Ndị Galeshịa 3 - Ika

Isi Nke Ẹtọ Iwu ra Okukwe?

¹ Euu ndị Galeshịa, ndị-nzuzu! Onyẹ mẹ ụnụ ihiẹnni? Idẹnya ụnụ kẹ wẹ nọ ghọsịchanrịn nị wẹ kpọgbu Jizọsị Kraịstị elu obe.

² Ihiẹn ohuni sụọ kẹ m chọ nị m marịn: gwadẹleni m, nanị kẹ ụnụ dọn nwọnhẹn Mmọn-nsọ? Ghahanị idọnmẹ Iwu ra ghahanị ikweri oziọma ụnụ nụ?

³ Ẹrịra kẹ ụnụ e zuzuhan? Ẹka Mmọn-nsọ kẹ ụnụ gha bidọn; ụnụ rị nwan a lịlịma nị ụnụ gi ikẹn ụnụ, ikẹn ịhịan, mẹchanrịn a?

⁴ Nị m jụlele ụnụ: afụnfụn ahụn ile ụnụ ta a lagụọ iwi? Mba nụ — ra ọ lagụọdẹ iwi?

⁵ Osolobuẹ hụn e ye ụnụ Mmọn-nsọ a, a rụn ọrụn atụmẹnya imẹ igunrun ụnụ, o ye ụnụ ya nị ụnụ rị e dọnmẹ Iwu Mozizi ra makẹni ụnụ hụ a nụ e gi ihiẹn ụnụ nụ e dọn?

⁶ Nke Ebraham, Ẹkụkwọ-nsọ sị, “O kweyeni Osolobuẹ, Osolobuẹ nọ gụn a yen'ẹ, kpọ a onyẹ ezi-omumẹ.”

⁷ Gi ni ọnwan marịn nị ndị hụn wụ ezigbo ụmụ Ebraham wụ ndị kwerini.

⁸ Ẹkụkwọ-nsọ e kutọgụọ a nị Osolobuẹ jẹnkọ d'e gi okukwe ndị wụlẹni ndị Ju kuni wẹ ọhụnma; ọ sị nị Chuku zi Ebraham oziọma ẹdẹi, sị, “Ẹka ị kẹ Osolobuẹ k'a gha gọzi ndị alị ile.”

⁹ Ya wụ, ndị hụn kwerini k'e sọn Ebraham hụn kwerini wụrụ ndị wẹ gọzi.

¹⁰ Ndị hụ gi idọnmẹ Iwu e dọn ẹnya a wụrụọlẹ ndị wẹ bụ ọnụ. Makẹni, Ẹkụkwọ-nsọ sị, “Onyẹ ọwụlẹ ghalẹni e dọnmẹ ihiẹn ile wẹ de imẹ ẹhụhụọ Iwu e họnringụọ onyẹ wẹ bụ ọnụ!”

¹¹ O wegụọ nwan ẹnya n'o nwọnni onyẹ Osolobuẹ jẹnkọ d'e kuni ọhụnma makẹni o dọnmẹ Iwu. Ezioku rọ, makẹni Ẹkụkwọ-nsọ sị, “Okukwe kẹ onyẹ ezi-omumẹ k'e gi rị ndụn,”

¹² bụ ẹlẹ okukwe kẹ Iwu gi a rụn, makẹni, Iwu lẹ enwẹn ẹ e kugụọ nị, “Onyẹ e mẹ ihiẹn Iwu ku k'e gi wẹ rị ndụn.”

¹³ Kraịstị gbapụha ẹnyi imẹ abụmọnụ rị imẹ Iwu ghahanị igi ufiri ẹnyi wụrụ onyẹ wẹ bụ ọnụ. Makẹni, Ẹkụkwọ-nsọ sị, “Onyẹ ọwụlẹ wẹ hogbu elu osisi a wụrụọlẹ onyẹ wẹ bụ ọnụ.”

¹⁴ Ọ gbapụha ẹnyi kẹni ngọzi Osolobuẹ gọzi Ebraham hụn ụzọ ruzi ndị alị ndị ọzọ wụlẹni ndị Ju ẹka, ghahanị Kraịstị wụ Jizọsị, kẹni ẹnyi hụn ụzọ gi okukwe nwọnhẹn Mmọn-nsọ ahụn Osolobuẹ kwe nkwa a.

Iwu Lẹ Nkwa Osolobuẹ

¹⁵ Umunẹ m, nị m gi ihiẹn w'e mẹ ụhụọhịn ile kọwa ihiẹnni: madụ ẹbụọ kwerigbamaọlẹ biye ẹka, onwọnni onyẹ k'a saẹka kagbu ẹ mọbụ wechen'ẹ.

