Matiu 26 - Ika

Isi Nke Isin-kwasị-ọgụn E Zuni Wẹ Jizọsị Umẹ

¹ Ogẹn Jizọsị gi kugụ ihiẹn ndịnị ile, ọ nọ sị ndị nsọnmazụụn a,

² “Ụnụ a marịnghọ nị nwẹnẹ eki wụ Mmẹmmẹ-Nghafe. Ụhụọhịn hụ kẹ wẹ jẹnkọ d'e we Nwa nke Ịhịan ye wẹ kpọgbu.”

³ Ogẹnni kẹ ndị-isi nchụn-ẹjan lẹ ndị-isi gizikwọ rị ọgwa Kayafasị wụ onyẹ-isi nchụn-ẹjan e zu.

⁴ Wẹ nọ zu umẹ nị wẹ gi ẹro nwụnrụn Jizọsị gbu.

⁵ Wẹ nọ sị, “Kanị, ẹlẹkwọ ogẹn mmẹmmẹni, amamgbe isusu gha a rị.”

Kẹ Okpoho Dọn Hu Udẹn Ye Jizọsị Isi

⁶ Ogẹn Jizọsị gi rị Bẹtani, iwe Saịmọnụ onyẹ emu oti te kụ,

⁷ okpoho ohu nọ wẹhẹ ọgọ wẹ gi alabasta mẹmẹ hụn okẹn udẹn ṅanran ọda-ọda rị imẹ ẹ. Ọ nọ hu ẹ ye Jizọsị isi ebe ọ nọdị alị e ri ihiẹn-oriri.

⁸ Kanị ndị nsọnmazụụn a a hụn ihiẹnni, wemẹ iwe, sị, “Elee iwi wụ ọnwan?!

⁹ Nkẹ w'e re udẹnni okẹn egho, we ẹ ye ndị-igbẹnnyẹ!”

¹⁰ Jizọsị a marịngụọ ihiẹn wẹ rị e ku, ọ nọ sị wẹ, “Kị ụnụ rị e sọngbuni okpohoni? Ihiẹn rị mma k'o mẹni m.

¹¹ Ụnụ lẹ ndị igbẹnnyẹ rị ebeni ogẹn ile, kanị mmẹ nwẹn esọnkọ ụnụ nọdị ebeni ogẹn ile.

¹² O hukpugụọ m udẹn olili hụn nkẹ wẹ e hukpu m wẹ gha e li m.

¹³ Ezioku kẹ m rị a gwa ụnụ, ebe ọwụlẹ wẹ nọ zi oziọmanị imẹ ụwa ile, wẹ jẹnkọ d'e ku ihiẹnni o mẹ, e gi ẹ a nyanhan a.”

Judasị E Kweri N'o Re Jizọsị

¹⁴ Ya onyẹ ohu imẹ ndị nsọnmazụụn mmẹbụọ hụ hụn ẹfan a wụ Judas Iskarọtụ nọ jẹnburu ndị-isi nchụn-ẹjan,

¹⁵ sị wẹ, “Kị ụnụ k'e ye m nị m we Jizọsị che ụnụ ẹka? Wẹ nọ kụ a egho ọrụn akpọhịn iri-kwasị-ọgụn.”

¹⁶ Gha ogẹn hụ jẹnmẹ, ọ nọ chọma oghere o gi we Jesu ye wẹ.

Kẹ Jizọsị Lẹ Ndị nsọnmazụụn A Dọn Ri Oriri-nghafe

¹⁷ Ụhụọhịn wẹ gi e bidọn Mmẹmmẹ Brẹdi nwọnlẹni yisti, ndị nsọnmazụụn Jizọsị nọ bịa d'e kunrun ẹ, sị a, “Elebe k'ị chọ nị ẹnyi dọnkwama hụn y'a nọ ri Oriri-Nghafe?”

¹⁸ Ọ nọ sị wẹ, “D'e kunrun ni onyẹ nọ ẹnịna imẹ obodo, ụnụ a sị a, ‘Onyẹ-nkuzi sị, “Ogẹn m e rugụọ; mmẹ lẹ ndị nsọnmazụụn m sikọ d'a nọ iwe i mẹ Mmẹmmẹ-Nghafe.” ’ ”

¹⁹ Ndị nsọnmazụụn a nọ mẹ kẹ Jizọsị gwa wẹ, wẹ nọ mẹmẹ ihiẹn-oriri Mmẹmmẹ-nghafe.

²⁰ O ru ogẹn ẹnyasị, Jizọsị lẹ ndị nsọnmazụụn mmẹbụọ hụ nọ weri oche rimẹ ihiẹn-oriri.

