Ndị Galeshịa 4 - Ika

Isi Nke Ẹnọ Ụnụ E Werigụọ Enwẹn Ụnụ!

¹ Ihiẹn m rị e ku wụ nị, ebe nwa jẹnkọ d'a kwarị ukuu nẹdi ẹ kelẹni ru ogo, ọ rịhụ kẹ igbọn, ihiẹn ichẹn arịa, ọsụọn'a nị ihiẹn ile wụ nke ẹ:

² ọ rịsọnmẹ okpuru ndị e dun'ẹ lẹ ndị e lepụ a ẹnya d'e ru ogẹn nẹdi ẹ kaye.

³ Ẹrịra kẹ ẹnyi nọ kẹ ẹnyi rị ụmụẹka, ẹnyi wụsọnmẹ igbọn okpuru mmọn lẹ iwu lẹ ihiẹn ile wẹ gi e dọn ẹnya elu-ụwa.

⁴ Kanị ogẹn e zu, Osolobuẹ nọ zihẹ Nwa a: okpoho mụ a; wẹ mụ a ye okpuru Iwu.

⁵ Osolobuẹ zihẹ ẹ n'ọ hụn ụzọ gbarị ndị rị okpuru Iwu, kẹni ẹnyi họnrin ụmụ Osolobuẹ.

⁶ Makẹni ụnụ wụ ụmụ, Osolobuẹ nọ zihẹ Mmọn Nwa a ye imẹ obi ẹnyi; ọ hụ imẹ ẹnyi a hị, “Baba! Baba nẹdi m!”

⁷ Ya wụ nwan nị y'ẹlẹzi igbọn; nwa kẹ ị wụ. Ebe o mẹ ni nwa k'ị wụ, Osolobuẹ k'e keye i ihiẹn ẹ.

Ekinlẹ Ni Imẹ Ẹgbụn

⁸ Mgbe mbụ, ogẹn ụnụ kelẹni marịn Osolobuẹ, ụnụ te wụ igbọn ihiẹn ichẹn-ichẹn furulẹni w'e fe hụn ụnụ e fe.

⁹ Kanị hụnnị ụnụ marịngụ Osolobuẹ, mba, hụnnị Osolobuẹ marịngụ ụnụ, kị ụnụ burukọzịnị mmọn lẹ iwu lẹ ihiẹn ndị ahụn nwọnlẹni isi ndụn rịlẹni hụn ịhịan mmaka gi e dọn ẹnya nị ụnụ d'e họnrinzi igbọn wẹ?

¹⁰ Ụnụ rị nwan a gbaye ụhụọhịn lẹ ifọn lẹ ogẹn lẹ ahụa ichẹn-ichẹn!

¹¹ Egun ụnụ rị a tụ m, nị ikẹnkwọ ọrụn ile m rụn ebe ụnụ rị a lagụọ iwi!

¹² M rị a rịọ ụnụ umunẹ m, rị nị kẹ mmẹ, makẹni a rịgụọ m kẹ ụnụ, etuni m. Ụnụ nwẹn etuzikwọnị, ụnụ emẹni m njọ.

¹³ Ụnụ a marịnghọ nị emu rị a kụnị m ogẹn ahụn wẹhẹni m oghere m gi zi ụnụ oziọma isi-ibuzọ ahụn.

¹⁴ Kanị, ụnụ etuni ụya rị m ẹhụ hụn mẹ ụnụ ibu, ụnụ elegberini m, ụnụ ajụnị m; kama, ụnụ nabanhan m nọkẹ sị m wụ mmọn-ozi Osolobuẹ, nọkẹ sị m wụ Kraịstị Jizọsị lẹ enwẹn ẹ.

¹⁵ Kị mẹzi ịghọghọ hụ ile ụnụ nwọn ogẹn hụ?! M rị a shịa ẹri nị, omẹni ọ te rị nfe, nkẹ ụnụ a gụye m akp'ẹnya ụnụ, omẹni o te k'e yeni m ẹka!

¹⁶ Kị m họnrinni nwan eṅẹnrẹn ụnụ, makẹni m gwa ụnụ ezioku?

