Ndị Rom 9 - Ika

Isi Nke Itenẹi Okukwe Kẹ Ịhịan Gi A Wụ Onyẹ Izrẹlụ

¹ M rị e ku ezioku idẹnya Kraịstị, arị m a tụ ntụ, ịhọrị m rị a ghọnị m idẹnya Mmọn-nsọ nị arị m a tụ ntụ, nị

² okẹn ẹkwan jun m obi, nị ogẹn ile kẹ obi gi a chọ n'ọ gbawapụ m

³ ebe m rị e ro ndị alị m! Nkẹ ọ rị m nị Osolobuẹ bụ m ọnụ wepụ m imẹ Kraịstị, omẹni ọhụn kẹ wẹ e gi nwọn nzụọpụha.

⁴ M rị e ku oku ndị Izrẹlụ: uwẹ kẹ Osolobuẹ gi họnrin ụmụ; uwẹ k'ọ ghọsị ọghọ a hụ; uwẹ k'o ye nkwerigbama ahụn o kwademẹ; uwẹ k'o ye Iwu hụ; uwẹ k'o tumẹni ofufe hụ rị imẹ Iwu; uwẹ nwọnhẹn nkwa ndị hụ Osolobuẹ kwe;

⁵ Ebraham lẹ ndị nẹdi mbụ hụ wẹ marịn amarịn wụ ndị nke wẹ; ebọn wẹ kẹ wẹ mụye Kraịstị nọkẹ ịhịan — Kraịstị hụn wụ Osolobuẹ hụn ịhịan ile lẹ ihiẹn ile rị okpuru ẹ, ịja-mma ya rịn'a jẹnrin ejẹn! Isẹẹ.

⁶ Ẹlẹni ihiẹn Osolobuẹ ku banyeni ndị Izrẹlụ aghazịnị. Mba. Makẹni, ẹlẹ ndị Izrẹlụ ile wụ ndị Izrẹlụ nke-esi.

⁷ Ẹlẹdẹ ụmụ ẹfọ Ebraham ile wụ ụmụ a nke-esi, makẹni Osolobuẹ sị Ebraham, “Ẹka Aziki kẹ ụmụ wẹ jẹnkọ d'a kpọ ụmụ ị k'a gha bịa.”

⁸ Ọnwan ghọsị nị ẹlẹ ụmụ wẹ mụhụ ẹfọ wụ ụmụ Osolobuẹ, kanị, ụmụ gha nkwa Osolobuẹ kwe bịa, uwẹ kẹ wẹ a gụn nị wẹ wụ ụmụ nke-esi.

⁹ Makẹni, nkwa kẹ Osolobuẹ kwe ogẹn o gi sị, “Mgbeni akan-ile a bịazị m, Sẹra a mụ okẹnnyẹ.”

¹⁰ Ẹlẹdẹ ọhụn sụọ. Ogẹn Rebika gi rị imẹ ejimẹ, nẹdi ohu kẹ wẹ nwọn, hụn wụ Aziki nẹdi ẹnyi;

¹¹ kanị, nị wẹ d'a mụ wẹ, kẹ wẹ kelẹni mẹ ihiẹn ọwụlẹ — kẹ mma kẹ njọ — Osolobuẹ nọ ghọsị nị ihiẹn ọ chọ n'o mẹ k'o mẹ —

¹² nị ẹlẹ oku ọrụn kanị onyẹ ọ chọ n'ọ kpọ: ọ sị Rebika, “Hụn kanị sikọ d'e fe hụn-nta.”

¹³ Ọ rịhụ kẹ wẹ dọn de ẹ imẹ Ẹkụkwọ-nsọ sị, “M nwọn ihiẹn-ọsụsụọ Jekọpụ; kanị, enwọn m ihiẹn-ọsụsụọ Isọ.”

Osolobuẹ E Mẹ Uche Ẹ

¹⁴ Nị ẹnyi sị nwan nị Osolobuẹ e gbeyeni ịhịan? Mba, kaka!

¹⁵ Makẹni ọ sị Mozizi, “Onyẹ m chọ nị m mẹ omikẹn ẹ kẹ m'e mẹ omikẹn ẹ; onyẹ m chọ nị m mẹ ebere ẹ kẹ m'e mẹ ebere ẹ.”

¹⁶ Ya wụ nwan nị ẹlẹ “onyẹ hụn chọnị” mọbụ “onyẹ hụn lịlịmanị” kẹ wẹ gi e mẹ ẹ, kanị omikẹn Osolobuẹ sụọ k'o gi e mẹ ẹ.

¹⁷ Imẹ Ẹkụkwọ-nsọ, Osolobuẹ sị eze alị Ijiptu wụ Fẹro, “M wepụha ị kẹni m gi i ghọsị ikẹn m, gi ẹ mẹ ẹfan m ghagbarị ụwa ile.”

