọ ile rị. Ya wẹ nọ nọ ebe wẹ wuzo kupụha njọ wẹ lẹ njọ ndị nẹdi wẹ kanị.

³ Ebẹhụ wẹ wuzokwọ, a gha wẹ imẹ Ẹkụkwọ Iwu Osolobuẹ wụ Chuku wẹ gụnpụhanị wẹ Iwu ndị ahụn. Wẹ kebe ụhụọhịn ụzọ ẹnọ, gi ụzọ ohu gụn Ẹkụkwọ Iwu hụ, gizi ụzọ ohu kupụhasọnmẹ njọ wẹ, e fe Osolobuẹ wụ Chuku wẹ ofufe.

⁴ Ndị Livaị nọ turusọnmẹ elu mgbanyinrin rị ihun wẹ: Jeshụa lẹ Bani lẹ Kad'miẹlụ lẹ Shẹbania lẹ Buni lẹ Shẹrẹbịa lẹ Bani hụn ẹbọ lẹ Kenanị; wẹ hụ e gi okẹn olu a kpọku Osolobuẹ wụ Chuku wẹ.

⁵ Ya ndị Livaị wụ Jeshụa lẹ Kad'miẹlụ lẹ Bani lẹ Hashab'neya lẹ Shẹrẹbịa lẹ Hodia lẹ Shẹbania lẹ Pẹtahia nọ hị: “Lihi ni ja Osolobuẹ wụ Chuku ụnụ mma, Onyẹ hụn nwọnlẹni mbidọn mọbụ ọgụgụ!” “Ịja-mma ya rịnị ẹfan ị hụn nwọn ọghọ; wẹ ye ẹfan ị ọghọ hụn karị ekele ile lẹ ịja-mma ile.

⁶ “Ịyụ sụọ wụ Osolobuẹ: Ịyụ ke elu-igwere, k'o jẹnhanlẹ elu — ya lẹ kokisẹ ile rịn'a; ịyụ kezikwọ ụwa lẹ ihiẹn ile rị imẹ ẹ lẹ ohimin ile lẹ ihiẹn ile rị imẹ wẹ. Ịyụ ye wẹ ile ndụn; ndị ile rị elu-igwee e fe i efe.

⁷ “Ịyụ wụ Osolobuẹ hụn wụ Chuku, onyẹ hụn họrị Ebram, gha alị Uru ndị Kal'di wepụha a, gụn a Ebraham.

⁸ Ogẹn i gi hụn a n'o wegụọ obi ẹ kwan'ị, ị nọ sọn ẹ mẹmẹ nkwerigbama hụn i gi kwe ẹ nkwa n'i sikọ d'e ye ụmụ a alị ndị Kenaanị lẹ Hẹti lẹ ndị Amọ lẹ ndị Pẹrẹzi lẹ ndị Jebusu lẹ ndị Gẹgashị. Y'e mẹzugụọ nkwa ị kwe, makẹni i furu w'e gi dọn ẹnya.

⁹ “Y'a hụnghọ afụnfụn ndị nẹdi ẹnyi wẹ ta kẹ wẹ rị imẹ alị Ijiptu; y'a nụzịghọ ẹkwan wẹ kẹ wẹ rị ẹhụ Ohimin Ufie.

¹⁰ Ị nọ rụnsọnmẹ ihiẹn bu ọda i gi ghọsị ẹka ị lẹ ọrụn atụmẹnya rị ichẹn-ichẹn, gi wẹ mẹshi Fẹro lẹ ndị-ọrụn a ile lẹ ndị alị hụ ile ikẹn, makẹni y'a marịnghọ nị uwẹ wụ ndị Ijiptu kpari ndị nẹdi ẹnyi wẹ ọda-ọda, gi ẹ mẹkarị enwẹn wẹ. Ị nọ gi ikẹn i kpa nwọnrin ẹfan d'e rukwọ tannị.

¹¹ “Ị nọ kewanị wẹ ohimin, a hụn wẹ alị kọrọnị, gi fetu ohimin hụ; kanị y'e bu ndị rị a chụnị wẹ tụye okẹn mirin — rịkẹ ebe ọmụma nọ danye imẹ ohimin.

¹² Ị nọ gisọnmẹ orukpu mawuru kẹ adansụn du wẹ efinaị, gi ọkụn mawuru kẹ adansụn du wẹ uhinhin, nị wẹ e legha ebe wẹ ghakọ.

¹³ “Ị nọ gha elu-igwee bịa elu-ugu Saịnaị; y'a gha elu-igwee gwa wẹ oku, ị nọ yesọnmẹ wẹ ọdịnalị furuni lẹ uhi lẹ iwu rị mma.

¹⁴ Ị nọ mẹ wẹ marịn Ụhụọhịn Ezumikẹn i hụn rị nsọ, gwasọnmẹ wẹ ihiẹn wẹ sikọ d'e mẹ, yini wẹ uhi lẹ ụmụ-iwu ghahanị odibo i wụ Mozizi.

