Nehemiah 8 - Ika

Isi Nke Ẹsatọ Ẹzra A Gụnpụhanị Wẹ Iwu Osolobuẹ

¹ Ya wẹ ile nọ gbakikomẹ ebẹhụ ndị alị nọ e zu ihun Ọnụ-mgbọn Mirin. Wẹ nọ sị Ẹzra onyẹ-nkuzi Iwu-Mozizi ya wepụha Ẹkụkwọ Iwu-Mozizi, Iwu hụ Osolobuẹ ye ndị Izrẹlụ.

² Ya kẹ Ẹzra hụn wụzị onyẹ nchụn-ẹjan nọ wepụha Ẹkụkwọ Iwu ihun igunrun hụ zuni: kẹ ikẹnnyẹ kẹ ikpoho rị ebẹhụ, wẹ lẹ ndị ile k'a sa ẹka ghọta ihiẹn wẹ sikọ d'a gụnnị wẹ. Ihiẹnni mẹ ụhụọhịn ibuzọ imẹ ifọn nke ẹsa.

³ Ọ gụnshi ẹ elu hụn w'a nụ, gha ụzụtụntụn d'e ru ogẹn anwụn gi ru isi. O bu ihun zinmẹ igunrun hụ rị ebe ndị alị nọ e zu, ihun Ọnụ-mgbọn Mirin — idẹnya ikẹnnyẹ lẹ ikpoho lẹ ndị hụ ile a saẹka a ghọta. Ndị hụ ile gọnchanrịn ntịn Ẹkụkwọ-Iwu hụ wẹ rị a gụnnị wẹ.

⁴ Elu mkpọnyin wẹ gi osisi ma hụn wẹ mẹmẹtọnị ụhụọhịn hụ kẹ onyẹ-nkuzi iwu hụ wụ Ẹzra wuzo gụn a. Ndịnị rị a ẹka-nni: Matitịa, Shẹma, Anaya, Yuria, Hil'kia lẹ Maaseya; ndị rị a ẹka-ekpẹn wụ Pẹdaya, Mishẹlụ, Mal'kija, Hashum, Hash'badana, Zẹkaraya lẹ Mẹshulam.

⁵ Kẹ Ẹzra shịapụ Ẹkụkwọ hụ, ndị hụ ile hụ e legha a, makẹni ebe o wuzo jẹn elu karị ebe wẹ rị. Ogẹn o gi shịapụ a, ndị hụ ile nọ lihi ọtọ.

⁶ Ẹzra nọ ja Osolobuẹ, Chuku ahụn kachanrịnnị, mma; ndị hụ ile nọ kịshi ẹka elu, za, “Isẹẹ! Isẹẹ!!” Ya wẹ nọ kụnị Osolobuẹ isi alị.

⁷ Ndị Livaị wụ Jeshụa, Bani, Shẹrẹbịa, Jamini, Akubu, Shabẹtaị Hodia lẹ Maaseya, Kelita lẹ Azaria lẹ Jozabadị lẹ Hanan lẹ Pẹlaya hụ a kọwanị ndị hụ ihiẹn wẹ rị a gụnnị wẹ.

⁸ Ya wụ, wẹ hụ a gha Ẹkụkwọ Iwu Osolobuẹ a gụnpụha a ọhụnma, a kọwa a kẹn'ọ nị wẹ ghọta ihiẹn wẹ rị a gụnnị wẹ.

⁹ Ya kẹ Nehimaya hụn wụ Gọvanọ, Ẹzra onyẹ nchụn-ẹjan lẹ onyẹ nkuzi-iwu lẹzi ndị Livaị hụn rị a kọwanị wẹ ya nọ sị wẹ ile, “Tannị rị Osolobuẹ wụ Chuku ụnụ nsọ: anọlẹ ni kẹ ndị eje-ihiẹn mẹ; akwanlẹ ni ẹkwan.” Wẹ gwa wẹ ẹrịra makẹni ndị hụ ile rị a kwan ẹkwan ogẹn wẹ gi rị a nụ oku ndị rị imẹ Iwu.