¹⁸ Ya wụ, ọ chọ n'o mẹ omikẹn ịhịan o mẹ omikẹn ẹ; ọ chọ n'ọ kpọkin ịhịan obi ọ kpọkin ẹ obi.

¹⁹ Kanị ụnụ k'a sị m, “Kị Chuku rị nwan e kpeni? Onyẹ napụtu Chuku ihiẹn ọ chọ n'o mẹ?”

²⁰ Kanị, ịyụ wụ ịhịan-mmaka, onyẹ k'ị wụdẹ nwan i gi a shịarị Osolobuẹ oku? Ihiẹn wẹ kpụ a jụdẹ nwan onyẹ kpụn'a, “Kị haịn i gi kpụ m ẹnịna?”

²¹ Ọkpụ-ite enwọnzi ikẹn gi ọkpụkpụ-ụrụa kpụ ihiẹn ọ chọ n'ọ kpụ? Ọsụọ a o gi ẹ kpụ ite wẹ gi ẹ mẹ ihiẹn-ọghọ, ọ sụọzịkwọ a o gi ẹ kpụ ite wẹ gi e gbu alị.

²² Kị rị a omẹni Osolobuẹ kpachanpụ ẹnya gi okẹn ndidin sọn ndị ọ sị o k'e tikpọ, kẹni o gi ihiẹn o k'e mẹ wẹ ghọsị iwe-lẹ-ọnụma a, mẹ ịhịan marịn ikẹn ẹ?

²³ Kị rị a omẹni o gi ẹ ghọsị ndị ọ chọ n'o mẹni omikẹn ikẹn ẹ hi ogbe, ndị ọ sị o k'e ye ọghọ,

²⁴ ya wụ ẹnyi ndị hụn ọ kpọ — kẹ ndị rị imẹ ẹnyi wụ ndị Ju ndị wụlẹni ndị Ju.

²⁵ Ọnwan k'o ku imẹ Ẹkụkwọ-nsọ, imẹ ẹhụhụọ Hosia, sị, “Ndị te wụlẹni ndị nke m kẹ m jẹnkọ nwan d'a kpọ ‘Ndị nke m.’ Alị m te nwọnlẹni ihiẹn-ọsụsụọ a kẹ m jẹnkọ nwan d'a kpọ ‘alị m nwọn ihiẹn-ọsụsụọ a.’

²⁶ Ebahụn wẹ nọ sị wẹ, ‘Ụnụ ẹlẹ ndị nke m’ kẹ wẹ k'a nọzị kpọ wẹ ‘ụmụ Osolobuẹ ahụn rị ndụn.’ ”

²⁷ Nke ndị Izrẹlụ, Azaya gi wẹ yi oro, sị, “Ọsụọn'a nị ndị Izrẹlụ bu ọda kẹ ẹjan rị mkpẹnrẹn ohimin, ndị Osolobuẹ k'a zụọpụha imẹ wẹ ebukọ ọda;

²⁸ makẹni, Di-nwọnni-ẹnyi sikọ d'e mẹkẹnrin ihiẹn ọ sị o k'e mẹ alị hụ, mẹ wẹ ya ru alị!”

²⁹ Ẹrịra kẹ Azaya dọnzi ku ẹ mbụ, sị, “Omẹni Osolobuẹ ihiẹn ile rị okpuru ẹ ete nịnị wẹ gbuhọdụnị ẹnyi ụmụ, nkẹ ẹnyi a nọgụọ kẹ Sodọm, nkẹ ẹnyi a nọgụọ kẹ Gomora.”

³⁰ Kị ẹnyi k'e kuzi nwan? Nị ndị alị ọzọ te rịlẹni e mẹ oku ezi-omumẹ a wụrụgụọ nwan ndị ezi-omumẹ ẹnya Osolobuẹ, ezi-omumẹ wẹ gi okukwe wẹ ye wẹ;

³¹ bụ ndị Izrẹlụ, hụn rị a lụ nị Osolobuẹ gi Iwu wẹ rị e dọnmẹ kuni wẹ ọhụnma, asanị ẹka wụrụ ndị ezi-omumẹ ẹnya Osolobuẹ.

³² Kị haịn wẹ gilẹni sa ẹka? Makẹni egini wẹ okukwe mẹ ẹ, ọrụn wẹ kẹ wẹ gi dọn ẹnya, ya wẹ nọ kpọgburu Ọmụma ahụn ịhịan a kpọgburu,

³³ kẹ Ẹkụkwọ-nsọ dọn ku ẹ, sị, “Lee ẹnya, e butọgụọ m ọmụma imẹ Zayọnụ, ọmụma ịhịan a kpọgburu a dan, nkumẹ hụn k'e mẹ wẹ dan. Kanị, o kpuyekọ onyẹ kwerinin'ẹ.”