Ndị Rom 4 - Ika

Isi Nke Ẹnọ Ebraham Lẹ Okukwe

¹ Kị ẹnyi k'a sị nwan nị ya kẹ Ebraham nẹdi ẹnyi elu-ụwanị hụn?

² Omẹni ihiẹn Ebraham rụn kẹ Osolobuẹ gi kun'ẹ ọhụnma, nkẹ o nwọn ihiẹn o gi nyan isi, kanị ẹlẹ ebe Osolobuẹ rị.

³ Kị Ẹkụkwọ-nsọ ku? Ọ sị, “Ebraham kweyeni Osolobuẹ, Osolobuẹ nọ gi ẹ sị ọ wụ onyẹ ezi-omumẹ.”

⁴ Lee ẹ nwan: ịhịan rụngụ ọrụn, n'a kụ w'a ụgwọ-ọrụn a, w'a ra sị nị e yegụọ w'a ihiẹn-ọfẹ, kama, nị a kụgụọ w'a ụgwọ ihiẹn ọ rụn.

⁵ Kanị nke onyẹ nwọnlẹni ihiẹn ọ rụn, kanị o kweyeni Osolobuẹ hụn a gbagharị onyẹ njọ a nabanhan a, okukwe hụnyẹ kẹ Osolobuẹ gi e kun'ẹ ọhụnma.

⁶ Ịya kẹ Defidi gi sị nị ngọzi rọ nị Osolobuẹ kpọ ịhịan onyẹ ezi-omumẹ bụ onwọnni ọrụn ọma onyẹ hụ rụn: Defidi sị,

⁷ “Ngọzi arịkakwọnị ndị hụn Osolobuẹ gbagharị eje-ihiẹn wẹ mẹ, ndị hụn o finchanpụ njọ wẹ;

⁸ ngọzi arịkakwọnị onyẹ Di-nwọnni-ẹnyi gụnlẹnini njọ a yeni!”

⁹ Ngọzini wụdẹ nwan nke ndị Ju kwa ugun sụọ ra nke wẹ lẹ ndị kwalẹni ugun? Ẹnyi hụ e ku ẹ nị ufiri okukwe Ebraham kẹ Osolobuẹ gi kpọ a onyẹ ezi-omumẹ:

¹⁰ elee ọnọdị kẹ Osolobuẹ nọdẹ gụn ihiẹnni yen'ẹ? Ebe ọ kwagụ ugun ra ebe o kelẹni kwa ugun? Ẹlẹ k'ọ kwagụ ugun kanị k'o kelẹni kwa,

¹¹ omẹgụ, Osolobuẹ nọ nwan gi ịkwa-ugun ye ẹ ahịma, ghọsị n'o gigụọlẹ okukwe ẹ họnrin onyẹ ezi-omumẹ k'o kelẹni kwa ugun. Osolobuẹ mẹ ẹ kẹni Ebraham wụrụ nẹdi ndị ile kwalẹni ugun hụn kwerini, ndị hụn Osolobuẹ gizi okukwe wẹ kpọ ndị ezi-omumẹ,

¹² lẹni Ebraham wụrụzịkwọ nẹdi ndị hụn kwa ugun bụ ẹlẹ nị wẹ kwahụ ugun, kanị e nwọnzighọ wẹ okukwe ahụn Ebraham nẹdi ẹnyi nwọn n'o d'a kwa ugun.

Okukwe E Wẹhẹ Ihiẹn Osolobuẹ Kwe Nkwa A

¹³ Nkwa Osolobuẹ kwe Ebraham lẹ nwa a nị ụwa ile k'a wụ nke ẹ ẹlẹ ghahanị Iwu kanị ghahanị ezi-omumẹ wẹ gi okukwe e nwọnhẹn.

¹⁴ Makẹni, omẹni ndị hụn e dọnmẹ Iwu kẹ Osolobuẹ te e ye ihiẹn o kwe nkwa a, ya wụ n'o nwọnni ihiẹn okukwe wụ, nkwa Osolobuẹ enwọnzikwọnị ihiẹn ọ wụ;

¹⁵ makẹni afụnfụn kẹ Iwu e wẹhẹ wẹ dan a; kanị ebe Iwu rịlẹni, w'a ra dan iwu.

¹⁶ Ya wụ nị okukwe kẹ wẹ gha e nwọnhẹn ihiẹn ahụn Osolobuẹ kwe nkwa a, kẹni nkwa hụ wụrụ ihiẹn-ọfẹ Osolobuẹ gi ẹfọma ye hụn k'e ru ụmụ Ebraham ile ẹka — ẹlẹ ndị wẹ ye Iwu sụọ kanị ndị ile nwọn okukwe kẹ Ebraham, ebe o mẹ ni ịya wụ nẹdi ẹnyi ile.

¹⁷ Ẹrịra kẹ Ẹkụkwọ-nsọ dọn ku ẹ, sị, “E mẹgụọ m'ị wụrụ nẹdi alị bu ọda.” Ịya k'ọ wụ ebe Osolobuẹ rị — Osolobuẹ hụn o gi dọn ẹnya; Osolobuẹ hụn e mẹ onyẹ nwụnhụnnị a rịzị ndụn, hụn e gi oku-ọnụ a e mẹ ihiẹn rịtulẹni n'ọ rị.

¹⁸ Ebraham e kweri, ọsụọn'a n'o nwọnni ihiẹn o kwọndọn ẹka, ọ tọ a tụ ẹnya n'o jẹnkọ d'a wụrụ “Nẹdi alị bu ọda,” kẹ Osolobuẹ dọn gwa a mbụ ogẹn o gi sị a, “Ẹrịra kẹ ụmụ ị k'e buhan ọda.”

¹⁹ Okukwe Ebraham ebelụanị, ọsụọn'a n'ọ nyanhanghọ nị ẹhụ a anwụnhụngụọ makẹni ya nwẹn wụ ihiẹn nọkẹ ahụa ọgụn-isẹn, ẹkpa-nwa nwunyẹ ẹ wụ Sẹra a nwụnhụngụọzị;

²⁰ ọ rụkwọnị Osolobuẹ kwe nkwa ụka yeni obi ẹbụọ; kama o kwerikẹnmẹdẹ, a ja Osolobuẹ mma.

²¹ O kwerichanrịn nị Osolobuẹ k'a s'ẹka mẹ ihiẹn Osolobuẹ kwe nkwa a.

²² Ya haịn Osolobuẹ gi “gụn a yen'ẹ, kpọ a onyẹ ezi-omumẹ.”

²³ Ẹlẹ Ebraham sụọ kẹ wẹ deni oku hụ, Osolobuẹ nọ “gụn a yen'ẹ.”

²⁴ Kanị, wẹ dezini ẹnyi nwẹn ya; makẹni wẹ jẹnkọ d'a gụn okukwe ẹnyi yeni ẹnyi nwẹn — ẹnyi ndị hụn kwerini Osolobuẹ, Onyẹ ahụn gha ọnwụn weli Di-nwọnni-ẹnyi wụ Jesu.

²⁵ Osolobuẹ gi ufiri njọ ẹnyi we Jesu ye n'ọ nwụnhụn, ghazị ọnwụn weli Jesu kẹni o gi ifiri Jesu kuni ẹnyi ọhụnma.