Ndị Kolosị 4 - Ika

Isi Nke Ẹnọ Ndị Hụn Ịhịan Rị Okpuru Wẹ

¹ Ndị hụn ịhịan rị okpuru wẹ, e gi ni ẹka rị mma e sọn wẹ; emẹgbulẹ ni wẹ. Nyanhankwọ nị nị ụnụ nwẹn e nwọnghọzị onyẹ ụnụ rị okpuru ẹ hụn rị elu-igwee.

Ndụnmọdụn

² E mẹ ni ekpere ogẹn ile, e we ẹnya e ru alị e mẹ ẹ, a kpanmịn Osolobuẹ ụnụ gha e mẹ ekpere.

³ Ụnụ gha e mẹ ekpere, e mẹzikwọ nị nị ẹnyi nwẹn, kẹni Chuku a kpọpụnị ẹnyi ụzọ ẹnyi e gi e ku oku-Chuku, ku oku ihiẹn-omimi ahụn wụ Kraịstị, hụn wẹ gi ufiri ẹ tụ m ngannị;

⁴ rịọn'a kẹni m'a s'ẹka e mẹ ẹ e we ịhịan ẹnya k'o furu nị m'e mẹ ẹ.

⁵ E gi ni uche e sọn ndị kwerilẹni; anịlẹ ni oghere ọwụlẹ ụnụ nwọn nahịn ụnụ.

⁶ Oku-ọnụ ụnụ ya wụrụ hụn e ye ẹka, oku wẹ ye nnu, ụnụ a wụ ndị marịn kẹ w'a shịarị onyẹ ọwụlẹ oku ọhụnma.

Ekele Ikpanzụụn

⁷ Ezi nwẹnẹ ẹnyi wụ Taịkikọsụ hụn furu wẹ gi e dọn ẹnya jẹnkọ d'a gwachanrịn ụnụ kẹ m rị. Odibo ibe ẹnyi imẹ Onyẹ-nwọnni-ẹnyi k'ọ wụ.

⁸ Ya haịn m gi zilanị ụnụ ya, kẹni ụnụ marịn kẹ ẹnyi nọ lẹni ọ gba ụnụ umẹ.

⁹ Ịya lẹ Onesimọsụ ezi nwẹnẹ ẹnyi furu wẹ gi e dọn ẹnya, hụn wụzị onyẹ alị ụnụ, wị lala. Wẹ k'a gwachanrịn ụnụ kẹ ihiẹn ile nọ ebeni.

¹⁰ Arịstakusu onyẹ-ngan ibe m e kele ụnụ, ya lẹ Makị nwa-nwẹnẹ Banabasị. (Ẹnyi a gwatọgụọ ụnụ nabanhan Makị omẹni ọ bịa ebẹhụ.)

¹¹ Jizọsị hụn w'a kpọzị Jọstusu, e kelezi ụnụ. Mmadụ ẹtọnị sụọ wụ ndị Ju, ndị kwa ugun, imẹ ndị mmẹ lẹ wẹ wị a rụn ọrụn Alị-eze Osolobuẹ; e yekẹni wẹ m ẹka.

¹² Ẹpafrasị onyẹ alị ụnụ hụn wụzị odibo Jesu Kristi e kele ụnụ. Ẹpafrasị e shini ụnụ ọnwụn ọda-ọda imẹ ekpere. Ọ rịọsọnmẹ Osolobuẹ n'o mẹ ụnụ turukẹnmẹ, ka-ẹhụ, marịn ihiẹn ụnụ rị e mẹ ebe ihiẹn ọwụlẹ wụ uche Osolobuẹ rị.

¹³ M k'a saẹka shịan'a ẹri n'o shikẹni ụnụ ọnwụn, ụnụ lẹ ndị rị Laodishia lẹ Hịrapolisi.

¹⁴ Ezi dọkịta wụ Luku e zi ekele ụnụ, ịya lẹ Dẹmasị.

¹⁵ Kele ni ni m umunẹ ẹnyi imẹ Kraịstị rị Laodishia, ụnụ e kele nwẹnẹ ẹnyi okpoho wụ Nimfa lẹ ụka nọ iwe ẹ e zu.

¹⁶ Wẹ gụngụnị ụnụ ẹhụhụọ-ozini imẹ ụka ụnụ, hụn n'a nị wẹ gụnzịnị ndị ụka rị Laodishia ya. Hụnzịkwọ n'a nị ụnụ gụn hụn m dejẹnni ndị ụka Laodishia imẹ igunrun ụnụ.

¹⁷ Sị nị Akịpọsụ, “Hụnkwọ a n'ị rụnchanrịn ogbo wẹ keye i imẹ ọrụn Di-nwọnni-ẹnyi.”

¹⁸ Nị m gi ẹka m de nwan ekele m: Mmẹ wụ Pọlụ e kele. Nyanhankwọ nị ẹgan ndịnị rị m ẹka! Ẹfọma Osolobuẹ ya rusọnmẹ ụnụ ẹka.