Nehemiah 2 - Ika

Isi Nke Ẹbụọ E Zijẹn Wẹ Nehimaya Alị Juda

¹ Hụn mẹ ẹ ahụa ọgụn eze wụ Atazẹzẹsi kịma, imẹ ọnwan Nisanị, ogẹn wẹ gi buhẹni eze manya a, m nọ buru manya hụ, bu ẹ ye eze. Erọnmẹtuni m idẹnya a mbu.

² Ya kẹ eze nọ sị m, “K'i rọnmẹni ihun bụ emu arị a kụ ị? O k'a wụrịrị nị ẹfọ arị a sụọ ị ụsụọ.” Kẹ o ku ihiẹnni, egun nọ tụma m ọda-ọda,

³ m nọ sị eze, “Agụ! Ẹlẹ oku m maị! Obodo m, ebe wẹ liye ndị nẹdi m mẹkwọ mkpọkọ-mkpọkọ, a dụngụọ wẹ ọnụ-mgbọn ndị rịsọnmẹn'ẹ ọkụn.”

⁴ Eze nọ sị m, “K'ị chọ?” Ya m nọ mẹ ekpere ozigbo jẹnni Osolobuẹ rị elu-igwee.

⁵ M nọ sị eze, “Eze, omẹni ọ sụọghọ ị, omẹni ihiẹn m a sụọghọ ị, dodo zijẹn m obodo hụ rị Juda, hụn wẹ litọ ndị nẹdi m, nị m hụn ụzọ dọnzi ẹ.”

⁶ Alasị eze nọdịyen'ẹ ebẹhụ. Eze nọ sị m, “Nanị kẹ y'a nọhan? Elee mgbe y'a lụa?” A hụn m'a n'ọ sụọghọ eze n'o zi m jẹn, ya m nọ kaye.

⁷ Ya m nọzị sị eze, “Agụ! Omẹni ọ sụọghọ ị, dodo, deye m ẹkụkwọ ye ndị gọvanọ rị Ẹgbẹrẹ Nfetu Iyi-Yufretisi kẹni wẹ a nị m a ghafe d'e ru Juda.

⁸ N'i deyezikwọ m ẹkụkwọ jẹnni Asafụ hụn e lepụ ẹgboko eze ẹnya, kẹn'o ye m osisi m'e gi rụndọnzi ọnụ-mgbọn ndị rị ọgwa nọkunmẹ Ụlọ-nsọ lẹ mgbọn obodo hụ lẹzi ụlọ ẹka mmẹ nwẹn sikọ d'e bi.” Eze nọ kweri — makẹni Osolobuẹ m nọyeni m anọyeni.

⁹ Ya kẹ m nọ buli, yekọ ndị gọvanọ rịsọnmẹ Ẹgbẹrẹ Nfetu Iyi-Yufretisi ẹkụkwọ-ozi ndị hụ eze ye m ye wẹ. Eze e yegụọzị m ndị isi-agha lẹ ndị-agha e gi ụgbọ-ẹshin a lụ agha.

¹⁰ Ogẹn Sanbalatị onyẹ alị Horọnụ lẹ Tobaya onyẹ Amọnụ hụn rị ndị-isi ọrụn gọmẹnti gi nụ ihiẹnni, ize nọ ban wẹ nị o nwọnọlẹ onyẹ bịa d'a chọ ọrịrịmma ndị Izrẹlụ.

Nehimaya E Lehunmẹ Mgbọn Jerusalẹm

¹¹ Ya m nọ bịa Jerusalẹm; a nọpụ m ebẹhụ akpọhịn ẹtọ,

¹² m nọ gi imẹ abalị gepụ, mmẹ lẹ ikẹnnyẹ bulẹni ọda m werizi. O ke nwọn onyẹ m gwa ihiẹn Osolobuẹ m buche m obi d'e mẹni Jerusalẹm. Onwọnni anyịnyan ọzọ m gi karị hụn m rị e nyin.

¹³ M nọ gi imẹ abalị hụ jẹnmẹ, ghashi Ọnụ-mgbọn rị ibẹka Ọdanmgbugbu pụha, dọn ihun ibẹka Ọmị Jakalụ lẹ Ọnụ-mgbọn wẹ gha e kpọnpụ nsịn anụ; m hụ e jẹn, m hụ e lehunmẹ mgbọn Jerusalẹm wẹ tikpọ lẹ ọnụ-mgbọn ẹ ndị hụ wẹ gi ọkụn wiwi.

¹⁴ Ya m nọ gha ebẹhụ shi Ọnụ-mgbọn Isi-mirin lẹ Ọgọdọ eze, kanị ebe k'e ru anyịnyan m gha arịa,

¹⁵ ya m nọ gwarị ghasọnmẹ Ọdanmgbugbu hụ imẹ abalị hụ, lelesọnmẹ mgbọn ahụn. O mẹgụ, m nọ kin azụụn, ghakin Ọnụ-mgbọn ahụn rị ibẹka Ọdanmgbugbu banye imẹ obodo.

¹⁶ Ndị-isi ọrụn-gọmẹnti rịn'a amarịn ebe m jẹn mọbụ ihiẹn m rị e mẹ, makẹni o ke nwọn onyẹ m gwa ihiẹn ọwụlẹ — kẹ ndị Ju kẹ ndị nchụn-ẹjan kẹ ndị-isi ndị Ju kẹ ndị-isi ọrụn gọmẹnti rị ebẹhụ kẹ ndị ọzọ ile hụn sikọ d'e ye ẹka rụn ọrụn hụ.

Wẹ Ile E Kweri Ni Wẹ Dọnzimẹ Mgbọn Jerusalẹm

¹⁷ M nọ nwan sị wẹ, “Ụnụ a hụngụọ nwan nsọngbu ẹnyi rị imẹ ẹ: Jerusalẹm mẹ mkpọkọ-mkpọkọ, ọnụ-mgbọn ẹ ndị wẹ dụn ọkụn nọkwọ ẹrịra. Bịa nị nwan nị ẹnyi dọnzi mgbọn Jerusalẹm, nị ẹnyi hụn ụzọ pụha imẹ ifẹnrẹn.”

¹⁸ M nọ nwan gwa wẹ ọhụnma Osolobuẹ mẹni m lẹ ihiẹn eze gwa m. Wẹ nọ sị, “Nị ẹnyi dọnzimẹn'ẹ nwan!” Ya wẹ nọ bidọn ọrụn-ọma hụ.

¹⁹ Kanị ogẹn Sanbalatị onyẹ Horọnụ lẹ Tobaya onyẹ alị Amọnụ ahụn rị ndị-isi ọrụn gọmẹnti lẹ Gẹshẹm onyẹ Arabụ gi nụ a, wẹ nọ kpa ẹnyi ye ẹmụ, gi ọnụ mẹ ẹnyi, sị, “Kị wụ ihiẹnni ụnụ rị e mẹ? Ụnụ chọ nị ụnụ nupụ isi okpuru eze?”

²⁰ Ya m nọ sị wẹ, “Osolobuẹ rị elu-igwee k'e mẹ ẹ ghanị ẹnyi, ẹnyi ndị idibo ẹ e lihi dọnzi ẹ. O mẹ nke ụnụ, onwọnni ebe Jerusalẹm nọ wụ nke ụnụ, onwọnni hụn ọwụlẹ k'e ru ụnụ ẹka imẹ ẹ; onwọnni ogẹn Jerusalẹm gi wụ nke ụnụ.”