Nehemiah 5 - Ika

Isi Nke Isẹn Nehimaya A Nọ Ndị Igbẹnnyẹ Ye Azụụn

¹ Ogẹn hụ, o nwọn ikẹnnyẹ wẹ lẹ inyẹnmẹ wẹ rị a kwan nị ndị Ju ibe wẹ rị a bịangbu wẹ.

² Imẹ wẹ, ụfọdụ sị, “Ẹnyi lẹ ụmụ ẹnyi ikẹnnyẹ lẹ ikpoho bu ọda; wẹ ye nwan ẹnyi ọka nị ẹnyi hụn ihiẹn ẹnyi k'e ri rị ndụn.”

³ Ndị ọzọ sị, “Ẹnyi e gigụọ ugbo ẹnyi lẹ alị vaịnị ẹnyi lẹ ụlọ ẹnyi gbama-ibe, kẹni ẹnyi hụn ihiẹn-oriri imẹ ụnwụnnị.”

⁴ O nwọnzighọ ndị sị, “Ẹnyi gwarị zinrin egho kẹni ẹnyi hụn ụzọ tụ ụtụ alị ugbo lẹ alị vaịnị hụn eze be ẹnyi.

⁵ Umunẹ ẹnyi etuni nị ẹnyi lẹ wẹ wụ ẹhụ ohu lẹ ẹdeke ohu, nị ụmụ wẹ akanị ụmụ ẹnyi mma, w'e d'e mẹ ẹnyi re ụmụ ẹnyi ikẹnnyẹ lẹ ikpoho yeni oku egho; e gigụọdẹ wẹ ụfọdụ ụmụ ẹnyi ikpoho họnrin igbọn! Kanị onwọnni nwan ihiẹn ẹnyi k'a saẹka mẹ makẹni ugbo ẹnyi lẹ alị vaịnị ẹnyi a bangụọ ndị ọzọ ẹka.”

⁶ Iwe we m ọda-ọda ogẹn m gi nụ ẹkwan wẹ lẹ ihiẹn wẹ rị e kin.

⁷ E rogụ m'a, m nọ kpọ ndị-isi wẹ lẹ ndị-isi ọrụn gọmẹnti rị imẹ wẹ ikpe; sị wẹ “Y'a hụnnị ụnụ?! Ụnụ ndị a na ndị nke wẹ ọmụnịnwa!” Ya kẹ m nọ kpọnị wẹ ọgwa hi-ogbe.

⁸ Ẹnyi e zu, m nọ sị wẹ, “Ẹnyi hụ a nwan ikẹn ẹnyi a gbarị umunẹ ẹnyi ndị Ju wẹ reye ndị alị ọzọ, ụnụ nwẹn hụ ebeni e re umunẹ ụnụ! Ụnụ regụ wẹ ye wẹ, e rezi wẹ wẹ ye ẹnyi!!” Ya wẹ nọ gba nkịtịn, ahụnnị wẹ ihiẹn wẹ sikọ d'e ku.

⁹ M nọ nwan sị wẹ, “Ihiẹn ụnụ rị e mẹ arị mma. Ẹlẹ o te furu nị ụnụ e gi egun Osolobuẹ ẹnyi e bi amamgbe ndị alị ọzọ ndị-iṅẹnrẹn ẹnyi gha a mụ ẹnyi ẹmụ?”

¹⁰ Ẹghẹẹ, mmẹ nwẹn lẹ umunẹ m lẹ ndị mmẹ lẹ wẹ rị hụzị e zinye ịhịan egho lẹ ọka, kanị nke ịna-ọmụnịnwanị, nị ẹnyi kụsị n'a!

¹¹ Yekin ni wẹ ugbo wẹ lẹ alị vaịnị wẹ tannị-tannị, ya lẹ alị olivu wẹ lẹ ụlọ wẹ, ụnụ e yekinzi wẹ ọmụnịnwa ohu-imẹ-ọgụn-isẹn ụnụ na wẹ — kẹ egho kẹ ọka kẹ manya-ọhụn kẹ ofigbọn-olivu.

¹² Ya wẹ nọ sị, “Ẹnyi jẹnkọ d'e yekin wẹ ihiẹn ile; ẹnyi anakọzị wẹ ihiẹn ọwụlẹ. Ẹnyi jẹnkọ d'e mẹ kẹ i dọn ku.” M nọ kpọ ndị nchụn-ẹjan, mẹ ndị-isi wẹ lẹ ndị-isi ọrụn gọmẹnti rị imẹ wẹ kun Osolobuẹ nị wẹ jẹnkọ d'e mẹrịrị ihiẹn wẹ kwe nkwa a.

¹³ M nọzị fapụha ẹkpa ẹwuru m, fechanpụ a, sị wẹ, “Osolobuẹ ya gi ẹrịra gha ụlọ ị lẹ ihiẹn i fechanpụ ị — onyẹ ọwụlẹ ị wụ — omẹni y'e mẹzuni nkwanị! Ya fechanpụ onyẹ nọ ẹrịra, gbama a ẹka!” Ya igunrun ahụn ile zu ebẹhụ nọ sị “Isẹẹ!” Wẹ nọ ja Osolobuẹ mma. Ndị hụ nọ mẹ ihiẹn wẹ kwe nkwa a.

Nehimaya Kẹnmẹ Ẹfọ Du Wẹ

¹⁴ Ghakwọrị ahụa hụ mẹ ẹ ọgụn eze wụ Atazẹzẹsi kịma, ahụa hụ o tumẹ m gọvanọ wẹ imẹ alị Juda, d'e ru hụn mẹ ẹ ahụa mmẹbụọ kwasị ọgụn, ọrọgbọ ahụa mmẹbụọ, kẹ mmẹ kẹ umunẹ m erini ihiẹn-oriri w'e ye gọvanọ.

¹⁵ Kanị, ndị gọvanọ bu m ụzọ kị buye wẹ okẹn ibu, d'e ru ebe wẹ nọ sị wẹ tụhamanị wẹ ihiẹn-oriri lẹ manya lẹ akpụrụ egho siliva ọgụnnaị ụhụọhịn-ụhụọhịn; ndị ọrụn ndị gọvanọ a kịgbudẹ wẹ a kịgbu. Kanị, emẹni m ẹrịra, makẹ egun Osolobuẹ.

¹⁶ E bu m enwẹn m che ọrụn idọnzi mgbọnni; ẹnyi enwọnrinni alị; ndị ile rị okpuru m rịchanrịn ebẹhụ a rụn ọrụn hụ.

¹⁷ Ẹlẹdẹ ọhụn sụọ: madụ iri kwasị ọgụn-ẹsa gbegbegbe kẹ mmẹ lẹ wẹ gba e ri ihiẹn-oriri m, kẹ ndị Ju kẹ ndị ọrụn gọmẹnti, cheni ndị rị a gha alị ndị nọhunmẹ ẹnyi a bịa d'a hụn ẹnyi.

¹⁸ Ihiẹn m'e ye w'e shini m ụhụọhịn-ụhụọhịn wụ efin ohu, atụnrụn isin hi-ogbe lẹ ọhụhụ bu ọda; akpọhịn iri-iri kẹ m gi e butọ manya ichẹn-ichẹn buni. Imẹ ihiẹn ndịnị ile, adọnị m wẹ ihiẹn-oriri ru gọvanọ, makẹ wẹ gha e bu okẹn ibu.

¹⁹ Euu Osolobuẹ m, nyanhankwọ m ọnyanhan rị mma makẹ ihiẹn ile rị mma m mẹni ndịnị.