Nehemiah 1 - Ika

Isi Nke Ohu A Gwa Wẹ Nehimaya Nị Ụya Rị E Ri Jerusalẹm

¹ Ihiẹn Nehimaya nwa Hakalia de. Hụn mẹ ẹ ahụa ọgụn eze wụ Atazẹzẹsi kịma, imẹ ọnwan Kislẹvụ, ebe m rị obi-eze ẹ ahụn rị isi-obodo ẹ wụ Susa,

² nwẹnẹ m ohu w'a kpọ Hanani nọ gha alị ẹnyi wụ Juda bịa, ya lẹ ikẹnnyẹ ya lẹ wẹ wị. M nọ jụ wẹ ukwere ndị Ju ẹnyi ghasọnmẹ alị ndị wẹ kpụnjẹn wẹ lụaha lẹ isi-obodo ẹnyi wụ Jerusalẹm.

³ Wẹ nọ sị m, “Ndị Ju ẹnyi ghasọnmẹ alị ndị wẹ kpụnjẹn wẹ lụaha Juda rị imẹ okẹn nsọngbu lẹ ụya. Mgbọn Jerusalẹm rị mkpọkọ-mkpọkọ; ọnụ-mgbọn ndị rịn'a wẹ dụn ọkụn nọkwọ k'ọ nọ.”

Kẹ Nehimaya Dọn Rịọ Osolobuẹ

⁴ Ogẹn m gi nụ ihiẹn ndịnị, m nọ nọdị alị kwan ẹkwan, emẹshịanị m ẹhụ akpọhịn ole-lẹ-ole; m hụ e bu ọnụ, e mẹ ekpere a rịọ Chuku rị elu-igwee,

⁵ sị, “Euu Osolobuẹ, Chuku rị elu-igwee, Chuku hụn hi ogbe, hụn w'a tụ egun ẹ, hụn e gi ihiẹn-ọsụsụọ e sọn ndị ya lẹ wẹ kwerigbama, ndị ihiẹn ẹ a sụọ hụn rị e dọnmẹ iwu ẹ.

⁶ Dodo, gọn ntịn, dodo lee ẹnya, n'ị nụ ekpere mmẹ wụ odibo i rị nwan ihun i e mẹ efinaị lẹ uhinhin, a rịọ ị banyeni idibo i, ndị Izrẹlụ; m rị e ku ẹ nị ẹnyi ndị Izrẹlụ e mẹọlẹ njọ — kẹ mmẹ kẹ ikpụlọ nẹdi m e mẹgụọ ị njọ.

⁷ Ẹnyi e mẹọlẹ i njọ ọda-ọda. Ẹnyi e dọnmẹni iwu ndị hụn i ye ẹnyi, ẹnyi egini uhi i rụn ọrụn, ẹnyi edọnmẹni iwu ndị i ye odibo i wụ Mozizi.

⁸ “Dodo, nyanhan oku hụn ị gwa odibo i wụ Mozizi, sị a, ‘Omẹni ụnụ emẹni hụn runi ụnụ, m k'e feyịya ụnụ ye alị rị ichẹn-ichẹn;

⁹ kanị, ụnụ kinhẹn d'e kunrunzi m, dọnmẹmẹ iwu ndị m ye ụnụ, ọsụọn'a nị ndị nke ụnụ m chụpụ rị ebe kachanrịn e te, m sikọ d'a gha ebẹhụ kpọnlụa wẹ, e wẹhẹ m wẹ alịnị m họrị nị ịya jẹnkọ d'a za Ẹfan m.’

¹⁰ “Idibo i lẹ ndị nke i kẹ ndị Izrẹlụ wụ, ndị hụn i gi ikẹn i hi ogbe lẹ ẹka ị ahụn zeni gbapụha.

¹¹ Euu Di-nwọnni ẹnyi, dodo gọn ntịn ekpere odibo i ni lẹ idibo i ndị ọzọ hụn ọ sụọ nị wẹ e ye ẹfan ị ọghọ. Ye mmẹ wụ odibo i ẹwẹrẹ tannị, y'e mẹ eze kweri ihiẹn m jẹnkọ d'a rịọ a.” Ogẹn hụ, mmẹ wụ odibo eze hụn e buye eze manya.