²¹ Ebe wẹ rị e ri ihiẹn-oriri hụ, ọ nọ sị, “Ezioku kẹ m rị a gwa ụnụ, onyẹ ohu imẹ ụnụ jẹnkọ d'e re m.”

²² Ẹfọ asụọzịnị wẹ ụsụọ kaka, onyẹ-onyẹ hụ a jụ a, “Di-nwọnni-ẹnyi, mmẹ rọ?”

²³ Jizọsị nọ sị, “Onyẹ hụ mẹ lẹ ịya rị e buche ẹka imẹ afẹrẹ, ịya jẹnkọ d'e re m.

²⁴ Nị Nwa nke Ịhịan laghọ kẹ wẹ dọn de ẹ imẹ ẹkụkwọ-nsọ n'o k'a la, kanị nsọngbu jẹnkọ d'a rịnị onyẹ k'e we Nwa nke Ịhịan che wẹ ẹka! O te ka onyẹ hụ mma nị amụnị w'a.”

²⁵ Judasị hụn sikọ d'e we ẹ che wẹ ẹka nọ sị, “Onyẹ-nkuzi, mmẹ rọ?” Jizọsị nọ sị a, “Ịyụ ku.”

Oriri-nsọ

²⁶ Ebe wẹ rị e ri ihiẹn-oriri ahụn, Jizọsị nọ weri brẹdi: ọ kpanmịngụ Osolobuẹ, ọ nọ bebe ẹ ye ndị nsọnmazụụn a, sị, “Weri ni ri: ọnwan wụ ẹhụ m.”

²⁷ O weri mkpu manya: ọ kpanmịngụ Osolobuẹ, ọ nọ we ẹ ye wẹ, sị, “Ụnụ ile, rarịsọnmẹ ni:

²⁸ makẹni ọnwan wụ ẹdeke m, hụn wẹ gi biye ẹka nkwerigbama ọhụn Osolobuẹ kwademẹ — ẹdeke m wẹ hupụnị ndị bu ọda, igi wẹhẹ mgbagharị njọ.

²⁹ M rị a gwa ụnụ, arakọzị m manya vaịnị d'e ru ụhụọhịn hụ mmẹ lẹ ụnụ jẹnkọ d'a ra nke ọhụn a imẹ Alị-eze Nẹdi m.”

³⁰ Wẹ nọ bụ ẹbụ. A bụgụ wẹ, wẹ nọ shi Ugu Olivu.

Jizọsị E Ku Ẹ Nị Pita Jẹnkọ D'a Ghọrị Nị Ọ Marịn A

³¹ Ya Jizọsị nọ sị wẹ, “Ukinkinni, ụnụ ile jẹnkọ d'e gi ufiri m danpụ, makẹni Ẹkụkwọ-nsọ sị, ‘Osolobuẹ jẹnkọ d'e gbu onyẹ-ndu atụnrụn, atụnrụn ile a gbayịya.’

³² Kanị, m ghagụ ọnwụn lihi, e shi m d'e cheri ụnụ imẹ Galili.”

³³ Pita nọ shịarị Jizọsị, “Ọsụọn'a nị ịhịan ile e gi ufiri i danpụ, onwọnni ogẹn m'e gi danpụ!”

³⁴ Ya kẹ Jizọsị nọ sị Pita, “Nị m gwa ị ezioku, ọkpa gini d'a kwan imẹ abalịnị, i jẹnkọ d'a ghọrị mgbe ẹtọ nị y'a marịn m.”

³⁵ Pita nọ sị, “Kaka, aghọrịkọ m n'a marịn m'ị, ọsụọn'a nị mmẹ lẹ yụ jẹnkọ d'a nwụn!” Ndị nsọnmazụụn ile họdụnị nọ kuzikwọ ẹrịra.

Kẹ Jesu Dọn Mẹ Ekpere Imẹ Gẹtisẹmani

³⁶ Ya Jizọsị lẹ ndị nsọnmazụụn a nọ shi ebe w'a kpọ Gẹtisẹmani. Ọ nọ sị ndị nsọnmazụụn a, “Nọdị nị alị ebeni nị m jẹnzụka d'e mẹ ekpere.”

³⁷ Ọ nọ weri Pita lẹ ụmụ Zẹbẹdi ẹbụbụọ shi ụsụọ. Ẹhụ ekezin'ẹ ọkụn, obi eruzin'ẹ alị.

³⁸ Ya ọ nọ sị wẹ, “Obi e d'a gbawapụ m. Nọdị nị ebeni sọn m mụ ẹnya.”

³⁹ O jẹnshi ihun ẹkẹrẹ, ọ nọ tụha enwẹn ẹ ye alị, bu ihun kpumẹ alị, mẹ ekpere, sị, “Baba, omẹni ọ rịghọ nfe, anịlẹ m ra mkpuni; kanị, uche i y'a mẹ, ẹlẹ uche m.”

