Ndị Rom 11 - Ika

Isi Nke Mmanaị Nkwa Osolobuẹ Kwe K'o Gi E Sọn Ndị Izrẹlụ

¹ M rị nwan a jụ: “Osolobuẹ a jụgụọ ndị nke ẹ wụ ndị Izrẹlụ ra?” Kaka! M wụ onyẹ Izrẹlụ maị! M wụ nwa Ebraham, onyẹ ebọn Bẹnjamini.

² Osolobuẹ ajụnị ndị nke ẹ, ndị ọ họtọ! Ụnụ amarịn ihiẹn Ẹkụkwọ-nsọ ku ebẹhụ Ẹlaịja nọ kpe ndị Izrẹlụ ẹka Osolobuẹ? Kẹ Ẹlaịja dọn sị,

³ “Di-nwọnni-ẹnyi, e gbuchanrịngụọ wẹ ndị-amụma ị, tikpọpụ ebe ile wẹ nọ a chụnyen'i ẹjan. Mmẹ sụọ họdụ, bụ wẹ rị nwan a chọ nị wẹ gbu m!”

⁴ Kanị, kị Osolobuẹ za a? Osolobuẹ sị a, “E butọgụọnị m enwẹn m mmadụ nnụ-uku ẹsa (7,000) hụn gbutulẹnini mmọn hụ wụ Baalụ osekpu.”

⁵ Ẹrịra k'ọ rịkwọ nwan; o nwọnzighọ ndị bulẹni ọda họdụnị, ndị Osolobuẹ gi ẹfọma a họtọ.

⁶ O mẹ nwan nị ẹfọma k'o gi mẹ ẹ, ya wụ ẹlẹzi ọrụn haịn — nkẹ o mẹ ni ẹfọma ẹlẹzi ẹfọma.

⁷ Ya wụ nwan nị ndị Izrẹlụ ahụnnị ihiẹn wẹ rị a lụgbuni enwẹn wẹ, ndị ahụn Osolobuẹ họrị sụọ hụn a, Osolobuẹ a kpọkin ndị họdụnị obi:

⁸ ọ nọhụ kẹ Ẹkụkwọ-nsọ dọn ku ẹ, sị, “Osolobuẹ e mẹ wẹ amarịnzịlẹ ihiẹn wẹ rị e mẹ; mẹ ẹnya wẹ eleghalẹ ụzọ; mẹ ntịn wẹ anụlẹ ihiẹn — d'e rukwọ nwan tannị.”

⁹ Defidi sị, “Ihiẹn-oriri wẹ ya wụrụ ihiẹn wẹ gi shini wẹ ọnyan, ya wụrụ ọmụma w'a kpọgburu; ya wụrụ ihiẹn wẹ gi mẹgwarị wẹ.

¹⁰ Ẹnya ya kpu wẹ ishi, amamgbe w'e legha ụzọ; wẹ hietọ yeni nsọngbu jẹnrin ejẹn!”

¹¹ M rị nwan a jụ: kẹ ndị Ju kpọgburu, wẹ dangungwọn adangungwọn? Kaka! Kama, makẹni wẹ mẹ njọ, nzụọpụha a bịagụọnị alị ndị ọzọ, kẹni ẹnya fụma uwẹ wụ ndị Ju.

¹² O mẹ nwan nị mmẹfie wẹ wẹhẹni ụwa ẹregede ihiẹn rị mma, nị ẹdan wẹ dan wẹhẹni ndị wụlẹni ndị Ju ẹregede ihiẹn rị mma, ihiẹn ka mma apụhakọ nwan ogẹn wẹ e gi wekinhẹn wẹ?

W'ara Gi Nzụọpụha Legberi Ibe

¹³ M rị a gwa ụnụ ndị wụlẹni ndị Ju oku. Ebe o mẹ ni m wụ onyẹ-ozi pụ-ichẹn Osolobuẹ zijẹnni ndị wụlẹni ndị Ju, m'e mẹ oku ọrụn m ọda-ọda,

¹⁴ ikẹnkwọ nị m saẹka gi ẹ mẹ ẹnya fụma ndị alị m, kẹni m saẹka zụọpụhadẹ ụfọdụ.

¹⁵ Makẹni, omẹni ọjụjụ Osolobuẹ jụ wẹ ye ụwa oghere wẹ lẹ Osolobuẹ gi dọn, kị ịnabanhannị wẹ k'e wẹhẹ nwan? Ẹlẹ ịgha ọnwụn lihi?!

¹⁶ Omẹni brẹdi wẹ bu ụzọ beri ye Osolobuẹ hụghọ nsọ, ogbe wẹ gha beri ẹ rịzịkwọ nsọ; omẹni mkpọgụn osisi rị nsọ, agala ndị rị osisi hụ hụzị nsọ.

¹⁷ Omẹni wẹ kwapụsọnmẹ agala olivu wẹ kụn, we ụnụ wụ agala olivu-ọfịa che olivu hụ d'e sọn agala ndị họdụnị ri erere rị olivu hụ,

¹⁸ elegberikwọlẹ ni agala ndị hụ mọbụ nyanmanị wẹ isi. Kanị, ụnụ nyanma isi, nyanhankwọ nị nị ẹlẹ ụnụ bu mkpọgụn, kanị mkpọgụn bu ụnụ.

