Ndị Ẹfẹsọsụ 2 - Ika

Isi Nke Ẹbụọ Osolobuẹ Gha Ọnwụn We Ẹnyi Shi Ndụn

¹ Ogẹn mbụ, ụnụ te nwụnhụn anwụnhụn makẹ njọ lẹ mmẹfie ụnụ.

² Ụnụ e mẹ njọ, e mẹfie nọkẹ ndị ụwanị, e sọn onyẹ hụn a kị eje-mmọn ile rị imẹ elu, mmọn ahụn rị nwan ọrụn imẹ igunrun ndị rị e nupụ isi okpuru Osolobuẹ.

³ Eziẹ, ẹnyi ile e te bi k'ọ sụọ ẹnyi nọkẹ wẹ, e mẹ kẹ ẹhụ ẹnyi lẹ obi ẹnyi chọ. Iwe-lẹ-ọnụma Osolobuẹ te hụ e che ẹnyi nọkẹ ndị ọzọ ile.

⁴ Kanị, makẹni Osolobuẹ e mẹkẹ onyẹ-omikẹn, makẹni o nwọn okẹn ihiẹn-ọsụsụọ ebe ẹnyi rị —

⁵ ọsụọn'a nị njọ ẹnyi e te gbugụọ ẹnyi, ọ nọ gha ọnwụn wepụha ẹnyi, mẹ ẹnyi sọn Kraịstị rịzị ndụn. Ẹfọma Osolobuẹ mẹ kẹ ụnụ gi nwọn nzụọpụha.

⁶ Osolobuẹ a ghagụ ọnwụn weli ẹnyi, ọ nọ weshi ẹnyi elu k'o dọn weshi Kraịstị, mẹ ẹnyi sọn Kraịstị Jizọsị nọdị alị imẹ elu-igwee makẹni ẹnyi rị imẹ Kraịstị.

⁷ Osolobuẹ mẹ ọnwan n'o gi ẹfọma o mẹni ẹnyi imẹ Kraịstị Jizọsị ghọsị agbọ ile lalanị ẹfọma a ka ẹfọma,

⁸ ẹfọma haịn Osolobuẹ gi gi okukwe ụnụ zụọpụha ụnụ, ẹlẹ ụnụ gi ẹka ụnụ mẹ ẹ, ihiẹn Chuku ye ọfẹ rọ —

⁹ ẹlẹ ihiẹn onyẹ rụn, amamgbe ịhịan a nyanma isi.

¹⁰ Ọrụn-ẹka Osolobuẹ kẹ ẹnyi wụ, ndị o ke imẹ Kraịstị wụ Jizọsị, kẹni ẹnyi hụn ụzọ e mẹ ihiẹn rị mma o ketọnị ẹnyi.

Kraịstị E Wegbamagụọ Ẹnyi Lẹ Ibe Ẹnyi

¹¹ Ebe ẹhụ rị, nyanhan nị nị ụnụ te wụ ndị alị ọzọ. Ndị Ju a kpọ ụnụ “ndị kwalẹni ugun,” a kpọ enwẹn wẹ “ndị kwa ugun” bụ ugun wẹ kwa ẹhụ mmaka rọ, ugun ịhịan kwa;

¹² nyanhan nị nị, ụnụ arị imẹ Kraịstị ogẹn ahụn; ụnụ arị ebọn Izrẹlụ; ụnụ arị nkwerigbama Osolobuẹ lẹ nkwa o kwe, elu ụwa ụnụ rị, ụnụ enwọn olilẹnya, ụnụ enwọn Osolobuẹ.

¹³ Kanị, makẹni ụnụ rị imẹ Kraịstị wụ Jizọsị, e gigụọ wẹ nwan ẹdeke Kraịstị, ọnwụn Kraịstị, wezụhan ụnụ te rị ebe teni.

¹⁴ Makẹni, Kraịstị lẹ enwẹn ẹ e wẹhẹgụọnị ẹnyi udọn: o mẹgụọ ndị Ju lẹ ndị alị ọzọ wụrụ ohu. O gigụọ ẹhụ a lẹ ọnwụn a titu mgbọn te kebeni wẹ e buhẹ eṅẹnrẹn,

¹⁵ Iwu o wepụ k'o gi mẹ ẹ, Iwu lẹ ụmụ iwu lẹ ọdịnalị rịn'a. O mẹ ẹ kẹni o mẹmẹrin agbọ ọhụn gi nọkin ẹnya azụụn ẹbụbụọ ahụn wụ ndị Ju lẹ ndị alị ọzọ. Ẹrịra k'o dọn wẹhẹ udọn ẹgbata wẹ,

¹⁶ gi ọnwụn ọ nwụn elu obe wekinhẹnni Chuku azụụn ẹbụbụọ hụ o gi họnrin ohu, azụụn ẹbụbụọ hụ o wepụ eṅẹnrẹn ẹgbata wẹ.

¹⁷ Ya Kraịstị nọ bịa d'e zi ịhịan ile ozi udọn ahụn: kẹ ụnụ ndị alị ndị ọzọ rị ebe teni kẹ ndị Ju rị nsue.

¹⁸ Ghahanị Kraịstị, ẹnyi ile a sa nwan ẹka a gha Mmọn-nsọ ohu a banhan ebe Nẹdi ẹnyi wụ Osolobuẹ rị, kẹ ndị Ju kẹ ndị alị ọzọ.

¹⁹ Ya wụ, ụnụ ndị alị ọzọ kwerini Jesu ẹlẹzi itumunyẹ; ụnụ ẹlẹzi ndị alị ọzọ. Ụnụ e sọngụọ ndị nke Osolobuẹ, ndị nsọ, wụrụ ụmụ di-alị Alị-eze, ndị ezi-lẹ-ụlọ Osolobuẹ,

²⁰ Osolobuẹ a tụngụọ ụnụ nọkẹ ụlọ ye elu iyetọ ahụn wụ ndị-ozi pụ-ichẹn lẹ ndị-amụma. Ọmụma gi ụlọ ahụn wụ Jesu Kristi lẹ enwẹn ẹ.

²¹ Ịya gi ụlọ hụ ile, e mẹ ẹ e jẹn elu e jẹnwaye, n'ọ wụrụ Ụlọ-nsọ rị nsọ ebe Di-nwọnni-ẹnyi rị.

²² Hụnnị ụnụ rị imẹ Kraịstị, ụnụ nwẹn rịzị nwan ndị Osolobuẹ rị a tụn kẹ ụlọ, nị ụnụ wụrụ ebe Osolobuẹ e bi ghahanị Mmọn-nsọ a.