Ndị Rom 7 - Ika

Isi Nke Ẹsa Ẹnyi Lẹ Jesu Nọ Kẹ Di Lẹ Nwunyẹ

¹ Umunẹ m, ụnụ amarịn nị ebe ịhịan rị ndụn sụọ kẹ Iwu nọ a kị a? A marịnghọ m nị m rị e deni ndị marịn Iwu.

² Ya k'o gi mẹni iwu rọ nị okpoho nwọn di k'a lụrịrị di ẹ kasị a mẹni di ẹ ahụn hụ ndụn. Di ẹ nwụnhụn, iwu di-lẹ-nwunyẹ egizi ẹ.

³ Ya wụ, omẹni ya lẹ okẹnnyẹ ọzọ a sụọma mọbụ lụma ebe di ẹ rịkwọ ndụn, wẹ k'a kpọ a onyẹ zọ-ụkụ-ye-ọfịa; kanị omẹni di ẹ a nwụnhụngụọ, iwu hụ egizi ẹ: ọ lụma okẹnnyẹ ọzọ, ọ zọnị ụkụ ye ọfịa.

⁴ Umunẹ m, ụnụ nwẹn a nwụnnahịngụọzị Iwu Mozizi ebe ụnụ nọ sọn Kraịstị nwụn, kẹni wẹ hụn ụzọ we ụnụ ye onyẹ ọzọ lụrụ, onyẹ hụ Osolobuẹ gha ọnwụn weli, kẹni ẹnyi mịnị Osolobuẹ mkpụrụ.

⁵ Makẹni, ogẹn ahụn enwẹn ẹnyi gi rị a kị ẹnyi, eje-ihiẹn ndị ahụn Iwu kpọtiẹn rị ọrụn mkpamkpa ẹhụ ẹnyi, a mịnị ọnwụn mkpụrụ.

⁶ Kanị, ẹnyi e nwọnringụọ nwan enwẹn ẹnyi okpuru Iwu Mozizi, ẹnyi a nwụnnahịngụọ ihiẹn hụn te gini ẹnyi, kẹni ẹnyi hụn ụzọ femẹ ofufe ọhụn Mmọn-nsọ, ẹlẹzi ofufe-akan Iwu wẹ de.

Iwu Osolobuẹ Anịkọ Ịhịan Ndụn Rịlẹni Dọnmẹ

⁷ Kị ẹnyi e kuzi nwan? Nị ẹnyi sị nwan nị Iwu Mozizi e buhẹ njọ? Mba nụ! Makẹni, omẹni ẹlẹ Iwu, m'e ke marịn ihiẹn njọ wụ. Omẹni Iwu asịnị, “Anịlẹ ihiẹn la ị ẹnya,” m'e ke marịn ihiẹn ọ wụ nị ihiẹn a la ịhịan ẹnya.

⁸ Kanị njọ hụn ihiẹn ahụn Iwu ku tụdọn, gi ẹ kpasu ihiẹn ọlịlẹnya rị ichẹn-ichẹn imẹ m. Ya wụnị, omẹni ẹlẹ Iwu, njọ wụ ihiẹn nwụnnị.

⁹ M te hụ ndụn kẹ m kelẹni nụ iwu; kanị, a nụ m ihiẹn ahụn iwu ku, njọ nọ tụlụa —

¹⁰ m nọ nwụnhụn. Iwu hụn nkẹ e ye ndụn nọ buhẹni m ọnwụn!

¹¹ Njọ hụn ihiẹn ahụn Iwu ku tụdọn, gi ẹ dufie m, gi ẹ gbu m.

¹² Ya wụ, Iwu lẹ enwẹn ẹ rị nsọ; ihiẹn hụ Iwu ku rịzị nsọ, ihiẹn Osolobuẹ chọ rọ, ihiẹn rị mma rọ.

¹³ Ihiẹn rị mma buhẹni m nwan ọnwụn? Kaka akpohu! Njọ gi ihiẹn rị mma buhẹni m ọnwụn, gi ẹ ghọsịchanrịn nị njọ wụ njọ, gi ihiẹn Iwu ku ghọsị nị njọ a jọka.

¹⁴ Ẹnyi a marịnghọ nị Iwu wụ ihiẹn imẹ-mmọn, kanị mmẹ nwẹn wụ ịhịan-mmaka nwọnlẹni Mmọn-nsọ — nị m wụ igbọn njọ.

¹⁵ M'a ra ghọta ihiẹn m rị e mẹ. Makẹni, m'a ra mẹ ihiẹn m chọ nị m mẹ, kama, ihiẹn e ze m ize kẹ m'e mẹ.

¹⁶ Ebe o mẹ nwan nị ihiẹn hụn m chọlẹni nị m mẹ kẹ m'e mẹ, ya kẹ m gi e kweri nị Iwu rị mma nke-esi.

¹⁷ Ya wụ nwan nị ẹlẹzi mmẹ rị e mẹ ẹ, kanị, njọ rị imẹ m rị e mẹ ẹ.

¹⁸ Makẹni, a marịnghọ m n'o nwọnni kaka akpụ ihiẹn ohu rị mma imẹ m, imẹ mmẹ wụ ịhịan-mmaka. Makẹni, m'a chọ nị m mẹ ihiẹn rị mma, kanị, m'a ra saẹka mẹ ẹ.

¹⁹ M'a ra mẹ ihiẹn rị mma m chọ nị m mẹ, eje-ihiẹn m chọlẹni nị m mẹ kẹ m'e mẹ.

²⁰ Ẹghẹẹ, omẹni m'e mẹ ihiẹn m chọlẹni nị m mẹ, ya wụ nị ẹlẹzi mmẹ rị e mẹ ẹ — njọ rị imẹ m rị e mẹ ẹ.

²¹ Ya wụ, a hụngụọ m'a nwan n'o nwọn iwu rị ọrụn imẹ m, a kị m, hụn o gi e mẹ ni m chọ nị m mẹ ihiẹn rị mma, eje-ihiẹn sụọ kẹ m'a sa ẹka e mẹ.

²² Eziẹ, imẹ m, Iwu Osolobuẹ a sụọ m ụsụọ.

²³ Kanị, iwu ichẹn kẹ m rị a hụn rị ọrụn imẹ ẹhụ m, a lụsọn Iwu ahụn rị m mma ọgụn, e mẹ m a gbaye njọ hụn rị ọrụn mkpamkpa ẹhụ m.

²⁴ Ụya e gbuẹ m! Onyẹ k'a gbapụha m ẹka ẹhụnị rị e buhẹni m ọnwụn?!

²⁵ Ekele ya rịnị Osolobuẹ n'o jẹnkọ d'e mẹ ẹ ghahanị Di-nwọnni-ẹnyi wụ Jesu Kristi! Kẹ ihiẹn nọ nwan wụ nị: k'ọ rị m, e sọn m Iwu Osolobuẹ; kanị, kẹ m nọ, iwu njọ kẹ m'e sọn.