Ndị Rom 14 - Ika

Isi Nke Mmẹnọ Amalẹ Ni Ibe Ụnụ Ikpe

¹ A nabanhan nị ibe ụnụ okukwe wẹ zelẹni, esọnlẹ ni wẹ dọ ihiẹn wụlẹni iwu imẹ Kraịstị:

² O nwọn ndị kweri nị ịhịan k'a saẹka ri ihiẹn ile, kanị ndị ọzọ okukwe wẹ zelẹni e ri ihiẹn-ugbo sụọ.

³ Onyẹ hụn e ri ihiẹn ile y'e lelịalẹ onyẹ ghalẹni e ri ihiẹn ile; onyẹ hụn ghalẹni e ri ihiẹn ile ya amalẹ onyẹ hụn e ri ihiẹn ile ikpe, makẹni Osolobuẹ a nabanhangụọ a.

⁴ Onyẹ k'ị wụ i gi a ma odibo onyẹ ọzọ ikpe? Di-nwọnn'ẹ nwọn ku k'o turughọ ra o turuni. Kanị o k'e turu, makẹni Di-nwọnni-ẹnyi k'a saẹka mẹ ẹ turu.

⁵ Onyẹ ohu sị ụhụọhịn ohu ka ibe ẹ nsọ, hụn-ẹbọ sị wẹ ile han. Onyẹ-onyẹ ya kwọnkẹnmẹ hụn we ẹ ẹnya.

⁶ Hụn sị ụhụọhịn ohu ka mkpa gi ufiri Di-nwọnni-ẹnyi kweri ẹrịra; hụn e ri ihiẹn ile gi ufiri Di-nwọnni-ẹnyi e ri, makẹni ọ kpanmịn Osolobuẹ e ri. Onyẹ ghalẹni e ri ihiẹn ile gizi ufiri Di-nwọnni-ẹnyi a jụ — ọ kpanmịnzị Osolobuẹ a kpanmịn.

⁷ Ẹnyi ile, onwọnni onyẹ rịnị enwẹn ndụn, onwọnzikwọnị onyẹ a nwụnnị enwẹn ẹ:

⁸ ẹnyi rị ndụn, Onyẹ-nwọnni-ẹnyi kẹ ẹnyi rịnị ndụn; ẹnyi nwụnhụn, Onyẹ-nwọnni-ẹnyi kẹ ẹnyi nwụnnị. Kẹ ẹnyi rị nwan kẹ ẹnyi nwụnhụn anwụnhụn, nke Onyẹ-nwọnni-ẹnyi kẹ ẹnyi wụ.

⁹ Ịya haịn Kraịstị gi nwụnhụn, ọ nwụnhụngụ, ọ nọ rịzị ndụn: kẹni ọ hụn ụzọ wụrụ Onyẹ nwọn ndị rị ndụn lẹ ndị nwụnhụnnị.

¹⁰ Ịyụ nwẹn, kị rị a manị onyẹ otu-Kraịstị ibe i ikpe? Ịyụ nwẹn, k'ị rị e lelịanị onyẹ otu-Kraịstị ibe i? Ẹnyi ile k'e turu ihun Osolobuẹ n'o kin ẹnyi ikpe.

¹¹ Makẹni Ẹkụkwọ-nsọ sị, “Di-nwọnni-ẹnyi sị, ‘Ma isi m, onyẹ ọwụlẹ jẹnkọ d'e gbuni m osekpu; ọnụ ile k'e ku ẹ nị mmẹ wụ Osolobuẹ!’ ”

¹² Ya wụ nwan nị onyẹ-onyẹ imẹ ẹnyi sikọ d'a kọnị Osolobuẹ k'o jẹn.

Emẹkwọlẹ Ni Ibe Ụnụ Dan

¹³ Nị ẹnyi mabehi ni nwan ibe ẹnyi ikpe. Kama, nị ẹnyi kwademẹ obi ẹnyi nị ẹnyi ebutọkọnị onyẹ otu-Kraịstị ibe ẹnyi ọmụma kpọgburu mọbụ buhẹn'ẹ ọnwụnwan.

¹⁴ Imẹ Di-nwọnni-ẹnyi wụ Jesu, o we m ẹnya ọhụnma-ọhụnma n'o nwọnni ihiẹn rụnị nke-esi; kanị onyẹ sị ihiẹn rụ arụ, ọ wụrụn'a ihiẹn rụnị.

¹⁵ K'osilẹrị, omẹni ihiẹn y'e ri rị e ye nwẹnẹ i nsọngbu, ya wụ nị y'a rịzị e gi ihiẹn-ọsụsụọ e bi. Egikwọlẹ ihiẹn-oriri y'e ri tikpọ onyẹ Kraịstị nwụnnị ọnwụn!

¹⁶ Emẹkwọlẹ wẹ ye ihiẹn rị ị mma ẹnya hụn ị rị e mẹ eje-ẹfan,

¹⁷ makẹni Alị-eze Osolobuẹ ẹlẹ oku ihiẹn-oriri lẹ ihiẹn-ọrịra kanị ezi-omumẹ, udọn lẹ ịghọghọ Mmọn-nsọ.

¹⁸ Onyẹ e fe Kraịstị ẹrịra kẹ ihiẹn ẹ a sụọ Osolobuẹ, ndị ọzọ e kuzi oku ẹ ọhụnma.

¹⁹ Nị ẹnyi a chọ nị nwan ihiẹn ẹnyi lẹ ibe ẹnyi e gi bi udọn, e sue imẹ okukwe.

²⁰ Egikwọlẹ oku ihiẹn-oriri ị sị i k'e rirịrị tikpọ ọrụn Osolobuẹ. Ezioku-ezioku, onwọnni ihiẹn-oriri rụnị, kanị eje-ihiẹn k'ọ wụ nị ịhịan e ri ihiẹn k'e mẹ onyẹ ọzọ dan.

²¹ Ọ ka mma nị y'e erini anụ mọbụ ra manya mọbụ mẹ ihiẹn ọzọ ọwụlẹ k'e mẹ nwẹnẹ i imẹ Kraịstị dan.

²² Ya wụ, ihiẹn ọwụlẹ i kweri banyeni ihiẹn ndịnị, ya rị ẹgbata yụ lẹ Osolobuẹ. Ngọzi rị a nị ịhịan egini ihiẹn o kweri n'ọ hụghọ mma ma enwẹn ẹ ikpe ẹnya Osolobuẹ.

²³ Onyẹ gi obi-ẹbụọ e ri, ikpe a magụọ a, makẹni o rin'ẹ n'o nwọn okukwe n'ọ hụghọ mma ẹnya Osolobuẹ: makẹni ihiẹn ọwụlẹ ịhịan gilẹni okukwe mẹ wụ njọ.