Matiu 9 - Ika

Isi Nke Itenẹi Jizọsị A Zụọ Onyẹ-ọrọ

¹ Jizọsị nọ banye imẹ ụgbọ-mirin, fetu mirin shi Kapanọm, obodo o bi.

² Ya wẹ nọ gi ute buhẹn'ẹ okẹnnyẹ ọrọ kinmin. Ogẹn Jizọsị gi hụn okukwe wẹ, ọ nọ sị onyẹ hụ ọrọ kinmin, “Atụlẹ egun nwa m, a gbagharịgụọ wẹ i njọ ị.”

³ Ya ụfọdụ ndị-nkuzi Iwu nọ sị enwẹn wẹ, “Okẹnnyẹni rị e ku arụ!”

⁴ Kanị Jizọsị a marịngụọ ihiẹn wẹ rị e ro, ọ nọ sị, “Kị ụnụ rị e roni eje-ihiẹn imẹ obi ụnụ?

⁵ Elee hụn ka nfe? Ị sị, ‘A gbagharịgụọ wẹ i njọ ị,’ ra ị sị, ‘Lihi ọtọ jẹnmẹ ijẹn?’

⁶ Kanị, nị m mẹ ụnụ marịn nị mmẹ Nwa nke Ịhịan nwọn ikẹn ịgbagharị njọ elu-ụwanị.” Ọ nọ sị onyẹ hụ ọrọ kinmin, “Lihi ọtọ! Heri ute i lama iwe i!”

⁷ Okẹnnyẹ hụ nọ lihi ọtọ, lashi iwe ẹ.

⁸ Egun nọ tụma igunrun ahụn rị ebẹhụ, wẹ nọ ja Osolobuẹ mma, o gi ye ịhịan ikẹn nọ ẹnịna.

Jizọsị A Kpọ Matiu

⁹ Ogẹn Jizọsị gi gha ebahụn pụ, ọ hụn onyẹ ohu w'a kpọ Matiu ebe ọ nọdị alị ọdụ-ọrụn a ebe wẹ nọ a na ụgwọ-isi. Ọ nọ sị a, “Sọnmẹ m.” Ya Matiu nọ lihi ọtọ, sọnmẹ ẹ.

¹⁰ Ogẹn Jizọsị gi nwan rị iwe Matiu e ri ihiẹn-oriri, ndị ụgwọ-isi bu ọda lẹ ndị bu ọda wẹ gizi njọ marịn nọ bịa d'e du ya lẹ ndị nsọnmazụụn a ri ihiẹn-oriri.

¹¹ Ogẹn ndị Itu-Farisi gi hụn ihiẹnni, wẹ nọ sị ndị nsọnmazụụn a, “Kị haịn onyẹ-nkuzi ụnụ gi e sọn ndị ụgwọ-isi lẹ ndị njọ e ri ihiẹn-oriri?”

¹² Kanị, ogẹn Jizọsị gi nụ a, ọ nọ sị wẹ, “Ẹlẹ ndị ẹhụ rị ikẹn a chọ dibiẹ, kama ndị ẹhụ rịlẹni ikẹn.

¹³ Jẹn ni d'a mụ ihiẹn okuni rị Ẹkụkwọ-nsọ wụ: ‘Omikẹn kẹ m chọ, ẹlẹ ịchụn-ẹjan.’ Makẹni, ẹlẹ ndị ezi-omumẹ kẹ m bịa d'a kpọ, kama ndị njọ.”

Elu Jesu Chọ Nghọta Ọhụn

¹⁴ Ndị nsọnmazụụn Jọnụ bịa d'e kunrun Jizọsị, jụ a, “Kị haịn ẹnyi lẹ ndị Itu-Farisi gi e bu ọnụ mbụ-lẹ-ẹbụọ, kanị ndị nsọnmazụụn ị ara bu?”

¹⁵ Jizọsị nọ za wẹ, sị, “Ndị bịa agbamẹkụkwọ a kwandẹ nwan ẹkwan ebe okẹnnyẹ rị a gba ẹkụkwọ rị a ra? Ogẹn lala hụn wẹ e gi wepụ a imẹ igunrun wẹ; o ru ogẹn hụ, e bumẹ wẹ ọnụ.”

¹⁶ “Onwọnni onyẹ e gi ẹkwa ọhụn hụn a kụkụmanị a kwakin ẹkwa akan. Makẹni, ẹkwa ọhụn hụ wẹ gi kwakin ẹ sikọ d'a dọkapụ, ebahụn dọkanị a jọwaye njọ.

¹⁷ W'a ra gizikwọ ihiẹn akan gbaye manya ọhụn. Makẹni wẹ gi ẹ, ọ gbawa, manya a kwanhu, ihiẹn wẹ gi gbaye ẹ a la iwi. Kama, w'a gba manya ọhụn e ye imẹ ihiẹn-manya ọhụn, ogẹn ahụn, wẹ ẹbụọ alakọ iwi.”

