Ndị Ẹfẹsọsụ 4 - Ika

Isi Nke Ẹnọ Kẹ Mkpamkpa Ẹhụ Bu ọda Dọn Wụ Ẹhụ Ohu

¹ Mmẹ hụn wụ onyẹ-ngan makẹni m rị e jẹnni Di-nwọnni-ẹnyi ozi rị nwan a rịọ ụnụ nị ụnụ bi obibi furu ọkpụkpọ Osolobuẹ kpọ ụnụ.

² E welụachanrịn nị enwẹn ụnụ alị, e mẹ ni jụụ; e gi ni ndidin e sọn ibe ụnụ makẹ ufiri ihiẹn-ọsụsụọ.

³ E gi ni obibi udọn e kẹngbama enwẹn ụnụ nọkẹ eriri, kẹni ụnụ e gi ẹ e chedọn ịrị-ohu ahụn Mmọn-nsọ e ye.

⁴ Ẹhụ ohu lẹ Mmọn-nsọ ohu rọ nọkẹ k'o dọn mẹni olilẹnya ohu kẹ Osolobuẹ kpọ ụnụ d'e nwọn.

⁵ Di-nwọnni-ẹnyi ohu rọ; okukwe ohu rọ; mirin-Chuku ohu rọ.

⁶ Chuku ohu lẹ Nẹdi ohu rọ, hụn gi ịhịan ile a rụn, hụn rịzịkwọ imẹ ịhịan ile.

⁷ Kanị wẹ yesọnmẹ onyẹ-onyẹ imẹ ẹnyi oyiye ichẹn-ichẹn kẹ Kraịstị dọn chọ n'o ye ẹ.

⁸ Ya kẹ Ẹkụkwọ-nsọ gi sị, “Ogẹn o gi lashi elu, ọ kpụnrụn igunrun ndị o mẹri, o ye ịhịan oyiye ichẹn-ichẹn.”

⁹ (Ogẹn Ẹkụkwọ-nsọ gi sị, “Ọ lashi elu,” k'o gi nwan “Ọ lashi elu” e ku? Ya wụ n'o buzọ hidangụ, shi ebẹhụ kachanrịn e mi imẹ alị.

¹⁰ Ya wụ nị onyẹ ohu hụ hidannị wụzị onyẹ hụn lashi elu, ghafechanrịn elu-igwere, kẹni ọ hụn ụzọ jun ihiẹn ile.)

¹¹ Ịya yesọnmẹ ụka a ndị-ozi pụ-ichẹn, ndị-amụma e zi ozi Osolobuẹ, ndị e jẹnhunmẹ e zi oziọma, ndị ụkọ-Chuku lẹ ndị-nkuzi.

¹² O yesọnmẹ oyiye ndịnị n'o gi wẹ a zụn ndị nke Osolobuẹ ile ọzụnzụn ọrụn Kraịstị chọ lẹni o gi wẹ e mẹ ẹhụ Kraịstị wụ ụka e sue, a tụn a kẹ ụlọ.

¹³ D'e ru ni ẹnyi ile a wụrụ ohu imẹ ofufe Jesu lẹ ịmarịn Nwa Osolobuẹ, wụrụ ndị ka ẹhụ, sueruchanrịn ogo Kraịstị, nọchanrịn kẹ ya;

¹⁴ makẹ ẹnyi gha a wụsọnmẹ ụmụẹka, ndị ẹbi e bushi ihun-lẹ-azụụn, ndị-nkuzi ọwụlẹ e buhunmẹ kẹ ufere, ndị ịhịan gi nkuzi ẹro lẹ aghịghọ e dufie.

¹⁵ Kama, ẹnyi a hụn ụzọ wụrụ ndị a gwa ibe ẹnyi ezioku, e gi ihiẹn-ọsụsụọ e mẹ ẹ, ẹnyi ile e gi ẹ e sue; ẹnyi e gi ẹrịra sueru ogo Kraịstị, hụn wụ isi ẹhụnị, rịchanrịn kẹ ya.

