Nehemiah 6 - Ika

Isi Nke Isin Eje-umẹ Ndị-iṅẹnrẹn Zu A Dan ufori

¹ Ozi nọ ru Sanbalatị lẹ Tobaya lẹ Gẹshẹm onyẹ Arabụ lẹ ndị-iṅẹnrẹn ẹnyi họdụnị ntịn nị e dọnzichanrịngụọ m mgbọn hụ, n'o nwọnzini ebe ọ nọ gba oghe. (M'e ke yikin ọnụ-mgbọn ndị rịn'a ogẹn ahụn.)

² Ya kẹ Sanbalatị lẹ Gẹshẹm nọ zihẹni m ozi, sị m, “Bịa, nị ẹnyi zu imẹ alị-ọfịa nẹi rị alị aradan Ono.” Kanị, eje-umẹ kẹ wẹ zuni m ihiẹn hụ.

³ Ya m nọ zi wẹ jẹnni wẹ, sị, “M gi ọrụn rịkẹnmẹ mkpa ẹka, asakọ m ẹka bịa. Kẹ m k'a kụsịnị ọrụn hụ d'e kunrun ụnụ?”

⁴ Mgbe ẹnọ zu ezu kẹ wẹ zihẹni m ozini; mmẹ nwẹn nọ za wẹ ihiẹn ohu hụ m za mbụ.

⁵ Hụn mẹ ẹ mgbe isẹn, Sanbalatị nọ zi onyẹ hụn e jẹnn'ẹ ozi d'e kunrun m, o gihụ ẹkụkwọ-ozi wẹ nyankinlẹni.

⁶ Ihiẹn Sanbalatị de imẹ ẹ wụ: “Wẹ rị e ku ẹ imẹ alị ndị ọzọ rị ichẹn-ichẹn nị ịyụ lẹ ndị Ju rị a chọ nị ụnụ nupụ isi okpuru eze; Gẹshẹm lẹ enwẹn ẹ e kugụọzịd'a; wẹ sị nị ya haịn ụnụ gi rị a tụn mgbọn hụ. Ẹlẹdẹ ọhụn sụọ; kẹ wẹ dọn rị e ku ẹ, y'e d'a wụrụdẹ eze wẹ,

⁷ wẹ sị y'e tumẹringụọdẹ ndị-amụma nị wẹ hịn'ị ya imẹ Jerusalẹm, sị wẹ nị ‘Juda e nwọnringụọ eze!’ Y'a marịnghọ nị okuni jẹnkọ d'e ru ebe eze rị. Bịa nwan nị ẹnyi lẹ yụ ku.”

⁸ Ya kẹ m nọ zi wẹ jẹnn'ẹ, sị a, “Onwọnni ihiẹn nọ ẹrịra rị e mẹni; ịyụ rị e ropụha wẹ.”

⁹ Wẹ ile rị a chọ nị wẹ rọn ẹnyi egun, a sị enwẹn wẹ, “O ru, ndụn a gụ wẹ, arụngụkọzị wẹ ọrụn hụ.” M nọ mẹ ekpere, sị, Osolobuẹ, “Dodo, mẹ nwan ẹka shi m ikẹn!”

¹⁰ Ụhụọhịn ohu, m jẹn iwe Shẹmaya nwa Dẹlaya nwa Mẹhẹtabẹlụ, hụn rịlẹni a pụ ezi ogẹn hụ, ọ nọ sị, “Nị ẹnyi zu imẹ Ụlọ Osolobuẹ, nị ẹnyi banyedẹ imẹ Ụlọ-NSỌ kẹti-kẹti; ẹnyi ru ẹ, ẹnyi a kpọkinchanrịn ụzọ ile rị Ụnọ-NSỌ, makẹni ndị-iṅẹnrẹn i lala d'e gbu i; wẹ lala imẹ uhinhin d'e gbu i.”

¹¹ Kanị m nọ sị, “Nị onyẹ nọ kẹ mmẹ gbapụ? Nị onyẹ nọ kẹ mmẹ warị imẹ Ụlọ-NSỌ nị m rị e ghe isi? Ejẹnkọ m!”

¹² Ya m nọ hụn a nị ẹlẹ Osolobuẹ zi ẹ kaka. Kama, n'o buni m amụmanị makẹni Tobaya lẹ Sanbalatị e yegụọ a egho-azụụn.

¹³ Wẹ kụ a ụgwọ n'ọ hụn ụzọ bu egun che m ẹnya, kẹni, m gbapụ, ikpe a ma m, e gi w'ẹ ye m eje-ẹfan, wiwi ẹfan m.

¹⁴ Euu, Osolobuẹ m, nyanhan Tobaya lẹ Sanbalatị; gi ihiẹn ile wẹ mẹ nyanhan wẹ; nyanhanzịkwọ onyẹ-amụma okpoho wụ Nụadịa lẹ ndị-amụma họdụnị, ndị te chọ nị wẹ bu egun che m ẹnya.

E Dọnzikwama Wẹ Mgbọn Hụ

¹⁵ Hụn mẹ ẹ akpọhịn isẹn kwasị ọgụn imẹ ọnwan Ẹlulu kẹ ẹnyi gi dọnzichanrịn mgbọn hụ, ya wụ nị akpọhịn mmẹbụọ kwasị ọgụn-ẹbụọ (52) kẹ ẹnyi gi dọnzichanrịn a.

¹⁶ Ogẹn ndị-iṅẹnrẹn ẹnyi ile lẹ ndị alị ọzọ ile rị ichẹn-ichẹn nọhunmẹni ẹnyi gi nụ ihiẹnni, egun nọ tụma wẹ, ifẹnrẹn e mẹgbu wẹ, ndụn a gụ wẹ — makẹni a hụn w'a nị Osolobuẹ ẹnyi wụ onyẹ hụn yeni ẹnyi ẹka rụn ọrụnnị.

¹⁷ Ogẹn hụ, ndị-isi Juda hụ e dejẹnni Tobaya ẹkụkwọ-ozi bụ ọda, Tobaya nkẹ hụ e dehẹzini wẹ hụn o gi a za wẹ.

¹⁸ Makẹni ndị Juda bu ọda e wegụọ enwẹn wẹ kwanị Tobaya, kundẹ Osolobuẹ chen'ẹ, makẹni Tobaya wụ ọgọ Shẹkania nwa Ara lẹzi makẹni Jehohananị nwa Tobaya rị a lụ nwa-okpoho Mẹshulam nwa Bẹrẹkia.

¹⁹ Ẹlẹdẹ ọhụn sụọ; w'a gwasọnmẹ m ihiẹn rị mma ọ rị e mẹ, a gwazịkwọ a ihiẹn m ku; Tobaya hụ e dehẹsọnmẹni m ẹhụhụọ kẹni o bu egun che m ẹnya.