Ndị Kolosị 3 - Ika

Isi Nke Ẹtọ Ẹnyi A Lashigụọ Imẹ Kraịstị

¹ O mẹ nwan nị ụnụ e sọngụọ Kraịstị gha ọnwụn lihi, chọma nị nwan ihiẹn ndị hụn rị elu, ebẹhụ Kraịstị nọdị alị ẹka-nni Osolobuẹ.

² Bu ni obi che ihiẹn rị elu, ẹlẹ ihiẹn rị ụwa.

³ Makẹni, ụnụ a nwụnhụngụọ; e bugụọ wẹ ndụn ụnụ che imẹ Kraịstị zuemẹ imẹ Osolobuẹ.

⁴ Ogẹn Kraịstị hụn wụ ndụn ụnụ jẹnkọ d'e gi pụha, ụnụ nwẹn e sọn ẹ gi ọghọ pụha.

Ndụn Akan Lẹ Ndụn Ọhụn

⁵ Gbu ni nwan ẹgụn ihiẹn-ụwa hụn rị imẹ ụnụ a rụn ọrụn: kẹ ughẹrẹ kẹ obibi ru unyin kẹ ihiẹn ọlịlẹnya kẹ ẹgụn ihiẹn rịlẹni mma kẹ ẹnya-uku hụn wụzị ife-mmọn.

⁶ Ihiẹn ndịnị wẹ haịn iwe-lẹ-ọnụma Chuku gi lalanị ndị nnupụ-isi.

⁷ Ụnụ te e sọn wẹ e bi ẹrịra ogẹn mbụ ahụn ụnụ lẹ wẹ gi wụ ohu.

⁸ Ka wepụ nị nwan ihiẹn ile nọ ẹrịra: olulu, ịkpọ-ọnụma, iwe, ikuja oku ịhịan lẹ iku eje-oku, ụnụ e wepụ oku ọwụlẹ ru unyin ọnụ ụnụ.

⁹ Atụkwọlẹ ni ibe ụnụ ntụ, makẹni ụnụ a gbụpụgụọ ndụn-akan lẹ obibi ẹ nọkẹ ẹwuru;

¹⁰ ụnụ e yirigụọ ndụn ọhụn hụn rị a marịnwaye onyẹ ken'ẹ, a rịwaye kẹ ịya.

¹¹ Imẹ ndụn ọhụnnị, onwọnzini ihiẹn nọ kẹ ndị Ju lẹ ndị wụlẹni ndị Ju mọbụ ndị kwa ugun lẹ ndị kwalẹni mọbụ ndị rị imẹ ọfịa lẹ ndị walẹni ẹnya mọbụ igbọn lẹ onyẹ nwọn enwẹn ẹ. Kraịstị sụọ wụ ihiẹn ile; Kraịstị rị imẹ wẹ ile.

¹² Nọkẹ ndị Chuku họrị, ndị rị nsọ, ndị rị a obi, yiri ni nwan omikẹn lẹ ẹfọma, iwelụa enwẹn ụnụ alị, imẹ-jụụ lẹ ndidin.

¹³ E gi ni ndidin e sọn ibe ụnụ; onyẹ nwẹnẹ ẹ mẹja ya gbagharị a: kẹ Di-nwọnni-ẹnyi wụ Kraịstị dọn gbagharị ụnụ kẹ ụnụ k'a dọn gbagharị ibe ụnụ.

¹⁴ Hụn kadẹni, yiri ni ihiẹn-ọsụsụọ, makẹni ịya kẹ wẹ ile gi a layechanrịn k'o furu.

¹⁵ A chọnị udọn ahụn Kraịstị e ye, e gi ẹ e lele ihiẹn ụnụ rị e mẹ, makẹni, ezioku-ezioku, ịya kẹ Osolobuẹ kpọnị ụnụ d'a rị ẹhụ ohu. A kpanmịn nị Osolobuẹ.

¹⁶ A nị nị oku Kraịstị a rị imẹ ndụn ụnụ ọda-ọda. E gi ni amamihiẹn lẹ akọ-lẹ-uche ile a kuzi ibe ụnụ, a dụn wẹ ọdụn; e gi obi rị a kpanmịn Osolobuẹ a bụnị Osolobuẹ ẹbụ-ọma rị Ẹkụkwọ-nsọ lẹ ẹbụ-ofufe lẹ ẹbụ-nsọ.

¹⁷ Ihiẹn ile ụnụ e mẹ, kẹ omumẹ kẹ oku-ọnụ, e gi ni ẹfan Di-nwọnni-ẹnyi wụ Jizọsị e mẹ ẹ, a gha ẹka a e ye Chuku Nẹdi ekele.

Obibi Furu Ndị Rị Ichẹn-ichẹn

¹⁸ Nwunyẹ, e humẹni di i isi, makẹni ẹrịra k'o furu imẹ Di-nwọnni-ẹnyi.

¹⁹ Di, nwọn ihiẹn-ọsụsụọ nwunyẹ i; egilẹ iwe e sọn ẹ.

²⁰ Ụmụ, e humẹni ni ndị mụnị ụnụ isi imẹ ihiẹn ile, makẹni ya kẹ Di-nwọnni-ẹnyi chọ nị ụnụ e mẹ nọkẹ ndị nke ẹ.

²¹ Ndị nẹdi, atọlẹ ni a kpasu ụmụ ụnụ iwe, amamgbe ndụn a gụ wẹ.

²² Ndị rị okpuru ịhịan, e humẹni nị ndị ụnụ rị okpuru wẹ elu-ụwanị isi imẹ ọnọdị ọwụlẹ. Ẹlẹ ihun wẹ sụọ, rịkẹ ndị rị e mẹ n'ọ sụọ ịhịan, kama, gi ni akpakalị obi ụnụ e mẹ ẹ, makẹ egun Di-nwọnni-ẹnyi.

²³ Ihiẹn ọwụlẹ wẹ sị ụnụ rụn, gi ni obi ụnụ ile rụn a, nọkẹ sị Di-nwọnni-ẹnyi kẹ ụnụ rị a rụnn'a, ẹlẹ ịhịan;

²⁴ ụnụ a marịnghọ nị Di-nwọnni-ẹnyi jẹnkọ d'e gi ihiẹn hụ o butọnị ndị nke ẹ kụ ụnụ ụgwọ. Kristi wụ Di-nwọnni-ẹnyi kẹ ụnụ gi ẹ e fe;

²⁵ ndị ile rị e mẹ eje-ihiẹn k'a narịn ụgwọ a, onwọnni onyẹ o klee ẹnya ihun.