Ndị Rom 1 - Ika

Isi Nke Ohu

¹ Mmẹ wụ Pọlụ de ẹkụkwọ-ozini. M wụ igbọn Jizọsị Kraịstị. Osolobuẹ kpọ m, tumẹ m onyẹ-ozi pụ-ichẹn makẹ Oziọma Osolobuẹ.

² Oziọma Osolobuẹ kwe nkwa a ẹdẹi imẹ Ẹkụkwọ-nsọ ghahanị ndị-amụma a rọ.

³ Oziọmanị rị e ku oku Nwa Osolobuẹ hụn gha ebọn Defidi bịa kẹ ịhịan.

⁴ Osolobuẹ nọ gi ikẹn Mmọn-nsọ a ghọsị n'ọ wụ Nwa Osolobuẹ ebe ọ nọ gha ọnwụn weli ẹ: Jesu Kristi Di-nwọnni-ẹnyi rọ.

⁵ Osolobuẹ a ghalẹ nwan ẹka Jesu Kristini mẹni ẹnyi ẹfọma, gha ẹka a ye ẹnyi ọrụn ndị-ozi pụ-ichẹnni ẹnyi rị a rụn, kẹni ẹnyi hụn ụzọ wẹhẹ ndị alị ọzọ ile d'e kwerin'ẹ, humẹn'ẹ isi kẹ ndị kwerinin'ẹ, kẹni o gi ẹ ye ẹfan a ọghọ;

⁶ ụnụ lẹ enwẹn ụnụ rịzị ndị wẹ kpọ d'a wụrụ nke Jesu Kristi.

⁷ M rị e dejẹnni ndị ile Osolobuẹ nwọn ihiẹn-ọsụsụọ wẹ imẹ Rom, ndị ọ kpọ d'a wụrụ ndị-nsọ. Ẹfọma lẹ udọn gha ẹka Osolobuẹ Nẹdi ẹnyi lẹ Di-nwọnni-ẹnyi wụ Jesu Kristi a bịa ya rịnị ụnụ.

Pọlụ Rị A Kpanmịn Osolobuẹ

⁸ Nke ibuzọ, m rị e gi ufiri ụnụ ile a kpanmịn Osolobuẹ m ghahanị Jesu Kristi, makẹni wẹ rị e ku oku okukwe ụnụ imẹ ụwa ile.

⁹ Osolobuẹ m gi obi m ile e fe ghahanị izisọnmẹ oziọma Nwa a wụ ọshẹri m nị m'a nyanhan ụnụ ogẹn ile m gha e mẹ ekpere.

¹⁰ M gha e mẹ ekpere, m'a rịọsọnmẹ Osolobuẹ n'o beyeni m oghere kẹni m s'ẹka bịa d'a hụn ụnụ omẹni uche ẹ rọ.

¹¹ M rị a chọ nị m hụn ụnụ kẹni m yebeye ụnụ ihiẹn Mmọn-nsọ ye m, gi ẹ mẹ ụnụ zekẹnmẹ,

¹² ya wụ, kẹni mmẹ lẹ ụnụ gi okukwe ẹnyi kasịtarị ibe ẹnyi obi.

¹³ Umunẹ m, m chọ nị ụnụ marịn n'o tekẹ m chọma nị m bịa d'a hụn ụnụ, kanị o ke nị m. M rị a chọ nị m bịa, kẹni m gha imẹ ụnụ wẹhẹzini Osolobuẹ ịhịan kẹ m dọn mẹ imẹ alị ndị ọzọ wụlẹni ndị Ju.

¹⁴ M gi ịhịan ile ụgwọ: kẹ ndị elu-ebo rugụ ẹka kẹ ndị ọfịa, kẹ ndị wa ẹnya kẹ ndị nzuzu —

¹⁵ ya haịn o gi a dụ m nị m bịa d'e zizikwọ ụnụ ndị rị imẹ Rom oziọma.

Ikẹn Rị Imẹ Oziọma

¹⁶ Ifẹnrẹn oziọma arị e mẹ m, makẹni ya wụ ikẹn Osolobuẹ gi a zụọpụha onyẹ ọwụlẹ kwerini, ndị Ju wụ ibuzọ, o sọn ndị wụlẹni ndị Ju.

¹⁷ Makẹni, oziọma a ghọsị kẹ ezi-omumẹ wụ nke Osolobuẹ nọ: okukwe ịhịan k'o gi e mẹ ẹ gha mbidọn d'e ru isi ẹ. Ọ nọhụ kẹ Ẹkụkwọ-nsọ dọn ku ẹ, “Okukwe kẹ onyẹ ezi-omumẹ gi a rị ndụn.”

