Matiu 5 - Ika

Isi Nke Isẹn Ihiẹn Jizọsị Kuzi Elu Ugu

¹ Ogẹn Jesu gi hụn igunrun hụ rị e sọnn'ẹ, ọ nọ shi elu òke rị ebẹhụ, nọdị alị, ndị nsọnmazụụn a nọ bịa d'e kunrun ẹ.

Ndị Nke Wẹ Ka Mma

² Ya Jesu nọ kuzimẹ igunrun hụ ile, sị,

³ “Ngọzi wụ nke ndị la enwẹn wẹ tọnị Osolobuẹ nọkẹ igbẹnnyẹ, makẹni Alị-eze elu-igwee wụ nke wẹ!

⁴ Ngọzi wụ nke ndị hụn rị a kwannị, makẹni wẹ jẹnkọ d'a rọkọ wẹ obi.

⁵ Ngọzi wụ nke ndị hụn e welụa enwẹn wẹ alị, makẹni wẹ sikọ d'e nwọnrin ụwa ile.

⁶ Ngọzi wụ nke ndị ọ rị a gụn nị ihiẹn rị kẹ Osolobuẹ dọn chọ, a gụn wẹ kẹ ihiẹn-oriri lẹ ihiẹn-ọrịra; ẹfọ jẹnkọ d'e jun wẹ.

⁷ Ngọzi wụ nke ndị hụn e mẹ omikẹn, makẹni wẹ sikọ d'e mẹni wẹ omikẹn.

⁸ Ngọzi wụ nke ndị obi wẹ rị ọchan, makẹni wẹ sikọ d'a hụn Osolobuẹ.

⁹ Ngọzi wụ nke ndị hụn e mẹ ni udọn rị, makẹni wẹ sikọ d'a kpọ wẹ ụmụ Osolobuẹ.

¹⁰ Ngọzi wụ nke ndị wẹ rị e kpokpo makẹni wẹ rị e mẹ ihiẹn Osolobuẹ chọ: Alị-eze elu-igwee wụ nke wẹ.

¹¹ “Ngọzi wụ nke ụnụ wẹ gha a kpari ụnụ, e kpokpo ụnụ, e gi ufiri m e buo ụnụ eje-ihiẹn ile rị ichẹn-ichẹn.

¹² Ghọghọ nị; ẹfọ ya sụọ ụnụ ụsụọ — makẹni ụgwọ-ọrụn ụnụ hi-ogbe imẹ elu-igwee! Ẹrịra kẹ wẹ kpokpozi ndị-amụma buni ụnụ ụzọ.

Ndị Nke Kraịstị Wụ Nnu Lẹ Ukpẹ Ụwa

¹³ “Ụnụ wụ nnu ụwa. Kanị, omẹni nnu asụọzịnị ụsụọ, nị wẹ s'ẹka mẹ ẹ sụọmazị ụsụọ? Onwọnzini ihiẹn wẹ gi ẹ e mẹ, karị ikpọn ẹ tuhu, a zọgbumẹ wẹ ẹ.

¹⁴ “Ụnụ wụ ukpẹ ụwa. Obodo wẹ tụnye elu òke asakọ ẹka zueri.

¹⁵ Ẹrịra k'ọ rịzị nị ịhịan ara mụyegụ ukpẹ, zuemẹ ẹ ye okpuru afẹrẹ; kama, w'e bu ẹ e che elu ihiẹn, ịhịan ile rị imẹ ụlọ e gi ẹ legha ụzọ.

¹⁶ Ẹrịra kẹ ụnụ k'a nịzị ukpẹ ụnụ e nwun hụn ịhịan e legha, kẹni wẹ a hụn ọrụn-ọma ụnụ, e gi ẹ a ja Nẹdi ụnụ rị elu-igwee mma.

Nkuzi Banyeni Iwu

¹⁷ “Erokwọlẹ ni nị m bịa d'a kagbu Iwu Mozizi mọbụ ihiẹn ndị-amụma de. Abịanị m d'a kagbu wẹ, kama, m bịa d'e mẹzu wẹ.

