Ndị Galeshịa 5 - Ika

Isi Nke Isẹn Ụnụ E Werigụọ Enwẹn Ụnụ!!

¹ Kraịstị gbapụha ẹnyi kẹni ẹnyi wụrụ ndị nwọn enwẹn wẹ. Wuzokẹnmẹ ni nwan kẹ ndị werigụ enwẹn wẹ! Anịkwọlẹ ni wẹ kpọmazị ụnụ ẹgan igbọn!

² Gọn ni ntịn! Mmẹ wụ Pọlụ rị a gwa ụnụ nị ụnụ nị wẹ kwa ụnụ ugun, ya wụ nị onwọnni erere Kraịstị k'a bannị ụnụ.

³ M rị a gwazị okẹnnyẹ ọwụlẹ hụn k'a nị wẹ kwa a ugun ya kwademẹkwọ n'o dọnmẹchanrịn Iwu ile.

⁴ Onyẹ ọwụlẹ rị e dọnmẹ Iwu n'o gi ẹ wụrụ onyẹ ezi-omumẹ ẹnya Osolobuẹ a ghagụọ imẹ Kraịstị pụ; ọ ghagụọkwọ imẹ ẹfọma Osolobuẹ mẹ danpụ.

⁵ Kanị, okukwe lẹ ikẹn Mmọn-nsọ kẹ ẹnyi nwẹn rị e gi che nị Osolobuẹ kuni ẹnyi ọhụnma ahụn ẹnyi rị a tụ ẹnya a.

⁶ Makẹni, imẹ Kraịstị wụ Jizọsị, ịkwa-ugun lẹ akwanị-ugun enwọnni ihiẹn ọ wụ. Ihiẹn rị mkpa wụ okukwe rị e gi ihiẹn-ọsụsụọ a ghọsị enwẹn ẹ.

⁷ Ụnụ te hụ a gba ọsọ elu-igwee ọhụnma! Onyẹ bu uke cheni ụnụ, ụnụ gizilẹni e sọn ezioku?

⁸ Ẹlẹkwọ Osolobuẹ hụn kpọ ụnụ nu ụnụ d'e mẹ ihiẹnni ụnụ rị e mẹ!

⁹ Ọ nọhụ kẹ wẹ e ku ẹ, “Ẹkẹrẹ yisti sụọ kẹ w'e buche, ọ ghagbarị brẹdi wẹ rị a gwọ.”

¹⁰ Kanị obi ru m alị imẹ Di-nwọnni-ẹnyi nị ụnụ erokọ ihiẹn ichẹn, sọnmẹ nkuzi ọzọ. Onyẹ hụ rị e nuhunmẹni ụnụ — onyẹ ọwụlẹ ọ wụ — k'a narịnrịrị afụnfụn rịn'a.

¹¹ Umunẹ m, omẹni echẹn kẹ m rị e mẹ oku ịkwa-ugun, kị wẹ rị e kpokpozini m? Ẹlẹ nkẹ obe Kraịstị e sebehi oku?

¹² K'ọ rị m, ndị hụ rị e ye ụnụ nsọngbu e jẹn d'a waradẹ enwẹn wẹ, ẹlẹdẹ ịkwa-ugun sụọ!

Anịlẹ Enwẹn I Kị Ị

¹³ Ụnụ nwẹn, Osolobuẹ kpọ ụnụ d'e weri enwẹn ụnụ, umunẹ m, ka egikwọlẹ ni nị ụnụ nwọn enwẹn ụnụ mẹmẹ k'ọ rị ụnụ; ka gi ni ihiẹn-ọsụsụọ e fetarị ibe ụnụ.

¹⁴ Makẹni, wẹ wegbamachanrịn Iwu ile imẹ iwu ohu hụn wụ “Ihiẹn ibe i k'a sụọrịrị ị kẹ ihiẹn enwẹn i dọn a sụọ ị.”

¹⁵ Kanị, omẹni ụnụ hụ a tagbu ibe ụnụ e ri, kpachanpụkwọ nị ẹnya, amamgbe ụnụ e gbupụ ibe ụnụ!

Mmọn-nsọ Lẹ Ịhịan-mmaka

¹⁶ M sị ụnụ, a nị nị nwan Mmọn-nsọ a kị ụnụ, makẹ ụnụ gha e mẹ kẹ ịhịan-mmaka.

¹⁷ Makẹni, ihiẹn ịhịan-mmaka a chọ ẹlẹ ihiẹn Mmọn-nsọ a chọ; ihiẹn Mmọn-nsọ a chọ ẹlẹ ihiẹn ịhịan-mmaka a chọ. Wẹ ẹbụbụọ a lụsọn ibe wẹ ọgụn e gbọndọn i emẹlẹ ihiẹn ị chọ n'ị mẹ.

¹⁸ Kanị, omẹni Mmọn-nsọ rị a kị ụnụ, ya wụ nwan nị ụnụ arịzị okpuru iwu.

Ịhịan-mmaka

¹⁹ Ihiẹn ịhịan-mmaka e mẹ pụhachanrịn ifọn; wẹ wụ ihiẹn ndịnị: ughẹrẹ, ibi obibi ru unyin, imẹ ihiẹn-ifẹnrẹn,

²⁰ ịrụa-mmọn, ịgwọ-ọgụn lẹ ịgba-ẹfa, idu-eṅẹnrẹn, ikpe, ẹnya-ụfụ, eje-olulu, ịchọ nke-i nke-i, nkebe, ịzụọ ẹka-nke,

²¹ iwe-ẹnya, igbu-ọchụn, ịra-manya tụ, eje-mmẹmmẹ lẹ ihiẹn ndị ọzọ nọ ẹrịra. M rị nwan a gba ụnụ mkpịnsịn-ẹka ẹnya kẹ m dọn gba ụnụ ya mbụ, nị ndị hụn e mẹ ihiẹn nọ ẹrịra abankọ Alị-eze Osolobuẹ.

Mmọn-nsọ

²² Kanị, mkpụrụ Mmọn-nsọ a mịpụha wụ: ihiẹn-ọsụsụọ, ịghọghọ, udọn, ndidin, ẹfọma, imẹ-mma, ịwụ onyẹ wẹ gi e dọn ẹnya,

²³ imẹ-jụụ, ikwọndọn-enwẹn ịhịan. Onyẹ e mẹ ihiẹn ndịnị adannị iwu ọwụlẹ.

Ibi Kẹ Onyẹ Nke Kraịstị

²⁴ Ndị hụn wụ nke Kraịstị Jizọsị a kpọgbugụọ ịhịan-mmaka wẹ te wụ lẹ ihiẹn a gụnn'a lẹ ihiẹn a sụọn'a elu obe Kraịstị.

²⁵ Ebe o mẹ ni Mmọn-nsọ e ye ẹnyi ndụn, nị ẹnyi e bi ni nwan kẹ ndị Mmọn-nsọ rị a kị.

²⁶ Ẹlẹ hụn ẹnyi e gi pachemẹ — a kpasu ibe ẹnyi iwe mọbụ e weni ibe ẹnyi iwe-ẹnya.