Ikpe Ma Ịhịan Ile

¹⁸ Iwe-lẹ-ọnụma Osolobuẹ gha elu-igwee e sọn ndị ile a gbakitọ Osolobuẹ azụụn lẹ ndị ile e mẹ njọ, ndị gi eje-ihiẹn wẹ e mẹ e gbọndọn ezioku.

¹⁹ Makẹni, ihiẹn w'a marịn banyeni Osolobuẹ we wẹ ẹnya, makẹni Osolobuẹ e mẹgụọ a we wẹ ẹnya.

²⁰ Ebe o mẹ ni kete Osolobuẹ kelẹ ụwa, ihiẹn ile wẹ ghalẹni e legha banyeni Osolobuẹ pụhachanrịn ifọn, kẹ ikẹn-itẹbitẹ ẹ kẹ ihiẹn o gi wụrụ Osolobuẹ; makẹni w'e gi ihiẹn o ke a ghọta wẹ. Onwọnzini nwan ihiẹn wẹ k'e kin!

²¹ Ebe o mẹ ni ọsụọn'a nị a marịnghọ wẹ Osolobuẹ, agbayeni wẹ ẹ kẹ Osolobuẹ, akpanmịnị w'a. Kama, e romẹ wẹ iroro la iwi, uche wẹ a rụnbehi, gba ishi.

²² Ebe wẹ rị a sị nị wẹ marịn ihiẹn, e họnrin wẹ ndị-nzuzu;

²³ hụn nkẹ w'e gi fe Osolobuẹ ghalẹni a nwụn, e fesọnmẹ wẹ mmọn wẹ kpụ — kẹ ndị yi ịhịan mmaka a nwụnnị kẹ ndị yisọnmẹ anụ nwọn ụkụ ẹnọ lẹ nnụnụ lẹ ihiẹn ndị a rịnị!

²⁴ Ya kẹ Osolobuẹ nọ la wẹ tọnị eje-ihiẹn rị a gụnnị wẹ, nị wẹ mẹmẹ ihiẹn ru unyin, nị wẹ lẹ ibe wẹ gi ẹhụ wẹ mẹmẹ ihiẹn-ifẹnrẹn;

²⁵ e gi wẹ ntụ nọkin ẹnya ezioku Osolobuẹ, fesọnmẹ ihiẹn Osolobuẹ ke, a kụnị wẹ isi-alị hụn nkẹ w'e gi fe Osolobuẹ Onyẹ-okike w'a ja mma jẹnrin ejẹn! Isẹẹ.

²⁶ Osolobuẹ nọ gi ufiri ẹ la wẹ tọnị ẹgụn ihiẹn-ifẹnrẹn, nke wụ nị ikpoho wẹ nọ mẹmẹ mgba ikpoho ibe wẹ, gi ẹ nọkin ẹnya hụn te furu w'e mẹ.

²⁷ Ẹrịra kẹ ikẹnnyẹ wẹ dọnzi latọ mgba ikẹnnyẹ-lẹ-ikpoho, ikẹnnyẹ ibe wẹ hụ a lagbu wẹ ẹnya: ikẹnnyẹ lẹ ikẹnnyẹ hụ e mẹtarị ihiẹn ifẹnrẹn, a narịnzị afụnfụn furu eje-ihiẹn wẹ rị e mẹ.

²⁸ Makẹni ekwerini wẹ mẹ nọkẹ sị a marịnghọ wẹ Osolobuẹ, Osolobuẹ nọ la wẹ tọnị uche wẹ ahụn la iwi kẹni wẹ mẹsọnmẹ ihiẹn furulẹni,

²⁹ ihiẹn ile rịlẹni mma e jun imẹ wẹ: kẹ eje-ihiẹn kẹ ẹnya-uku kẹ iwe kẹ iwe-ẹnya kẹ igbu-ọchụn kẹ ikpe kẹ ẹro kẹ ịchọ-njọ; e họnrin wẹ ndị-ọghẹlẹ,

³⁰ ndị e kuja oku ịhịan, ndị ize Osolobuẹ e ze; w'a kpari ịhịan, a pache, a nyan isi, e ropụhasọnmẹ eje-ihiẹn, e nupụ isi okpuru ndị mụnị wẹ.

³¹ W'a ra saẹka ghọta, w'ara s'ẹka gi wẹ dọn ẹnya, ẹfọ a jọka wẹ, w'ara mẹ omikẹn.

³² A marịnghọ wẹ nị Osolobuẹ sị ndị e mẹ ihiẹn nọ ẹrịra furu hụn a nwụnhụnnị, kanị ẹlẹni w'e mẹ wẹ sụọ, w'a kwadọnzidẹ ndị e mẹni wẹ.