Matiu 25 - Ika

Isi Nke Isẹn-kwasị-ọgụn Ịgbagba Nwọn Uche Lẹ Ịgbagba Nzuzu

¹ “Ogẹn ikpanzụụn ahụn, ihiẹn jẹnkọ d'e mẹ imẹ Alị-eze elu-igwee jẹnkọ d'a nọ kẹ ebe ịgbagba iri nọ weri ukpẹ wẹ jẹnmẹ d'a nabanhan okẹnnyẹ lala d'a gba ẹkụkwọ.

² Mmadụ isẹn imẹ wẹ nwọn uche, mmadụ isẹn wụ ndị nzuzu.

³ Makẹni, kẹ ndị nzuzu hụ weri ukpẹ wẹ, ewerini wẹ mirin-ukpẹ cheni hụn rị imẹ ukpẹ wẹ,

⁴ kanị ndị hụ marịn ihiẹn gi ihiẹn gbarị mirin-ukpẹ cheni hụn rị imẹ ukpẹ wẹ.

⁵ “Okẹnnyẹ hụ rị a gba ẹkụkwọ abịanị ẹgwa, ụran nọ tụma wẹ ile, wẹ nọ ranhịn.

⁶ O ru imẹ odinẹ-abalị, oro nọ pụ, ‘Okẹnnyẹ jẹnkọ d'a gba ẹkụkwọ a bịa-oo! D'e kunrunn'ẹ!’

⁷ Ya kẹ ịgbagba ndị hụ ile nọ lihi, fishi ukpẹ wẹ elu.

⁸ Ndị nzuzu hụ nọ sị ndị hụ marịn ihiẹn, ‘Yebeye ni ẹnyi mirin-ukpẹ, nị ukpẹ ẹnyi rị e tinyụn.’

⁹ Kanị, ndị hụ marịn ihiẹn nọ sị wẹ, ‘Mba! O zukọ ẹnyi lẹ ụnụ; ọ ka mma nị ụnụ jẹnburu ndị e ren'ẹ d'e ṅọnrin nke ụnụ.’

¹⁰ Ogẹn wẹ gi jẹnmẹgụ d'e ṅọnrin mirin-ukpẹ, okẹnnyẹ hụn jẹnkọ d'a gba ẹkụkwọ nọ banhan; ndị hụ kwademẹni nọ sọn ẹ banye d'e ri oriri agbamẹkụkwọ hụ, wẹ nọ gụnma ụzọ.

¹¹ Omẹgụ, ịgbagba isẹn hụ họdụnị nọzị pụha, hịma a, ‘Diọkpa! Diọkpa! Kpọpụnị ẹnyi ụzọ!’

¹² Kanị ọ nọ sị, ‘Nị m gwakwọ ụnụ ezioku, amarịn m ndị ụnụ wụ.’

¹³ “Jizọsị a tagụ iluni, ọ nọ sị wẹ: E che ni nwan nche, makẹni ụnụ amarịn ụhụọhịn mọbụ ogẹn o sikọ d'a wụ.

Ihiẹn Jesu Gi Idibo Ẹtọ Kuzi

¹⁴ “Ihiẹn jẹnkọ d'e mẹ imẹ Alị-eze elu-igwee nọ kẹ ebe okẹnnyẹ ohu chọ n'o jẹn alị-ịhịan nọ kpọ ndị idibo ẹ, we ihiẹn o nwọn che wẹ ẹka.

¹⁵ O ye onyẹ ohu egho jun ẹkpa isẹn, ye hụn-ẹbọ egho jun ẹkpa ẹbụọ, ye hụn mẹ wẹ ẹtọ egho jun ẹkpa ohu. Kẹ ikẹn onyẹ han k'o ye ẹ. Ya ọ nọ jẹnmẹ ebe o jẹnkọ.

¹⁶ “Hụn o ye hụn jun ẹkpa isẹn nọ gi ẹ zụma afịa, nwọnhẹnzi hụn jun ẹkpa isẹn chen'ẹ.

