Ndị Rom 6 - Ika

Isi Nke Isin Nwụnnahịn Njọ, N'ị Rịnị Osolobuẹ Ndụn

¹ Kị ẹnyi k'e ku nwan? Nị ẹnyi mẹsọnmẹ nwan njọ kẹni ẹfọma hụn ụzọ barapụ?

² Mba nụ! Nanị ndị nọkẹ ẹnyi nwụnnahịngụ njọ e dọn tọ imẹ njọ e bi?

³ Ra ụnụ amarịn nị ndị ile wẹ gi mirin-Chuku buche imẹ Jesu Kristi, nị e gigụọ w'a bu wẹ che ọnwụn Jesu Kristi nwụn?

⁴ Ya wụ, e gigụọ wẹ mirin-Chuku wẹ mẹ ẹnyi ligbama ẹnyi lẹ Jesu, gi ẹ mẹ ẹnyi wụrụ ndị sọn ẹ nwụn, kẹni ẹnyi sọn ẹ lihi bimẹ ndụn ọhụn kẹ Nẹdi ẹnyi dọn gi ikẹn ẹ hi-ogbe mẹ ẹ gha ọnwụn lihi.

⁵ Ebe o mẹ ni ẹnyi lẹ ya a wụgụọ ohu ẹnịna ghahanị isọn ẹ nwụn, ẹnyi lẹ ịya k'a wụzịkwọ ohu ghahanị isọn ẹ lihi,

⁶ makẹni ẹnyi a marịnghọ nị ya lẹ onyẹ hụ ẹnyi wụ mbụ kẹ wẹ kpọgbu elu-obe, kẹni wẹ hụn ụzọ napụ onyẹ ahụn ẹnyi wụ mbụ ikẹn, amamgbe njọ ghazị a kị ẹnyi kẹ igbọn.

⁷ Makẹni, onyẹ nwụnhụngụnị arịzị okpuru njọ.

⁸ O mẹ nwan nị ẹnyi e sọngụọ Kraịstị nwụnhụn, ẹnyi e kwerighọ nị ẹnyi k'e sọnzi ẹ rịzị ndụn —

⁹ makẹni ẹnyi a marịnghọ nị hụnnị Kraịstị ghagụ ọnwụn lihi, ọ nwụnkọzị; ọnwụn enwọnzi ikẹn ebe ọ rị.

¹⁰ Makẹni, ọnwụn hụn ọ nwụn, njọ k'ọ nwụnnahịn, nwụnnahịnchanrịn. Ndụn ọ rị, Osolobuẹ k'ọ rịn'a.

¹¹ Ụnụ nwẹn, weri ni nwan enwẹn ụnụ kẹ ndị nwụnnahịngụ njọ lẹ ndị nọ imẹ Kraịstị wụ Jizọsị a rịnị Osolobuẹ ndụn.

¹² Anịlẹ ni nwan njọ a kị ẹhụ ụnụ, e mẹ ụnụ a gbaye eje-ihiẹn a gụnsọnmẹ ẹhụ ụnụ;

¹³ ewelẹ ni mkpamkpa ẹhụ ụnụ ye njọ gi họnrin ihiẹn-ọrụn o gi e mẹ eje-ihiẹn. Ka wechanrịn nị enwẹn ụnụ ye Osolobuẹ nọkẹ ndị wẹ ghagụ ọnwụn weli hụn rị ndụn; ụnụ e wechanrịn mkpamkpa ẹhụ ụnụ ile ye Osolobuẹ n'o gi họnrin ihiẹn-ọrụn ezi-omumẹ.

¹⁴ Ẹghẹẹ, njọ akịkọ ụnụ, makẹni ụnụ arịzị okpuru iwu, kanị okpuru ẹfọma.

Ndị Kwerini Wụ Igbọn Ezi-omumẹ

¹⁵ Kị ẹnyi e mẹzi nwan? Nị ẹnyi mẹsọnmẹ nwan njọ makẹni ẹnyi rị nwan okpuru ẹfọma Osolobuẹ ẹlẹzi okpuru Iwu? Kaka akpohu!

¹⁶ Ụnụ amarịn nị onyẹ ụnụ we enwẹn ụnụ ye nị ịya kẹ ụnụ e humẹni isi kẹ ụnụ wụ igbọn ẹ? Omẹni njọ rọ, o buhẹ ọnwụn; omẹni ihumẹ-isi rọ, o buhẹ ezi-omumẹ.

¹⁷ Kanị, ekele ya rịnị Osolobuẹ, nị, ọsụọn'a nị ụnụ te wụ igbọn njọ, ụnụ e gigụọ obi ụnụ ile humẹ isi, mẹ ihiẹn wẹ kuzi ụnụ kẹ wẹ dọn kuzi ẹ;

¹⁸ a gbapụhagụ wẹ ụnụ ẹka njọ, ụnụ nọ nwan họnrin igbọn ezi-omumẹ.

¹⁹ (M rị e ku ẹ hụ kẹ ịhịan e ku kẹni ọ nị ụnụ ghọha.) Kẹ ụnụ te dọn we mkpamkpa ẹhụ ụnụ ye ihiẹn-ụrụ lẹ eje-obibi nọkẹ igbọn — hụn ụnụ gi rị e bi eje-obibi, e biwaye, gizi ni nwan ẹrịra we mkpamkpa ẹhụ ụnụ ye ezi-omumẹ, kẹni ụnụ rị nsọ.

²⁰ Kẹ ụnụ wụ igbọn njọ, ụnụ arị okpuru ezi-omumẹ.

²¹ Kị wụ nwan erere ihiẹn ndị ahụn ụnụ mẹ ogẹn ahụn — hụn rị nwan e mẹ ụnụ ifẹnrẹn? Ọnwụn, ya kẹ ihiẹn ndị ahụn e buhẹ!

²² Kanị, hụnnị Osolobuẹ gbapụhagụ ụnụ ẹka njọ, ụnụ e họnrin igbọn Osolobuẹ, erere ụnụ wụ ịrị-nsọ hụn sikọ d'e wẹhẹ ndụn itẹbitẹ.

²³ Makẹni, ụgwọ njọ wụ ọnwụn, kanị ihiẹn-ọfẹ Osolobuẹ e ye wụ ndụn itẹbitẹ hụn rị imẹ Jizọs Kraịstị Di-nwọnni-ẹnyi.