Nehemiah 12 - Ika

Isi Nke Mmẹbụọ Ndị Nchụn-ẹjan lẹ Ndị Livaị Lụaha Alị Izrẹlụ

¹ Ndịnị wụ ndị nchụn-ẹjan lẹ ndị Livaị hụn sọn Zerubabẹlụ nwa Shiẹtiẹlụ lẹ Jeshụa lụaha: Sẹraya, Jerimaya, Ẹzra,

² Amaria, Maluku, Hatushi.

³ Shẹkania, Rehum, Meremọtụ,

⁴ Ido, Ginẹtọnụ, Abija,

⁵ Mijamini, Mụadia, Bil'ga,

⁶ Shẹmaya; uwẹ lẹ Joyaribu, Jedaya,

⁷ Salu, Amoku, Hil'kia, Jedaya. Wẹ ile gba a kị ndị nchụn-ẹjan lẹ ndị itu wẹ ogẹn Jeshụa gi wụ onyẹ-isi nchụn-ẹjan.

⁸ Ndị Livaị sọn wẹ lụaha wụ: Jeshụa, Binui, Kad'miẹlụ, Shẹrẹbịa, Juda lẹ Matania hụn ya lẹ ndị itu ẹ nwọn oku ịbụ-ẹbụ lẹ iye Osolobuẹ ekele.

⁹ Bak'bukia lẹ Uni hụn rị itu wẹ wụ ndị e wuzo nchetarị ihun wẹ a bụsọn wẹ ẹbụ ogẹn ofufe.

¹⁰ Jeshụa onyẹ-isi nchụn-ẹjan wụ nẹdi Joyakim, Joyakim wụ nẹdi Ẹliashibu, Ẹliashibu wụ nẹdi Joyada,

¹¹ Joyada wụ nẹdi Jonatanị, Jonatanị wụ nẹdi Jadụa.

Ndị Kị Ndị Nchụn-ẹjan Ogẹn Joyakim

¹² Ogẹn Joyakim gi wụ onyẹ-isi nchụn-ẹjan, ndị kị ikpụlọ ichẹn-ichẹn ndị nchụn-ẹjan wụ ndịnị: Mẹraya a kị ikpụlọ Sẹraya. Hanania a kị ikpụlọ Jerimaya

¹³ Mẹshulam kị ikpụlọ Ẹzra, Jehohananị kị ikpụlọ Amaria.

¹⁴ Jonatanị kị ikpụlọ Maluku. Josẹfụ kị ikpụlọ Shẹbania.

¹⁵ Adna kị ikpụlọ Harim. Hẹl'kaị kị ikpụlọ Meremọtụ.

¹⁶ Zẹkaraya kị ikpụlọ Ido. Mẹshulam kị ikpụlọ Ginẹtọnụ.

¹⁷ Zikri kị ikpụlọ Abija. O nwọnzikwọ onyẹ kị ikpụlọ Miniamini. Pil'taị kị ikpụlọ Mụadia.

¹⁸ Shamụa kị ikpụlọ Bil'ga. Jehonatanị kị ikpụlọ Shẹmaya.

¹⁹ Matenaị kị ikpụlọ Joyaribu. Uzi kị ikpụlọ Jedaya

²⁰ Kalaị kị ikpụlọ Salu. Ẹba kị ikpụlọ Amoku.

²¹ Hashabia kị ikpụlọ Hil'kia, Natanẹlụ kị ikpụlọ Jedaya.

Ndị Livaị Lẹ Ndị Kịnị Wẹ

²² Nke ndị Livaị, wẹ detusọnmẹ ẹfan ndị-isi wẹ lẹ ndị-ndu ndị nchụn-ẹjan — ogẹn Ẹliashibu lẹ Joyada lẹ Johananị lẹ Jadụa gisọnmẹ wụ ndị-isi nchụn-ẹjan d'e ru ogẹn Dariọsụ eze Pẹshịa:

²³ wẹ detu nke ndị-isi ndị Livaị d'e ru ogẹn Johananị nwa Ẹliashibu gi wụ onyẹ-isi nchụn-ẹjan. Imẹ ẹkụkwọ wẹ detu ihiẹn mẹ ogẹn wẹ kẹ wẹ detu wẹ.

