Ndị Kolosị 2 - Ika

Isi Nke Ẹbụọ

¹ M chọ nị ụnụ marịn kẹ m dọn rị a lụnị ụnụ lẹ ndị rị Laodishia lẹ ndị ọzọ ile kelẹni hụntu m.

² M rị a lụ nị ndụn ban wẹ obi lẹ nị wẹ wụrụ ndị wẹ gi ihiẹn-ọsụsụọ kwọngbama, kẹni ihiẹn Osolobuẹ wechanrịn wẹ ẹnya hụn obi e gi ruchanrịn wẹ alị, a marịn wẹ ihiẹn-omimi Osolobuẹ, hụn wụ Kraịstị lẹ enwẹn ẹ,

³ Kraịstị hụn amamihiẹn lẹ nghọta ile zuerini rị imẹ ẹ.

⁴ M rị e ku ẹ amamgbe wẹ e gi oku rịgbu enwẹn ẹ mma dufie ụnụ.

⁵ Makẹni, ọsụọn'a nị arị m ebẹhụ, m hụ a imẹ-mmọn, ọ hụ a sụọ m m gha e legha kẹ ụnụ dọn rị e gi usọnrọn e bi lẹzi kẹ ụnụ dọn turu ọhụnma e gichanrịn Kraịstị e dọn ẹnya.

Ẹnyi E Gigụọ Kraịstị Zu Oke

⁶ Ebe o mẹ ni ụnụ a nabanhangụọ Jizọs Kraịstị nọkẹ Di-nwọnni ụnụ, e bi ni nwan kẹ ndị nke ẹ;

⁷ gba nị nwan nkpọgụn imẹ ẹ, e shi elu kẹ ụlọ wẹ rị a tụn, e turukẹnmẹ imẹ okukwe Kraịstị kẹ wẹ dọn kuzi ụnụ ya, a kpanmịn Osolobuẹ ogẹn ile.

⁸ Kpachanpụ nị ẹnya amamgbe w'e gi okẹn ịmarịn-ihiẹn hụn rulẹni alị hụn e dufieni kwọndọn ụnụ: makẹni nkuzi ịhịan lẹ mmọn lẹ iwu ndị wẹ gi e dọn ẹnya elu-ụwanị kẹ wẹ sọnkọ, ẹlẹ Kraịstị.

⁹ Kanị, ihiẹn ile Osolobuẹ gi wụrụ Osolobuẹ zu oke ẹhụ Kraịstị.

¹⁰ Ya wụ, ụnụ e zuọlẹ nwan oke hụnnị ụnụ rị imẹ Kraịstị, onyẹ ndị-ọkịkị ile lẹ ọkịkị ile rị okpuru ẹ.

¹¹ Imẹ Kraịstị, a kwagụọ wẹ ụnụ ezigbo ugun hụn wẹ gilẹni ẹka kwa — ghahanị ibepụ onyẹ ahụn ẹnyi te wụ, ịkwa-ugun hụn wụ nke Kraịstị.

¹² E mẹgụọ wẹ ụnụ mirin-Chuku gi ligbama ụnụ lẹ Kraịstị, wepụha ụnụ imẹ mirin gi weligbama ụnụ lẹ ya, makẹni ụnụ gi ikẹn Osolobuẹ dọn ẹnya, Osolobuẹ hụn gha ọnwụn weli Kraịstị.

¹³ Ụnụ te nwụnhụn anwụnhụn yeni mmẹfie lẹ obibi ndị wẹ kwalẹni ezigbo ugun wepụ onyẹ wẹ te wụ, kanị Osolobuẹ nọ mẹ ụnụ sọn Kraịstị rị ndụn, ọ gbagharị ẹnyi njọ ile ẹnyi mẹ.

¹⁴ Ọ nọ kagbu ụgwọ ile ẹnyi gi ebe wẹ detu ẹ, iwu ile ikpe gi ma ẹnyi, wepụ a, kpọ a ye elu-obe Kraịstị.

¹⁵ Ọ napụ ndị-ọkịkị ile lẹ ọkịkị ile ikẹn, gbe ifẹnrẹn ye wẹ ihun idẹnya ịhịan ile, gi ihiẹn o mẹ elu obe hụ mẹrichanrịn wẹ.

¹⁶ Anịlẹ ni wẹ nwan gi oku ihiẹn-oriri lẹ ihiẹn-ọrịra ma ụnụ ikpe, mọbụ oku mmẹmmẹ ọwụlẹ mọbụ Mmẹmmẹ ifọn-ọhụn mọbụ Ụhụọhịn Ezumikẹn rị ichẹn-ichẹn.

¹⁷ Ihiẹn ndịnị ile wụhụ onyinyọn ihiẹn lalanị, ezigbo ẹ wụ Kraịstị.

¹⁸ Anịlẹ ni ịhịan gi oku imẹshi ẹhụ ikẹn mọbụ oku ife ndị mmọn-ozi ma ụnụ ikpe: hụnyẹ e mẹ oku ọhụn ọ hụn, kanị ihiẹn rị a kịn'a wụ iroro ẹ hụn rị e bu ẹ isi.

¹⁹ O kwọndọnzini Kraịstị, hụn wụ isi hụn ẹhụ ile gha e nwọnhẹn ihiẹn-oriri, e mẹ akwanran rịn'a e kwọndọnsọnmẹ mkpamkpa ile rịn'a ghahanị okẹn-ẹhụ ile, e mẹ ẹhụ e sue ezigbo usue gha ẹka Osolobuẹ bịa.

Idu Kristi Nwụn Lẹ Idu Ẹ E Bi

²⁰ O mẹ nwan nị ụnụ e sọngụọ Kraịstị nwụnhụn, ụnụ a nwụnnahịngụọ mmọn lẹ iwu ile wẹ gi e dọn ẹnya elu-ụwanị. Kị ụnụ a gbayeni nwan omẹnalị lekẹ sị ụnụ wụzị nke ụwa?

²¹ “Ekwọndọnlẹ!” “Adanmịnlẹ!” “Emẹtụlẹ ẹka!”?

²² Omẹnalị ndịnị nwọn ebe w'e ru, makẹni wẹ wụhụ iwu lẹ nkuzi ịhịan-mmaka.

²³ W'a la ẹnya ọda — kẹ ife-ofufe w'a waye enwẹn wẹ olu kẹ iwelụa enwẹn ịhịan alị wụlẹni ezigbo ẹ kẹ imẹshi ẹhụ ikẹn. Kanị, ihiẹn la iwi rọ, makẹni ịhịan ara gi wẹ a saẹka e kwọndọn enwẹn ẹ.