¹⁹ Kanị ị k'a sị, “Ẹghẹẹ, ufiri m kẹ wẹ gi kwapụ agala ndị ahụn nụ, kẹni o beyeni m ụzọ.”

²⁰ Ezioku rọ. Kanị, wẹ kwapụ wẹ makẹni ekwerini wẹ, bụ ụnụ nwẹn rị ebẹhụ yeni ụnụ kweri ekweri. Egilẹ n'ẹ pachemẹ, ka gi nị egun e bi!

²¹ Makẹni, omẹni Osolobuẹ ahatuni ndị Ju hụn wụ ezigbo agala osisi hụ, ọ hatukọkwọ ụnụ nwẹn!

²² Ebeni kẹ ẹnyi nọ hụn ẹfọma Osolobuẹ lẹ ẹka a zeni: ẹka zeni o gi e sọn ndị hụn danpụnị lẹ ẹfọma o gi e sọn ụnụ ndị kwerini — kasị a mẹ ni ụnụ nọdịhụkwọ ebe ẹfọma a nọ e ru ụnụ ẹka. Kanị, omẹni ụnụ anọdịsọnmẹni, ọ kwapụzịkwọ ụnụ nwẹn.

²³ Nke ndị Ju hụ wẹ kwapụ makẹni ekwerini wẹ, wẹ kweri, Osolobuẹ e we wẹ chezi osisi hụ — makẹni o k'a s'ẹka mẹ ẹ.

²⁴ Omẹni Osolobuẹ gha osisi olivu-ọfịa kwarị ụnụ, mẹ ihiẹn wẹ ghalẹni e mẹ, we ụnụ che olivu wẹ kụn, ọ kakọ Osolobuẹ nfe iwekinzi agalaba ndị ahụn ebe wẹ gha kwapụ wẹ.

Omikẹn Sụọ Kẹ Osolobuẹ Gi A Zụọpụha Ịhịan

²⁵ Umunẹ m, m chọ nị ụnụ marịn ihiẹn-omimini, amamgbe ụnụ e ro nị ụnụ ka ndị ọzọ mkpa. Isi-akwanran Izrẹlụ k'e ruhụ ogẹn ndị wụlẹni ndị Ju banlanị e gi zu ọnụ.

²⁶ Ya wụ, ndị Izrẹlụ ile jẹnkọ d'e nwọn nzụọpụha, nọkẹ kẹ Ẹkụkwọ-nsọ dọn ku, sị, “Onyẹ-nzụọpụha k'a gha obodo Zayọnụ bịa; o k'e wepụ eje-obibi imẹ igunrun ụmụ Jekọpụ.”

²⁷ Ọ sịzị “Ọnwan wụ nkwerigbama hụn k'a rị ẹgbata mmẹ lẹ wẹ: nị m k'e wepụ njọ wẹ.”

²⁸ Kẹ oziọma nọ, wẹ wụ nwan ndị-iṅẹnrẹn ẹnya Osolobuẹ makẹ ufiri ụnụ; kanị, kẹ Osolobuẹ dọn a họrị ihiẹn, Osolobuẹ nwọnkwọ ihiẹn-ọsụsụọ wẹ makẹ ufiri nẹdi wẹ.

²⁹ Makẹni Osolobuẹ ara napụ ịhịan ihiẹn o ye ẹ mọbụ kpọgụ ịhịan oku jụ a.

³⁰ Kẹ ụnụ ndị te e nnupụ-isi okpuru Osolobuẹ dọn nwan nwọnhẹn omikẹn ẹka Osolobuẹ makẹni ndị Ju nupụ isi,

³¹ ẹrịra kẹ wẹ nwẹn dọn nwan rị imẹ nnupụ-isi, wụrụ ndị k'a gha omikẹn Osolobuẹ mẹni ụnụ nwọnhẹnzikwọ omikẹn ẹka Osolobuẹ.

³² Makẹni, Osolobuẹ a gụngụọ ịhịan ile ye ndị nnupụ-isi, kẹni ọ hụn ụzọ mẹni ịhịan ile omikẹn.

Ịja-mma Ya Rịnị Osolobuẹ!

³³ Euu! Osolobuẹ e mẹkẹnmẹkẹ ọdanfịn! Amamihiẹn ẹ lẹ akọ-lẹ-uche ẹ e mikẹ! W'a ra saẹka ghọta iroro ẹ! W'a ra saẹka ghọta k'o mẹ!

³⁴ “Onyẹ marịn uche Di-nwọnni-ẹnyi? Onyẹ a dụn a ọdụn?

³⁵ Onyẹ yetu ẹ ihiẹn hụn o gi kụkin ẹ ya?”

³⁶ Ẹghẹẹ! Makẹni, ẹka a kẹ ihiẹn ile gha a bịa; ẹka a kẹ ihiẹn ile gha a rị; ihiẹn ile a rịzịkwọ n'a. Ịja-mma ya rịn'a jẹnrin ejẹn! Isẹẹ.