Ndị Ẹfẹsọsụ 6 - Ika

Isi Nke Isin Ụmụ Lẹ Ndị Mụnị Wẹ

¹ Ụmụ, e humẹni ni ndị mụnị ụnụ isi kẹ Onyẹ-nwọnni-ẹnyi dọn ku ẹ, makẹni o furu efuru.

² “Gbaye nẹdi i lẹ nnẹ i.” Ọnwan wụ iwu ibuzọ nkwa rị, nkwa hụ wụ,

³ “kẹni ọ rịn'ị mma, n'i nwọn isi-nka elu ụwa.”

⁴ Nẹdi lẹ nnẹ, atọlẹ ni akpasu ụmụ ụnụ iwe, ka e gi ni ọzụnzụn lẹ nkuzi Di-nwọnni-ẹnyi a zụn wẹ.

Idibo Lẹ Ndị Ịhịan Rị Okpuru Wẹ

⁵ Idibo lẹ igbọn, e gi ni egun lẹ ẹhụ ọmụma-nni e humẹni ndị ụnụ rị okpuru wẹ isi. E gichanrịn nị obi ụnụ ile e mẹ ẹ, nọkẹ sị Kraịstị kẹ ụnụ rị a gbaye.

⁶ Ẹlẹkwọ idẹnya wẹ sụọ — kẹni ịhịan sị ụnụ hụ a rụn — kama, e gi ni akpakalị obi ụnụ e mẹ ẹ rịkẹ igbọn Kraịstị makẹni uche Osolobuẹ rọ.

⁷ A shịapụ nị ẹfọ a rụn ọrụn ụnụ nọkẹ ndị rị a rụnnị Di-nwọnni-ẹnyi, ẹlẹ ịhịan.

⁸ Makẹni ụnụ a marịnghọ nị Di-nwọnni-ẹnyi jẹnkọ d'a kụ onyẹ-onyẹ ụgwọ ihiẹn-ọma o mẹ — kẹ igbọn kẹ onyẹ nwọn enwẹn ẹ.

⁹ Ndị ịhịan rị okpuru wẹ, e gizi nị ẹka rị mma ẹrịra e sọn wẹ. Erọnzilẹ ni wẹ egun. Ụnụ a marịnghọ nị ụnụ lẹ wẹ rị okpuru Nna ohu hụn rị elu-igwee hụn ghalẹni e tu onyẹ ịhịan wụ.

Ekikẹn-agha Onyẹ Nke Osolobuẹ

¹⁰ Nke ikpanzụụn, kakẹnmẹ ni ebe ihiẹn Di-nwọnni-ẹnyi rị, e nwọnkẹnmẹ ikẹn ẹ ahụn hi ogbe.

¹¹ Yiri ni ihiẹn-agha Osolobuẹ ile, kẹni ụnụ saẹka che Ekwensụ lẹ ẹro ẹ ile ọgụn.

¹² Makẹni, ẹlẹ ịhịan nwọn ẹhụ lẹ ẹdeke kẹ ẹnyi lẹ wẹ rị a lụ ọgụn, kanị, eje-mmọn rị ichẹn-ichẹn: ndị-isi eje-mmọn lẹ ndị-ọkịkị wẹ lẹ eje-mmọn ndị rị e mẹ eluni a gba ishi lẹ mmọn ile rị imẹ elu rị a kwadọn njọ kẹ ẹnyi lẹ wẹ rị a lụ.

¹³ Kọnrin ni nwan agha! Weri ni nwan ihiẹn-agha Osolobuẹ ile, kẹni, eje-ụhụọhịn bịa, ụnụ a hụn ụzọ saẹka turu; kẹni ụnụ saẹka mẹchanrịn ihiẹn ile furuni bụ ụnụ turuhụkwọ ebe ụnụ turu.

¹⁴ Turukẹnmẹ ni nwan! Ụnụ e gi ezioku kẹnmẹ ukun nọkẹ akpụkpọ-ukun onyẹ-agha; ụnụ e yiri ezi-omumẹ nọkẹ ẹwuru igwe onyẹ-agha gi e kpumẹ obi.

¹⁵ Yiri ni adụdụ izi-oziọma udọn ụkụ nọkẹ akpụkụ onyẹ-agha.

¹⁶ Buruzi ni okukwe cheni wẹ ile nọkẹ akpaịn onyẹ-agha ụnụ e gi saẹka gbọndọn ọbara-ụta ile rị e nwun ọkụn Eje-onyẹ ahụn rị a gba;

¹⁷ weri ni nzụọpụha Osolobuẹ zụọpụha ụnụ kpumẹ isi rịkẹ okpu onyẹ-agha; ụnụ e weri oku-Chuku hụn wụ ọpịa-agha Mmọn-nsọ, kwọndọn.

¹⁸ E gi ni ekpere lẹ ịrịọ-Osolobuẹ e sọn ihiẹn ile, e mẹ ekpere ogẹn ile kẹ Mmọn-nsọ dọn chọ; mụnrụn nị ẹnya ebe ekpere rị, anịlẹ ni ndụn gụ ụnụ; e mẹni ni ndị nke Osolobuẹ ile ekpere.

¹⁹ E mẹzikwọ nị nị mmẹ nwẹn ekpere, kẹni Osolobuẹ e ye m ihiẹn m sikọ d'e ku, m shịapụ ọnụ nị m zi oziọma, o mẹ m ku ẹ kushi ẹ ikẹn, e mẹ m wẹ marịn ihiẹn-omimi rị imẹ oziọma;

²⁰ m wụ nwan ụkọ oziọma hụn yi ẹgan, e mẹni ni m ekpere nị m hụn ụzọ e ku ẹ e kushi ikẹn k'o furu nị m'e ku ẹ.

Oku Ikpanzụụn Lẹ Ekele

²¹ Ezi nwẹnẹ ẹnyi wụ Taịkikọsụ, hụn wụzị onyẹ-ọrụn wẹ gi e dọn ẹnya imẹ Di-nwọnni-ẹnyi, k'a gwachanrịn ụnụ ihiẹn ile, kẹni ụnụ marịn ọnọdị m lẹ kẹ ihiẹn nọ ebeni.

²² Ịya haịn m gi zilanị nị ụnụ ya, nị ụnụ marịn kẹ ẹnyi ile nọ lẹ n'ọ kasị ụnụ obi.

²³ Udọn Chuku-Nẹdi lẹ Di-nwọnni-ẹnyi wụ Jesu Kristi lẹ ihiẹn-ọsụsụọ ya lẹ okukwe wị ya rịnị ndị nke Kraịstị ile.

²⁴ Ẹfọma Osolobuẹ ya rịnị ndị ile nwọn ihiẹn-ọsụsụọ Onyẹ-nwọnni-ẹnyi wụ Jesu Kristi — ihiẹn-ọsụsụọ hụn ghalẹni a gụ.