Matiu 7 - Ika

Isi Nke Ẹsa Amalẹ Ndị Ọzọ Ikpe

¹ “Amalẹ ndị-ọzọ ikpe makẹ Chuku gha a ma ị ikpe.

² K'i dọn han eṅẹn kẹ Osolobuẹ k'a dọn hann'ị. Ẹka i gi sọn ịhịan kẹ Osolobuẹ k'e gi sọn i.

³ “Kị haịn i gi a hụn irinrin-nkụn rị nwẹnẹ i ẹnya, kanị y'a ra hụn ogwe-nkụn rị yụ nwẹn ẹnya?

⁴ Nanị kẹ y'e dọnzi sị nwẹnẹ i, ‘Nị m wepụ ị irinrin-nkụn rị ị ẹnya’ bụ yụ nwẹn bu ogwe-nkụn ẹnya?

⁵ Onyẹ ihunnaị! Wepụgụ ogwe-nkụn rị ị ẹnya, kẹni i sa ẹka legha irinrin-nkụn rị nwẹnẹ i ẹnya ọhụnma wepụ.

Egilẹ Ihiẹn Rị Nsọ Gu Egu

⁶ “Eyekwọlẹ ni nkitẹ ihiẹn rị nsọ; atụkwọlẹ ihiẹn rị mkpa yeni ezin, amamgbe w'a zọkpụkpọ a, maye ụnụ ọgụn, dọrinrin ụnụ.

Rịọ, Chọ, Dụ Ẹka

⁷ “Rịọ nị, wẹ sikọ d'e ye ụnụ; chọ nị, ụnụ k'a hụn; dụ nị ẹka, wẹ k'a kpọpụnị ụnụ ụzọ.

⁸ Makẹni onyẹ ọwụlẹ hụn rịọnị k'e nwọnhẹn; onyẹ ọwụlẹ hụn chọnị k'a hụn; wẹ sikọ d'a kpọpụnị onyẹ ọwụlẹ dụ ẹka ụzọ.

⁹ Imẹ ụnụ ile, onyẹ k'e ye nwa a ọmụma omẹni ọ rịọ a brẹdi

¹⁰ mọbụ ye ẹ agwọ omẹni ọ rịọ a azụn?

¹¹ O mẹ nwan nị ụnụ ndị njọ ma ye ụmụ ụnụ ezigbo ihiẹn, Nẹdi ụnụ rị elu-igwee e yekọ ndị rị a rịọ a ihiẹn ezigbo ihiẹn karị?

¹² “Ya wụ, imẹ ihiẹn ile, e mẹ ndị ọzọ ihiẹn i chọ nị wẹ mẹ i: ọnwan wegbama ihiẹn ile Iwu lẹ ndị-amụma ku.

Ụzọ Mẹ Warara

¹³ “Ghashi ni ọnụ-mgbọn hụ mẹ warara. Makẹni, ọnụ-mgbọn wẹ gha a banye ntikpọ shịa ashịa, ụzọ a e ruchanrịn ịhịan a gha; ndị ghakọ ụzọ hụ bu ọda.

¹⁴ Kanị, ọnụ-mgbọn wẹ gha a banye ndụn mẹ warara ọda-ọda, w'a fagha ụzọ a a fagha; ndị a hụnn'a ebuni ọda.

Osisi Lẹ Mkpụrụ A

¹⁵ “Kpachanpụ nị nị ndị amụma-ntụ ẹnya: w'e kọnrin kẹ atụnrụn, a bịa d'e kunrun ụnụ, kanị, eje-ẹwọrọ kẹ wẹ wụ imẹ.

¹⁶ Mkpụrụ wẹ kẹ ụnụ k'e gi marịn wẹ. Ọgọgọ ara mị ogbe vaịnị; abị-ogun ara mị ogbe figi.

¹⁷ Ya wụ, osisi rị mma sikọ d'a mị mkpụrụ rị mma, kanị osisi rịlẹni mma sikọ d'a mị mkpụrụ rịlẹni mma.

¹⁸ Osisi rị mma as'ẹka mị mkpụrụ rịlẹni mma; osisi rịlẹni mma as'ẹka mị mkpụrụ rị mma.

¹⁹ Osisi ọwụlẹ mịlẹni mkpụrụ rị mma, e gbutu wẹ ẹ tụye ọkụn.

²⁰ Ẹghẹẹ, mkpụrụ wẹ mị k'i jẹnkọ d'e gi marịn wẹ.

“A Marịn M'ị!”

²¹ “Ẹlẹ ndị ile a kpọ m ‘Di-nwọnni-ẹnyi’, ‘Di-nwọnni-ẹnyi’ jẹnkọ d'a banye Alị-eze elu-igwee, kanị ndị hụn e mẹ uche Nẹdi m rị elu-igwee sụọ.

²² Ụhụọhịn hụ, ndị bu ọda jẹnkọ d'a sị m, ‘Di-nwọnni-ẹnyi, Di-nwọnni-ẹnyi! Ẹlẹ ẹfan ị kẹ ẹnyi gi bu amụma? Ẹlẹ ẹfan ị kẹ ẹnyi gi chụpụ eje-mmọn, rụn okẹn ọrụn-atụmẹnya rị ichẹn-ichẹn?’

²³ Ogẹn hụ, m sikọ d'a gwapụ wẹ, sị, ‘Onwọnni ogẹn m gi marịn ụnụ; pụ nị ebeni, ndị e bi k'ọ sụọnị wẹ!’

Onyẹ Tụnye Ụlọ Elu Ọmụma Lẹ Onyẹ Tụnye Elu Uzunzun

²⁴ “Ya wụ, onyẹ nụ ihiẹn ndịnị m rị e ku, gi wẹ bi, hụnyẹ lẹ onyẹ marịn ihiẹn hụn tụn ụlọ a ye elu ọmụma wụ ohu:

²⁵ mirin e zue, huru, okẹn ufere a kpọ ụlọ hụ, kanị ọ dannị, makẹni wẹ rụnye ẹ elu ọmụma.

²⁶ Kanị, onyẹ nụ ihiẹn ndịnị m rị e ku bụ o gini wẹ bi, hụnyẹ lẹ onyẹ-nzuzu tụn ụlọ a ye elu uzunzun wụ ohu:

²⁷ mirin e zue, huru, okẹn ufere a kpọ ụlọ hụ, ọ nọ dan, dankpọchanrịn ọhụnma-ọhụnma!”

Jizọsị Kẹ Oku Rị Ẹka

²⁸ Ogẹn Jizọsị gi kugụ ihiẹn ndịnị, nkuzi ẹ nọ tụ igunrun hụ ile ẹnya.

²⁹ Makẹni ọ kuzi wẹ kẹ onyẹ oku rị ẹka a, ẹlẹ nọkẹ ndị-nkuzi Iwu wẹ.