²⁴ Ndị-isi ndị Livaị wụ ndịnị: Hashabia, Shẹrẹbịa lẹ Jeshụa nwa Kad'miẹlụ, uwẹ lẹ ndị ọkụ-ẹbụ ibe wẹ hụn e turu azụụn hụn ẹbọ ihun wẹ ogẹn ẹbụ ịja-mma lẹ iye-ekele — ituni bụye, ituni e kwe — nọkẹ kẹ Defidi odibo Osolobuẹ dọn dọnmẹ ẹ;

²⁵ Matania lẹ Bak'bukia lẹ Obadaya rị imẹ wẹ. Mẹshulam lẹ Tal'mọnụ lẹ Akubu wụ ndị-nche ọnụ-mgbọn Ụlọ-nsọ, mmughẹ ndị w'e butọ ihiẹn hụn rịsọnmẹ ẹhụ ọnụ-mgbọn kẹ w'e che.

²⁶ Uwẹ kị ndị-nche ogẹn Joyakim nwa Jeshụa nwa Jozadakị gi wụ onyẹ-isi nchụn-ẹjan, ogẹn ahụn Nehimaya gi wụ Gọvanọ, ogẹn Ẹzra onyẹ nchụn-ẹjan lẹ onyẹ-nkuzi Iwu.

A Ha Wẹ Mgbọn Obodo Hụ Ye Ẹka Osolobuẹ

²⁷ Ogẹn wẹ gi nwan chọ nị wẹ ha mgbọn Jerusalẹm ye ẹka Osolobuẹ, wẹ nọ chọpụha ndị Livaị ebe ile wẹ bi, wẹhẹ wẹ Jerusalẹm makẹ mmẹmmẹ hụ, kẹni wẹ bụ ẹbụ-ịghọghọ lẹ ẹbụ-ekele, kụ kpajaị, kpọ ụbọ-mmaka lẹ ụbọ-layẹ ye mmẹmmẹ ahụn wẹ gi a ha mgbọn hụ e ye ẹka Osolobuẹ.

²⁸ A ghazị wẹ obodo ndị nọhunmẹ Jerusalẹm lẹ obodo ndị ahụn ndị Netofa, ndị ẹbụ, bi, wẹhẹ ndị ọkụ-ẹbụ,

²⁹ cheni ndị wẹ gha Bẹt-Gil'galụ lẹ ẹgbẹrẹ Gẹba lẹ Az'mavẹti werisọnmẹ, makẹni ebọn ndị ọkụ-ẹbụ Ụlọ-nsọ e pumẹsọnmẹgụọ ụmụ-alị fihunmẹ Jerusalẹm.

³⁰ Ndị nchụn-ẹjan lẹ ndị Livaị e dọngụ enwẹn wẹ nsọ, ya wẹ nọzị dọn ndị ọzọ ile họdụnị lẹ ọnụ-mgbọn ichẹn-ichẹn rị mgbọn Jerusalẹm nsọ, dọnzikwọ mgbọn lẹ enwẹn ẹ nsọ.

³¹ Ya m nọ gwa ndị-isi alị Juda, wẹ nọ shi elu mgbọn hụ. E tumẹ m itu-ẹbụ ẹbụọ hi-ogbe hụn jẹnkọ d'a gha a bụ ẹbụ-ekele: itu ohu ghashi ẹka-nni elu mgbọn hụ jẹnmẹ ibẹka Ọnụ-Mgbọn wẹ gha e kpọnpụ nsịn anụ;

³² Hoshaya nọ sọnmẹ wẹ, ndị-isi Juda nọ kebe ẹbụọ, azụụn ohu nọ sọnmẹzi itu-ẹbụnị,

³³ cheni Azaria, Ẹzra, Mẹshulam,

³⁴ Juda, Bẹnjamini, Shẹmaya lẹ Jerimaya;

³⁵ lẹzi ndị nchụn-ẹjan gi opi; uwẹ lẹ Zẹkaraya nwa Jonatanị nwa Shẹmaya nwa Matania nwa Maịkaya nwa Zakọ nwa Asafụ;

³⁶ lẹzi ndị otu Zẹkaraya ndịnị: Shẹmaya, Azarẹlụ, Milalaị, Gilalaị, Maaị, Natanẹlụ, Juda lẹ Hanani — uwẹ gi ihiẹn-egu ndị hụ odibo Osolobuẹ wụ Defidi tumẹ. Ẹzra onyẹ nkuzi-iwu hụ ihun ndịnị ile.

³⁷ E ru wẹ Ọnụ-mgbọn Isi-mirin, wẹ nọ gi mgbanyinrin Obodo Defidi nyinrin ebẹhụ mgbọn hụ nọ rị ebe jẹn elu; wẹ nọ nu obi-eze Defidi ye ụsụọ, ghafe, shi Ọnụ-mgbọn Mirin a gha hụn shi nkọ ọwụwa ẹnyanwụn.

