Nehemiah 10 - Ika

Isi Nke Iri

¹ Ndị bu ụzọ biye ẹka nkwerigbama hụ wẹ detu wụ ndịnị: Nehimaya wụ gọvanọ hụn wụ nwa Hakalia; ịya lẹ Zẹdikaya.

² Ndị nchụn-ẹjan biye ẹka wụ ndịnị: Sẹraya, Azaria, Jerimaya,

³ Pashuru, Amaria, Mal'kija,

⁴ Hatushi, Shẹbania, Maluku

⁵ Harim, Meremọtụ, Obadaya,

⁶ Daniẹlụ, Ginẹtọnụ, Baruku,

⁷ Mẹshulam, Abija, Mijamini,

⁸ Maazia, Bil'gaị, Shẹmaya.

⁹ Ndị Livaị hụn biye ẹka wụ ndịnị: Jeshụa nwa Azania, Binui onyẹ ikpụlọ Henadadị, Kad'miẹlụ —

¹⁰ uwẹ lẹ ndị Livaị ibe wẹ ndịnị: Shẹbania, Hodia, Kelita, Pẹlaya, Hanan,

¹¹ Mika, Rehobu, Hashabia,

¹² Zakọ, Shẹrẹbịa, Shẹbania hụn ẹbọ,

¹³ Hodia, Bani lẹ Bẹninu.

¹⁴ Ndị-isi biye ẹka wụ ndịnị: Parọshị, Pahatị-Mụabụ, Ẹlam, Zatu, Bani

¹⁵ Buni, Az'gadị, Bebaị,

¹⁶ Adonija, Big'vaị, Adini,

¹⁷ Ata, Hezikaya, Azuru,

¹⁸ Hodia, Hashum, Bezaị,

¹⁹ Harifu, Anatọtụ, Nẹbaị,

²⁰ Mag'piashi, Mẹshulam, Heziri,

²¹ Mẹshẹzabẹlụ, Zadọkụ, Jadụa,

²² Pẹlatịa, Hanan, Anaya,

²³ Hoshia, Hanania, Hashubu,

²⁴ Halohẹshi, Pil'ha, Shobẹkị,

²⁵ Rehum, Hashab'na, Maaseya,

²⁶ Ahia, Hanan hụn ẹbọ, Ananị,

²⁷ Maluku, Harim hụn ẹbọ lẹ Baana.

Ịhịan Ile E Biye Ẹka Nkwerigbama Hụ

²⁸ Ndị họdụnị — kẹ ndị nchụn-ẹjan kẹ ndị Livaị kẹ ndị e che nche ọnụ-mgbọn Ụlọ-nsọ kẹ ndị ọkụ-ẹbụ kẹ ndị e jẹn ozi Ụlọ-nsọ, uwẹ lẹ ndị ile ghagụ imẹ ndị alị ọzọ wụlẹni ndị Ju wepụ enwẹn wẹ makẹ ufiri Iwu Osolobuẹ, kẹ uwẹ kẹ inyẹnmẹ wẹ kẹ ụmụ wẹ ikẹnnyẹ lẹ ikpoho — ile marịngụ ihiẹn lẹ ndị a ghọta ihiẹn.

²⁹ Wẹ ile nọ nwan sọn umunẹ wẹ lẹ ndị-isi wẹ kun ẹfan Osolobuẹ, sị a mẹshi wẹ ikẹn omẹni emẹni wẹ ihiẹnni wẹ kwe nkwa a, ya wẹ nọ kwe nkwa nị wẹ sikọ d'e dọnmẹ Iwu Chuku hụn o gi odibo ẹ wụ Mozizi ye; nị wẹ sikọ d'e dọnrin ẹnya dọnmẹchanrịn ụmụ-iwu lẹ usọnrọn lẹ uhi Osolobuẹ Di-nwọnni ẹnyi yi.

³⁰ Wẹ sị, “Ẹnyi ewekọ ụmụ ẹnyi ye ndị alị ọzọ ndịnị nọhunmẹni ẹnyi lụrụ mọbụ lụye ụmụ ẹnyi ikpoho wẹ.

³¹ “Ndị alị ọzọ ndịnị buhẹ ibu-afịa mọbụ ọka ọwụlẹ Ụhụọhịn Ezumikẹn d'e re, ẹnyi eṅọnnarịnkọ wẹ ya Ụhụọhịn Ezumikẹn mọbụ ụhụọhịn ọwụlẹ rị nsọ. O ru ahụa nke ẹsa ọwụlẹ, ẹnyi arụnkọ ugbo ẹnyi; o ru ahụa ahụn, ẹnyi a kagbu ụgwọ ọwụlẹ onyẹ Ju ibe ẹnyi gi ẹnyi.

