Nehemiah 13 - Ika

Isi Nke Mmẹtọ E Dọnzisọnmẹ Wẹ Alị

¹ Wẹ gụn Ẹkụkwọ Mozizi ụhụọhịn hụ wẹ ha mgbọn Jerusalẹm ye ẹka Osolobuẹ, gụn a hụn ịhịan ile nụ. Wẹ nọ hụn a n'ọ sị wẹ e webanhankwọlẹ onyẹ alị Amọnụ mọbụ alị Mụabụ ọwụlẹ n'ọ wụrụ onyẹ nke Osolobuẹ,

² makẹni ewẹhẹni ni wẹ ndị Izrẹlụ ihiẹn-oriri lẹ mirin ogẹn wẹ gi gha Ijiptu pụla, kama, a kụ wẹ Balaam ụgwọ n'ọ bụ wẹ ọnụ, kanị, Osolobuẹ ẹnyi nọ mẹ ẹ gọzi ẹnyi hụn nkẹ o gi bụ ẹnyi ọnụ ahụn.

³ Ogẹn wẹ gi nụ iwuni, wẹ nọ gha imẹ ebọn Izrẹlụ chụpụ ndị ile ndị alị ọzọ mụ.

Nehimaya E Dọnzi Ihiẹn Wẹ Wiwisọnmẹ

⁴ Nị ihiẹnni d'e mẹ, onyẹ nchụn-ẹjan wụ Ẹliashibu kẹ wẹ bu mmughẹ ndị w'e butọ ihiẹn imẹ Ụlọ Chuku ẹnyi che ẹka a. Ẹliashibu lẹ Tobaya wị a kpa;

⁵ ya ọ nọ we mmughẹ ohu shịanị ye Tobaya, mmughẹ wẹ te buche ọka wẹ gi ye oyiye lẹ frankisẹnsị lẹ ihiẹn ụlọ-nsọ lẹ ohu-imẹ-ụzọ-iri ọka lẹ manya-ọhụn lẹ ofigbọn-olivu, hụn wẹ sị wẹ e ye ndị Livaị lẹ ndị ọkụ-ẹbụ lẹ ndị-nche ọnụ-mgbọn ụlọ-nsọ lẹ ihiẹn ndị wẹ a tụnị ndị nchụn-ẹjan.

⁶ Kanị, arị m Jerusalẹm ogẹn ihiẹnni gi rị e mẹ, makẹni ahụa hụn m'ẹ mmẹbụọ kwasị ọgụn-ẹbụọ eze Babilọnụ wụ Atazẹzẹsi kịma, m laburu ẹ. O mẹgụ, m nọ rịọ a nị m bịa;

⁷ m nọ kinhẹn Jerusalẹm. Ya kẹ m nọ nụ eje-ihiẹn hụ Ẹliashibu mẹ ebe ọ nọ ye Tobaya mmughẹ imẹ ezi-ọgwa Ụlọ Chuku.

⁸ Olulu nọ bu m ọda-ọda, m nọ gha mmughẹ hụ tụchanrịn ihiẹn Tobaya ile ye ezi.

⁹ M nọ gwa wẹ, wẹ nọ dọn mmughẹ ndị hụ w'e butọ ihiẹn nsọ nị wẹ rịzị ọchan; m nọ kwakinhẹn ihiẹn ndị te rị Ụlọ Chuku lẹ ọka ndị hụ wẹ gi ye oyiye lẹ Frankisẹnsị ndị hụ ebẹhụ wẹ te e buche wẹ.

¹⁰ M nụzị nị w'a ra yezi ndị Livaị ihiẹn runi wẹ; nị ndị Livaị ile lẹ ndị ọkụ-ẹbụ ofufe a lashigụọ ugbo wẹ ozigbo-ozigbo.

¹¹ Ya m nọ du ndị-isi ndị Ju kpemẹ, sị wẹ, “Kị ụnụ gbakitọnị Ụlọ-Osolobuẹ azụụn?” M nọ kpọkikomẹ ndị Livaị, bu wẹ che ọnụ-ọrụn wẹ.