¹⁶ Ogẹn Osolobuẹ gi kwe Ebraham lẹ nwa a nkwa hụ, Ẹkụkwọ-nsọ asịnị “Ụmụ ị” ya wụ, hụn karị onyẹ ohu; kanị ọ sị “nwa ị” ya wụ onyẹ ohu sụọ — hụn wụ Kraịstị.

¹⁷ Ihiẹn m gi ẹ e ku wụ nị Osolobuẹ e biyegụọ nkwerigbama hụ ẹka, tumẹ ẹ; Iwu wẹ webanhan kẹ ọrọgbọ ahụa iri-kwasị-ọgụn kwasị nnụ (430) gharịgụ asakọ nwan ẹka kagbu nkwerigbama Osolobuẹ biyegụ ẹka lẹ nkwa o kwe imẹ nkwerigbama ahụn.

¹⁸ Makẹni, omẹni idọnmẹ Iwu kẹ wẹ gi e nwọnhẹn ihiẹn Osolobuẹ kwe nkwa a, ya wụ nị ẹlẹzi nkwa a haịn wẹ gi e nwọnhẹn ẹ. Kanị, ezioku-ezioku, Osolobuẹ ye Ebraham ya ọfẹ gi ẹ mẹzu nkwa a.

Kị Haịn Nwan Wẹ Gi Ye Iwu?

¹⁹ Kị Osolobuẹ webanhannị nwan Iwu? Njọ haịn. O webanhan a n'ọ rụn d'e ru ogẹn nwa ahụn wẹ kwe nkwa hụ e gi bịa. Wẹ gha ẹka ndị mmọn-ozi tumẹ Iwu hụ, we ẹ ye ụkọ ye wẹ.

²⁰ Kanị w'a ra chọ ụkọ ebe onyẹ ohu sụọ nọ e mẹ ihiẹn: Osolobuẹ aghanị ẹka ụkọ kwe Ebraham nkwa ahụn.

²¹ Arị m e ku nị Iwu lẹ nkwa Osolobuẹ wụ eṅẹnrẹn. Kaka akpohu! Makẹni, omẹni wẹ te ye iwu hụn a saẹka e ye ndụn, nkẹ ọ wụrụ nị, ezioku-ezioku, onyẹ dọnmẹ ẹ, ọ wụrụ onyẹ ezi-omumẹ.

²² Kanị Ẹkụkwọ-nsọ e kugụọ a nị ịhịan ile rị ẹgbụn njọ, ndị kwerini nwan Jesu Kristi kẹ Osolobuẹ e ye ihiẹn Osolobuẹ kwe nkwa a.

²³ Kẹ ẹnyi kelẹni kweri ni Kraịstị, Osolobuẹ bu ẹnyi dọnmẹ okpuru Iwu, kpọkin ẹnyi ye, nọkẹ ndị ngan, e che ogẹn okukwe e gi bịa.

²⁴ Ya wụ, Osolobuẹ tumẹ Iwu n'ọ wụrụnị ẹnyi onyẹ bu mkpịnsịn e lepụ ẹnyi ẹnya d'e ru ni Kraịstị a banhan, kẹni o gi okweri ẹnyi jẹnkọ d'e kwerini Kraịstị kpọ ẹnyi ndị ezi-omumẹ.

²⁵ Kanị, hụnnị ẹnyi kwerigụnị Kraịstị, ẹnyi arịzị okpuru onyẹ nlepụ-ẹnya.

²⁶ Ụnụ ile wụ ụmụ Osolobuẹ ghahanị okweri ụnụ kwerini Kraịstị wụ Jizọsị,

²⁷ makẹni, ụnụ ile wẹ gi mirin-Chuku lẹ Mmọn-nsọ buche imẹ Jesu Kristi e yirigụọ Kraịstị.

²⁸ Ya wụ nị onwọnzini ihiẹn rị ichẹn ẹgbata ndị Ju lẹ ndị wụlẹni ndị Ju; ẹgbata igbọn lẹ onyẹ nwọn enwẹn ẹ; ẹgbata ikẹnnyẹ lẹ ikpoho: ẹnyi ile wụ ohu imẹ Kraịstị wụ Jizọsị.

²⁹ O mẹ nwan nị ẹnyi wụ nke Kraịstị, ụmụ Ebraham kẹ ẹnyi wụ, ndị sikọ nwan d'e nwọnhẹn ihiẹn Osolobuẹ kwe nkwa a.