³² “Ẹnyi e kwerighọ nị ogbo ẹnyi rọ ịkụ ụzọ-ohu-imẹ-ẹtọ egho-shẹkẹlụ, nị wẹ gi ẹ e mẹ ihiẹn ile wẹ gi e fe ofufe imẹ ụlọ Chuku ẹnyi —

³³ kẹ imẹmẹsọnmẹ brẹdi hụ w'e butọ elu teburu ihun Osolobuẹ kẹ ọka lẹ ẹjan w'a dụn ọkụn hụn w'a chụnye ụhụọhịn-ụhụọhịn kẹ oyiye ndị w'e ye Ụhụọhịn Ezumikẹn rị ichẹn-ichẹn lẹ ifọn ọhụn ọwụlẹ lẹ mmẹmmẹ ndị wẹ tumẹsọnmẹ imẹ Iwu; kẹ oyiye ichẹn-ichẹn rị nsọ w'e yesọnmẹ kẹ ẹjan-njọ wẹ gi a gbarị isi ndị Izrẹlụ; wẹ gizikwọ a a rụn ihiẹn ile w'a rụn imẹ ụlọ Chuku ẹnyi.

³⁴ Ẹnyi ile, kẹ ndị nchụn-ẹjan kẹ ndị Livaị kẹ ndị alị — ẹnyi a nyangụọ utẹn Osolobuẹ gi họrịsọnmẹ ogẹn onyẹ-onyẹ lẹ ikpụlọ a sikọ d'e gi wẹhẹ nkụn imẹ ahụa ụlọ Chuku ẹnyi, nkụn hụn w'e gi a dụn ihiẹn ọkụn elu ukpo nchụn-ẹjan Osolobuẹ Di-nwọnni ẹnyi — kẹ wẹ dọn de ẹ imẹ Iwu.

³⁵ “Ẹnyi e kwerizighọ nị ẹnyi sikọ d'a gha e wẹhẹ ihiẹn-ugbo ibuzọ ẹnyi lẹ mkpụrụ-osisi ibuzọ ẹnyi ụlọ Osolobuẹ ahụa-ahụa.

³⁶ Kẹ Iwu dọnzi ku, ẹnyi sikọ d'a gha e wẹhẹ ikẹnnyẹ ibuzọ ẹnyi ile ụlọ Chuku ẹnyi, lẹzi okẹn ibuzọ anụ ẹnyi mụ, kẹ efin kẹ atụnrụn. Ẹnyi sikọ d'e we wẹ e ye ndị nchụn-ẹjan hụn a rụn ọrụn ebẹhụ.

³⁷ Ẹnyi sikọ d'a gha e wẹhẹni ndị nchụn-ẹjan rị ebe w'e butọ ihiẹn-oriri imẹ ụlọ Chuku ẹnyi ya: kẹ ọka ibuzọ ẹnyi gwọ kẹ oyiye ọka ibuzọ ẹnyi kẹ mkpụrụ ibuzọ osisi ẹnyi ọwụlẹ mị kẹ manya ọhụn ibuzọ ẹnyi kẹ ofigbọn-olivu ibuzọ ẹnyi, kẹni w'e bu ẹ a tọ ebẹhụ. Ẹnyi k'a rị e wẹhẹzikwọnị ndị Livaị ụzọ-ohu-imẹ-ụzọ-iri ihiẹn-ugbo ẹnyi, makẹni ndị Livaị nwọn a na ụzọ-ohu-imẹ-ụzọ-iri imẹ ụmụ-alị ile ẹnyi n'a rụn ugbo.

³⁸ “Onyẹ nchụn-ẹjan, onyẹ ebọn Ẹrọnụ, sikọ d'e sọnrịrị ndị Livaị wẹ gha a nakikomẹ ụzọ-ohu-imẹ-ụzọ-iri; ndị Livaị sikọ d'e wepụha ụzọ-ohu-imẹ-ụzọ-iri ihiẹn ndị wẹ nakikomẹ, wẹhẹ ẹ Ụlọ Chuku ẹnyi d'e bu ẹ tọ ebe w'e butọ ihiẹn ebẹhụ.

³⁹ Ya wụ, ndị Izrẹlụ ile, kẹ ndị Livaị, sikọ d'a gha e wẹhẹ ọka, manya-ọhụn lẹ ofigbọn-olivu ebẹhụ w'e butọ ihiẹn Ụlọ-nsọ, ebẹhụ ndị nchụn-ẹjan rị ọrụn lẹ ndị e che ọnụ-mgbọn Ụlọ-nsọ lẹ ndị ọkụ-ẹbụ a nọdị. Ẹnyi agbakịtọkọ ụlọ Osolobuẹ ẹnyi azụụn.”