Ndị Rom 5 - Ika

Isi Nke Isẹn Ẹnyi Lẹ Osolobuẹ E Dọngụọ Nwan!

¹ Ebe o mẹ nwan nị Osolobuẹ e gigụọ okukwe ẹnyi kuni ẹnyi ọhụnma, ẹnyi lẹ Osolobuẹ e dọngụọ nwan ghahanị Di-nwọnni-ẹnyi wụ Jesu Kristi,

² onyẹ hụn Osolobuẹ gha ẹka a gi okukwe ẹnyi webanhan ẹnyi ọnọdị ndị wẹ mẹni ẹfọma hụn ẹnyi turu nwan imẹ ẹ; ẹnyi rị nwan a ṅan makẹni ẹnyi rị e lee ẹnya ọghọ Osolobuẹ jẹnkọ d'e ye ẹnyi!

³ Ẹlẹdẹ ọhụn sụọ, ẹnyi a ṅanzị nị ẹnyi rị a hụn nsọngbu ẹnyi rị a hụn, makẹni ẹnyi a marịnghọ nị nsọngbu e wẹhẹ ndidin;

⁴ ndidin e wẹhẹ agụngụn rị mma; agụngụn rị mma e wẹhẹ olilẹnya —

⁵ bụ olilẹnyanị ekpuyekọ ẹnyi, makẹni Osolobuẹ nwọn ihiẹn-ọsụsụọ ẹnyi ọda-ọda — o hugụọd'a ye ẹnyi imẹ obi ghahanị Mmọn-nsọ a o ye ẹnyi.

⁶ Makẹni, Kraịstị nwụndọnni ẹnyi ndị njọ ọnwụn ogẹn ndụn gilẹni rị ẹnyi, ogẹn o gi rịchanrịn mkpa.

⁷ Ọ fụdẹ ọrụn ọda-ọda nị ịhịan nwụndọnni onyẹ ezi-omumẹ; ikẹnkwọ nị ịhịan s'ẹka nwụndọnni onyẹ o mẹni ọ rịka mma ọnwụn.

⁸ Kanị, nke Osolobuẹ, ọ ghọsịgụọ ẹnyi n'o nwọn ihiẹn-ọsụsụọ ẹnyi ọda-ọda ebe Kraịstị nọ nwụnnị ẹnyi kẹ ẹnyi rịkwọ imẹ njọ!

⁹ Hụnnị Osolobuẹ gi ufiri ẹdeke Jesu kuni ẹnyi ọhụnma, ya wụ nị ẹnyi jẹnkọ d'a wanahịnchanrịn iwe-lẹ-ọnụma Osolobuẹ ghahanị Jesu.

¹⁰ Makẹni, omẹni ogẹn ẹnyi gi wụ ndị-iṅẹnrẹn Osolobuẹ, o gi ọnwụn Nwa a dọnzi ẹgbata ẹnyi lẹ ya, ya wụ nị hụnnị ẹnyi lẹ ịya dọngụ, n'o gighọ nwan ndụn Nwa a zụọpụhachanrịn ẹnyi!

¹¹ Ẹlẹdẹ ọhụn sụọ, ẹnyi hụzịdẹ e gi Osolobuẹ a ṅan yeni ihiẹn Di-nwọnni-ẹnyi wụ Jizọs Kraịstị mẹ, onyẹ hụn Osolobuẹ gha nwan ẹka a dọnzi ẹgbata ẹnyi lẹ Osolobuẹ!

Ọnwụn Adam Buhẹ Lẹ Ndụn Kraịstị Wẹhẹ

¹² Ya wụ, kẹ njọ dọn gha ẹka okẹnnyẹ ohu wụ Adam banhan imẹ ụwa, buhẹ ọnwụn, ẹrịra kẹ ọnwụn dọn ru ịhịan ile ẹka makẹni ịhịan ile mẹ njọ.

¹³ Ẹghẹẹ, njọ a rịọlẹ imẹ ụwa nị wẹ d'e ye Iwu Mozizi, kanị, w'a ra gụn njọ omẹni iwu arịa.

¹⁴ Kanị, ọnwụn nọkwọ kịsọnmẹ ịhịan gha ogẹn Adam d'e rukwọrị ogẹn Mozizi — ọ kịghọdẹ ndị danlẹni iwu Osolobuẹ kpọ ẹfan nọkẹ hụn Adam dan. Wẹ k'a saẹka gi Adam kọwa onyẹ hụ kelẹni bịa ogẹn hụ — hụn wụ Kraịstị.

¹⁵ Kanị, ihiẹn Osolobuẹ ye ọfẹ anọnị kẹ njọ Adam. Ọnwụn kẹ njọ okẹnnyẹ ohu hụ wụ Adam buhẹni ndị bu ọda. Kanị, Osolobuẹ gi ẹfọma okẹnnyẹ ohu ahụn wụ Jesu Kristi mẹni ndị bu ọda ọhụnma, ye wẹ ihiẹn-ọfẹ — ẹlẹ ọnwụn.

¹⁶ Ọzọzị, ihiẹn Osolobuẹ ye ọfẹ anọnị kẹ ikpe-ọmụma hụn njọ okẹnnyẹ ohu hụ wụ Adam buhẹ. Makẹni, okinkin-ikpe kẹ wẹ gi sọn akpụ njọ ohu, gi ẹ ye ịhịan afụnfụn. Kanị Osolobuẹ gi ihiẹn-ọfẹ sọn njọ bu ọda ịhịan mẹ, kuni ịhịan ọhụnma.

¹⁷ Omẹni njọ okẹnnyẹ ohu ahụn wụ Adam kẹ ọnwụn gi ghaha ẹka a d'a kịma, kị k'e mẹ ndị nabanhan okẹn ẹfọma Osolobuẹ lẹ ezi-omumẹ o ye ọfẹ? Ya wụ nị o k'e wẹhẹni wẹ ndụn, ẹlẹzi ọnwụn — wẹ k'a rịferi ndụn wụ ndụn ghahanị okẹnnyẹ ohu hụ wụ Jesu Kristi.

¹⁸ Ya wụ, kẹ akpụ njọ ohu hụ Adam mẹ dọn buhẹni ịhịan ile ikpe-ọmụma, ẹrịra kẹ akpụ ihiẹn rị mma ohu Kraịstị mẹ dọn nwan e mẹ Osolobuẹ e kuni ịhịan ọhụnma, e ye ịhịan ndụn.

¹⁹ Makẹni, kẹ ndị bu ọda dọn họnrin ndị njọ makẹni okẹnnyẹ ohu hụ wụ Adam nupụ isi, ẹrịra kẹ Osolobuẹ k'e dọn nwan mẹ ndị bu ọda wụrụ ndị ezi-omumẹ makẹni okẹnnyẹ ohu hụ wụ Jizọsị humẹ isi.

²⁰ Iwu Mozizi banhanhụ d'e mẹ ịhịan danwaye iwu. Kanị ebe njọ nọ barahị kẹ ẹfọma Osolobuẹ nọ a karịdẹ ẹka —

²¹ n'ọ wụrụ nị kẹ njọ dọn gi ọnwụn kị ẹrịra kẹ ẹfọma Osolobuẹ k'e dọnzi gi ezi-omumẹ ọ rị e ye ịhịan kị — gi ẹrịra mẹ ịhịan nwọnhẹn ndụn-itẹbitẹ ghahanị Di-nwọnni-ẹnyi wụ Jizọs Kraịstị.