Matiu 24 - Ika

Isi Nke Ẹnọ-kwasị-ọgụn Jizọsị E Ku Ẹ Nị Wẹ Jẹnkọ D'e Tikpọ Ụlọ-nsọ

¹ Jizọsị nọ gha Ụlọ-nsọ pụ; ọ pụkọ, ndị nsọnmazụụn a nọ bịa d'e kunrun ẹ, a ghọsịsọnmẹ ẹ ụlọ rị ichẹn-ichẹn rị Ụlọ-nsọ.

² Kanị Jizọsị nọ sị wẹ, “Ụnụ a hụn ihiẹn ndịnị? M rị a gwa ụnụ ezioku, onwọnni ogbe ọmụma ohu jẹnkọ d'a họdụ elu ibe ẹ; wẹ k'a kụtuchanrịn wẹ ile.”

Nsọngbu Lẹ Ukpokpo Lalanị

³ Jizọsị nọdị alị elu Ugu Olivu, ndị nsọnmazụụn a nọ bịa d'e kunrun ẹ ebẹhụ ya sụọ nọdị, sị, “Gwa ẹnyi, elee ogẹn kẹ ihiẹn ndịnị jẹnkọ d'e mẹ? Kị wụ ahịma ọbịbịa ị lẹ ahịma ọgụgụ-ogẹn?”

⁴ Jizọsị nọ za wẹ, sị, “Kpachanpụ nị ẹnya makẹ wẹ gha e dufie ụnụ;

⁵ makẹni, ndị bu ọda jẹnkọ d'e gi ẹfan m bịa, a sị, ‘Mmẹ wụ Kraịstị,’ gi ẹ dufie ndị bu ọda.

⁶ Ụnụ jẹnkọ d'a nụsọnmẹ nị agha rị, nụsọnmẹ nị agha jẹnkọ d'a rị; ka anịlẹ ni egun tụ ụnụ, makẹni ihiẹn ndịnị jẹnkọ d'e mẹ bụ ọgụgụ-ogẹn eke ru.

⁷ “Alị sikọ d'a lụsọn alị; alị-eze a lụsọn alị-eze, ụnwụn lẹ alị-ọmahihie jẹnkọ d'a rị ebe rị ichẹn-ichẹn.

⁸ Kanị, wẹ ile nọhụ kẹ ebe imẹ nọhụ mẹmẹ okpoho.

⁹ “Ogẹn hụ, wẹ k'e mẹshi ụnụ ikẹn, gbudẹ ụnụ; ize ụnụ jẹnkọ d'a ban alị ndị ọzọ makẹni ụnụ rị a za ẹfan m.

¹⁰ Ndị bu ọda jẹnkọ d'a danpụ imẹ okukwe, e re ibe wẹ, e ze ize ibe wẹ.

¹¹ Ndị amụma-ntụ bu ọda jẹnkọ d'a pụha, dufie ndị bu ọda.

¹² Ufiri nị njọ jẹnkọ d'a barahị, ihiẹn-ọsụsụọ ndị bu ọda jẹnkọ d'a jụ oyi.

¹³ Kanị onyẹ hụn din ndidin ru isi ẹ kẹ nzụọpụha jẹnkọ d'e ru ẹka.

¹⁴ Wẹ jẹnkọ d'e zigbarị elu-ụwa ile oziọmanị, oziọma Alị-eze, kẹn'ọ wụrụ ọshẹri imẹ alị ile; ogẹn hụ kẹ ọgụgụ-ogẹn e gi ru.

Arụ Hụn E Buhẹ Ntikpọ

¹⁵ “Ya wụ, ụnụ hụn arụ ahụn k'e buhẹ ntikpọ k'o turu imẹ Ebe rị nsọ nọkẹ kẹ Daniẹlụ onyẹ-amụma dọn ku (onyẹ rị a gụnnị ya ghọta a ọhụnma),

¹⁶ ndị rị Judia wẹ gbashikwọ elu ugu ndị rị ebẹhụ;

¹⁷ onyẹ rị elu ụlọ y'e hidangụkwọlẹ banyemẹzi d'e weri ihiẹn rị mmụlọ;

¹⁸ onyẹ rị ugbo, y'e kinkwọlẹ shi ụlọ n'o jẹnkọ d'e weri ẹwuru o yiye elu ẹ.

