Matiu 8 - Ika

Isi Nke Ẹsatọ Jizọsị A Zụọ Onyẹ-oti

¹ Ogẹn Jesu gi hidan elu òke hụ ọ nọ kuzi, igwerigwe ịhịan nọ sọnmẹ ẹ.

² Ya kẹ okẹnnyẹ ohu emu oti rị a kụ nọ bịa, gbun'ẹ osekpu, sị, “Di-nwọnni-ẹnyi, omẹni y'a chọghọ, i k'e saẹka zụọ m otini, a wụbehi m onyẹ rụnị.”

³ Jesu nọ tịnpụ ẹka, mẹtụ a, sị, “A chọghọ m; dịnhịn nwan n'ị wụbehi onyẹ rụnị.” Oti hụ nọ la ozigbo, ọ nọ wụbehi onyẹ rụnị.

⁴ Jizọsị nọ sị a, “Hụn a n'o nwọnni onyẹ ị gwa ihiẹnni; ka we enwẹn i d'a ghọsị onyẹ nchụn-ẹjan, y'e ye oyiye hụ Mozizi ku imẹ Iwu, n'i gi ẹ ghọsị wẹ nị y'a dịnhịngụọ wụbehi onyẹ rụnị.”

Jizọsị A Zụọ Odibo Onyẹ-isi agha

⁵ Ogẹn Jizọsị gi banhan imẹ Kapanọm, onyẹ-isi agha Rom hụn a kị ndị-agha ọgụn-isẹn nọ bịa, rịọ a sị,

⁶ “Diọkpa, emu rị a kụ odibo m. O dinẹ mmụlọ, a ra sa ẹka mẹhunmẹ; ọ rị okẹn afụnfụn.”

⁷ Jizọsị a sị a, “M k'a bịa d'a zụọ a.”

⁸ Kanị onyẹ-isi agha hụ nọ sị a, “Diọkpa, eruni m onyẹ y'a banye iwe ẹ! Ka kuhụ oku sụọ, odibo m k'a dịnhịn.

⁹ Makẹni, mmẹ nwẹn rị okpuru ịhịan; m nwọnzikwọ ndị-agha rị okpuru m. M sị hụnnị, ‘Jẹn,’ o jẹn; m sị hụnnị, ‘Bịa,’ ọ bịa; m sị igbọn m, ‘Mẹ ihiẹnni,’ o mẹ ẹ.”

¹⁰ Jizọsị a nụ ihiẹn o ku, ọ nọ tụ a ẹnya. Jizọsị nọ sị ndị rị e sọnn'ẹ, “M rị a gwa ụnụ ezioku, ahụntuni m onyẹ Izrẹlụ nwọn okukwe han ẹnịna.

¹¹ M rị a gwa ụnụ, ndị bụ ọda k'a gha kẹ ẹbamịn ọwụwa-ẹnyanwụn kẹ ẹbamịn ọdịdan-ẹnyanwụn bịa d'e sọn Ebraham lẹ Aziki lẹ Jekọpụ ri oriri imẹ Alị-eze elu-igwee;

¹² kanị ụmụ Alị-eze hụn nkẹ a banyen'ẹ k'a rị ẹkpa ishi rị ezi ebe wẹ k'a chụshi wẹ, ebe ịkwan-ẹkwan lẹ ịta nkwẹnrẹn-eze jẹnkọ d'a rị.”

¹³ Ọ nọ sị onyẹ-isi agha hụ, “Jẹnmẹ; ya rịn'ị k'ị dọn kweri.” Ogẹn hụ hụra, odibo ẹ nọ dịnhịn.

Jizọsị A Zụọ Ndị Bu Ọda Iwe Pita

¹⁴ Ogẹn Jizọsị gi banye iwe Pita, ọ nọ hụn nị nnẹ nwunyẹ Pita dinẹ edinẹ yeni ẹhụ-ọkụn.

¹⁵ Jizọsị nọ mẹtụ a ẹka, ẹhụ-ọkụn hụ nọ hapụ a. Ọ nọ lihi, lemẹ Jizọsị ọbịa.

¹⁶ Ẹnyasị hụ, wẹ nọ wẹhẹni Jizọsị ndị bu ọda eje-mmọn rị imẹ wẹ, ọ nọ gi oku-ọnụ mmakalaka chụpụsọnmẹ eje-mmọn ndị hụ, zụọzịkwọ ndị ile emu rị a kụ.