⁴⁰ Ọ bịa d'e kunrun ndị nsọnmazụụn a, ọ hụn nị wẹ rị ụran; ọ sị Pita, “Ya wụ, ụnụ asanị ẹka sọn m mụ ẹnya ogẹnni?

⁴¹ We ni ẹnya ru alị, ụnụ e mẹmẹ ekpere, amamgbe ụnụ a danye imẹ ọnwụnwan; ezioku-ezioku, mmọn ịhịan a chọghọ, kanị ndụn gụ ẹhụ.”

⁴² Ọ nọ pụzị nke mgbe ẹbụọ, mẹ ekpere, sị, “Baba, omẹni mkpu afụnfụnnị asaẹka ghafe mmanị m ra, uche i ya mẹ.”

⁴³ Ọ bịazị ebe ndị nsọnmazụụn a rị, ọ nọ hụnzị a n'a ranhịngụọ wẹ, makẹni ẹnya wẹ a nyịntọgụọ.

⁴⁴ Ọ lazị wẹ tọ, pụ d'e mẹ ekpere nke mgbe ẹtọ, e kpezikwọ ihiẹn ohu hụ.

⁴⁵ Ya ọ nọ jẹnzi d'e kunrun ndị nsọnmazụụn a; ọ sị wẹ, “Echẹn kẹ ụnụ rịkwọ ụran, e zu ikẹn? Lee n'ẹ, ogẹn hụ e rugụọ: e bu wẹ Nwa nke Ịhịan che ẹka ndị njọ.

⁴⁶ Lihi ni nị ẹnyi jẹnmẹ.” Ya ọ nọzị sị, “Lee ẹ, onyẹ rị e reni m e rugụọ ebeni!”

A Nwụnrụn Wẹ Jizọsị

⁴⁷ Ebe Jizọsị rịkwọ e ku okuni, Judasị hụn wụ onyẹ ohu imẹ ndị nsọnmazụụn a mmẹbụọ nọ bịa. Judasị lẹ igunrun hi-ogbe bu ọpịa-agha lẹ ẹgbe wị. Ndị-isi nchụn-ẹjan lẹ ndị-isi zihẹ ndị ahụn.

⁴⁸ Judasị hụn rị e ren'ẹ a gwatọgụọ wẹ kẹ w'a dọn kọma Jesu ẹnya. Ọ sị, “Onyẹ m jẹnkọ d'e susu ọnụ kele rọ; nwụnrụn n'a.”

⁴⁹ Ọ nọ bịa d'e kunrun Jizọsị ozigbo, sị, “Ụw'ọma, Onyẹ-nkuzi!” Ọ nọ susu Jizọsị ọnụ.

⁵⁰ Jizọsị nọ sị a, “Di-ẹnyi, mẹ ihiẹn i bịa d'e mẹ!” Wẹ nọ kwọndọn Jizọsị, nwụnrụn a.

⁵¹ Ya kẹ onyẹ ohu imẹ ndị wẹ lẹ Jizọsị wị nọ sepụha ọpịa-agha a ozigbo, banpụ odibo onyẹ-isi nchụn-ẹjan ntịn.

⁵² Jizọsị nọ sị a, “Wekin ọpịa ị azụụn, makẹni ndị ile e bu ọpịa sikọ d'a gha ọpịa la.

⁵³ I ro ni asa m ẹka rịọ Nẹdi m, o ye m ndị mmọn-ozi agha karị itu agha uku mmẹbụọ ozigbo?

⁵⁴ Kanị, m mẹ ẹ, nanị kẹ w'a dọn mẹzu Ẹkụkwọ-nsọ hụn ku n'o k'a rị ẹrịra?”

⁵⁵ Ogẹn hụ kẹ Jizọsị gi sị igunrun hụ, “M wụdẹ nwan onyẹ-ohin ra — ụnụ gi bu ọpịa-agha lẹ ẹgbe d'a nwụnrụn m? Ụhụọhịn ile kẹ m'a nọdị alị imẹ Ụlọ-nsọ a kuzi, ụnụ anwụnrụnnị m.

⁵⁶ Kanị, ihiẹn ndịnị ile rị nwan e mẹ kẹni ihiẹn ndị-amụma ku imẹ Ẹkụkwọ-nsọ mẹzu.” Ya kẹ ndị nsọnmazụụn a ile nọ la a tọ, gbama ọsọ.

Imẹ Ọgwa Kayafasị Onyẹ-isi Nchụn-ẹjan

⁵⁷ Ya ndị nwụnrụn Jizọsị nọ we ẹ jẹnni onyẹ-isi nchụn-ẹjan wụ Kayafasị imẹ ọgwa a, ebe ndị-nkuzi Iwu lẹ ndị-isi nọ rị e zu.

