Ndị Ẹfẹsọsụ 5 - Ika

Isi Nke Isẹn Obibi Ụmụ Ukpẹ

¹ E leri ni nwan Chuku nọkẹ ezigbo ụmụ a.

² E gi ni ihiẹn-ọsụsụọ e bi, kẹ Kraịstị dọn nwọn ihiẹn-ọsụsụọ ẹnyi, gi ufiri ẹnyi we ndụn a ye nọkẹ oyiye lẹ ẹjan e shin ọhụnma hụn wẹ chụnyeni Osolobuẹ.

³ Nọkẹ ndị nke Osolobuẹ, anịkwọlẹ ni wẹ nụdẹ oku ughẹrẹ mọbụ ihiẹn ọwụlẹ ru unyin mọbụ ẹnya-uku imẹ igunrun ụnụ,

⁴ mọbụ oku e mẹ ifẹnrẹn mọbụ oku ẹwobi mọbụ ịkpa ẹmụ rịlẹni mma. Kama, e gi ni ọnụ ụnụ e yesọnmẹ Osolobuẹ ekele.

⁵ Marịnkwọ nị nị onwọnni onyẹ ughẹrẹ mọbụ onyẹ e bi obibi ru unyin mọbụ ẹnya-uku (hụn wụzị ịrụa-mmọn) jẹnkọ d'a ban Alị-eze Kraịstị lẹ Osolobuẹ!

⁶ Anịkwọlẹ ni onyẹ ọwụlẹ gi oku nwọnlẹni isi dufie ụnụ, makẹni ufiri ihiẹn ndịnị kẹ iwe-lẹ-ọnụma Osolobuẹ gi a bịanị ndị nnupụ-isi.

⁷ Esọnkwọlẹ ni wẹ mẹkọ kaka!

⁸ Makẹni, ụnụ te rị imẹ ishi, kanị hụnnị ụnụ rị imẹ Di-nwọnni-ẹnyi, ụnụ wụ ukpẹ; e bi ni nwan kẹ ụmụ ukpẹ,

⁹ makẹni mkpụrụ hụn ukpẹ a mị wụ ihiẹn ile rị mma lẹ ezi-omumẹ ile lẹ ihiẹn ile wụ ezioku.

¹⁰ A marịn nị ihiẹn a sụọ Di-nwọnni-ẹnyi.

¹¹ Ebuchekwọlẹ ni ẹka ihiẹn ishi makẹni abannị wẹ erere; kama, kpu ni wẹ oro,

¹² nị ihiẹn ndị nnupụ-isi e mẹ nzuzue e mẹdẹ ifẹnrẹn okuku!

¹³ Kanị, wẹ wepụha ihiẹn ifọn, a hụn wẹ k'ọ nọ —

¹⁴ makẹni ukpẹ nwunkpuhụ ihiẹn, o họnrin ukpẹ. Ya haịn Ẹkụkwọ-nsọ gi sị, “Onyẹ-ụran, tẹnhin! Gha ọnwụn lihi, kẹni Kraịstị nwunkpu i.”

¹⁵ Kpachanpụ nị nwan ẹnya e bi; ebilẹ ni kẹ ndị marịnlẹni ihiẹn, ka e bi ni kẹ ndị marịn ihiẹn.

¹⁶ Anịlẹ ni oghere ọwụlẹ ụnụ nwọn la mmaka, makẹni elu e zekẹ.

¹⁷ Ebilẹ ni nwan kẹ ndị nwọnlẹni uche, ka ghọta nị ihiẹn wụ uche Di-nwọnni-ẹnyi.

¹⁸ Aralẹ ni manya tụ, makẹni obibi la iwi rọ; ka a nị nị Mmọn-nsọ a kị ụnụ —

¹⁹ ụnụ e gi ẹbụ rị imẹ ẹkụkwọ Ẹbụ-ọma lẹ ẹbụ-ofufe lẹ ẹbụ ndị ọzọ rị nsọ a gwa ibe ụnụ oku, a bụ nị Di-nwọnni-ẹnyi ẹbụ a sụọ ụsụọ imẹ obi ụnụ;

²⁰ e gi ẹfan Di-nwọnni-ẹnyi wụ Jesu Kristi e ye Chuku-Nẹdi ekele ogẹn ile imẹ ọnọdị ile,

²¹ e gi ni egun Kraịstị e humẹni ibe ụnụ isi.

Ẹgbata Di Lẹ Nwunyẹ

²² Nwunyẹ, e humẹni di i isi kẹ i dọn e mẹni Di-nwọnni-ẹnyi.

²³ Makẹni, di wụ isi nwunyẹ ẹ kẹ Kraịstị dọn wụ isi ụka, ẹhụ Kraịstị hụn Kraịstị wụ onyẹ-nzụọpụha a.

²⁴ Ya wụ, nwunyẹ k'e humẹrịrịnị di ẹ isi imẹ ihiẹn ile kẹ ụka dọn e humẹni Kraịstị isi.

²⁵ Di, nwọn ihiẹn-ọsụsụọ nwunyẹ i kẹ Kraịstị dọn nwọn ihiẹn-ọsụsụọ ụka, gi ufiri ẹ we ndụn a ye,

²⁶ kẹn'o gi mirin hụ wụ oku-Osolobuẹ chanchan a, dọn ẹ nsọ,

²⁷ kẹni o wepụha ụka ọghọ jun ẹhụ ihun ẹ, ẹlẹ ụka nwọn ntụpọ mọbụ se alịlị mọbụ ihiẹn ọwụlẹ nọ ẹrịra, kama n'ọ hụn ụzọ wụrụ ụka rị nsọ, nwọnlẹni ihiẹn wẹ gi kọrịan'a.

²⁸ Ẹrịrazịkwọ, di furu n'o nwọn ihiẹn-ọsụsụọ nwunyẹ ẹ k'o dọn nwọn ihiẹn-ọsụsụọ ẹhụ a. Onyẹ nwọn ihiẹn-ọsụsụọ nwunyẹ ẹ nwọn ihiẹn-ọsụsụọ enwẹn ẹ,

²⁹ makẹni, onwọnni onyẹ ize ẹhụ a e ze. Kama, ịhịan a zụn ẹhụ a, e mẹmẹ ẹ ọhụnma kẹ Kraịstị e mẹ ụka,

³⁰ makẹni ẹnyi hụn wụ ụka wụ mkpamkpa ẹhụ a.

³¹ “Ufiri ẹ, okẹnnyẹ k'a latọ nẹdi ẹ lẹ nnẹ ẹ, kwọnkẹnmẹ nwunyẹ ẹ, wẹ ẹbụbụọ e họnrin ẹhụ ohu.”

³² Ihiẹnni e mikẹ; m gi ẹ e ku oku Kraịstị lẹ ụka.

³³ K'osilẹrị, di ya nwọn ihiẹn-ọsụsụọ nwunyẹ ẹ k'o dọn nwọn ihiẹn-ọsụsụọ enwẹn ẹ; nwunyẹ y'a gbaye di ẹ.