¹⁵ Ẹgụn a gụnma wẹ, ị nọ ye wẹ ihiẹn-oriri gha elu-igwee bịa; ẹgụn mirin a gụnma wẹ, ị nọ gha ọmụma wepụhanị wẹ mirin. Ị nọ sị wẹ banye d'e weri alị hụ i kun enwẹn i n'i sikọ d'e ye wẹ.

¹⁶ “Kanị ndị nẹdi ẹnyi wẹ nọ mẹkarịma enwẹn wẹ, gbama isi-akwanran, e mẹni wẹ ihiẹn ị sị wẹ mẹ.

¹⁷ A jụ wẹ n'e gọnkọ wẹ ntịn, anyanhanzidẹni wẹ ọrụn-atụmẹnya ị rụnsọnmẹ imẹ igunrun wẹ; a gba wẹ isi akwanran tumẹrin ịhịan n'o dukin wẹ Ijiptu nwẹn wẹ te nọ wụ igbọn. Kanị Chuku hụn a gbagharị njọ k'ị wụ, onyẹ ẹfọma lẹ onyẹ e mẹyeni ịhịan, onyẹ ghalẹni e wekẹnrin iwe, onyẹ e nwọn ihiẹn-ọsụsụọ ọda-ọda, y'a gbakitọkwọnị wẹ azụụn —

¹⁸ kẹ ogẹn wẹ gidẹ kpụrụ mmọn yi nwa-efin, sị ibe wẹ, ‘Ọnwan wụ Chuku ụnụ — hụn gha alị Ijiptu wepụha ụnụ’ lẹ ogẹn wẹ gi kusọnmẹ arụ.

¹⁹ “Makẹni y'e mẹkẹ omikẹn, y'a latọnị wẹ imẹ atụ alị-ọkpọnkụn ahụn. Orukpu hụ mawuru kẹ adansụn edubehini wẹ efinnaị ebe ọwụlẹ wẹ ghakọ, ọkụn hụ mawuru kẹ adansụn eyebehini wẹ ukpẹ imẹ uhinhin ebe ọwụlẹ wẹ ghakọ.

²⁰ Y'e yeghọ wẹ ezi Mmọn ị n'ọ kuzi wẹ; y'a jụnị nị y'e yekọ wẹ mana ị; y'e yeghọ wẹ mirin ebe ẹgụn mirin nọ gụn wẹ.

²¹ Ọrọgbọ ahụa ọgụnnaị k'i gi dọnmẹ wẹ ndụn imẹ atụ alị-ọkpọnkụn ahụn; onwọnni ihiẹn kọnị wẹ, ẹkwa wẹ akahịnị, ụkụ wẹ azanị.

²² “Ị nọ we alị-eze ichẹn-ichẹn lẹ ndị alị ichẹn-ichẹn ye wẹ, ye wẹ ya d'e rudẹ nkọ ndị hụ tegbu enwẹn ẹ; wẹ nọ weri alị Sihọnụ eze ndị Hẹsh'bọnụ lẹ nke Ọgụ eze ndị Bashanị.

²³ “Ị nọ mẹ ụmụ wẹ ba ụba, e bu wẹ ọda nọkẹ kokisẹ rị elu-igwere, wẹhẹ wẹ imẹ alị hụn ị gwa ndị mụnị wẹ banye d'e weri.

²⁴ Ụmụ wẹ nọ nwan banye, weri alị hụ; i nọ mẹrini wẹ ndị bi alị hụ, ndị Kenaanị; y'e bu ndị Kenaanị hụ lẹ ndị-nze wẹ lẹ ndị alị ichẹn-ichẹn rị alị hụ che wẹ ẹka nị wẹ mẹ wẹ ihiẹn sụọnị wẹ.

²⁵ Wẹ nọ mẹri obodo ichẹn-ichẹn wẹ tụnhunmẹ mgbọn, weri wẹ, lẹ alị bu ọda e mẹ ihiẹn-ugbo; e werisọnmẹ wẹ ụlọ ihiẹn ichẹn-ichẹn rị mma jun lẹ ọmị ndị hụ gutọ lẹ ugbo-vaịnị rịsọnmẹ alị hụ lẹ ugbo-olivu lẹ osisi bu ọda hụn a mị mkpụrụ. E rijun wẹ ẹfọ, ẹhụ wẹ a pụha; okẹn-ọhụnma ị rị e mẹni wẹ hụ a sụọ wẹ ụsụọ ẹfọ.

²⁶ “Kanị e nupụkwọnị wẹ i isi; e nu wẹ Iwu i ye ụsụọ; e gbu wẹ ndị-amụma ị hụn gwa wẹ njọ wẹ kẹni wẹ gi ẹ rogharị buruhẹz'i; e mẹsọnmẹ wẹ ihiẹn bu ọda wẹ gi kpari i.