¹² Ya ndị Juda ile nọ wẹhẹmẹ ụzọ-ohu-imẹ-ụzọ-iri ọka lẹ manya-ọhụn lẹ ofigbọn-olivu, e bu wẹ a tọ imẹ mmughẹ ndị hụ w'e butọ ihiẹn.

¹³ M nọ tumẹ onyẹ nchụn-ẹjan wụ Shẹlẹmia lẹ onyẹ nkuzi-Iwu wụ Zadọkụ lẹ Pẹdaya onyẹ Livaị nị w'e lepụ mmughẹ ndị hụ w'e butọ ihiẹn ẹnya. M nọ bu Hanan nwa Zakọ, nwa Matania cheni wẹ n'ọ hụn ụzọ e yeni wẹ ẹka. Uwẹ kẹ m tumẹ makẹni wẹ marịn wẹ kẹ ndị wẹ gi e dọn ẹnya lẹ makẹni ọrụn wẹ wụ ikeni ibe wẹ ihiẹn ndị hụ wẹ rị e wẹhẹni wẹ.

¹⁴ Euu Chuku m, gikwọ ihiẹnni nyanhan m! Dodo, e finchanpụkwọlẹ ọrụn-ọma ile m rụn hụn m gi kwadọn Ụlọ yụ wụ Chuku m lẹ ofufe rịn'a.

¹⁵ Ogẹn hụ, o nwọn ogẹn m gi hụn ndị rị a zọ vaịnị a pịpụha manya vaịnị Ụhụọhịn Ezumikẹn imẹ Juda. Wẹ hụzị e bubanhan ọka, e dọnye elu jaki, ya lẹ manya lẹ mkpụrụ-osisi vaịnị lẹ figi lẹ ibu ile rị ichẹn-ichẹn: wẹ hụ e gi Ụhụọhịn Ezumikẹn e bubanhan wẹ imẹ Jerusalẹm d'e re!! Ya m nọ jụgbọ wẹ, sị wẹ erezilẹ ihiẹn Ụhụọhịn Ezumikẹn.

¹⁶ Ndị alị Taya hụn bi imẹ Jerusalẹm hụ e bubanhan azụn lẹ ibu-afịa ile rị ichẹn-ichẹn, e re wẹ e ye ndị Juda Ụhụọhịn Ezumikẹn.

¹⁷ M nọ du ndị-isi Juda kpemẹ, sị wẹ, “Elee eje-ihiẹn wụ hụnnị ụnụ rị e mẹ, e mẹrụ Ụhụọhịn Ezumikẹn?!

¹⁸ Ẹlẹ ihiẹn ohuni kẹ ndị nẹdi ụnụ mẹ, hụn Chuku ẹnyi gi wẹhẹni ẹnyi lẹ obodoni nsọngbuni ile? Ụnụ e gimẹgụọ Ụhụọhịn Ezumikẹnni ụnụ rị e mẹrụ kpasumẹzi Osolobuẹ iwe o k'e gi mẹshi Izrẹlụ ikẹn!”

¹⁹ Ogẹn ọhịhị gi gbama ụhụọhịn Fraịde nị Ụhụọhịn Ezumikẹn d'e ru, m nọ sị wẹ kpọkinsọnmẹ ọnụ-mgbọn ndị hụ, w'a kpọpụkwọlẹ wẹ d'e ru ni Ụhụọhịn Ezumikẹn a ghafegụ ama ẹnyasị ekile. M nọ budẹ ụfọdụ idibo m che ọnụ-mgbọn ndị ahụn, amamgbe w'e bubanhan ibu ọwụlẹ Ụhụọhịn Ezumikẹn,

²⁰ Ndị-afịa lẹ ndị ọzọ e re ihiẹn a ranhịnghọ ọnụ-mgbọn Jerusalẹm mgbe ohu mọbụ ẹbụọ, makẹni anịnị wẹ wẹ banhan.