¹⁹ “Kanị o jẹnkọ d'a fụ ndị rị imẹ lẹ ndị pa nwa ẹka ọrụn ogẹn hụ!

²⁰ E mẹ ni nwan ekpere amamgbe ọsọ ụnụ a wụ ebe mirin rị e zue mọbụ Ụhụọhịn Ezumikẹn kẹni ọsọ nị ụnụ gba.

²¹ Makẹni okẹn afụnfụn jẹnkọ d'a rị, ụdị hụn rịtulẹni kete ụwa e bidọnlẹ, ụdị hụn jẹnkọlẹni d'a rịzị.

²² Omẹni ebelụanị wẹ ogẹn hụ, onwọnni onyẹ k'a wanahịnnị; kanị, Osolobuẹ k'e gi ufiri ndị Osolobuẹ họrị belụa ogẹn nsọngbu ahụn.

²³ “Ogẹn hụ, onyẹ sị ụnụ, ‘Lee Kraịstị ebeni!’ Mọbụ ‘Lee ẹ ebẹhụ,’ ekwerikwọlẹ ni.

²⁴ Makẹni, ndị kpọ enwẹn wẹ Kraịstị lẹ ndị amụma-ntụ jẹnkọ d'a pụha, rụnsọnmẹ okẹn ihiẹn-ahịma lẹ ọrụn-atụmẹnya, kẹni wẹ dufie ịhịan, dufiedẹ ndị Osolobuẹ họrị omẹni o te k'a nị wẹ mẹ.

²⁵ “A gwatọgụọkwọ m ụnụ!

²⁶ “Ya wụ, wẹ sị nwan ụnụ, ‘Lee ẹ, ọ rị imẹ atụ’, ejẹnkwọlẹ ni. Wẹ sị, ‘Lee ẹ, ọ rị mmughẹ’, ekwerikwọlẹ ni.

²⁷ Makẹni, kẹ amụma dọn a gha ọwụwa-ẹnyanwụn e be, a hụn w'a ọdịdan-ẹnyanwụn, ẹrịra kẹ ọbịbịa Nwa nke Ịhịan jẹnkọ d'a rị.

²⁸ Ebe ọwụlẹ ozun rị kẹ udele sikọ d'a nọ zu.

Ọbịbịa Nwa Nke Ịhịan

²⁹ “Hụn nsọngbu ogẹn hụ gihụ ghafegụ, ẹnyanwụn jẹnkọ d'a gba ishi, ifọn etikọzị; kokisẹ rị igwere k'a dantusọnmẹ, ikẹn ndị rị igwere k'e mẹhunmẹ.

³⁰ Ogẹn hụ kẹ ahịma Nwa nke Ịhịan k'e gi pụha igwere. Alị ile rị elu-ụwa k'a kwan ẹkwan wẹ hụn Nwa nke Ịhịan. Wẹ k'a hụn Nwa nke Ịhịan k'ọ rị orukpu igwere o gi lala, ya lẹ ikẹn lẹ ọghọ hi-ogbe.

³¹ O sikọ d'e gi okẹn opi hannị zipụ ndị mmọn-ozi ẹ ẹbamịn ẹnịnọ d'e wegbama ndị nke Osolobuẹ rị ebe ile ụwa ru.

Ihiẹn Jesu Gi Osisi Figi Kuzi

³² “Gi ni osisi figi mụnrụn ihiẹnni: Hụn agalaba a gihụ fọrịma, y'a marịn nị udu-mirin e d'e bidọn.

³³ Ẹrịrazịkwọ, ụnụ hụn ihiẹn ndịnị ile, ụnụ a marịn nị ogẹn hụ e rugụọ, n'o rugụọdẹ ọnụmụzọ.