¹⁸ Makẹni, m rị a gwa ụnụ ezioku, d'e ru ni elu-igwee lẹ ụwa a ghafe, onwọnni mkpụrụ-ẹkụkwọ ọwụlẹ rị imẹ Iwu mọbụ ihiẹn ọwụlẹ wẹ vinyehụ mkpụrụ-ẹkụkwọ, hụn wẹ jẹnkọ d'a kagbu — d'e ru nị ihiẹn ile rị Iwu e mẹzuchanrịn.

¹⁹ Ya wụ nị onyẹ nu hụn ọwụlẹ imẹ iwu ndịnị ye nkọ, a kuzi ịhịan ẹrịra, wẹ sikọ d'a kpọ hụnyẹ onyẹ kachanrịn ntịn imẹ Alị-eze elu-igwee. Kanị, onyẹ rị e dọnmẹ wẹ, a kuzi wẹ, wẹ sikọ d'a kpọ a okẹn-ịhịan imẹ Alị-eze elu-igwee.

²⁰ M rị a gwa ụnụ, mmanị ezi-omumẹ ụnụ ka nke ndị-nkuzi Iwu lẹ ndị Itu-Farisi, ụnụ asakọ ẹka banye Alị-eze elu-igwee.

Nkuzi Banyeni Ibu-olulu

²¹ “Ụnụ a nụgụọ nị wẹ sị ndị akan, ‘Egbulẹ ni ọchụn; onyẹ gbu ọchụn, a ma w'a ikpe.’

²² Kanị, m rị gwa ụnụ nị onyẹ budẹni nwẹnẹ ẹ olulu a kpọ w'a ikpe; onyẹ kpọ nwẹnẹ ẹ iyi, o jẹnkọ Ọgwa Ndị-isi; onyẹ sị ịhịan ‘Nzuzu,’ ọkụn-mmọn rị e che ẹ.

²³ “Ya wụ, omẹni ị wẹhẹ oyiye i ebe wẹ nọ e ye oyiye, nị y'a nọ ebẹhụ nyanhan nị nwẹnẹ i rị e wen'i iwe makẹ ihiẹn i mẹ ẹ,

²⁴ lagụ oyiye i tọ ebẹhụ wẹ nọ e ye oyiye; jẹn, ni ịyụ lẹ nwẹnẹ i sụọkingụ, i kebe kinhẹn d'e ye oyiye i.

²⁵ “Ịyụ lẹ onyẹ ikpe i sụọkin ẹgwa, ebe ụnụ kelẹni ru ọgwa, amamgbe o we i ye ọka-ikpe, ọka-ikpe e we i ye (ụlakpa) onyẹ ẹwuru-ogi, a tụ wẹ i ye ụlọ-ngan.

²⁶ M rị a gwa ị ezioku, y'a pụhakọ ngan d'e ru mgbe ị kụgụ ịkọbọ ikpanzụụn wẹ be i.

Nkuzi Banyeni Ughẹrẹ

²⁷ “Ụnụ a nụgụọ nị wẹ sị ndị mbụ, ‘Aghẹrẹlẹ.’

²⁸ Kanị mmẹ lẹ enwẹn m rị a gwa ụnụ nị onyẹ lee okpoho ẹnya, ọ la a ẹnya, e mẹgụọlẹ mgba a imẹ obi ẹ.

²⁹ Omẹni ẹnya ẹka-nni i a han ị e mẹ njọ, gụpụ a tuhu. Ọ ka ị mma nị mkpamkpa ẹhụ ị ohu arịzị a, karị nị wẹ tụ ẹhụ ị ile ye ọkụn-mmọn.

³⁰ Omẹni ẹka-ihiẹn i a han ị e mẹ njọ, bepụ a tuhu. Ọ ka ị mma nị mkpamkpa ẹhụ ị ohu arịzị a, karị nị wẹ tụ ẹhụ ị ile ye imẹ ọkụn-mmọn.

Nkuzi Banyeni Mkpechan

³¹ “Wẹ te sịzịkwọ, ‘Onyẹ kpechan nwunyẹ ẹ, ya ye ẹ ẹkụkwọ mkpechan.’