³⁸ Itu-ẹbụ hụn ẹbọ nọ ghashi azụụn ẹka-ekpẹn. M nọ sọn ituni elu mgbọn hụ, mmẹ lẹ azụụn hụn ẹbọ họdụnị imẹ ndị-isi lẹ ndị-ọzọ; ẹnyi nọ ghafe Ụlọ-nche Ẹnya-mgba Uku, pụha Mgbọn Hụn Shịanị;

³⁹ ẹnyi nọ ghafe Ọnụ-mgbọn Ifrem, Ọnụ-mgbọn Jẹshana, Ọnụ-mgbọn Azụn, Ụlọ-nche Hananẹlụ lẹ ụlọ-nche ẹnyi a kpọ Ụlọ-nche “Ọgụn-isẹn”; ẹnyi nọ jẹnsọnmẹ d'e ru Ọnụ-mgbọn Atụnrụn. Ẹnyi e ru Ọnụ-mgbọn Ndị-nche, itu-ẹbụ ẹnyi lẹ wẹ wị nọ kụsị.

⁴⁰ Ya kẹ itu ẹbụọ hụ a bụ ẹbụ-ekele nọ nwan shi imẹ Ụlọ Osolobuẹ d'e werisọnmẹ ọnọdị wẹ; mmẹ nwẹn nọzị mẹ ẹrịra, mmẹ lẹ ndị-isi rị imẹ ndị mmẹ lẹ wẹ wị —

⁴¹ lẹ ndị nchụn-ẹjannị: Ẹliakim, Maaseya, Miniamini, Maịkaya, Ẹlionaị, Zẹkaraya lẹ Hanania — hụn gisọnmẹ opi,

⁴² lẹ Maaseya, Shẹmaya, Ẹliẹza, Uzi, Jehohananị, Mal'kija, Ẹlam lẹ Ẹza. A bụshi wẹ ẹbụ elu ọhụnma-ọhụnma; onyẹ hụn duni wẹ ẹbụ ahụn wụ Jezrahia.

⁴³ Ẹjan wẹ chụnyeni Osolobuẹ ụhụọhịn hụ e bukẹ; ịhịan ile hụ a ghọghọ makẹni Osolobuẹ e mẹgụọnị wẹ ihiẹn okẹn ịghọghọ; ikpoho lẹ ụmụ-ẹka sọnzi rị a ghọghọ. Ndị rị ebe teni nụ olu wẹ gi rị a ghọghọ imẹ Jerusalẹm.

A Rụnmazị Wẹ Ọrụn Ụlọ-nsọ

⁴⁴ Ogẹn ahụn, wẹ tumẹzi ndị sikọ d'e lepụ ẹnya ebe ile w'e butọ oyiye lẹ ihiẹn-ugbo ibuzọ lẹ ụzọ-ohu-imẹ-ụzọ-iri; uwẹ nwọn a gha ugbo-ugbo lẹ obodo-obodo, a na ịhịan ile ihiẹn Iwu sị wẹ e ye ndị nchụn-ẹjan lẹ ndị Livaị, e kpọnhẹn ẹ ebe w'e butọ ihiẹn, makẹni ọ sụọ ndị Juda ụsụọ imẹni ndị nchụn-ẹjan lẹ ndị Livaị hụn a rụn ọrụn Osolobuẹ ya.

⁴⁵ Wẹ nọ rụnsọnmẹ ọrụn rị ofufe Chuku wẹ lẹ ihiẹn ile gbashịarị idọnzi ihiẹn rụnị; ndị ọkụ-ẹbụ lẹ ndị-nche ọnụ-mgbọn nọzịkwọ rụnsọnmẹ nke wẹ. Wẹ ile rụn kẹ Defidi lẹ nwa a wụ Solomọnụ dọn ku —

⁴⁶ makẹni, mbụ-mbụ, ogẹn Defidi lẹ Asafụ, wẹ nwọnsọnmẹ ndị e du ndị ọkụ-ẹbụ wẹ gha a bụnị Osolobuẹ ẹbụ ịja-mma lẹ ẹbụ-ekele.

⁴⁷ Ya k'o gi mẹ ni ogẹnni, ogẹn Zerubabẹlụ lẹ ogẹn Nehimaya, ndị Izrẹlụ ile hụ a tụnị ndị ọkụ-ẹbụ lẹ ndị-nche ọnụ-mgbọn ihiẹn ụhụọhịn-ụhụọhịn; w'a tụzịkwọnị ndị Livaị ọzọ rịlẹni itu ẹbụbụọnị, ndị Livaị nkẹ a gha ihiẹn wẹ ye wẹ a tụnị ndị nchụn-ẹjan, ụmụ Ẹrọnụ, ihiẹn runi wẹ.