¹⁶ Kraịstị gi ẹhụ hụ ile, hụn akwanran ile rịn'a gi wegbamachanrịn ihiẹn ile rịn'a, kwọndọn ọhụnma-ọhụnma; ịya rịzị e mẹ mkpamkpa ọwụlẹ a sa ẹka a rụn ọhụnma, hụn ẹhụ ile gi a rị ikẹn, e sue, ghahanị ihiẹn-ọsụsụọ.

Obibi Ọhụn Hụn Rị Imẹ Kraịstị

¹⁷ M rị nwan e gi ẹfan Di-nwọnni-ẹnyi a gba ụnụ mkpịnsịn ẹka, a gbashi ụnụ ya ikẹn: ebizilẹ ni kẹ ndị ghalẹni e fe Osolobuẹ, ndị iroro wẹ nwọnlẹni isi.

¹⁸ Uche wẹ a gbagụọ ishi. Enwọn wẹ ndụn Osolobuẹ yeni onwọnni ihiẹn wẹ marịn, makẹni obi wẹ kpọkin akpọkin.

¹⁹ Makẹni ifẹnrẹn arịzị wẹ ẹnya; e wechanrịngụọ wẹ enwẹn wẹ ye ihiẹn-ifẹnrẹn lẹ ihiẹn ile rị ichẹn-ichẹn ru unyin, arịzị wẹ a sa ẹka e kwọndọn enwẹn wẹ.

²⁰ Kanị, ẹlẹkwọ ẹrịra kẹ wẹ kuzi ụnụ ihiẹn Kraịstị!

²¹ Ẹghẹẹ, ụnụ a nụgụọ oku Kraịstị, makẹni a kuzigụọ wẹ ụnụ ụzọ a, kuzi ụnụ ezioku k'ọ rị imẹ Jesu:

²² Nị ụnụ jẹnkọ nwan d'a ma eje-obibi hụ ụnụ te rị e bi tuhu, onyẹ hụ ụnụ wụ mbụ rehigụ ihun lẹ azụụn makẹni ihiẹn ọlịlẹnya e dufiegụ a;

²³ nị mmọn ụnụ lẹ uche ụnụ k'e hutọrịrị,

²⁴ ụnụ e yiri onyẹ ọhụn ahụn wẹ gi ụdị Osolobuẹ ke, hụn nwọn ezi-omumẹ lẹ ezigbo ịrị-nsọ.

²⁵ Tụbehi ni nwan ntụ! A gwa nị ibe ụnụ ezioku, makẹni ẹnyi lẹ ibe ẹnyi wụ ẹhụ ohu.

²⁶ Olulu nwọn ikẹn bu i, ka egilẹ ẹ mẹ njọ. Olulu y'e bulẹ i nị eki gi.

²⁷ Eyelẹ ni Ekwensụ efe.

²⁸ Onyẹ e zun ohin y'e zunzilẹ. Ya gi ẹka a lụrụ ihiẹn o gi e bi, e gi ẹka a a rụn ihiẹn rị mma, kẹni ọ hụn ihiẹn o gi e yezini ndị ihiẹn rị a fụ ọrụn ẹka.

²⁹ Anịlẹ ni eje-oku pụha ụnụ ọnụ, kanị oku rị mma a gba ịhịan umẹ, a bann'a erere imẹ ọnọdị ọ rị, kẹni oku ọnụ ụnụ e yeni ndị rị e gọn ntịn ẹka.

³⁰ Emẹkwọlẹ ni ihiẹn k'a fụ Mmọn-nsọ Osolobuẹ, makẹni ịya wụ ahịma Osolobuẹ ye (yi) ụnụ makẹ ụhụọhịn nzụọpụha.

³¹ Wepụ nị iwe ile, ịkpọ-ọnụma, olulu, oro, ikuja oku ịhịan lẹ eje-ihiẹn ile ịhịan gi e sọn ibe ẹ imẹ ụnụ.

³² Kama, e gi ni ẹfọma lẹ omikẹn e sọn ibe ụnụ, a gbagharị ibe ụnụ kẹ Osolobuẹ dọn nwan gbagharị ụnụ ghahanị Kraịstị.