¹⁷ Ẹrịra kẹ onyẹ o ye hụn jun ẹkpa ẹbụọ dọnzi nwọnhẹn ẹkpa ẹbụọ chen'ẹ.

¹⁸ Kanị onyẹ o ye hụn jun ẹkpa ohu nọ jẹn d'e gu alị, zuemẹ egho di-nwọnn'ẹ ye ẹ.

¹⁹ “O tebe, di-nwọnni wẹ nọ lụa; ọ nọ bịa nị wẹ ku kẹ wẹ jẹn.

²⁰ Hụn o ye hụn jun ẹkpa isẹn nọ wẹhẹzi egho jun ẹkpa isẹn chen'ẹ. Ọ nọ sị, ‘Diọkpa, egho jun ẹkpa isẹn k'i ye m; lee ẹ, e nwọnhẹnzi m egho jun ẹkpa isẹn chen'ẹ.’

²¹ “Di-nwọnn'ẹ nọ sị, ‘Ezigbo odibo wẹ gi e dọn ẹnya! Y'e kwọndọngụọ ihiẹn mẹ ẹkẹrẹ ọhụnma. M jẹnkọ d'e ye i ihiẹn bu ọda lepụ ẹnya. Bịa d'e sọn di-nwọnn'i ghọghọ.’

²² Onyẹ hụ o ye egho jun ẹkpa ẹbụọ nọzị bịa, sị, ‘Diọkpa, egho jun ẹkpa ẹbụọ k'i ye m, lee ẹ, e nwọnhẹngụọ m egho jun ẹkpa ẹbụọ chen'ẹ.’

²³ Di-nwọnn'ẹ nọ sị a, ‘Y'e mẹyekẹ, ezigbo odibo wẹ gi e dọn ẹnya; y'e kwọndọngụọ ihiẹn mẹ ẹkẹrẹ ọhụnma. M jẹnkọ d'e ye i ihiẹn bu ọda lepụ ẹnya. Bịa d'e sọn di-nwọnn'i ghọghọ.’

²⁴ “Onyẹ ahụn o ye ẹkpa egho ohu nọ bịa, sị, ‘Diọkpa, a marịnghọ m nị obi i e zekẹ, n'ị y'a ghọrị ihiẹn i kụnlẹni, e ri ihiẹn ị rụnlẹni.

²⁵ Egun i rị a tụ m; ya m nọ jẹn d'e zuemẹ egho i ye m imẹ alị; lee ẹ, weri ihiẹn i.’

²⁶ Kanị di-nwọnn'ẹ nọ sị a, ‘Eje-odibo, onyẹ nzụnzụn! Y'a marịnghọ nị m'a ghọrị ihiẹn m kụnlẹni, e ri ihiẹn m rụnlẹni, ẹlẹ ịya?

²⁷ Nkẹ y'e bu egho m cheni m imẹ ụlọ egho, m lụaha, kẹni m weri isi egho m lẹ ọmụnịnwa rịn'a.

²⁸ Napụn'a nwan egho hụ weye hụn nke ẹ jun ẹkpa iri.

²⁹ Makẹni onyẹ hụn nwọn hụn o gi kẹ wẹ sikọ d'e yecheni, nke ẹ a karị ẹka. Kanị onyẹ hụn nwọnlẹni hụn o gi, a napụdẹ w'a ẹkẹrẹ o nwọn.

³⁰ Tụ nị nwan odibo ẹti hụ ye ishi rị ezi, ebe ịhịan jẹnkọ d'a nọ a kwan ẹkwan, a ta nkwẹnrẹn-eze.’

Okinkin-ikpe Ikpanzụụn

³¹ “Ogẹn Nwa nke Ịhịan jẹnkọ d'e gi gi ọghọ-nze ẹ bịa, ya lẹ ndị mmọn-ozi ile, o sikọ d'e weri oche okẹn ukpo ẹ.

³² Wẹ sikọ d'e wẹhẹn'ẹ alị ile; ọ họ wẹ ohu-ohu kẹ onyẹ e du anụ dọn a họpụha atụnrụn wẹ lẹ ewu rị.

