Matiu 28 - Ika

Isi Nke Ẹsatọ-kwasị-ọgụn Kẹ Jizọsị Dọn Gha Ọnwụn Lihi

¹ Ụhụọhịn Ezumikẹn a ghafegụ, o ru ụhụọhịn ibuzọ imẹ izuka. Ogẹn eki gi fọnmẹ, Meri onyẹ obodo Magidala lẹ Meri hụn-ẹbọ nọ jẹn d'e lele ili hụ.

² Idẹnmizi, alị nọ mahihie ọda-ọda, makẹni mmọn-ozi Di-nwọnni-ẹnyi gha elu-igwee bịa, nupụ ọmụma hụ hi-ogbe, nọdị alị elu ẹ.

³ Mmọn-ozi hụ hụ e be nwaịn-nwaịn kẹ amụma, ẹwuru ọchan o yi hụ e nwun zaị kẹ sno.

⁴ Egun ẹ nọ bịa ndị nche hụ, ẹhụ a mama wẹ nni, wẹ nọ sọhị, nọchanrịn kẹ ndị nwụnnị.

⁵ Kanị, mmọn-ozi hụ nọ sị ikpoho ndị hụ, “Atụlẹ ni egun. A marịnghọ m nị ụnụ rị a chọ Jizọsị, hụn wẹ kpọgbu elu obe.

⁶ Ọ rịzị ebeni; o lihigụọ k'o dọn ku. Bịa nị d'e lee ebe o te rị.

⁷ Jẹnmẹ ni nwan ozigbo d'a gwa ndị nsọnmazụụn a. Sị nị wẹ, ‘Ọ ghagụọ ọnwụn lihi. O jẹnmẹgụọ Galili d'e cheri ụnụ; ebẹhụ kẹ ụnụ jẹnkọ d'a nọ hụn a!’ A gwagụọkwọ m ụnụ.”

⁸ Ya wẹ nọ gi egun lẹ okẹn ịghọghọ gha ili hụ pụ ozigbo, gbama ọsọ d'a gwa ndị nsọnmazụụn a.

⁹ Idẹnmizi, Jizọsị nọ kunrun wẹ, sị, “Darụ nị!” Ya wẹ nọ nọzụnhan d'e fiedọn ẹ ụkụ, gbun'ẹ osekpu.

¹⁰ Ya Jizọsị nọ sị wẹ, “Atụlẹ ni egun. Jẹn ni d'a gwa umunẹ m wẹ jẹn Galili, nị ebahụn kẹ w'a nọ hụn m.”

E Gi Wẹ Egho Kpumẹ Ndị-nche Ọnụ

¹¹ Ikpoho ndị hụ e jẹnmẹ, ụfọdụ ndị-nche nọ shi imẹ obodo d'a gwa ndị-isi nchụn-ẹjan ihiẹn ile mẹni.

¹² Ndị-isi nchụn-ẹjan lẹ ndị-isi nọ zu, tụgbama iroro, wẹ nọ ye ndị-agha hụ ezigbo egho,

¹³ sị wẹ, “Gwakwọ nị ịhịan ile nị ‘Ndị nsọnmazụụn a bịa d'e zuru ẹ imẹ abalị ebe ẹnyi rị ụran.’

¹⁴ Omẹni Gọvanọ wụ Paịleti a nụ a, ẹnyi k'a sị a nị nsọngbu arịa, ụnụ ahụnkọ oku.”

¹⁵ Ya wẹ nọ narịn wẹ egho hụ, mẹ ihiẹn wẹ gwa wẹ. Ndị Ju hụkwọ nwan e ku ẹ d'e ru tannị nị ndị nsọnmazụụn a bịa d'e zuru ẹhụ a.

Ọrụn Jizọsị Sị Ndị nsọnmazụụn A Rụn

¹⁶ Ya ndị nsọnmazụụn a mmanaị hụ nọ nwan shi ugu hụ rị Galili Jizọsị gwa wẹ.

¹⁷ Ogẹn wẹ gi hụn Jizọsị, wẹ nọ gbun'ẹ osekpu, kanị o nwọn ndị nwọn obi-ẹbụọ.

¹⁸ Jizọsị nọ jẹnzụnhan, sị wẹ, “E yeọlẹ wẹ m ikẹn ile rị elu-igwee lẹ elu-ụwa.

¹⁹ Jẹnmẹ ni nwan d'e mẹ ndị alị ile rị ichẹn-ichẹn wụrụ ndị e sọnni m; e gi ni ẹfan Nẹdi lẹ Nwa lẹ Mmọn-nsọ e mẹ wẹ mirin-Chuku.

²⁰ Kuzi ni wẹ, nị wẹ e mẹ ihiẹn ile m sị ụnụ mẹ. Eziẹ, m nọyeni ụnụ ogẹn ile d'e ru ọgụgụ-ogẹn.”