Ndị Rom 8 - Ika

Isi Nke Ẹsatọ Obibi Mmọn-nsọ Rị A Kị

¹ Ya wụ, onwọnzini nwan ikpe hụn ma ndị rị imẹ Kraịstị wụ Jizọsị, ndị rịzịlẹni e bi kẹ ịhịan-mmaka kanị kẹ Mmọn-nsọ dọn chọ.

² Makẹni, ọkịkị ahụn Mmọn-nsọ gi e ye ndụn imẹ Jesu Kristi a gbapụhagụọ ẹnyi ẹka ọkịkị ahụn njọ gi e buhẹ ọnwụn.

³ Makẹni, ihiẹn nwẹn Iwu Mozizi salẹni ẹka mẹ yeni ndụn arị ịhịan, Osolobuẹ e mẹgụọ a nwan ghahanị izihẹ Nwa a nọkẹ ịhịan mmaka hụn ndị-njọ wụ, kẹni o wepụ njọ, Osolobuẹ nọ gi ẹ ma njọ rị imẹ ịhịan ikpe.

⁴ Osolobuẹ mẹ ihiẹnni kẹni ihiẹn rị mma Iwu chọ hụn ụzọ e mẹ imẹ ndụn ẹnyi ndị rịzịlẹni e bi kẹ ịhịan-mmaka kanị kẹ Mmọn-nsọ dọn chọ.

⁵ Ndị rị e bi kẹ ịhịan-mmaka e ro nke ịhịan-mmaka; kanị ndị hụn e bi kẹ Mmọn-nsọ dọn chọ e ro nke Mmọn-nsọ.

⁶ I ro iroro kẹ ịhịan-mmaka e buhẹ ọnwụn, kanị, iro iroro kẹ Mmọn-nsọ dọn chọ e ye ndụn lẹ udọn.

⁷ Makẹni, onyẹ hụn e ro kẹ ịhịan-mmaka ara kweyeni Osolobuẹ kaka, ara dọnmẹ Iwu Osolobuẹ; eziẹ, ọ nịkọ a dọnmẹ.

⁸ Onyẹ e bi kẹ ịhịan-mmaka asakọ ẹka mẹ ihiẹn a sụọ Osolobuẹ.

⁹ Kanị, ụnụ nwẹn, ụnụ arị e bi kẹ ịhịan-mmaka; Mmọn-nsọ rị a kị ụnụ, omẹni eziẹ rọ nị Mmọn Osolobuẹ rị imẹ ndụn ụnụ, makẹni onyẹ ọwụlẹ nwọnlẹni Mmọn Kraịstị ẹlẹ nke Kraịstị.

¹⁰ Kanị, omẹni Kraịstị rị imẹ ụnụ, ẹhụ ụnụ a nwụnhụngụọ yeni njọ, mmọn ụnụ hụ ndụn yeni ezi-omumẹ.

¹¹ Omẹni Mmọn onyẹ hụn gha ọnwụn weli Kraịstị bi imẹ ndụn ụnụ, onyẹ hụn weli Kraịstị sikọ d'e mẹzikwọ ẹhụ ụnụ a nwụnhụnnị n'ọ rị ndụn — ghahanị Mmọn a hụn bi imẹ ndụn ụnụ.

¹² Umunẹ m, ya wụ nwan nị onwọnni ụgwọ ẹnyi gi ịhịan-mmaka ahụn ẹnyi wụ mbụ hụn ẹnyi e gi bi k'ọ chọ.

¹³ Makẹni, ụnụ bimẹ kẹ ịhịan-mmaka, ụnụ k'a nwụnhụnrịrị. Kanị, ụnụ gi isọn Mmọn-nsọ gbupụ eje-ihiẹn ndị ahụn ẹhụ e mẹ, ụnụ k'a rị ndụn.

¹⁴ Makẹni, ndị ile Mmọn Osolobuẹ rị e du wụ ụmụ Osolobuẹ.