¹⁰ Nehimaya a sị wẹ, “Jẹnmẹ ni, d'e ri ni ihiẹn-oriri rị mma; d'a ra nị ihiẹn-ọrịra sụọnị — ụnụ e zijẹnzikwọnị ndị nwọnlẹni hụn wẹ k'e ri. Tannị rị nsọ ẹnya Osolobuẹ ẹnyi; akwanlẹ ni ụya, ịghọghọ Osolobuẹ e ye k'e ye ụnụ ikẹn.”

¹¹ Ndị Livaị e mẹzighọ ndị hụ ile mẹ jụụ, a sị wẹ, “Gba nị nkịtịn, nị tannị rị nsọ. Akwanlẹ ni ẹkwan.”

¹² Omẹgụ, wẹ ile nọ nwan jẹnmẹ d'e ri ra, d'e zijẹnzikwọnị ndị ọzọ ihiẹn-oriri, d'e mẹ mmẹmmẹ ndị rị a ghọghọ ọda-ọda, makẹni wẹ ghọha oku ile wẹ kọwanị wẹ.

Mmẹmmẹ Ibi-imẹ-ọdụ

¹³ Eki e fọn, hụn mẹ akpọhịn ẹbụọ imẹ ifọn hụ, ndị-ichẹn ikpụlọ ichẹn-ichẹn lẹ ndị nchụn-ẹjan lẹ ndị Livaị nọ bịa d'e fihunmẹ onyẹ-nkuzi Iwu wụ Ẹzra kẹni wẹ mụ oku ndị rị imẹ Iwu.

¹⁴ Wẹ nọ hụn a nị wẹ deye ẹ imẹ Iwu ahụn Osolobuẹ gha ẹka Mozizi ye Izrẹlụ nị ndị Izrẹlụ sikọ d'a gha e bi imẹ ọdụ ogẹn Mmẹmmẹ hụ w'e mẹ ifọn nke ẹsa,

¹⁵ wẹ masọnmẹ ọkwa a imẹ obodo wẹ ile rị ichẹn-ichẹn lẹ imẹ Jerusalẹm, sị ịhịan ile, “Shi ni Ugu ndịnị nọkunmẹni ụnụ d'e wẹhẹsọnmẹ agalaba osisi olivu wẹ kụn lẹ nke olivu-ọfịa lẹ nke mẹtụlụ lẹ iguru lẹ agalaba osisi ndị ọzọ ẹhụhụọ jun nị ụnụ d'e gi wẹ rụn ọdụ kẹ wẹ dọn de ẹ imẹ Iwu.”

¹⁶ Ya ndị Ju hụ nọ pụ, wẹ nọ wẹhẹsọnmẹ iguru lẹ agala osisi ndị hụ, gi wẹ rụnrụnsọnmẹ ọdụ ye elu-ụlọ wẹ mẹsọnmẹ aradan lẹ imẹ ezi wẹ lẹ ezi-ọgwa Ụlọ-Osolobuẹ lẹ ebe ndị alị nọ a hụn ihun Ọnụ-mgbọn Mirin lẹzi ebe ndị alị nọ e zu ẹhụ Ọnụ-mgbọn Ifrem.

¹⁷ Ndị ahụn ile gha alị ndị wẹ kpụnshi wẹ lụaha nọ tụnrụnsọnmẹ ọdụ, biri imẹ wẹ. Ọnwan wụ nke ibuzọ wẹ mẹ mmẹmmẹ hụ kete ogẹn Jeshụa nwa Nọnụ. Wẹ ile hụ a ghọghọ.

¹⁸ Ẹzra hụ a gụn Ẹkụkwọ Iwu-Osolobuẹ ụhụọhịn-ụhụọhịn, gha ụhụọhịn ibuzọ d'e ru ụhụọhịn ikpanzụụn. Akpọhịn ẹsa kẹ wẹ mẹ mmẹmmẹ hụ. Nke akpọhịn ẹsatọ wẹ nọ zu iko rị nsọ ya lẹ ẹ wị.