Ndị Rom 16 - Ika

Isi Nke Mmisin Pọlụ Ekele Ndị Rị Ichẹn-ichẹn

¹ Obi ru m alị ebe Fibi nwẹnẹ ẹnyi okpoho rị. Fibi wụ onyẹ-ọrụn imẹ ụka rị Sẹnkrẹ.

² M rị nwan a gwa ụnụ gi ẹfan Di-nwọnni-ẹnyi nabanhan a kẹ ndị nke Osolobuẹ e mẹ, ụnụ e yen'ẹ ẹka ọwụlẹ ọ chọ, makẹni o yepụkanị ndị bu ọda ẹka, kẹ mmẹ nwẹn.

³ Kele ni Prisilia lẹ Akwila ndị-ọrụn ibe m imẹ Kraịstị Jizọsị.

⁴ Wẹ gi ufiri m be isi wẹ ye ọb'ẹka. Ẹlẹdẹ mmẹ sụọ rị a kpanmịn wẹ, ndị ụka ile rịsọnmẹ alị ndị wụlẹni ndị Ju rịzị a kpanmịn wẹ.

⁵ Kelezi ni ụka hụn a nọ iwe wẹ e zu. Kele ni ezi ọwụ m wụ Ẹpẹnẹtọsụ. Ịya wụ onyẹ ibuzọ kwerini Kraịstị Ẹgbẹrẹ Eshịa.

⁶ Kele ni Meri hụn shini ụnụ ọnwụnnẹi ile.

⁷ Kele ni Andronikusu lẹ Junia, ndị Ju ibe m mmẹ lẹ wẹ wị jẹn ngan. Ndị-ozi pụ-ichẹn marịn wẹ ọhụnma-ọhụnma; uwẹ bu m ụzọ sọnmẹ Kraịstị.

⁸ Kele ni Amplayatọsụ, ezi nwẹnẹ m imẹ Di-nwọnni-ẹnyi.

⁹ Kele ni Ọbanusu onyẹ-ọrụn ibe ẹnyi imẹ Kraịstị lẹ ezi ọwụ m wụ Stakisi.

¹⁰ Kele ni Apẹlẹsị hụn wẹ e ku oku ẹ ọhụnma imẹ ihiẹn Kraịstị. Kele ni ezi-lẹ-ụlọ Aristobulusu.

¹¹ Kele ni Hẹrodiọnụ onyẹ Ju ibe m. Kele ni ndị ezi-lẹ-ụlọ Nasisọsụ hụn kwerini Di-nwọnni-ẹnyi.

¹² Kele ni Traịfina lẹ Traịfosa, ikpoho hụn a rụnshi ọrụn Di-nwọnni-ẹnyi ikẹn. Kele ni ezi ọwụ m wụ Pẹsisi hụn a gbakẹnmẹ ihiẹn Di-nwọnni-ẹnyi ọda-ọda.

¹³ Kele ni Rufọsụ, onyẹ nke Di-nwọnni-ẹnyi pụ-ichẹn lẹ nnẹ ẹ hụn mmẹ nwẹn werizi kẹ nnẹ.

¹⁴ Kele ni Asinkritusu lẹ Flegọnụ lẹ Hẹmisi lẹ Patrobasị lẹ Hẹmasị lẹ umunẹ ẹnyi ndị ọzọ imẹ Kraịstị wẹ ile rị ebẹhụ.

¹⁵ Kele ni Filologusu lẹ Julia. Kele ni Neriusu lẹ nwẹnẹ ẹ okpoho. Kele ni Olimpasị lẹ ndị nke Osolobuẹ ile hụn wẹ ile gba rị ebẹhụ.

¹⁶ Dide ni ibe ụnụ odide rị nsọ. Ndị ụka Kraịstị ile e zi ekele ụnụ.

Oku Ikpanzụụn

¹⁷ Umunẹ m, dodo, ọ rị ẹka ụnụ, kpachanpụ nị ẹnya makẹ ndị rị e kebe ụnụ, e mẹ okukwe ụnụ uke ebe wẹ n'a kuzi ihiẹn wụlẹni ezioku ahụn ndị kuzini ụnụ kuzi ụnụ. Gbanị nị wẹ ọsọ!

¹⁸ Makẹni ndị nọ ẹrịra arị e fe Di-nwọnni-ẹnyi wụ Kraịstị, kanị ẹfọ wẹ lẹ ihiẹn a gụnnị wẹ kẹ wẹ rị e fe. W'e gi ọnụ-ọma lẹ oku ọnụnụ-ire e dufie ndị marịnlẹni ihiẹn.

¹⁹ Ịhịan ile a nụgụọ kẹ ụnụ dọn rị e humẹ isi, ọ hụ a sụọ m; kanị m chọ nị ụnụ e gi uche e mẹ ihiẹn rị mma, e dọnmẹ ẹka ụnụ ọchan ebe eje-ihiẹn rị.

²⁰ O biekọ Osolobuẹ hụn e ye udọn a zọkpụkpọ Ekwensụ ye okpuru ụkụ ụnụ. Ẹfọma Di-nwọnni-ẹnyi wụ Jizọsị ya ru ụnụ ile ẹka.

²¹ Timoti mmẹ lẹ ya wị a rụn ọrụn e zi ekele ụnụ, ya lẹ Lushiọsụ lẹ Jasịnị lẹ Sosipata ndị Ju ibe m.

²² Mmẹ Tẹtiọsụ hụn yeni ẹka de ẹkụkwọ-ozini gi ẹfan Di-nwọnni-ẹnyi e zi ekele ụnụ.

²³ Gayọsụ m rị iwe ẹ, hụn ụka nọzị iwe ẹ e zu, e zizighọ ekele ụnụ. Ẹrastọsụ, hụn e dọnmẹni obodoni egho lẹ Kwọtusu nwẹnẹ ẹnyi imẹ Kraịstị e zi ekele ụnụ.

²⁴ Ẹfọma Di-nwọnni-ẹnyi wụ Jizọs Kraịstị ya nọyeni ụnụ ile. Isẹẹ.

Ịja-mma ya rịnị Osolobuẹ!

²⁵ Ọjịja-mma ya rịnị Osolobuẹ hụn k'a s'ẹka mẹ ụnụ zekẹnmẹ ghahanị oziọma m lẹ ihiẹn ẹnyi rị e ku banyeni Jesu Kristi. Oziọmanị rị e ku oku ihiẹn-omimi ẹdẹi te zuerini,

²⁶ hụn rị nwan a pụha ifọn; wẹ rị nwan e gi ihiẹn ndị-amụma de imẹ Ẹkụkwọ-nsọ a kọwanị ndị alị ile ya. Osolobuẹ rị ndụn jẹnrin ejẹn sị wẹ kọwanị wẹ ya, kẹni ndị alị ile hụn ụzọ kweri, gi okweri ahụn wẹ kweri humẹn'ẹ isi.

²⁷ Ẹghẹẹ, ịja-mma ya rịnị Osolobuẹ hụn ya sụọ marịn ihiẹn ile! Ya rịn'a jẹnrin ejẹn ghahanị Jizọs Kraịstị! Isẹẹ.