¹⁵ Makẹni mmọn hụn Osolobuẹ ye ụnụ ẹlẹ mmọn igbọn, hụn ụnụ e gi tụmazị egun, kanị Osolobuẹ ye ụnụ mmọn hụn o gi mụnrụn ụnụ, mmọn ahụn e mẹ ẹnyi a hị Osolobuẹ, “Baba! Baba Nẹdi m!”

¹⁶ Mmọn-nsọ lẹ enwẹn ẹ hụ e sọn mmọn ẹnyi a shịa ẹri nị ẹnyi wụ ụmụ Osolobuẹ nke-esi.

¹⁷ O mẹ nwan nị ẹnyi wụ ụmụ, ihiẹn nẹdi ẹnyi wụ nke ẹnyi, ihiẹn Osolobuẹ wụ nke ẹnyi: ẹnyi lẹ Kraịstị gba nwan nwọn ihiẹn Osolobuẹ, omẹkwọnị ẹnyi e sọn nwan Kraịstị ta afụnfụn kẹni ẹnyi sọnzi ẹ nwọnrin ọghọ.

Ọghọ Hụn Lalanịnị Ẹnyi

¹⁸ E gighọ m'a dọn nị afụnfụn ẹnyi rị a ta ogẹnni eruni hụn wẹ e gi jeni ọghọ wẹ jẹnkọ d'e ye ẹnyi ihun.

¹⁹ Ihiẹn ile Osolobuẹ ke rịzị e che nị Osolobuẹ ye ụmụ a ọghọ ahụn lalanịnị wẹ.

²⁰ Makẹni Osolobuẹ bu ihiẹn ile o ke tọ imẹ ụya; ẹlẹni ihiẹn o ke chọ n'ọ rị imẹ ụya, kanị, Osolobuẹ hụn bu ẹ tọ imẹ ụya chọ n'ọ rị ẹrịra, makẹni o nwọnghọ ihiẹn o bu obi:

²¹ nị omẹgụ, ọ tọpụzị ihiẹn ndị ọzọ ile o ke imẹ iwi wẹ rị a la, e sọn wẹ ụmụ Osolobuẹ weri enwẹn wẹ nke-esi.

²² Makẹni ẹnyi a marịnghọ nị ihiẹn ile Osolobuẹ ke hụkwọ nwan a sụn udẹn kẹ okpoho imẹ rị e mẹ d'e ru ogẹnni.

²³ Ẹlẹdẹ ihiẹn ndị ọzọ o ke sụọ, kanị ẹnyi nwọnzi, ẹnyi ndị nwọndẹ Mmọn-nsọ hụn Osolobuẹ bu ụzọ e ye — ẹnyi hụzịkwọ nwan a sụn udẹn, kẹ ẹnyi dọn rị e che ni Osolobuẹ mụrụnchanrịn ẹnyi, n'o wepụha ẹhụ ẹnyi ụya ọ rị imẹ ẹ.

²⁴ Ihiẹnni ẹnyi rị e lee ẹnya a kẹ Osolobuẹ gi ufiri ẹ zụọpụha ẹnyi. Ẹnyi e ke nwọnhẹn ẹ, nkẹ ẹnyi e lebehi ẹnya a — olilẹnya ihiẹn ị hụngụ ẹlẹzi olilẹnya. Kị ịhịan k'e lemẹzini ẹnya ihiẹn bụ ọ hụngụọ a?

²⁵ Kanị, omẹni ẹnyi e ke hụn ihiẹn ẹnyi rị e lee ẹnya a, ẹnyi e din ndidin cheri ẹ.

Eyemẹka Mmọn-nsọ

²⁶ Mmọn-nsọ nkẹ e yezini ẹnyi ẹka ebe o mẹ ni ẹnyi ezuni oke. Ẹnyi amarịn ihiẹn ẹnyi k'a rịọ imẹ ekpere, kanị Mmọn-nsọ lẹ enwẹn ẹ gi ịsụn-udẹn a rịọdọnni ẹnyi Osolobuẹ, e ku ihiẹn ọnụ ghalẹni a saẹka e ku.

