Ndị Ẹfẹsọsụ 1 - Ika

Isi Nke Ohu Ekele

¹ Mmẹ wụ Pọlụ de Ẹkụkwọ-ozini. M wụ onyẹ ozi pụ-ichẹn Kraịstị Jizọsị ghahanị uche Osolobuẹ. M rị e dejẹnni ndị nsọ Osolobuẹ rị Ẹfẹsọsụ, ndị wẹ gi e dọn ẹnya imẹ Kraịstị Jizọsị.

² Ẹfọma lẹ udọn gha ẹka Osolobuẹ Nẹdi ẹnyi lẹ Onyẹ-nwọnni-ẹnyi wụ Jesu Kristi bịa ya rịnị ụnụ.

Ngọzi Ẹnyi Nwọn Imẹ Kraịstị

³ Ekele ya rịnị Osolobuẹ, hụn wụ Chuku lẹ Nẹdi Onyẹ-nwọnni-ẹnyi wụ Jesu Kristi, makẹni o yeọlẹ ẹnyi ngọzi imẹ-mmọn ile rị elu-igwee makẹni ẹnyi rị imẹ Kraịstị.

⁴ Nị Osolobuẹ d'e kedẹ ụwa, ọ họtọgụọlẹ ẹnyi imẹ Kraịstị makẹni o nwọn ihiẹn-ọsụsụọ ẹnyi, nị ẹnyi jẹnkọ d'a wụrụn'a ndị rị nsọ, nwọnlẹni nkọrịanị.

⁵ Ọ katọ a n'o k'a mụnrụn ẹnyi ghahanị Jesu Kristi makẹni ọ sụọghọ a, makẹni uche ẹ rọ.

⁶ Osolobuẹ mẹ ẹ kẹni wẹ ja Osolobuẹ mma o gi mẹni ẹnyi okẹn ẹfọmanị ghahanị ezi Nwa a!

⁷ Makẹni ẹnyi rị imẹ Kraịstị, Osolobuẹ e gigụọ ẹdeke ẹ hụn wụ ọnwụn a gbapụha ẹnyi, gbagharị ẹnyi njọ, makẹ okẹn ẹfọma Osolobuẹ.

⁸ Osolobuẹ gi amamihiẹn lẹ nghọta ile mẹni ẹnyi okẹn ẹfọmanị.

⁹ Ọ nọ nwan mẹ ẹnyi marịn ihiẹn o zuemẹye imẹ obi ẹ, ihiẹn hụn o rotọ n'o jẹnkọ d'a rụnpụha imẹ Kraịstị.

¹⁰ Ihiẹnni k'o rotọ: nị ogẹn zu, o wegbama ihiẹn ile che okpuru Kraịstị — kẹ ihiẹn rị elu-igwee kẹ ihiẹn rị elu-ụwa.

¹¹ Makẹni ẹnyi rị imẹ Kraịstị, ihiẹn Osolobuẹ a wụrụgụọ nke ẹnyi, makẹni Osolobuẹ hụn e mẹ ihiẹn ile n'o gi ẹ mẹzu uche ẹ gi ẹka a họtọ ẹnyi n'o gi ẹnyi mẹzu uche ẹ.

¹² O mẹ ẹ kẹni ẹnyi wụrụ ihiẹn wẹ gi a ja Osolobuẹ mma n'o hikẹ ogbe, ẹnyi ndị ibuzọ gi Kraịstị dọn ẹnya.

¹³ Ụnụ nwẹn e họnrinzighọ ndị nke Kraịstị kẹ ụnụ nụ oku hụ wụ ezioku, kweri — oziọma ahụn ụnụ gi nwọnrin nzụọpụha. Ụnụ e kwerigụnị Jesu, Osolobuẹ nọ bu Mmọn-nsọ o kwe nkwa a che imẹ ndụn ụnụ, gi ẹ yi ụnụ ahịma a,

¹⁴ makẹni Mmọn-nsọ k'o bu ụzọ e ye nọkẹ mbi, o kebe bịa d'e gbarị ndị ọ ṅọntọgụ. Osolobuẹ mẹ ẹ kẹni ụnụ nwẹn wụrụzị ihiẹn wẹ gi a ja Osolobuẹ mma n'o hikẹ ogbe!

Ekpere Pọlụ Mẹni Ndị Kwerini

¹⁵ Ịya haịn o gi mẹni, kete m nụlẹ oku okweri ụnụ kwerini Di-nwọnni-ẹnyi wụ Jesu lẹ ihiẹn-ọsụsụọ ụnụ nwọnni ndị nke Osolobuẹ ile,

¹⁶ m'e ke kelebehikwọ Osolobuẹ makẹ ụnụ, m gha e mẹni ụnụ ekpere —

¹⁷ m'a rịọsọnmẹ Osolobuẹ Di-nwọnni-ẹnyi Jesu Kristi, Nẹdi hụn kachanrịnnị, n'o ye ụnụ mmọn ịghọta-ihiẹn, a ghọsịsọnmẹ ụnụ ihiẹn, kẹ ụnụ dọn rị a marịnwaye ẹ.

¹⁸ M'a rịọ a ya kẹni ẹnya ụnụ shịapụ hụn obi ụnụ e gi ghọta, ụnụ a hụn ụzọ marịn ihiẹn hụn ọ kpọnị ụnụ, marịn ihiẹn ile higbu enwẹn ẹ ogbe o butọnị ndị-nsọ a;

¹⁹ ụnụ a ghọtazị ikẹn ahụn ka ikẹn ile hụn o gi a rụnnị ẹnyi ndị kwerini ọrụn, ikẹn hụ hi ogbe o gi e mẹ ihiẹn,

²⁰ ikẹn hụ o gi gha ọnwụn weli Kraịstị, m'ẹ nọdị alị ẹka-nni ẹ imẹ elu-igwee;

²¹ nke wụnị Kraịstị kachanrịn ọkịkị ile lẹ ikẹn ile lẹ ihiẹn ile w'a gbaye agbaye lẹ ẹfan lẹ nzere ile; ẹlẹdẹ ogẹnni sụọ kanị kẹ ogẹn lalanị.

²² Osolobuẹ e wegụọ ihiẹn ile che ẹ okpuru ụkụ, tumẹni ụka ya n'ọ wụrụ Onyẹ-isi ihiẹn ile rị okpuru ẹ.

²³ Ụka wụ ẹhụ a; imẹ ụka kẹ ihiẹn ile banyen'ẹ rị; ya lẹ enwẹn ẹ wụ onyẹ hụn rị ebe ile, hụn e mẹ ihiẹn ile e zu oke.