²¹ Kanị, a gba m wẹ mkpịnsịn-ẹka ẹnya, sị wẹ “Kị ụnụ ranhịnnị ụsụọ mgbọn hụ?! Ụnụ mẹzi ẹ, ẹka m e bitụ ụnụ!” Gha ogẹn hụ jẹnmẹ, abịazịnị wẹ Ụhụọhịn Ezumikẹn.

²² M nọ sị ndị Livaị wẹ fe ẹhụ kẹ Osolobuẹ dọn ku, jẹnmẹ d'e che ọnụ-mgbọn ndị ahụn, nị wẹ dọnmẹ Ụhụọkịn Ezumikẹn nsọ. Euu Osolobuẹ, gizikwọ hụnnị nyanhan m, y'e gi okẹn ihiẹn-ọsụsụọ ị mẹni m omikẹn!

²³ Ogẹn hụ, m nọzị hụn ndị Ju hụn lụ ikpoho obodo Ash'dọdụ alị Filistia lẹ ikpoho alị Amọnụ lẹ alị Mụabụ.

²⁴ Imẹ ụmụ wẹ, wẹ ke wẹ ụzọ ẹbụọ, azụụn ohu a sụ asụsụ ndị Ash'dọdụ mọbụ alị ndị ọzọ — asanị wẹ ẹka sụ asụsụ Juda.

²⁵ M nọ sọn ikẹnnyẹ ndị hụ kpemẹ, bụ wẹ ọnụ; m nọ gbu ụfọdụ imẹ wẹ ili, huepụ ntutu wẹ. M nọ mẹ wẹ kun Ẹfan Osolobuẹ, sị wẹ, “Ụnụ ewekọ ụmụ ụnụ ye ụmụ wẹ lụrụ; ụnụ alụkọ ụmụ wẹ ye ụmụ ụnụ mọbụ lụrụ ụmụ wẹ.

²⁶ Ẹlẹ ọlụlụ di-lẹ-nwunyẹ nọ ẹnịna kẹ Solomọnụ eze Izrẹlụ gi mẹ njọ ogẹn nke ẹ? Imẹ alị ndị hụ ile bu ọda, onwọnni eze nọ kẹ ịya; ihiẹn ẹ sụọzịkwọ Chuku ẹ a sụọ, Chuku nọ tumẹ ẹ eze ndị Izrẹlụ, kanị ikpoho alị ọzọ nọ mẹ onyẹ nọ kẹ ya mẹ njọ.

²⁷ Nị ẹnyi nụmazị nwan nị ụnụ nwẹn e mẹmẹ ihiẹnni jọgbu enwẹn ẹ, a gbakitọ Chuku ẹnyi azụụn ghahanị ịlụ ikpoho alị ọzọ?”

²⁸ Onyẹ ohu imẹ ụmụ Joyada nwa onyẹ-isi nchụn-ẹjan wụ Ẹliashibu rị a lụ nwa-okpoho Sanbalatị onyẹ Horọnụ; m nọ chụpụ nwa Joyada hụ ebe m rị.

²⁹ Euu Osolobuẹ m, nyanhan wẹ, makẹni e mẹrụgụọ wẹ ọrụn nchụn-ẹjan lẹ iwu ọrụn nchụn-ẹjan lẹ iwu i tini ndị Livaị.

³⁰ M nọ fe wẹ ẹhụ ihiẹn ile gbashịarị alị ọzọ kẹ Osolobuẹ dọn ku, keyesọnmẹ ndị nchụn-ẹjan lẹ ndị Livaị ọrụn, onyẹ-onyẹ lẹ ọrụn a.

³¹ M nọzị mẹ ndị Izrẹlụ tụhamazị nkụn hụ wẹ gi a fiye ọkụn ukpo nchụn-ẹjan imẹ Ụlọ-nsọ, wẹhẹmẹzi ihiẹn-ugbo ibuzọ, e mẹchanrịn wẹ ogẹn wẹ. Euu Osolobuẹ m, nyanhankwọ m ọnyanhan rị mma.