³³ O jẹnkọ d'e dọnmẹ atụnrụn ndị hụ ẹka-ihiẹn ẹ, dọnmẹ ewu ndị hụ ẹka-ekpẹn ẹ.

³⁴ “Ogẹn hụ, Eze wụ Nwa nke Ịhịan, jẹnkọ d'a sị ndị hụ rị a ẹka-nni, ‘Bịa nị, ndị Nẹdi m gọzi, weri ni Alị-eze hụ wẹ kwademẹni ụnụ kete wẹ gbelẹ iyetọ ụwa.

³⁵ Makẹni, kẹ ẹgụn rị a gụn m, ụnụ ye m ihiẹn-oriri, ẹgụn-mirin a gụn m, ụnụ e ye m mirin, a wụ m otumunyẹ, ụnụ a nabanhan m,

³⁶ a gba m ọtọ, ụnụ e ye m ẹkwa; emu a kụ m, ụnụ e lepụ m ẹnya; kẹ m rị ụlọ-ngan, ụnụ a bịa d'a hụn m.’

³⁷ Ogẹn hụ, ndị ezi-omumẹ ahụn jẹnkọ d'a za a, sị, ‘Di-nwọnni-ẹnyi, elee ogẹn kẹ ẹnyi gi hụn ị kẹ ẹgụn rị a gụn ị, ẹnyi nọ ye i ihiẹn-oriri mọbụ kẹ ẹgụn-mirin rị a gụn ị, ẹnyi nọ ye i mirin?

³⁸ Elee ogẹn kẹ ẹnyi gi hụn ị n'ị wụ otumunyẹ, ẹnyi nọ nabanhan ị mọbụ hụn ị n'ị gba ọtọ, ẹnyi nọ yimẹ i ẹkwa?

³⁹ Elee ogẹn kẹ ẹnyi gizi hụn nị emu rị a kụ ị mọbụ n'ị rị ụlọ-ngan, ẹnyi nọ bịa d'a hụn ị?!’

⁴⁰ Eze sikọ d'a za wẹ, sị, ‘M rị a gwa ụnụ ezioku, ebe ụnụ nọ mẹni onyẹ kachanrịndẹ ntịn imẹ umunẹ m ndịnị ya, mmẹ kẹ ụnụ mẹn'ẹ!’

⁴¹ “Ogẹn hụ, o sikọ d'a sị ndị hụ rị ẹka-ekpẹn ẹ, ‘Pụnị nị m ebeni, ndị wẹ bụ ọnụ! Shi ni ọkụn itẹbitẹ hụn wẹ kwademẹni Ekwensụ lẹ ndị mmọn-ozi ẹ!

⁴² Makẹni kẹ ẹgụn gụn m, ụnụ eyeni m ihiẹn-oriri; ẹgụn-mirin a gụn m, ụnụ eyeni m mirin;

⁴³ a wụ m otumunyẹ, ụnụ anabanhannị m; a gba m ọtọ, ụnụ eyimẹni m ẹkwa; ogẹn emu gi kụ m lẹ ogẹn m gi rị ụlọ-ngan, ụnụ abịanị d'a hụn m.’

⁴⁴ “Wẹ nwẹn k'a zazị a, ‘Di-nwọnni-ẹnyi, elee ogẹn kẹ ẹnyi gi hụn ị kẹ ẹgụn rị a gụn ị mọbụ kẹ ẹgụn-mirin rị a gụn ị mọbụ k'ị wụ otumunyẹ mọbụ k'ị gba ọtọ mọbụ kẹ emu rị a kụ ị mọbụ k'ị rị ụlọ-ngan ẹnyi nọlẹni yen'i ẹka?’

⁴⁵ O jẹnkọ d'a za wẹ, sị, ‘Ezioku kẹ m rị a gwa ụnụ, ebe ụnụ nọlẹni mẹni onyẹ hụn kachanrịndẹ ntịn imẹ ndịnị ya, ụnụ emẹnini m'ẹ.’

⁴⁶ Ogẹn ahụn, e shi wẹ d'a tama afụnfụn itẹbitẹ, kanị ndị ezi-omumẹ e shi ndụn itẹbitẹ.”