Ndị Galeshịa 1 - Ika

Isi Nke Ohu

¹ Mmẹ wụ Pọlụ de ẹkụkwọ-ozini. M wụ onyẹ-ozi pụ-ichẹn, ẹlẹ hụn ịhịan zi mọbụ hụn wẹ gha ẹka ịhịan tumẹ, kanị hụn Jesu Kristi lẹ Chuku-Nẹdi hụn gha ọnwụn weli Jesu Kristi tumẹ.

² Mmẹ lẹ umunẹ ẹnyi imẹ Kraịstị ndị mmẹ lẹ wẹ rị ebeni gba de ẹ. Ẹnyi rị e dejẹnni ụka ichẹn-ichẹn rịsọnmẹ Ẹgbẹrẹ Galeshịa ya.

³ Ẹfọma lẹ udọn hụn gha ẹka Osolobuẹ Nẹdi ẹnyi lẹ Di-nwọnni-ẹnyi wụ Jesu Kristi bịa ya rịnị ụnụ.

⁴ Di-nwọnni-ẹnyi wụ Jizọs Kraịstị we ndụn a ye makẹ ufiri njọ ẹnyi, kẹni ọ gbapụha ẹnyi imẹ eje-agbọnị gi mẹzu uche Osolobuẹ ẹnyi wụ Nẹdi ẹnyi.

⁵ Ọghọ ya rịnị Osolobuẹ Nẹdi ẹnyi jẹnrin ejẹn! Isẹẹ.

Oziọma Ọzọ Arịa

⁶ Ọ tụka m ẹnya nị o ke mẹ emẹ ụnụ a latọma onyẹ ahụn gi ufiri ẹfọma Kraịstị kpọ ụnụ, nabanhanma “oziọma ọzọ;”

⁷ ẹlẹni oziọma ọzọ rị a rị nke-esi, kanị o nwọnghọ ndị rị e ye ụnụ nsọngbu, e mẹ obi eruzilẹ ụnụ alị, a chọ nị wẹ gbehutọ oziọma Kraịstị.

⁸ Kanị, ọsụọn'a nị ẹnyi lẹ enwẹn ẹnyi mọbụ mmọn-ozi ghadẹ elu-igwee bịa d'e zimẹ ụnụ “oziọma” ọzọ wụlẹni hụn ẹnyi zi ụnụ, Osolobuẹ ya tikpọ hụnyẹ!

⁹ Kẹ ẹnyi dọn ku mbụ, m rịzị nwan e ku ẹ: omẹni onyẹ ọwụlẹ rị e zi ụnụ “oziọma” ọzọ wụlẹni hụn ahụn ụnụ nabanhan mbụ, Osolobuẹ ya tikpọ hụnyẹ!

Jesu Tumẹ M, Ẹlẹ Ịhịan

¹⁰ M rịdẹ nwan a chọ nị ịhịan kuni m ọhụnma ra Osolobuẹ? Ra a chọmagụọ m nwan nị m mẹ n'ọ sụọ ịhịan? Omẹni echẹn kẹ m rị a chọ nị m mẹ n'ọ sụọ ịhịan, ya wụ nị ẹlẹ m igbọn Kraịstị.

¹¹ Umunẹ m, m chọ nị ụnụ marịn nị oziọma m zi aghanị ẹka ịhịan bịa;

¹² amụnarịnnị m ịhịan ya; ẹlẹ ịhịan kuzi m'ẹ. Kama, Jesu Kristi lẹ enwẹn ẹ we ẹ ghọsị m.

¹³ Ụnụ a nụgụọ kẹ m dọn bi mbụ, ogẹn m gi rị e fe ofufe ndị Ju, ofufe Iwu Mozizi: kẹ m dọn kpokpo ụka Osolobuẹ ọda-ọda, chọ nị m kpọnchanpụ a.

¹⁴ Imẹ ofufe ẹnyi ndị Ju, mmẹ ka ndị ọgbọ m bu ọda ofufe e fe ogẹn ahụn. E mẹkẹmẹkẹ m oku omẹnalị ndị nẹdi ẹnyi ogẹn ahụn.

¹⁵ Kanị, ogẹn o gi sụọ Osolobuẹ, hụn gi ẹfọma a họrị m kpọ m kẹ m rịdẹ ẹfọ nnẹ m,

¹⁶ ọ nọ mẹ m marịn Nwa a, kẹni m zi ndị alị ndị ọzọ wụlẹni ndị Ju ozi Nwa a. Ogẹn o gi mẹ ẹ, ejẹnni m ozigbo d'a jụma ịhịan.

¹⁷ Ejẹndẹni m Jerusalẹm d'e kunrun ndị buni m ụzọ wụrụ ndị-ozi pụ-ichẹn, kama, e shi m Arebịa ozigbo. O mẹgụ, m nọ kinhẹnzi Damaskọsụ.

¹⁸ Ahụa ẹtọ a ghafegụ, m nọ nwan shi Jerusalẹm d'a hụn Kẹfasị wụ Pita; m nọ sọn ẹ nọdị akpọhịn mmisẹn.

¹⁹ Onwọnni onyẹ ọzọ m hụn imẹ ndị-ozi pụ-ichẹn họdụnị wezụka Jemisi nwẹnẹ Di-nwọnni-ẹnyi.

²⁰ M rị a gwa ụnụ, idẹnya Osolobuẹ, nị ihiẹnni m rị e deni ụnụ wụ ezioku, ẹlẹ ntụ!

²¹ Omẹgụ, m nọ jẹn Ẹgbẹrẹ Siria lẹ Silisia.

²² Ndị ụka Kraịstị rịsọnmẹ Ẹgbẹrẹ Judia e ke marịn m ọmarịn ẹnya ogẹn ahụn.

²³ Wẹ gihụ ntịn wẹ nụ kẹ wẹ rị a sị “Onyẹ ahụn te rị e kpokpo ẹnyi mbụ rị nwan e zisọnmẹ ozi okukwe ahụn o te chọ n'o tikpọ!”

²⁴ Wẹ nọ gi ufiri m ja ẹfan Osolobuẹ mma.