³⁴ M rị a gwa ụnụ ezioku, agbọnị agụchanrịnkọ ihiẹn ndịnị kebe mẹzu.

³⁵ Igwere lẹ ụwa k'a gụ, kanị oku m k'a bụnrịrị.

Onwọnni Onyẹ Marịn Ụhụọhịn Mọbụ Ogẹn Jesu Lala

³⁶ “O mẹ nke ụhụọhịn o k'a wụ mọbụ ogẹn o k'a wụ ụhụọhịn hụ, onwọnni onyẹ marịnnị — kẹ ndị mmọn-ozi rị elu-igwee kẹ mmẹ wụ Nwa-Chuku; Chuku-Nẹdi sụọ marịn.

³⁷ Ọbịbịa Nwa nke Ịhịan jẹnkọ d'a nọ kẹ ihiẹn mẹ ogẹn Nụa.

³⁸ O k'a rị k'ọ rị ogẹn hụ nị okẹn mirin hụ d'a bịa: wẹ hụ e ri a ra, a lụ di lẹ nwunyẹ, d'e ru ụhụọhịn Nụa banye ụgbọ-mirin hụ;

³⁹ amarịn wẹ ihiẹn rị e mẹni d'e ru ni okẹn mirin hụ a bịa, gbupụ wẹ ile. Ẹrịra kẹ ọbịbịa Nwa nke Ịhịan jẹnkọ d'a rị.

⁴⁰ Ogẹn hụ, ikẹnnyẹ ẹbụọ jẹnkọ d'a rị imẹ ugbo, e weri wẹ onyẹ ohu la ohu tọ;

⁴¹ ikpoho ẹbụọ k'a gha a kwọ ihiẹn, e weri wẹ ohu la ohu tọ.

⁴² We ni nwan ẹnya ru alị, makẹni ụnụ amarịn ụhụọhịn Di-nwọnni ụnụ lala!

⁴³ Marịnkwọ nị nị omẹni onyẹ nwọn ụlọ te marịn ogẹn ohin gi lala iwe ẹ imẹ abalị, nkẹ o che nche, o ke nị a gbukpọ ụlọ a, banhan.

⁴⁴ Ụnụ nwẹn, kwademẹkwọ nị, makẹni mmẹ wụ Nwa nke Ịhịan lala ogẹn ụnụ tụlẹni ẹnya.”

Odibo Furu Wẹ Gi E Dọn Ẹnya Ra Hụn Furulẹni?

⁴⁵ “Onyẹ wụ nwan odibo hụ furu nị wẹ gi ẹ dọn ẹnya, odibo ahụn marịn ihiẹn, hụn di-nwọnn'ẹ sị lepụn'a ezi-lẹ-ụlọ a ẹnya, e ye wẹ ihiẹn-oriri ogẹn furuni?

⁴⁶ O jẹnkọ d'a rịnị odibo hụ mma omẹni di-nwọnn'ẹ a lụa, hụn a n'ọ hụ e mẹ ihiẹn ndị hụ.

⁴⁷ M rị a gwa ụnụ ezioku, o sikọ d'e bu ihiẹn ẹ ile che odibo hụ ẹka lepụ ẹnya.

⁴⁸ Kanị, omẹni eje-odibo rọ, n'ọ sị enwẹn ẹ, ‘Di-nwọnni m alụakọ ẹgwa,’

⁴⁹ o gbumẹ idibo ibe ẹ ili, e du ndị manya e ri, a ra,

⁵⁰ di-nwọnn'ẹ jẹnkọ d'a lụa ụhụọhịn ọ tụlẹni ẹnya a lẹ ogẹn ọ marịnlẹni.

⁵¹ O k'a jakịka a, bu ẹ che ebe ndị ihunnaị rị, ebẹhụ ịhịan jẹnkọ d'a nọ a kwan ẹkwan, a ta nkwẹnrẹn-eze.