¹⁷ Ẹnịna kẹ ihiẹn Chuku gi onyẹ-amụma wụ Azaya ku dọn mẹzu. Azaya sị, “O wepụ emu ẹnyi, buru irẹnhụn ẹnyi.”

Ihiẹn Hụn Isọn Jizọsị Chọ

¹⁸ Ogẹn Jizọsị gi hụn igunrun fihunmẹn'ẹ, ọ nọ sị ndị nsọnmazụụn a mẹmẹ nị wẹ fetu odiyiri Galili hụ.

¹⁹ Ya onyẹ-nkuzi Iwu nọ bịa d'a sị a, “Di-nwọnni-ẹnyi, m k'e sọn i ebe ọwụlẹ i jẹnkọ.”

²⁰ Jizọsị nọ sị, “Ufu nwọn okporo ọ rụban; nnụnụ e fe elu nwọn ẹkụụ; kanị mmẹ Nwa nke Ịhịan enwọn ebe m'e buche isi.”

²¹ Onyẹ ọzọ imẹ ndị nsọnmazụụn a nọ sị a, “Di-nwọnni-ẹnyi, nị m jẹngụ d'e li nẹdi m.”

²² Kanị Jizọsị nọ sị a, “Sọnmẹ m; hapụ ndị nwụnhụnnị nị wẹ li ndị nke wẹ nwụnhụnnị.”

Jizọsị E Tinyụn Ẹbi-ohimin

²³ Ya Jesu nọ nwan banye ụgbọ-mirin, ndị nsọnmazụụn a nọ sọn ẹ banye.

²⁴ Ẹbi a kpọma idẹnmizi, nke wụ nị ụgbọ hụ e d'e ruban imẹ mirin yeni okẹn ẹbi hụ, kanị Jizọsị rị ụran.

²⁵ Ya wẹ nọ jẹn d'a kpọtiẹn ẹ, sị, “Di-nwọnni-ẹnyi, zụọpụha ẹnyi! Ẹnyi a laọlẹ!”

²⁶ Ọ nọ sị wẹ, “Kị ụnụ rị a tụnị egun? Ndị okukwe nta!” Ya ọ nọ lihi ọtọ, jụgbọ okẹn ufere hụ lẹ ohimin hụ. Ụzọ ile nọ mẹchanrịn rajụụ.

²⁷ Ọ tụ wẹ ẹnya. Wẹ nọ sị, “Elee ụdị ịhịan wụ ọnwan, hụn ufere lẹ ohimin gi e humẹn'ẹ isi!?”

Jizọsị A Zụọ Mmadụ Ẹbụọ Eje-mmọn Rị Imẹ Wẹ

²⁸ Ogẹn Jizọsị gi ru azụụn hụn-ẹbọ, hụn wụ alị ndị Gadara, ikẹnnyẹ ẹbụọ eje-mmọn rị imẹ wẹ gha ikpẹkpẹ pụha nọ kunrun ẹ. Wẹ e gbogbo ọda-ọda, nke wụnị onwọnni onyẹ a s'ẹka a ghazị azụụn hụ.

²⁹ Wẹ nọ dọbepụ oro, sị, “K'i gi ẹnyi e mẹ, Nwa Osolobuẹ? Ị bịa ebeni d'e ye ẹnyi afụnfụn bụ ogẹn e ke ru?”

³⁰ Igunrun ezin rị ẹhụ ebẹhụ ihiẹnni rị e mẹ a kpa nni.

³¹ Eje-mmọn ndị hụ nọ rịọ Jesu, sị, “Omẹni y'a chụpụ ẹnyi, dodo zi ẹnyi ye imẹ igunrun ezin hụ.”

³² Ya ọ nọ sị wẹ, “Jẹnmẹ ni!” Ya wẹ nọ pụha, banyesọnmẹ imẹ ezin ndị hụ. Igunrun ezin hụ ile nọ kpọtu idẹnmizi, zụnban imẹ mirin hụ, ragbu enwẹn wẹ.

³³ Ndị-ndu ezin ndị hụ nọ gbashi imẹ obodo d'a gwa wẹ ihiẹn ile mẹni lẹ ihiẹn mẹ ikẹnnyẹ ndị hụ eje-mmọn te rị imẹ wẹ.

³⁴ Ya ndị obodo hụ nọ rupụha d'e kunrun Jizọsị; a hụn w'a, wẹ nọ rịọ a n'ọ gha ẹgbẹrẹ wẹ pụ.