Ndị Filipi 4 - Ika

Isi Nke Ẹnọ

¹ Ezi umunẹ m, hụn rị a danị m, ịghọghọ m lẹ ugọn m! Ndị nke m, turukẹnmẹni nwan ẹrịra imẹ Di-nwọnni-ẹnyi!

Ndụnmọdụn

² Yodia, dodo! Sintike, dodo! Dodo ni, e gi ni obi ohu e bi, nọkẹ ndị nke Di-nwọnni-ẹnyi.

³ Ẹghẹẹ, yụ wụ onyẹ-ọrụn ibe m furu wẹ gi e dọn ẹnya, m rị a rịọ ị n'ị yeni ikpoho ndịnị ẹka, makẹni e sọngụọ wẹ m lụnị oziọma ọgụn, uwẹ lẹ Klemẹnti lẹ ndị ọzọ ile mmẹ lẹ wẹ gba a rụn ọrụn — ndị ẹfan wẹ rị imẹ ẹkụkwọ ndụn-itẹbitẹ.

⁴ A ghọghọ nị imẹ Di-nwọnni-ẹnyi ogẹn ile! E kuzi m'ẹ: a ghọghọ nị!

⁵ Ịhịan ile wẹ gi ẹka rị mma ụnụ gi e sọn ihiẹn ile marịn ụnụ; Di-nwọnni-ẹnyi lala ẹgwa.

⁶ Ehuelẹ ni uhue ihiẹn ọwụlẹ; imẹ ihiẹn ile, e gi ni ekpere lẹ arịrịọ lẹ iye-ekele a gwa Osolobuẹ ihiẹn rị ụnụ mkpa.

⁷ Ogẹn hụ, udọn Osolobuẹ hụn wẹ ghalẹni a ghọta e chemẹ obi ụnụ lẹ uche ụnụ imẹ Kraịstị wụ Jizọsị.

⁸ Umunẹ m, igi mẹkin, m sị ụnụ, e bu ni obi e che ihiẹn ọwụlẹ wụ ezioku, ihiẹn ọwụlẹ w'a gbaye, ihiẹn ọwụlẹ furuni; ihiẹn ọwụlẹ eje-ihiẹn rịlẹni, ihiẹn ọwụlẹ a sụọ ịhịan ụsụọ ẹfọ, ihiẹn ọwụlẹ w'a ja mma; ihiẹn ọwụlẹ rịchanrịn mma, ihiẹn ọwụlẹ wẹ e ku oku ẹ ọhụnma.

⁹ E mẹsọnmẹ ni ihiẹn ụnụ mụnarịn m, ihiẹn ụnụ nwọnhẹn ẹka m, ihiẹn ụnụ nụ ọnụ m lẹ ihiẹn ụnụ hụn m ẹka. Ụnụ mẹ wẹ, Osolobuẹ hụn e mẹ obi e ru ịhịan alị k'a nọyeni ụnụ.

Ụnụ E Mẹkẹ!

¹⁰ A ghọghọkakwọ m imẹ Di-nwọnni-ẹnyi nị ụnụ e romẹzi m ikpanzụụnnị. Eziẹ, ụnụ e ro m ero, kanị ụnụ ahụnnị oghere ụnụ e gi ghọsị a.

¹¹ Ẹlẹni mkpa gi m haịn m gi e ku ihiẹnni. Mba, a mụnrụngụọ m ịnị ihiẹn m nwọn e jun m ẹfọ.

¹² A marịngụọ m kẹ ihiẹn dọn a kọ ịhịan lẹ kẹ ịhịan dọn e nwọn ọda. A mụnrụngụọ m kẹ w'e dingbu ihiẹn ile lẹ ọnọdị ọwụlẹ: kẹ m rijun ẹfọ kẹ m bu ẹgụn; kẹ e nwọnkẹ m kẹ enwọn m enwọn.

¹³ M'a saẹka e mẹ ihiẹn ile ghahanị Onyẹ hụn e ye m ikẹn.

¹⁴ K'osilẹrị, ụnụ e mẹkẹ ụnụ gi yeni m ẹka imẹ nsọngbu m.

¹⁵ Ụnụ ndị Filipi a marịngụọ nị ogẹn ẹnyi gi zimẹ oziọma ebẹhụ, kẹ m pụgụ Ẹgbẹrẹ ụnụ wụ Masẹdonia, nị onwọnni ụka ọzọ gi ihiẹn wẹ a kwadọn m nị mmẹ wẹ lẹ gba a rụn karị ụnụ sụọ.

¹⁶ Kẹ ogẹn m gidẹ rị Tẹsalonika, ẹlẹdẹ mgbe ohu sụọ kẹ ụnụ zihẹni m ihiẹn rị a kọnị m.

¹⁷ Ẹlẹni m chọkọ ihiẹn ụnụ k'e ye m. Kaka akpohu! M rị a chọ nị wẹ gụn ọrụn-ọma ụnụ yeni ụnụ kẹni o wẹhẹni ụnụ erere.

¹⁸ Ihiẹn ile ụnụ ye e rugụọ m ẹka! O bukẹ!! Hụnnị Ẹpafrọditọsụ wẹhẹni m ihiẹn ile ụnụ ye ẹ bịanị m, ẹfọ e jungụọ m. Oyiye ishin ẹ a sụọ Osolobuẹ rọ, ẹjan Osolobuẹ a nabanhan hụn a sụọ a ụsụọ.

¹⁹ Chuku m jẹnkọ d'e yechanrịn ụnụ ihiẹn ile rị ụnụ mkpa. O k'e ye ụnụ ya mmagi-mmagi kẹ akụ-lẹ-ụba a han imẹ Kraịstị wụ Jesu.

²⁰ Ọjịja-mma ya rịnị Osolobuẹ wụ Nẹdi ẹnyi jẹnrin ejẹn. Isẹẹ!

Ekele Ikpanzụụn Lẹ Ngọzi

²¹ Kele ni ndị-nsọ Kraịst Jizọsị ile. Umunẹ ẹnyi imẹ Kraịstị mmẹ lẹ wẹ rị ebeni e zi ekele ụnụ.

²² Ndị-nsọ ile e zi ekele, tụmadụ ndị rị obi-eze Siza.

²³ Ẹfọma Di-nwọnni-ẹnyi wụ Jesu Kristi ya rịnị mmọn ụnụ.