²⁷ Osolobuẹ hụn e legha obi ẹnyi marịn ihiẹn Mmọn-nsọ rị a rịọ, makẹni Mmọn-nsọ a rịọdọnni ndị-nsọ kẹ Osolobuẹ dọn chọ.

²⁸ Ẹnyi a marịnghọ nị Osolobuẹ e gi ihiẹn ile a rụnpụhanị ndị ihiẹn ẹ a sụọ ihiẹn rị mma, ndị ọ kpọ makẹ ihiẹn ọ chọ n'o mẹ.

²⁹ Osolobuẹ a marịngụọ wẹ n'o d'a kpọ wẹ. Ya ọ nọ họtọ wẹ n'o k'e mẹ wẹ wụrụ ndị rị kẹ Nwa a, kẹni Nwa a wụrụ nwa-ibuzọ imẹ ụmụ bụ ọda.

³⁰ Ndịnị ọ họtọ k'ọ kpọ; ọ kpọgụ wẹ, ọ nọ kuni wẹ ọhụnma, ya ọ nọ ye wẹ ọghọ.

Ihiẹn-ọsụsụọ Osolobuẹ Hụn Rị Imẹ Jesu Kristi

³¹ Kị ẹnyi k'e ku nwan? O mẹ nwan nị Osolobuẹ rị ẹnyi azụụn, onyẹ k'a saẹka mẹ ẹnyi ihiẹn ọwụlẹ?

³² Omẹni Osolobuẹ etuni nị Nwa a rọ, kama, o gi ufiri ẹnyi ile we ẹ ye, o yechanrịnkọ ẹnyi ihiẹn ndị ọzọ ile?

³³ Onyẹ k'a sa nwan ẹka ma ndị Osolobuẹ họrị ikpe, ebe o mẹ ni Osolobuẹ lẹ enwẹn ẹ rị e kuni wẹ ọhụnma?

³⁴ Onyẹ k'a ma wẹ nwan ikpe, ebe o mẹ ni Jesu Kristi rị nwan ẹka-nni Osolobuẹ a rịọdọnni ẹnyi — Jesu Kristi hụn nwụnnị ẹnyi ọnwụn, hụn gizidẹ ufiri ẹnyi gha ọnwụn lihi? N'ọ ma ẹnyi ikpe?

³⁵ Kịnị k'a sa nwan ẹka napụ ẹnyi ihiẹn-ọsụsụọ Kraịstị? Nsọngbu? Ra afụnfụn? Ra ukpokpo; ra ẹgụn; ra ahụnnị ẹkwa je; ra eje-ọnọdị; ra ọpịa-agha?

³⁶ Wẹ ile kẹ Ẹkụkwọ-nsọ gi sị, “Ufiri i kẹ wẹ gi e gbu ẹnyi ndị nke i ogẹn ile; ẹnyi rị kẹ atụnrụn wẹ dukọ d'e gbu.”

³⁷ Mba!! Imẹ ihiẹn ndịnị ile, ẹnyi wụ ndị-mmẹri ka ndị-mmẹri ile, ghahanị onyẹ ahụn nwọn ihiẹn-ọsụsụọ ẹnyi!

³⁸ Makẹni, o we m ẹnya nị kẹ ọnwụn kẹ ndụn, kẹ ndị mmọn-ozi kẹ eje-mmọn ndị rị a kịnị, kẹ ihiẹn rị ogẹnni kẹ ihiẹn rị ihun, kẹ ikẹn ile rịnị;

³⁹ kẹ ihiẹn jẹn elu kẹ ihiẹn mi mgbugbu, kẹ ihiẹn ọzọ ọwụlẹ wẹ ke eke — onwọnni hụn k'a saẹka wepụ ẹnyi imẹ ihiẹn-ọsụsụọ Osolobuẹ rị imẹ Kraịstị wụ Jizọsị Di-nwọnni-ẹnyi!