Matiu 3 - Ika

Isi Nke Ẹtọ Jọnụ Hụn E Mẹ Mirin-Chuku A Kwanị Jesu Ụzọ

¹ Ogẹn hụ, Jọnụ hụn e mẹ mirin-Chuku nọ pụha imẹ atụ Judia, a hị,

² “Rogharị nị, makẹni alị-eze elu-igwee a bịagụọ d'a kịma!”

³ Makẹni, Jọnụ hụn e mẹ mirin-Chuku kẹ onyẹ-amụma wụ Azaya ku oku ẹ ogẹn o gi sị, “Olu rị a pụ imẹ atụ, a sị, ‘Kwa nị nị Di-nwọnni-ẹnyi ụzọ; mẹmẹ ni ụzọ a n'o zinrin.’ ”

⁴ Ẹwuru wẹ gi ẹṅẹnrẹn anyịnyan-mkpukpuke wụ kamẹlụ mẹmẹ kẹ Jọnụ e yi; akpụkpọ-anụ kẹ wẹ gi mẹmẹ akpụkpọ-ukun ẹ; igurube lẹ mirin-ẹnwụn rị ọfịa k'o ri.

⁵ Ndị Jerusalẹm lẹ ndị Judia ile lẹ obodo ile nọkunmẹ Iyi Jọdanị hụ e jẹn d'e kunrun ẹ.

⁶ Wẹ hụ e ku njọ wẹ mẹ, ọ hụ e mẹ wẹ mirin-Chuku imẹ Iyi Jọdanị.

⁷ Kanị, ogẹn o gi hụn kẹ ndị bu ọda imẹ ndị itu-Farisi lẹ ndị itu-Sadusi rị a bịa n'o mẹ wẹ mirin-Chuku, ọ nọ sị wẹ, “Igunrun agwọ! Onyẹ sị ụnụ gba nị iwe lẹ ọnụma Osolobuẹ lalanị ọsọ?!

⁸ Mịkwọ nị mkpụrụ ghọsị nị ụnụ e rogharịgụọ;

⁹ atụkwọlẹ ni enwẹn ụnụ ntụ, a sị, ‘Ebraham wụ nẹdi ẹnyi nụ!’ Makẹni, m rị a gwakwọ ụnụ, Osolobuẹ k'a saẹka gi ọmụma ndịnị ye Ebraham ụmụ.”

¹⁰ Anyụn rị nwan ukun osisi, e che: osisi ọwụlẹ mịlẹni ezigbo mkpụrụ, e gbutu w'ẹ tụye ọkụn.

¹¹ “Mmẹ nwẹn gi mirin-mmaka e mẹ ụnụ mirin-Chuku ụnụ gi a ghọsị nị ụnụ e rogharịgụọ. Kanị, onyẹ hụn sọnla m azụụn ka m ọhụnma-ọhụnma; erudẹni m onyẹ e bu akpụkụ a! Mmọn-nsọ lẹ ọkụn kẹ ya nwẹn k'e gi mẹ ọnụ mirin-Chuku.

¹² Ihiẹn o gi a fụchan ọka rị a ẹka: o k'a fụchanchanrịn ọka ile rị ebe ọ nọ a kụkpọ ọka a, kpọnrin ọka a ile ye ebe o butọ ọka, kpọn ẹfịfịa ọka che imẹ ọkụn hụ ghalẹni e tinyụn.”

Kẹ Jọnụ Dọn Mẹ Jizọsị Mirin-Chuku

¹³ Ogẹnni kẹ Jizọsị gi gha Galili bịa Iyi Jọdanị d'e kunrun Jọnụ kẹni Jọnụ mẹ ẹ mirin-Chuku.

¹⁴ Jọnụ e te kweni, ọ sị Jizọsị, “Ịyụ furu hụn k'e mẹ m mirin-Chuku, kanị yụ bịa nwan d'e kunrun m nị mẹ i?”

¹⁵ Kanị Jesu nọ sị, “Hapụ a nọ rị ẹrịra kikẹnni; o furu ni ẹnyi mẹkwama ihiẹn ile Osolobuẹ chọ.” Ya kẹ Jọnụ nọ nwan kweri mẹ ẹ mirin-Chuku.

¹⁶ Jọnụ e mẹgụ Jizọsị mirin-Chuku, hụn Jizọsị gihụ gha imẹ mirin pụla, elu-igwee nọ kpupụ idẹnmizi; ọ nọ hụn Mmọn Osolobuẹ k'ọ lala rịkẹ nduru, ọ nọ bịa d'e bekwasị a.

¹⁷ Ya kẹ olu nọ gha elu-igwee sị, “Ọnwan wụ ezi Nwa m, hụn ihiẹn ẹ a sụọ m ọhụnma-ọhụnma.”