Matiu 4 - Ika

Isi Nke Ẹnọ Kẹ Ekwensụ Dọn Nwan Jizọsị

¹ Ya kẹ Mmọn-nsọ nọ duru Jizọsị shi imẹ atụ kẹni Ekwensụ nwan a.

² Jizọsị bu ọnụ ukinkin lẹ efinnaị, ọrọgbọ akpọhịn ọgụnnaị; omẹgụ, ẹgụn nọ gụnma a.

³ Ya kẹ onyẹ-ọnwụnwan hụ nọ bịa, sị a, “Omẹni ịyụ wụ Nwa Osolobuẹ, sị ọmụma ndịnị họnrinsọnmẹ ogbe brẹdi.”

⁴ Kanị Jesu nọ sị a, “E degụọ w'a imẹ Ẹkụkwọ-nsọ, sị, ‘Ẹlẹ ihiẹn-oriri sụọ kẹ ịhịan gi a rị ndụn, kanị ihiẹn ile hụn gha Osolobuẹ ọnụ pụha.’ ”

⁵ Ya kẹ Ekwensụ nọ we ẹ shi imẹ obodo nsọ wụ Jerusalẹm, w'ẹ tumẹ mkpọnụnụ Ụlọ-nsọ,

⁶ sị a, “Omẹni ịyụ wụ Nwa Osolobuẹ, wụtu. Makẹni, e degụọ w'a imẹ Ẹkụkwọ-nsọ, sị, ‘O k'a gwa ndị mmọn-ozi ẹ oku i, a ghọdọn wẹ i, amamgbe y'a kpọ ụkụ ọmụma.’ ”

⁷ Jizọsị nọ sị a, “E degụọzị w'a imẹ Ẹkụkwọ-nsọ, sị, ‘Elelekwọlẹ Di-nwọnni-ẹnyi wụ Chuku i ọnụ.’ ”

⁸ Ekwensụ nọ werizi ẹ shi elu-ugu jẹngbu enwẹn ẹ elu, ghọsịkwama a alị-eze ile rị ụwa lẹ ọghọ wẹ,

⁹ sị a, “M k'e ye i ihiẹn ndịnị ile, omẹni y'a kụnị m isi alị.”

¹⁰ Ya kẹ Jizọsị nọ sị a, “Ekwensụ, pụ ebeni! Makẹni, e degụọ w'a imẹ Ẹkụkwọ-nsọ, sị, ‘Osolobuẹ wụ Chuku i k'i k'a kụnị isi-alị; ịya sụọ k'i k'e fe.’ ”

¹¹ Ya kẹ Ekwensụ nọ la Jizọsị tọ, ndị mmọn-ozi nọ bịa d'e ye ẹ ihiẹn rị a mkpa.

Jizọsị E Bidọn Ọrụn A Imẹ Galili

¹² Ogẹn Jizọsị gi nụ nị a tụgụọ wẹ Jọnụ ngan, ọ nọ gha Judia pụ, shi Galili.

¹³ Ọ nọ gha Nazarẹtị rị Galili pụ, ọ nọ jẹn d'e biri imẹ obodo Kapanọm hụn rịzị Galili, mkpẹnrẹn mirin Galili, ẹgbẹrẹ Zẹbulọnụ lẹ Naf'tali.

¹⁴ Ya kẹ ihiẹn onyẹ-amụma wụ Azaya ku nọ mẹzu. Azaya sị,

¹⁵ “Alị Zẹbulọnụ lẹ alị Naf'tali, hụn rị ụzọ Ohimin — wẹ fetugụ Iyi Jọdanị; Galili, alị ndị wụlẹni ndị Ju jun!

¹⁶ Ndị bi imẹ ishi a hụnọlẹ okẹn ukpẹ; ukpẹ e nwunmẹgụọnị ndị bi ebe ọnwụn nọ a kpọ wẹ ihun.”

¹⁷ Jizọsị nọ gha ogẹn hụ zimẹ ozi, a sị, “Rogharị nị, makẹni alị-eze Osolobuẹ a rịgụọ nsue!”

Kẹ Jesu Dọn Kpọ Ndị E Gbu Azụn

¹⁸ Ogẹn Jizọsị gi ghakọ mkpẹnrẹn mirin Galili, ọ nọ hụn umunẹ ẹbụọ, Saịmọnụ hụn w'a kpọ Pita lẹ Andrụ nwẹnẹ ẹ, ebe wẹ rị a tụ ọga e ye imẹ mirin ahụn, makẹni ndị e gbu azụn kẹ wẹ wụ.

¹⁹ Ọ nọ sị wẹ, “Sọnmẹ ni m, m jẹnkọ d'e mẹ ụnụ wụrụ ndị e wẹhẹ ịhịan nọkẹ azụn.”

²⁰ Ya wẹ nọ la ọga wẹ gi e gbu azụn tọ ozigbo, sọnmẹ ẹ.

²¹ Ogẹn Jesu gi jẹnshi ihun, ọ nọzị hụn umunẹ ẹbụọ, Jemisi nwa Zẹbẹdi lẹ Jọnụ nwẹnẹ Jemisi; uwẹ lẹ nẹdi wẹ rị imẹ ụgbọ, e dọnzi ọga wẹ gi e gbu azụn; ọ nọ kpọ wẹ ẹbụbụọ.

²² Wẹ nọ latọ ụgbọ-mirin hụ lẹ nẹdi wẹ, sọnmẹ ẹ ozigbo.

Jizọsị E Zigbarị Oziọma Imẹ Galili, A Zụọ Ndị Ọrịa

²³ Jesu nọ ghagbarị Galili ile, a kuzi imẹ ụlọ-ofufe ndị Ju, e zi oziọma Alị-eze, a zụọ wẹ emu lẹ ọrịa ile rị ichẹn-ichẹn wẹ bu.

²⁴ Ya kẹ otiti ẹ nọ kpọgbarị alị Siria ile; wẹ hụ e wẹhẹn'ẹ ndị ile emu rị a kụ, ndị bu ọrịa ichẹn-ichẹn lẹ ndị ihiẹn rị a tụrụ, ndị eje-mmọn rị e ye nsọngbu, ndị ibobo (odudu) lẹ ndị ọrọ, ọ nọ zụọ wẹ.

²⁵ Igunrun hi-ogbe gha Galili lẹ Obodo iri ahụn nọgbamanị wụ Dikapolisi lẹ Jerusalẹm lẹ Judia lẹ nfetu Iyi Jọdanị bịa nọ sọnmẹ ẹ.