Ndị Ẹfẹsọsụ 3 - Ika

Isi Nke Ẹtọ Ọrụn Pọlụ Imẹ Ndị Alị Ọzọ

¹ Oziọma Kraịstị wụ Jizọsịnị m rị e zi ụnụ ndị wụlẹni ndị Ju kẹ mmẹ wụ Pọlụ gi nwan rị imẹ ngan.

² E gighọ m'a dọn nị ụnụ a nụgụọ nị Chuku bu ọrụnnị che m ẹka rụnnị ụnụ;

³ ụnụ a nụgụọzị k'o dọn ghọsị m ihiẹn-omimini. Ịya kẹ m beni tan ụnụ nke-nke imẹ ẹhụhụọ-ozini.

⁴ Ụnụ gụn a, ụnụ a hụn kẹ m ghọtahan ihiẹn-omimini, kẹ m ghọtahan Kraịstị.

⁵ Osolobuẹ aghọsịnị ndị mbụ ya k'o dọn nwan ghọsị ndị-ozi nsọ a pụ-ichẹn lẹ ndị-amụma nsọ a ya ogẹnni ghahanị Mmọn-nsọ.

⁶ Ihiẹn nzuzueni wụ nị, ndị alị ndị ọzọ a bangụọzịnị ndị ihiẹn Osolobuẹ e ru ẹka makẹni wẹ gi oziọma dọn, wụrụ mkpamkpa imẹ ẹhụ ohu ahụn, wụrụzịkwọ ndị wẹ ile gba nwọn ihiẹn Osolobuẹ kwe nkwa n'o k'e mẹni ndị rị imẹ Kraịstị wụ Jizọsị.

⁷ E họnringụọ m onyẹ-ọrụn oziọmanị ghahanị oyiye hụn Osolobuẹ mẹ ẹfọma ye m hụn ikẹn ẹ gi rị ọrụn imẹ ndụn m.

⁸ Ọsụọn'a nị mmẹ kachanrịndẹ ntịn imẹ ndị nke Osolobuẹ, o ye m oyiyeni kẹni m zi ndị alị ọzọ oziọmanị, gwa wẹ ezigbo ihiẹn nwọnlẹni ọgụgụ hụn jun imẹ Kraịstị,

⁹ lẹni m ghọsị ịhịan ile kẹ Chuku hụn ke ihiẹn ile dọn nwan rị a rụnpụha ihiẹn-omimi ahụn o zuemẹ ketekete,

¹⁰ kẹni o gi ụka ghọsị ndị-ọkịkị lẹ eje-mmọn ile ikẹn rị ẹka wẹ imẹ elu amamihiẹn Osolobuẹ hụn nwọn agala bu ọda.

¹¹ Makẹni, ịya kẹ Osolobuẹ rotọ ẹdẹi n'o k'e mẹ ghahanị Kraịstị wụ Jizọsị Di-nwọnni-ẹnyi —

¹² Kraịstị, hụn obi gi okweri ẹnyi kwerinin'ẹ e ru ẹnyi alị ọda-ọda ịbanye ebe Osolobuẹ rị.

¹³ M rị nwan a rịọ ụnụ, anịkwọlẹ ni ndụn gụ ụnụ nị m rị e gi ufiri ụnụ a ta afụnfụn, makẹni ọghọ ụnụ rọ.

Ịghọta Ihiẹn-ọsụsụọ Kraịstị

¹⁴ M rị nwan e gi ufiri ẹ e gbuni Nẹdi ẹnyi osekpu,

¹⁵ onyẹ hụn ezi-lẹ-ụlọ ile rị elu-igwee lẹ ụwa gha ẹka a nwọnhẹn ẹfan wẹ.

¹⁶ M rị a rịọ a n'o gi ihiẹn ahụn ile o nwọn ye ụnụ ikẹn ụnụ e gi ze imẹ obi ụnụ ghahanị Mmọn-nsọ a.

¹⁷ M rịzị a rịọ a nị ụnụ wụrụ ndị Kraịstị birichanrịn imẹ obi wẹ makẹni ụnụ hụ e gi oku ẹ e dọn; ụnụ a nọ imẹ ihiẹn-ọsụsụọ gba mkpọgụn, gi ẹ turu ọhụnma —

¹⁸ kẹni ụnụ saẹka sọn ndị nke Osolobuẹ ile ghọta kẹ ihiẹn-ọsụsụọ Kraịstị shịahan, k'o suehan, k'o jẹnhan elu lẹ k'o mihan;

¹⁹ ụnụ a ghọta ihiẹn-ọsụsụọ Kraịstị hụn wẹ ghalẹni a ghọtachanrịn, kẹni ihiẹn ile rị imẹ Osolobuẹ hụn ụzọ jun imẹ ndụn ụnụ.

²⁰ Nke Osolobuẹ, Onyẹ hụn k'a s'ẹka gi ikẹn ẹ rị ọrụn imẹ ẹnyi rụnkarị ihiẹn ile ẹnyi k'a saẹka rịọ mọbụ ro, rụnkarị a ọhụnma-ọhụnma,

²¹ ọghọ ya rịn'a ghahanị ụka lẹ ghahanị Kraịstị wụ Jizọsị, ya rịn'a jẹnrin ejẹn d'e ru agbọ ile. Isẹẹ.