¹⁷ Wẹ rị nwan e mẹ oku ụnụ, kanị ẹlẹ ihiẹn rị mma kẹ wẹ bu obi! Wẹ chọhụ nị wẹ wepụ ụnụ ebe ụnụ rị, kẹni ụnụ bu ẹnya zinmẹ wẹ.

¹⁸ Ọ hụghọkwọ mma nị w'e mẹ oku ịhịan, omẹni ufiri ihiẹn rị mma rọ, omẹni w'e mẹ ẹ ogẹn ile, ẹlẹni mmẹ lẹ ụnụ nọdị sụọ.

¹⁹ Ụmụ m, imẹ ụnụ e mẹmẹzi m kẹ okpoho rị imẹ, imẹ hụn sikọ d'e mẹ m d'e ru ni ndụn Kraịstị a gbọrị imẹ ndụn ụnụ,

²⁰ k'ọ rị m m rị imẹ igunrun ụnụ kikẹnni, kẹni m hụn ụzọ gbehutọ ẹka, makẹni amarịnzị m hụn ụnụ rị!

Ihiẹn Pọlụ Gi Sẹra Lẹ Haga Ghọsị

²¹ Gwadẹ ni m, ụnụ ndị chọkọ nị ụnụ rị okpuru Iwu, ụnụ anụnị ihiẹn Iwu Mozizi ku?

²² Wẹ de ẹ imẹ Iwu nị Ebraham mụ ikẹnnyẹ ẹbụọ: Haga nnẹ ohu wụ igbọn; Sẹra nnẹ hụn-ẹbọ ẹlẹ igbọn.

²³ Hụn nnẹ ẹ wụ igbọn bịa kẹ nwa dọn a bịa; kanị hụn nnẹ ẹ nwọn enwẹn ẹ bịa ghahanị nkwa Osolobuẹ kwe.

²⁴ Ẹnyi k'a s'ẹka gi ihiẹn ndịnị ghọsị ihiẹn: wẹ gi ikpoho ẹbụọnị e ku oku nkwerigbama ẹbụọ. Ohu wụ hụn wẹ nọ elu Ugu Saịnaị mẹmẹ. Ọhụn kẹ Haga nọkin ẹnya a; ọ mụ ụmụ, a wụrụ wẹ igbọn.

²⁵ Haga nọkin ẹnya Ugu Saịnaị hụn rị imẹ atụ alị Arebịa. Ọ ghọsị obodo Jerusalẹm hụn rị ogẹnni, makẹni Jerusalẹm lẹ ụmụ a wụ igbọn kikẹnni.

²⁶ Kanị Jerusalẹm rị elu-igwee ẹlẹ igbọn; ịya wụ nnẹ ẹnyi.

²⁷ Makẹni Ẹkụkwọ-nsọ sị, “Ghọghọma nwan! Ịyụ wụ agan, hụn mụtulẹni nwa! Kwankpọma ẹbụ! Yimẹ oro! Ịyụ, imẹ mẹtulẹni! Makẹni, ụmụ okpoho hụ wẹ jụtọ a karịgụọ nke okpoho hụ ya lẹ di ẹ bichanrịn!”

²⁸ Umunẹ m, ụnụ wụ ụmụ wẹ kwe nkwa a nọkẹ Aziki.

²⁹ Kanị, ọ rị nwan k'ọ rị ogẹn ahụn: nwa wẹ mụ kẹ ịhịan a mụ nwa kpokpo hụn wẹ mụ ghahanị Mmọn Osolobuẹ.

³⁰ Kanị, kị Ẹkụkwọ-nsọ ku? Ọ sị, “Chụpụ igbọn ahụn lẹ nwa a; makẹni onwọnni ogẹn nwa igbọn hụ e gi sọn nwata ahụn nnẹ ẹ wụlẹni igbọn keri ukuu.”

³¹ Umunẹ m, ẹnyi ẹlẹ nwan ụmụ okpoho hụ wụ igbọn, kama, ụmụ okpoho ahụn wụlẹni igbọn kẹ ẹnyi wụ.