Okpoho Ihiẹn Rị A Gba Lẹ Nwata Nwụnhụnnị

¹⁸ Ebe ọ rị a gwa wẹ ihiẹn ndịnị, onyẹ-isi ohu nọ banhan idẹnmizi, gbun'ẹ osekpu, sị, “Nwa m okpoho nwụnhụnhụ kikẹnni; ka bịa d'e bu ẹka ị kwasị a, makẹni, i bu ẹka ị kwasị a, ọ sikọ d'a rị ndụn.”

¹⁹ Ya Jizọsị nọ lihi ọtọ sọnmẹ ẹ, ya lẹ ndị nsọnmazụụn a.

²⁰ Idẹnmizi, okpoho ohu ihiẹn rị a gba kete ahụa mmẹbụọ nọ ghaha Jizọsị azụụn, mẹtụ ntịn ẹwuru Jizọsị ẹka.

²¹ Makẹni ọ sị enwẹn ẹ, “M mẹtụhụ ẹwuru ẹ ẹka, m sikọ d'a dịnhịn.”

²² Jizọsị nọ gbehutọ, hụn a, sị a, “Atụlẹ egun nwa m, okukwe i a zụọlẹ i.” Ya kẹ okpoho hụ nọ dịnhịn ozigbo.

²³ Ogẹn Jizọsị gi nwan ru iwe onyẹ-isi ahụn bịa d'a rịọn'a, ọ hụn ndị rị e gbu ẹkpịrị lẹ igunrun ịhịan ebẹhụ kẹ wẹ rị a zụn ụzụn,

²⁴ ọ nọ sị wẹ, “Pụ nị, nị nwata hụ anwụnhụnnị; ụran k'ọ rị.” Wẹ nọ mụma a ẹmụ.

²⁵ Ogẹn Jizọsị gi chụpụgụ igunrun hụ, ọ nọ banye mmụlọ; o kwọndọn nwata hụ ẹka, nwata hụ nọ lihi.

²⁶ Ya ihiẹnni o mẹ nọ kpọgbarị ẹgbẹrẹ hụ ile.

Jizọsị A Zụọ Ndị Ẹnya-ishi Ẹbụọ

²⁷ Ogẹn Jizọsị gi gha ebẹhụ pụkọ, ikẹnnyẹ ẹbụọ ẹnya kpu ishi nọ sọnmẹ ẹ, e yi, “Mẹ omikẹn ẹnyi, nwa Defidi!”

²⁸ Ọ banye mmụlọ, ndị ẹnya-ishi hụ nọ bịa d'e kunrun ẹ. Ọ nọ sị wẹ, “Ụnụ e kwerighọ nị m sikọ d'a saẹka mẹ ihiẹnni?” Wẹ nọ sị a, “Ẹghẹẹ, Di-nwọnni-ẹnyi.”

²⁹ Ya Jizọsị nọ mẹtụ wẹ ẹka ẹnya, sị, “Ya rịnị ụnụ kẹ ụnụ dọn kweri.”

³⁰ Ẹnya wẹ nọ shịapụ. Jizọsị nọ gwa wẹ, gwashi wẹ ikẹn, sị wẹ, “Anịkwọlẹ ni onyẹ ọwụlẹ marịn ihiẹnni.”

³¹ Kanị a pụ wẹ, wẹ nọ kusọnmẹ oku ẹ ẹgbẹrẹ hụ ile.

Jizọsị A Zụọ Onyẹ Ghalẹni E Ku Oku

³² Kẹ ndị ahụn ẹnya te kpu ishi pụkọ, ndị ọzọ nọ wẹhẹ odin eje-mmọn rị imẹ ẹ.

³³ Jesu a chụpụ eje-mmọn hụ, odin hụ nọ kumẹ oku. Ọ tụ igunrun hụ ẹnya ọda-ọda, ya wẹ nọ sị, “Ihiẹn nọ ẹnịna emẹtuni imẹ Izrẹlụ.”

³⁴ Kanị ndị Itu-Farisi nọ sị, “Ikẹn onyẹ-isi eje-mmọn k'ọ rị e gi a chụpụ eje-mmọn ndịnị.”

Ihiẹn-ugbo E Hikẹ, Kanị Ndị-ọrụn Ehini

³⁵ Jizọsị nọ ghama obodo-obodo, kẹ ndị shịanị kẹ ndị mẹ ẹkẹrẹ, a kuzi imẹ ụlọ-ofufe ndị Ju, e zi oziọma Alị-eze, a zụọ ụdị emu lẹ ọrịa ile.

³⁶ Ọ hụ a hụn igunrun ịhịan rịsọnmẹ imẹ obodo ndị ahụn, omikẹn wẹ hụ e mẹ ẹ, makẹni wẹ wụ ndị rị imẹ nsọngbu, marịnlẹni hụn w'e mẹ, rịkẹ atụnrụn nwọnlẹni onyẹ-ndu.

³⁷ Ya k'ọ nọ sị ndị nsọnmazụụn a, “Ihiẹn-ugbo wẹ sikọ d'a ghọ e hikẹ, kanị ndị ọrụn ebuni ọda.

³⁸ Rịọ nị nwan Onyẹ nwọn ugbo n'o zihẹ ndị-ọrụn sikọ d'a ghọn'a ihiẹn-ugbo ẹ.”