⁵⁸ Pita sọn ẹ d'e ru ọgwa onyẹ-isi nchụn-ẹjan hụ, kanị ẹgbata wẹ te e te. E ru w'ẹ, Pita nkẹ nọ banye, sọn ndị-nche nọdị alị kẹn'ọ hụn isi ihiẹnni.

⁵⁹ Ogẹnni, ndị-isi nchụn-ẹjan lẹ Ndị-isi Nkịkwama ile hụ a chọ ihiẹn w'e gi buokin Jizọsị ọnụ kẹni wẹ gbu ẹ;

⁶⁰ kanị ahụnnị wẹ ihiẹn w'e kwọndọn ẹka, ọsụọn'a nị ndị bu ọda pụha ọshẹri-ntụ. O tebe, mmadụ ẹbụọ nọ pụha,

⁶¹ sị, “Onyẹni sị, ‘M jẹnkọ d'a saẹka tikpọ Ụlọ-nsọ Osolobuẹ, gi akpọhịn ẹtọ tụnkin ẹ.’ ”

⁶² Ya onyẹ-isi nchụn-ẹjan nọ lihi, sị, “Y'e nwọn ihiẹn y'a shịarị? Kị wụ ihiẹn ndịnị wẹ rị a sị nị ya k'i mẹ?”

⁶³ Kanị Jizọsị a gba nkịtịn. Onyẹ-isi nchụn-ẹjan nọ sị a, “E gi m ẹfan Osolobuẹ rị ndụn sị ị gwa ẹnyi omẹni ịyụ wụ Kraịstị Nwa Osolobuẹ.”

⁶⁴ Jizọsị nọ sị a, “Y'e kugụọ a. M rị a gwa ụnụ ile nị ogẹnni ghafegụ, ụnụ sikọ d'a hụn Nwa nke Ịhịan ebe ọ nọdị alị ẹka-nni Osolobuẹ Onyẹ nwọn ikẹn ile, hụnzị a k'ọ rị elu orukpu o gi lala.”

⁶⁵ Ya onyẹ-isi nchụn-ẹjan nọ tika ẹwuru ye enwẹn olu, yi, “O kuọlẹ arụ! Kị ẹnyi rị a chọzịnị ndị ọshẹri? Ụnụ a nụgụọ nwan arụnị o ku!

⁶⁶ Kị ụnụ ku nwan?” Wẹ nọ za, sị, “Ikpe a magụọ a; o jẹnkọ d'a nwụn!”

⁶⁷ Wẹ nọ jụ a ẹsọn ihun, fịan a ihiẹn, ndị hụ imẹ wẹ a ma a ọra,

⁶⁸ wẹ hụ a sị a, “Ịyụ hụn sị nị ị wụ Kraịstị, bu ni ẹnyi amụma: onyẹ fịan ị ihiẹn?!”

Pita A Ghọrị, Sị Ọ Marịnzị Jizọsị

⁶⁹ Ogẹnni, Pita nọdị alị ezi ọgwa. Ya nwagbọọ ohu wụ odibo nọ bịa d'e kunrun ẹ, sị a, “Ịyụ nwẹn rịzị imẹ ndị wẹ lẹ Jizọsị onyẹ Galili wị.”

⁷⁰ Kanị Pita nọ ghọrị idẹnya wẹ ile, sị, “Amarịn m ihiẹn ị rị e ku!”

⁷¹ Ọ pụ ebẹhụ, shi ẹhụ ọnụ-mgbọn ezi-ọgwa hụ, nwagbọọ ọzọ wụ odibo a hụn a, ọ nọ sị ndị turu ebẹhụ, “Onyẹni lẹ Jizọsị onyẹ Nazarẹtị wị.”

⁷² Ọ ghọrịzị, kundẹ Osolobuẹ, sị, “Amarịndẹ m okẹnnyẹ hụ!”

⁷³ Ọ nọbezi ẹkẹrẹ, ndị turu ebahụn nọ bịa d'e kunrun Pita, sị a, “Yụ lẹ wẹ wị ezioku-ezioku, asụsụ ị e sepụhagụọ ị.”

⁷⁴ Ya Pita nọ kunmẹ Osolobuẹ, sị n'ọ marịn okẹnnyẹ hụ. Ozigbo hụ, ọkpa nọ kwan.

⁷⁵ Ya Pita nọ nyanhan oku Jizọsị ku, sị, “Ọkpa gini d'a kwan, i jẹnkọ d'a ghọrị mgbe ẹtọ nị y'a marịn m.” Ọ nọ shi ezi d'a kwan ezigbo ẹkwan.