²⁷ “Ị nọ nwan bu wẹ che ẹka ndị-iṅẹnrẹn wẹ, a bịangbu wẹ wẹ. Kanị, a bịangbumẹ wẹ wẹ, wẹ nọ kwanghọs'ị; ị nọ gha elu-igwee nụ ẹkwan wẹ, mẹ okẹn omikẹn i ye wẹ ndị zụọpụhanị wẹ.

²⁸ Hụn ẹhụ gihụ fu wẹ, wẹ nọzị mẹ ihiẹn rịlẹni mma ẹnya ị, ị nọ la wẹ tọnị ndị-iṅẹnrẹn wẹ kịma. Ogẹn wẹ gi kwanghọsịzị ị, ị nọ gha elu-igwee nụ ẹkwan wẹ, mẹ omikẹn i zụọpụha wẹ mgbe ole-lẹ-ole.

²⁹ “Ị nọ gba wẹ mkpịnsịn ẹka, sị wẹ dọnmẹmẹzi Iwu i; kanị wẹ nọ mẹkarịma enwẹn wẹ, femẹn'i isi, pama iwu i tumẹsọnmẹ hụn o mẹ ni, onyẹ dọnmẹ wẹ, o gi ẹ rị ndụn. Wẹ nọ bọnmẹmẹ gbakitọ ị azụụn; bu isi-ikẹn, jụ n'e gọnkọ wẹ i ntịn.

³⁰ Ị nọ gi ndidin sọn wẹ ahụa bu ọda, gi Mmọn ị dọsọnmẹ wẹ ẹka-ntịn ghahanị ndị-amụma ị. Kanị egọnni wẹ ntịn. Ya ị nọ bu wẹ che ẹka ndị alị ọzọ nọhunmẹni wẹ.

³¹ K'osilẹrị, makẹni y'e mẹkẹ omikẹn, y'e gbupụnị wẹ mọbụ jụ wẹ tọgbọ, makẹni ị wụ Chuku hụn e mẹyeni ịhịan lẹ Chuku onyẹ omikẹn.

³² “Kikẹnni hụra, Chuku ẹnyi, Chuku hụn hi-ogbe, hụn nwọn ikẹn, hụn rị egun, hụn e nwọnsọnmẹ ihiẹn-ọsụsụọ o kwe nkwa a; dodo, elelịalẹ afụnfụnnị ile — afụnfụnnị ile bịanịnị ẹnyi lẹ ndị-nze ẹnyi lẹ ndị-isi ẹnyi lẹ ndị nchụn-ẹjan ẹnyi lẹ ndị-amụma ẹnyi lẹ ndị nẹdi ẹnyi wẹ lẹ ndị nke i ile, ghakwọrị ogẹn ndị-nze alị Asiria gi kpa ikẹn d'e ru tannị.

³³ Ihiẹn furuni kẹ i mẹ ebe ị nọ mẹ ẹnyi ihiẹnni ile; y'e mẹni njọ; ẹnyi mẹ njọ:

³⁴ kẹ ndị-nze ẹnyi kẹ ndị-isi ẹnyi kẹ ndị nchụn-ẹjan ẹnyi kẹ ndị nẹdi ẹnyi wẹ kanị edọnmẹni Iwu i; egọnni wẹ ntịn ihiẹn ị sị ẹnyi mẹ mọbụ gi ẹka-ntịn ị dọ wẹ mẹ ihiẹn ọwụlẹ,

³⁵ Kẹ ogẹn ọkịkị alị ẹnyi gidẹ rị wẹ ẹka, ogẹn wẹ gi rị e ri ihiẹn ile i gi okẹn-ọhụnma ị ye wẹ imẹ alị hụ shịa ẹfọ i ye wẹ hụn e mẹ ihiẹn-ugbo, efedẹni wẹ i, erogharịnị wẹ latọ eje-obibi wẹ.

³⁶ “Lee nwan ẹnyi: ẹnyi wụ nwan igbọn — imẹ alị hụn i ye ndị nẹdi ẹnyi wẹ nị wẹ ri ihiẹn o mẹ lẹ ihiẹn ndị-ọzọ gha imẹ ẹ pụha.

³⁷ Ufiri njọ ẹnyi, ihiẹnni ile bugbu enwẹn ẹ alịnị rị a mịpụha hụ a lanị ndị-nze alị ọzọ ndịnị i we ẹnyi che okpuru wẹ; wẹ hụ a kị kẹ ẹhụ ẹnyi kẹ anụ ẹnyi k'ọ sụọ wẹ. Ẹnyi rị nwan imẹ okẹn afụnfụn.”

Ekwerigbama Wẹ Idọnmẹ Iwu Osolobuẹ

³⁸ “Makẹ ufiri ẹ, ẹnyi ile rị nwan e kwegbama nkwa e kweshi ẹ ikẹn; ẹnyi rị nwan e detu ẹ imẹ ẹkụkwọ; ndị-isi ẹnyi lẹ ndị Livaị lẹ ndị nchụn-ẹjan ẹnyi rị nwan e biye ẹ ẹka.”