³² Kanị mmẹ nwẹn rị a gwa ụnụ nị onyẹ kpechan nwunyẹ ẹ bụ ẹlẹni nwunyẹ ẹ zọ ụkụ ye ọfịa, hụnyẹ rị e mẹ ẹ n'ọ zọ ụkụ ye ọfịa. Onyẹ lụ okpoho wẹ kpechan a nagụọ nwunyẹ ịhịan.

Nkuzi Banyeni Ikun-iyi

³³ “Ụnụ a nụzịghọ nị wẹ sị ndị akan, ‘Ekunlẹ ẹfan Osolobuẹ bụ y'e mẹni ihiẹn i kwe nkwa a; i k'e mẹrịrịnị Osolobuẹ ihiẹn i kwe nkwa a.’

³⁴ Kanị mmẹ lẹ enwẹn m sị ụnụ, ekunlẹ ihiẹn ọwụlẹ, kaka. Ekunlẹ elu-igwee, makẹni ịya wụ ukpo-eze Chuku;

³⁵ ekunlẹ ụwa, makẹni ịya k'ọ tụkwasị ụkụ; ekunlẹ Jerusalẹm, makẹni ịya wụ obodo Eze uku hụ;

³⁶ ekundẹlẹ isi i, makẹni y'a saẹka mẹ ntutu ohu chanma ụchan mọbụ gimẹ ngi.

³⁷ Sịhụ ‘Ẹghẹẹ’ mọbụ ‘Mba’; ihiẹn ọwụlẹ karị ọnwan gha ẹka Eje-onyẹ hụ bịa.

Nkuzi Banyeni Mmẹgwarị

³⁸ “Ụnụ a nụgụọ nị wẹ sị, ‘Onyẹ tikpọ ịhịan ẹnya ohu, wẹ tikpọgwarị a ẹnya ohu; onyẹ tikwọn ịhịan eze ohu, wẹ tikwọngwarị a eze ohu.’

³⁹ Kanị, mmẹ nwẹn sị ị, ịhịan bịangbu i, esọnlẹ ẹ dọ. Kama, onyẹ ma ị ọra nti ẹka-nni, y'e bu nti hụn-ẹbọ zimẹn'ẹ.

⁴⁰ Onyẹ chọ n'o kpe i narịn ị ẹwuru i yi imẹ, nịzị a weri hụn i yiye elu ẹ.

⁴¹ Onyẹ wa ijẹn maịlị ohu ye i olu, y'e sọn ẹ jẹn maịlị ẹbụọ.

⁴² Onyẹ rịọ ị ihiẹn, y'e ye ẹ; onyẹ chọ n'o zinarịn ị ihiẹn, ajụlẹ.

Inwọn Ihiẹn-ọsụsụọ Ndị-iṅẹnrẹn I

⁴³ “Ụnụ a nụgụọ nị wẹ sị, ‘I sikọ d'e nwọnrịrị ihiẹn-ọsụsụọ ndị nke i, e ze ize ndị-iṅẹnrẹn i.’

⁴⁴ Kanị mmẹ nwẹn sị ụnụ e nwọn ihiẹn-ọsụsụọ ndị-iṅẹnrẹn ụnụ, e mẹni ni ndị rị e kpokponi ụnụ ekpere,

⁴⁵ kẹni ụnụ wụrụ ụmụ Nẹdi ụnụ rị elu-igwee nke-esi. Makẹni, o mẹ anwụn a e tikpu kẹ eje-ịhịan kẹ ezigbo ịhịan, e mẹ mirin e zueni kẹ ndị ezi-omumẹ kẹ ndị eje-omumẹ.

⁴⁶ Makẹni, omẹni ndị nwọn ihiẹn-ọsụsụọ ị kẹ yụ nwẹn nwọn ihiẹn-ọsụsụọ wẹ, elee ụgwọ-ọrụn k'i k'e nwọnhẹn? Ẹlẹ ẹrịra kẹ ndị ụgwọ-isi wẹ gi njọ marịn e mẹ?

⁴⁷ Omẹzini ndị nke i sụọ kẹ y'e kele ọhụnma, k'i gi mẹkarị ndị ọzọ? Ẹlẹ ẹrịra kẹ ndị ghalẹni e fe Chuku e mẹ?

⁴⁸ Zu ni nwan oke kẹ Nẹdi ụnụ hụn rị elu-igwee dọn zu oke.